Follow us on        

ठाणे: बदलापूर आणि वांगणी रेल्वे स्थानकांच्या दरम्यान ‘कासगाव’ (चामटोली) येथे नवीन रेल्वे स्थानक उभारण्याच्या हालचालींना वेग आला आहे. रेल्वे प्रशासनाने यासंदर्भात प्रस्ताव मागविला असून, रेल्वेमंत्री अश्विनी वैष्णव यांनी या नवीन स्थानकापासून नवी मुंबईतील कामोठेपर्यंत थेट रेल्वे मार्ग टाकण्यासाठी सविस्तर प्रकल्प अहवाल (DPR) तयार करण्याचे निर्देश दिले आहेत. हा प्रकल्प पूर्ण झाल्यास बदलापूर परिसरातील नागरिक थेट लोकलने नवी मुंबईला जो़डले जातील.

​वाढत्या प्रवासी संख्येवर उपाय आणि टर्मिनसचा दर्जा

बदलापूर आणि आसपासच्या भागात नागरी वस्ती झपाट्याने वाढत असल्याने रेल्वे प्रवाशांची संख्या मोठी आहे, ज्यामुळे सध्याचा प्रवास जीवघेणा ठरत आहे. या पार्श्वभूमीवर, कुळगाव बदलापूर नगर परिषदेचे माजी नगराध्यक्ष राम पातकर यांनी रेल्वेमंत्र्यांची भेट घेऊन बदलापूर स्थानकाला ‘टर्मिनस’चा दर्जा देण्याची मागणी केली. या मागणीला रेल्वेमंत्र्यांनी सकारात्मक प्रतिसाद दिला असून संबंधित अधिकाऱ्यांना त्याबाबतचा तांत्रिक अहवाल सादर करण्यास सांगितले आहे.

​कासगाव स्थानकाचे महत्त्व आणि प्रवाशांना दिलासा

बदलापूर शहराच्या वेशीवरील ग्रामपंचायतींमध्ये लोकसंख्या वाढत आहे, मात्र मुंबईकडे जाण्यासाठी या प्रवाशांना बदलापूर किंवा वांगणी स्थानकावर अवलंबून राहावे लागते. वांगणीतून लोकलची संख्या कमी असल्याने प्रवाशांचे हाल होतात. अशा वेळी बदलापूर आणि वांगणीच्या दरम्यान कासगाव येथे नवीन स्थानक झाल्यास स्थानिकांचा प्रवास सोपा होईल. तसेच, येथून कामोठेपर्यंत नवा मार्ग झाल्यास नवी मुंबईला जाणाऱ्या प्रवाशांचा मोठा वेळ वाचणार आहे.

​भविष्यातील सुविधा आणि वंदे भारत एक्सप्रेस

रेल्वेच्या तिसऱ्या आणि चौथ्या मार्गिकेचे काम पूर्ण झाल्यानंतर बदलापूर स्थानकात अतिरिक्त फलाट उपलब्ध होणार आहेत. यामुळे बदलापूर ते पुणे दरम्यान ‘वंदे भारत एक्सप्रेस’ सुरू करण्याबाबत अभ्यास करण्याच्या सूचनाही रेल्वेमंत्र्यांनी दिल्या आहेत. तसेच, फलाटांची लांबी वाढल्यामुळे भविष्यात अनेक लांब पल्ल्याच्या एक्सप्रेस गाड्यांना बदलापूर स्थानकात थांबा मिळण्याची शक्यता निर्माण झाली असून, रेल्वे व्यवस्थापकांना या सर्व बाबींची प्रत्यक्ष पाहणी करण्याचे आदेश देण्यात आले आहेत.

   Follow us on        

अंबरनाथ: मुंबई महानगर प्रदेश विकास प्राधिकरण (MMRDA) ने २०२६-२७ च्या अर्थसंकल्पात कल्याण लोकसभा मतदारसंघातील वाहतूक आणि पायाभूत सुविधांसाठी तब्बल ४,८९७.१९ कोटी रुपयांची तरतूद जाहीर केली आहे. उपमुख्यमंत्री एकनाथ शिंदे यांच्या अध्यक्षतेखाली सादर झालेल्या या अर्थसंकल्पात मेट्रो मार्ग ५ (ठाणे-भिवंडी-कल्याण) आणि मेट्रो मार्ग १४ (कांजूरमार्ग-बदलापूर) या प्रकल्पांना विशेष प्राधान्य देण्यात आले आहे. या निर्णयामुळे कल्याण, अंबरनाथ आणि बदलापूर परिसरातील लाखो नागरिकांना मुंबईशी थेट, वेगवान आणि आरामदायी कनेक्टिव्हिटी मिळणार असल्याचे स्पष्ट झाले आहे.

मेट्रो मार्ग ५ अंतर्गत ठाणे ते भिवंडी ते कल्याण असा २४.९ किमी लांबीचा आणि १५ स्थानकांचा मूळ मार्ग असून, त्याचा विस्तार कल्याणहून दुर्गाडी, उल्हासनगर, अंबरनाथ (मेट्रो ५अ) पर्यंत करण्याचा निर्णय घेण्यात आला आहे. या प्रकल्पासाठी मेट्रो ५ साठी १,३०९.३० कोटी रुपये तर मेट्रो ५अ साठी १८३.३५ कोटी रुपयांची तरतूद करण्यात आली आहे. या विस्तारामुळे अंबरनाथ शहर थेट मेट्रो नेटवर्कशी जोडले जाणार असून, उल्हासनगरमार्गे चिखलोलीपर्यंत कनेक्टिव्हिटी मिळणार आहे. परिणामी, लोकल रेल्वेतील प्रचंड गर्दीतून सुटका होऊन नागरिकांना वातानुकूलित मेट्रोमधून सुखकर प्रवासाचा पर्याय उपलब्ध होणार आहे.

मेट्रो मार्ग १४ हा कांजूरमार्ग ते बदलापूर दरम्यान सुमारे ३८ ते ४५ किमी लांबीचा प्रस्तावित मार्ग असून तो देशातील सर्वात लांब मेट्रो मार्गांपैकी एक ठरणार आहे. या मार्गावर कांजूरमार्ग, विक्रोळी, शिळफाटा, महापे, घणसोली, ऐरोली, तुर्भे, दिघा, अंबरनाथ आणि बदलापूर अशी महत्त्वाची स्थानके असणार आहेत. या प्रकल्पासाठी ५०० कोटी रुपयांची तरतूद करण्यात आली आहे. काटई नाका ते बदलापूरपर्यंतचे काम प्राधान्याने हाती घेतले जाणार असून, या मार्गामुळे बदलापूर आणि अंबरनाथला मुंबईच्या पूर्व उपनगरांशी थेट जोडणी मिळेल. सध्या रस्त्याने १.५ ते २ तास लागणारा प्रवास केवळ ४० ते ४५ मिनिटांत पूर्ण होण्याची शक्यता आहे.

या दोन्ही प्रकल्पांमुळे कर्जत-कसारा लोकलमधील गर्दी आणि रस्त्यावरील वाहतूक कोंडी मोठ्या प्रमाणात कमी होण्याची अपेक्षा आहे. प्रवास वेळेत ३० ते ४० टक्क्यांनी घट होऊ शकते. मध्यमवर्गीय चाकरमान्यांसाठी हा मोठा दिलासा ठरणार असून, रोजच्या प्रवासासाठी एसी मेट्रोचा पर्याय उपलब्ध होणार आहे. तसेच बदलापूरच्या निसर्गरम्य परिसरात आणि अंबरनाथच्या औद्योगिक वसाहतीत गुंतवणूक वाढून रिअल इस्टेट आणि स्थानिक उद्योगांना चालना मिळेल.

हे सर्व प्रकल्प २०३० पर्यंत पूर्णत्वास जाण्याची शक्यता व्यक्त करण्यात येत आहे. राज्य सरकार आणि MMRDA च्या या महत्त्वपूर्ण निर्णयामुळे कल्याण-डोंबिवली-अंबरनाथ-बदलापूर पट्ट्यातील विकासाला नवी गती मिळणार असून, मुंबई महानगर प्रदेश अधिक सुसंगत, आधुनिक आणि वेगवान होण्याच्या दिशेने महत्त्वाचे पाऊल उचलले गेले आहे.

   Follow us on   

बदलापूर: मध्य रेल्वेच्या बदलापूर स्थानकात धावती ट्रेन पकडण्याच्या प्रयत्नात आज एका महिलेला आपला जीव गमवावा लागल्याची हृदयद्रावक घटना घडली आहे. या अपघाताचे अंगावर काटा आणणारे सीसीटीव्ही फुटेज समोर आले असून, यामध्ये गाडी फलाटावरून सुटत असताना ती पकडताना महिलेचा तोल गेल्याचे स्पष्ट दिसत आहे. मात्र, या अपघातानंतर रेल्वेच्या ढिसाळ नियोजनावर पुन्हा एकदा प्रश्नचिन्ह उपस्थित झाले आहे.

​नेमकी घटना काय?

​सकाळच्या गर्दीच्या वेळी (Peak Hours) बदलापूर स्थानकावर ही घटना घडली. समोर आलेल्या सीसीटीव्ही व्हिडिओनुसार, लोकल फलाटावरून वेग घेत होती. त्याच वेळी या महिलेने डब्यात चढण्याचा प्रयत्न केला, परंतु तिचा पाय घसरला आणि ती थेट रेल्वे आणि फलाट यांच्यातील फटीत पडली. उपस्थित प्रवाशांनी आरडाओरड करेपर्यंत आणि गाडी थांबेपर्यंत खूप उशीर झाला होता. गंभीर जखमी झालेल्या या महिलेचा जागीच मृत्यू झाला

अपघाताला जबाबदार कोण? 

​बदलापूर रेल्वे स्थानकावरील या दुर्दैवी अपघाताकडे पाहिल्यास, प्रथमदर्शनी धावती गाडी पकडण्याचा प्रयत्न केल्यामुळे ती महिलाच याला जबाबदार असल्याचे भासते. मात्र, या अपघाताला केवळ वैयक्तिक चूक मानणे तांत्रिकदृष्ट्या सोपे असले, तरी त्यामागील ईतर कारणांकडे दुर्लक्ष करून चालणार नाही. गेल्या काही दिवसांपासून मध्य रेल्वेच्या विस्कळीत नियोजनाचा मोठा फटका सर्वसामान्य प्रवाशांना बसत आहे. बदलापूर ते दादर हा साधारण तासाभराचा प्रवास आता चक्क दीड ते पावणेदोन तास घेत आहे. सकाळी नोकरी-व्यवसायासाठी बाहेर पडणाऱ्या प्रवाशांवर कामाच्या ठिकाणी वेळेत पोहोचण्याचे प्रचंड दडपण असते आणि रेल्वेच्या ‘लेट-लतीफी’मुळे हे दडपण अधिकच वाढते. याच मानसिक तणावातून प्रवासी जीव धोक्यात घालून धावती गाडी पकडण्याचा धोका पत्करतात.

​या परिस्थितीला रेल्वेचे विसंगत प्राधान्यक्रम मोठ्या प्रमाणावर कारणीभूत आहेत. सकाळी जेव्हा नोकरदार वर्गाची सर्वाधिक गर्दी असते (पीक अवर्स), तेव्हा प्रशासनाकडून लांब पल्ल्याच्या एक्सप्रेस गाड्यांना प्राधान्य दिले जाते. बदलापूरहून निघालेली लोकल गाडी ठाण्यापर्यंत वेळेत पोहोचते, परंतु त्यानंतर फास्ट ट्रॅकवर एक्सप्रेस गाड्यांची रांग असल्याने लोकलचा वेग बैलगाडीसारखा होतो. जलद मार्ग पूर्णपणे ‘जाम’ झाल्यामुळे लोकल गाड्या रखडतात.

हे रोजचेच झाले असल्याने कामावर वेळेवर पोहोचण्यासाठी आणि लेट मार्क वाचवण्यासाठी बहुतेक जणांना आता आपल्या नेहमीच्या गाडी आधी अर्धा पाउण तासतास पूर्वीची गाडी पकडावी लागत आहे. प्रवाशांची खासकरून महिला वर्गाची जी आपली घरची कामे आटोपून नोकरी करतात त्यांची खूपच मोठी धावपळ होत आहे. अशा धावपळीत गाडी पकडताना असे अपघात होत आहेत.

रेल्वे प्रशासनाने यावर लवकरात लवकर याकडे लक्ष देवून गाड्यांचे लेटमार्क कमी करावेत अशी मागणी प्रवाशांकडून होत आहे.

अपघाताचा सीसीटीव्ही व्हिडिओ 👇

   Follow us on   

बदलापूर: दोन चिमुकल्यांच्या अत्याचार प्रकरणी संतप्त पालक आणि बदलापूरकरांनी आंदोलकांनी साडेदहाच्या सुमारास बदलापूर रेल्वे स्थानकात ठिय्या मांडला. त्यामुळे मुंबईहून येणारी आणि मुंबईकडे जाणारी अशा दोन्ही रेल्वे सेवेला त्याचा फटका बसला आहे.

मंगळवारी सकाळी साडेसहा वाजल्यापासून बदलापूर पूर्व येथील आदर्श शाळेबाहेर पालक आणि नागरिकांनी आंदोलन सुरू केले होते. हे आंदोलन आक्रमक रूप घेत असतानाच यातील काही आंदोलकांनी आपला मोर्चा बदलापूर रेल्वे स्थानकाकडे वळवला. साडेदहा वाजण्याच्या सुमारास आंदोलकांनी मुंबईकडे जाणारी आणि मुंबईहून येणारी अशी दोन्ही रेल्वे सेवा बंद पाडली. रेल्वे रुळावर आंदोलक बसल्याने एकाच गोंधळ उडाला त्यामुळे लोकल वाहतूक ठप्प झाली. अकरा वाजेपर्यंत पोलीस आणि रेल्वे सुरक्षा बल आंदोलकांना समजावण्याचा प्रयत्न करत होते. मात्र आंदोलक आरोपीच्या फाशीची मागणी करत घोषणाबाजी करत आहेत.

   Follow us on        

बदलापूर दि. २५ एप्रिल : बदलापुर आणि अंबरनाथ येथील नागरिकांसाठी एक महत्त्वाची बातमी आहे. बदलापूर आणि अंबरनाथ शहराला पाणीपुरवठा करणाऱ्या उल्हास नदीवरील बॅरेज जलशुद्धीकरण केंद्रात उद्या शुक्रवारी नवीन पंपिंग यंत्रणा आणि विद्युत पुरवठा सुधारणा करण्याच्या कामासाठी १२ तास पाणीपुरवठा बंद ठेवण्यात येणार आहे. त्यामुळे शुक्रवार २६ एप्रिल सकाळी ८ ते रात्री ८ वाजेपर्यंत पाणीपुरवठा पूर्णतः बंद राहील. तसेच शनिवारी कमी दाबाने पाणीपुरवठा होण्याची शक्यता आहे. त्यामुळे बदलापूर आणि अंबरनाथ शहरातील नागरिकांना दोन दिवस पाणीटंचाईचा सामना करावा लागणार आहे.

गेल्याच आठवड्यात वीज पुरवठा खंडित झाल्याने बदलापूर आणि अंबरनाथ शहरातील पाणीपुरवठ्यावरही मोठा परिणाम झाला होता. त्यात तांत्रिक बिघाडामुळे दोन दिवस अंबरनाथ आणि बदलापूर या दोन्ही शहरांमध्ये नागरिकांना पाणी टंचाईचा सामना करावा लागला होता. त्यानंतर गेल्या चार ते पाच दिवसांपासून उंच भागात कमी दाबाने पाणीपुरवठा होत असल्याच्या तक्रारी वाढल्या आहेत. त्यातच येत्या शुक्रवारी उल्हास नदी किनारच्या खरवई येथील बॅरेज जलशुद्धीकरण केंद्रात सकाळी ८ वाजल्यापासून रात्री ८ वाजेपर्यंत तातडीचे काम हाती घेण्यात येणार आहे. येथे नवी पाणी उपसा यंत्रणा आणि विद्युत पुरवठ्यातील सुधारणा करण्यासाठी आवश्यक कामे केली जाणार आहे. त्यासाठी १२ तास पाणीपुरवठा बंद ठेवला जाणार आहे. त्यामुळे या काळात अंबरनाथ आणि बदलापूर शहरात विविध ठिकाणी पाणीपुरवठा बंद असेल.