सिंधुदुर्ग: महाराष्ट्रातील अग्रगण्य दर्पण वृत्तपत्र (ISO 9001:2015 मानांकन प्राप्त) व हिंदी मराठी पत्रकार संघ यांच्या संयुक्त विद्यमाने आयोजित करण्यात येणाऱ्या पत्रकार दिननिमित्त दर्पण रत्न पुरस्कार २०२६ अंतर्गत सिंधुदुर्ग जिल्ह्यातील कासार्डे गावचे कवी ओंकार धुरी यांना काव्य क्षेत्रातील उल्लेखनीय योगदानाबद्दल दर्पण रत्न पुरस्कार २०२६ जाहीर करण्यात आला आहे.
अवघ्या २२ व्या वर्षी कवी ओंकार धुरी यांनी काव्य क्षेत्रात उल्लेखनीय ठसा उमटवला असून, लहानपणापासून कविता लेखनाची आवड जोपासत ते सातत्याने लेखन करत आहेत.
मागील वर्षी युवा कला मंच, रायगड आयोजित राज्यस्तरीय काव्य लेखन स्पर्धेत त्यांनी सिंधुदुर्ग जिल्ह्यातून प्रथम क्रमांक पटकावत आपल्या कासार्डे गावाचे नाव राज्यभर उज्वल केले होते.
त्यांच्या या साहित्यिक कार्याची दखल घेत हा राज्यस्तरीय दर्पण रत्न पुरस्कार २०२६ दि. ६ जानेवारी रोजी मान्यवरांच्या उपस्थितीत बुलढाणा येथे प्रदान करण्यात येणार आहे.
या सन्मानाबद्दल साहित्य व काव्य क्षेत्रातून तसेच सिंधुदुर्ग जिल्ह्यातून त्यांचे अभिनंदन होत आहे.
