Follow us on   

Mumbai: मुंबई उपनगरीय रेल्वेतील अपघातांचे नेमके कारण शोधण्यासाठी आणि तपासात पारदर्शकता आणण्यासाठी मध्य रेल्वेने लोकल गाड्यांच्या मोटर कॅबिनबाहेर हाय-क्वालिटी CCTV कॅमेरे बसवण्याचा महत्त्वपूर्ण निर्णय घेतला आहे. रेल्वे माहिती अधिकार कार्यकर्ते समीर झवेरी यांनी माहिती अधिकारांतर्गत (RTI) विचारलेल्या प्रश्नानंतर ही बाब समोर आली आहे.

सध्या रेल्वे रुळांवरील अपघात, आत्महत्या किंवा तांत्रिक बिघाड यांसारख्या घटनांच्या तपासासाठी केवळ मोटरमनचे विधान किंवा प्रत्यक्षदर्शींच्या साक्षीवर अवलंबून राहावे लागते, ज्यात अनेकदा विसंगती आढळतात. आता या कॅमेऱ्यांमुळे रेल्वे प्रशासनाकडे ठोस पुरावे उपलब्ध होणार असून, अपघातासाठी मोटरमन जबाबदार आहे की बाह्य घटक, हे स्पष्ट होण्यास मदत होईल. यामुळे मोटरमनवर होणारे खोटे आरोपही थांबतील. मध्य रेल्वेच्या ताफ्यातील १६४ लोकल गाड्यांपैकी १६१ मोटर कॅबिनवर हे कॅमेरे आधीच कार्यान्वित झाले असून, उर्वरित कॅमेरे बसवण्याचे काम वेगाने सुरू आहे. या निर्णयामुळे भविष्यातील रेल्वे अपघात तपास अधिक अचूक आणि पारदर्शक होणार आहे.

   Follow us on   

मुंबई:- भूखंड क्रमांक १५६, प्रेरणा संस्था (रजि.) चारकोप सेक्टर एकच्या वतीने आयोजित केलेल्या ३६ व्या सत्यनारायण महापूजे निमित्त हळदी कुंकू, महाप्रसाद, कला, क्रीडा सांस्कृतिक व श्री प्रवीण सावंत, झाली कृपा साईंची समूहाचे सुस्वर सुगम भजन इत्यादी कार्यक्रमाचे आयोजन करण्यात आले होते. सदर कार्यक्रम संस्थेतील बाळ-गोपाळ, महिला मंडळ व रहिवाश्यांनी जल्लोषात व उत्साहात साजरे केले. उत्सवा दरम्यान प्रेरणा संस्था विद्युत रोषणाईने झगमगली होती.

वरील संस्थेत सादर करण्यात आलेल्या विविध कार्यक्रमांचे चारकोप परिसरात विशेष कौतुक होत आहे. सध्याच्या अशाश्वत सांस्कृतिक बदल आणि पाश्चिमात्य संस्कृतीचे अनुकरण करू पाहणाऱ्या मंडळाच्या गर्दीत ‘युवा प्रेरणा मंडळ’ आणि ‘प्रेरणा संस्था पूजा समिती’ यांचे अभिजात मराठी संस्कृतीचा साधेपणा जपणारे आयोजन पाहून मन भारावून गेले. सध्या सर्रास दिसून येणाऱ्या अशाश्वत कार्यक्रमांपेक्षा प्रतीवर्षी अशाच अभिजात सांस्कृतिक कार्यक्रमांना प्राधान्य देण्यास आग्रही असल्याचे संस्थेचे अध्यक्ष श्री. दत्तात्रय साईल व पूजा समिती प्रमुख श्री नितीन शिगवण व युवा मित्र मंडळाच्या सर्व सभासदांनी प्रतिपादन केले. प्रेरणा संस्थेतील रहिवाशांनीही या कार्यक्रमास उदंड प्रतिसाद दर्शवून संस्कृतीच्या संवर्धनाच्या या महत्कार्यात आपले मोलाचे योगदान दिले.

संस्थेतील श्री प्रशांत संभाजी जाधव हे सनदी लेखापाल (सी. ए.) परीक्षा उत्तीर्ण झाल्याबद्दल व कुमारी अद्विका अभिजित पालांडे हिने इंटरनॅशनल स्केटिंग स्पर्धांमधून अनेक सुवर्ण पदके प्राप्त केल्याबद्दल तसेच विविध स्पर्धेत सहभागी झालेले बाळ गोपाळ, महिला यांचा यथोचित सन्मान करण्यात आला.

नवनिर्वाचित नगरसेविका दक्षता कवठणकर, मा. नगरसेवक व सल्लागार सिंधुदुर्ग जिल्हा एकात्मक मंडळ श्री श्रीकांत कवठणकर, सर्वश्री योगेश पडवळ सचिव उत्तर मुंबई भाजपा, निखिल गुढेकर शिवसेना शाखाप्रमुख, प्रमोद गुजर मा. वॉर्ड अध्यक्ष भाजपा, मनीष साळुंखे वॉर्ड अध्यक्ष भाजपा, श्री शशांक चौकीदार अध्यक्ष प्रबोधनकार ठाकरे नगर युनियन चारकोप, सौ मनाली चौकीदार महिला विभाग प्रमुख शिवसेना, सौ. विशाखा मोरये महिला विभाग प्रमुख शिवसेना, सर्वश्री राजेंद्र (राजू मामा) खंकाळ समाजसेवक, भूषण विचारे आपला माणूस, उदय कोंडविलकर शाखा अध्यक्ष मनसे, श्री संतोष गवळी शाखा प्रमुख शिवसेना व इतर अनेक मान्यवरांनी श्रीचे दर्शन घेतले आणि आयोजकांस शुभेच्छा दिल्या.

कार्यक्रमाचे सूत्रसंचालन व आभार प्रदर्शन प्राध्यापक श्री संदीप गोसावी, श्री स्वप्नील शिंदे, सौ प्रणाली राऊळ व सौ. स्नेहल निनाद पवार यांनी केले.

   Follow us on   

मुंबई: मुंबईकरांचा आणि विशेषतः नवी मुंबईकरांचा प्रवास अधिक सुखकर करण्यासाठी मध्य रेल्वेने हार्बर मार्गावर पुन्हा एकदा वातानुकूलित (AC) लोकल सेवा सुरू करण्याचा महत्त्वपूर्ण निर्णय घेतला आहे. उद्या, म्हणजेच २६ जानेवारी २०२६, प्रजासत्ताक दिनाचे औचित्य साधून हार्बर मार्गावर एकूण १४ एसी लोकल फेऱ्या पुन्हा प्रवाशांच्या सेवेत दाखल होणार आहेत. यामध्ये ७ ‘अप’ आणि ७ ‘डाऊन’ फेऱ्यांचा समावेश असून, छत्रपती शिवाजी महाराज टर्मिनस (CSMT), वडाळा रोड, वाशी आणि पनवेल या महत्त्वाच्या स्थानकांदरम्यान या सेवा चालवण्यात येतील.

​या नवीन वेळापत्रकानुसार, दिवसाची पहिली एसी लोकल पहाटे ४:१५ वाजता वाशीहून वडाळा रोडसाठी सुटेल, तर शेवटची फेरी रात्री ८:०० वाजता CSMT हून पनवेलसाठी रवाना होईल. या सेवा सध्या सुरू असलेल्या साध्या लोकल फेऱ्यांच्या जागीच चालवण्यात येणार आहेत. विशेष म्हणजे, सकाळी आणि संध्याकाळच्या गर्दीच्या वेळी (Peak Hours) या गाड्या उपलब्ध करून देण्यात आल्याने नोकरदार वर्गाला मोठा दिलासा मिळणार आहे. दरम्यान, रेल्वे प्रशासनाने स्पष्ट केले आहे की, या १४ सेवा केवळ सोमवार ते शनिवार या कालावधीतच एसी म्हणून धावतील; रविवार आणि सार्वजनिक सुट्ट्यांच्या दिवशी या फेऱ्या साध्या लोकल म्हणून चालवण्यात येतील.

​हार्बर मार्गावर यापूर्वी एसी लोकलला मिळणारा प्रतिसाद कमी असल्यामुळे काही सेवा बंद करण्यात आल्या होत्या. मात्र, वाढते शहरीकरण आणि उन्हाळ्याची चाहूल लक्षात घेता प्रवाशांकडून एसी लोकलची मागणी सातत्याने होत होती. या पार्श्वभूमीवर रेल्वेने घेतलेला हा निर्णय प्रवाशांसाठी सुखद धक्का मानला जात आहे. या फेऱ्यांमुळे पनवेल-मुंबई दरम्यानचा प्रवास आता अधिक थंडगार आणि आरामदायी होणार आहे.

   Follow us on   

मुंबई: मुंबईतील छत्रपती शिवाजी महाराज टर्मिनस (CSMT) स्थानकावरील प्रवाशांचा वाढता भार कमी करण्यासाठी रेल्वे प्रशासनाने एक महत्त्वाचा निर्णय घेतला आहे. या नवीन नियोजनानुसार, काही एक्स्प्रेस गाड्या आता सीएसएमटीपर्यंत न येता केवळ लोकमान्य टिळक टर्मिनस (LTT) पर्यंतच चालवल्या जाणार आहेत.

​मुंबईचे मुख्य प्रवेशद्वार असलेल्या सीएसएमटी स्थानकावर दररोज लाखो प्रवाशांची ये-जा असते, ज्यामुळे प्लॅटफॉर्म आणि रेल्वे मार्गांवर मोठा ताण निर्माण होतो. हा ताण सुसह्य करण्यासाठी आणि गाड्यांच्या वेळापत्रकात अधिक सुसूत्रता आणण्यासाठी प्रशासनाने ठराविक लांब पल्ल्याच्या गाड्यांचे टर्मिनस बदलण्याचा निर्णय घेतला आहे. या बदलामुळे कुर्ला येथील लोकमान्य टिळक टर्मिनसचा वापर अधिक प्रभावीपणे होईल आणि मध्य रेल्वेच्या मुख्य मार्गावरील गर्दीचे विभाजन होण्यास मदत होईल.

​हा निर्णय विशेषतः उपनगरीय लोकल प्रवाशांसाठीही दिलासादायक ठरू शकतो, कारण एक्स्प्रेस गाड्यांची संख्या सीएसएमटीवर कमी झाल्यामुळे लोकल गाड्यांच्या संचालनात येणारे अडथळे कमी होण्याची शक्यता आहे. मात्र, ज्या प्रवाशांना थेट दक्षिण मुंबईत जायचे आहे, त्यांना आता कुर्ल्याला उतरून पुढील प्रवास करावा लागणार आहे.

   Follow us on   

मुंबई: मुंबईतील प्रवाशांची मागणी लक्षात घेऊन पश्चिम रेल्वेने (WR) प्रवाशांना मोठा दिलासा दिला आहे. येत्या २६ जानेवारी २०२६ पासून मुंबई उपनगरीय मार्गावर १२ नवीन एसी (AC) लोकल फेऱ्या सुरू करण्याचा निर्णय रेल्वे प्रशासनाने घेतला आहे.

मुंबई उपनगरीय प्रवाशांच्या सोयीसाठी पश्चिम रेल्वेने महत्त्वपूर्ण पाऊल उचलले असून, येत्या सोमवार, २६ जानेवारी २०२६ पासून १२ नवीन एसी लोकल फेऱ्या सुरू होणार आहेत. विशेष म्हणजे, या नवीन एसी फेऱ्या सध्या धावत असलेल्या १२ साध्या (Non-AC) फेऱ्यांच्या जागी चालवल्या जाणार आहेत. रेल्वे प्रशासनाने स्पष्ट केले आहे की, या बदलामुळे मुंबई उपनगरीय मार्गावरील लोकल गाड्यांच्या एकूण फेऱ्यांमध्ये कोणताही बदल होणार नाही. एकूण सेवांची संख्या १४०६ इतकीच कायम राहणार असून, त्यामध्ये आता एसी लोकलच्या एकूण फेऱ्यांची संख्या १०९ वरून १२१ वर पोहोचेल.

​फेऱ्यांचा तपशील (Annexure-I नुसार):

​या १२ सेवांपैकी ६ फेऱ्या ‘अप’ मार्गावर (चर्चगेटकडे) आणि ६ फेऱ्या ‘डाऊन’ मार्गावर (विरार/बोरिवलीकडे) असतील.

​१. अप मार्ग (चर्चगेटच्या दिशेने):

​गोरेगाव ते चर्चगेट: सकाळी ०५:१४ (स्लो) आणि संध्याकाळी १९:०६ (स्लो).

​बोरिवली ते चर्चगेट: सकाळी ०७:२५ (फास्ट).

​विरार ते चर्चगेट: सकाळी १०:०८ (फास्ट) आणि दुपारी १५:४५ (स्लो).

​भाईंदर ते चर्चगेट: दुपारी १२:४४ (फास्ट).

​२. डाऊन मार्ग (चर्चगेटवरून सुटणाऱ्या):

​चर्चगेट ते बोरिवली: सकाळी ०६:१४ (स्लो).

​चर्चगेट ते विरार: सकाळी ०८:२७ (फास्ट) आणि दुपारी १३:५२ (स्लो).

​चर्चगेट ते भाईंदर: सकाळी ११:३० (फास्ट).

​चर्चगेट ते गोरेगाव: संध्याकाळी १७:५७ (स्लो) आणि रात्री २०:०७ (स्लो).

​पश्चिम रेल्वेचे मुख्य जनसंपर्क अधिकारी श्री विनीत अभिषेक यांनी दिलेल्या माहितीनुसार, एसी लोकलच्या वाढत्या लोकप्रियतेमुळे आणि प्रवाशांची प्रवासाची सोय सुधारण्यासाठी हा निर्णय घेण्यात आला आहे.

   Follow us on   

मुंबई (गुरुदत्त वाकदेकर) : शब्दांना भावार्थ देणाऱ्या संवेदना, अनुभवांना दिशा देणारे विचार आणि संस्कृतीच्या मुळांशी जोडणारी अभिव्यक्ती यांचा सुरेल संगम साधणारे मराठी साहित्य व कला सेवा आयोजित तेवीसावे कविसंमेलन रविवार, दिनांक ११ जानेवारी २०२६ रोजी सायंकाळी दादर (पूर्व) येथील इंडियन एज्युकेशन सोसायटी, राजा शिवाजी विद्यालय, हिंदू कॉलनी येथे अत्यंत शिस्तबद्ध, रसिक आणि साहित्यनिष्ठ वातावरणात यशस्वीरीत्या पार पडले. नववर्षाच्या प्रारंभी आयोजित या साहित्यिक सोहळ्याने कवी आणि रसिकांच्या मनात सर्जनशील ऊर्जेचे नवे अंकुर रुजवले.

गेल्या नऊ वर्षांपासून सातत्याने काव्य, कला आणि विचारांच्या संवर्धनासाठी कार्यरत असलेल्या मराठी साहित्य व कला सेवा या संस्थेने या संमेलनातून नवोदित व अनुभवी कवींना समान व्यासपीठ उपलब्ध करून दिले. एकाच कार्यक्रमात प्रत्येक कवीला तीन कविता सादर करण्याची संधी देणारी ही संस्था अखंड भारतवर्षातील एकमेव संस्था असल्याचे वैशिष्ट्य या संमेलनात अधोरेखित झाले. “कविता का लिहावी?” या पहिल्या सत्रात आत्मशोध, समाजाशी साधलेला प्रामाणिक संवाद आणि न बोलता येणाऱ्या भावनांचा काव्यमय वेध घेण्यात आला, तर दुसऱ्या व तिसऱ्या सत्रात मुक्त विषयांवरील स्वच्छंद, प्रामाणिक आणि भावपूर्ण अभिव्यक्तीने रसिकांना मंत्रमुग्ध केले.

या कविसंमेलनात अशोक सहदेव सुकाळे, आदित्य भालचंद्र कुलकर्णी, एकनाथ शेडगे, कल्पना दिलीप मापूसकर, चंद्रकांत दढेकर (अभिवाचन), जयश्री हेमचंद्र चुरी, नमिता नितीन आफळे (अभिवाचन), प्रतिक्षा पांडुरंग सरमळकर, महेश रामनाथ वैजापूरकर, डॉ. मानसी पाटील, मोहित जनार्दन तांडेल, योगिता दशरथ कदम, विक्रांत मारुती लाळे, विलास मारुती अडसुळे (अभिवाचन), विवेक वसंत जोशी आणि गुरुदत्त दिनकर वाकदेकर यांनी आपल्या सादरीकरणातून विविध भावविश्वे उलगडली. स्वामी विवेकानंद या विषयांवरील अभिवाचनाने विचार, प्रेरणा आणि सकारात्मकतेचा सशक्त संदेश दिला.

कार्यक्रमाचे आस्वादक म्हणून डॉ. अनुज केसरकर आणि राहुल मुदाळकर यांनी सूक्ष्म निरीक्षणांसह रचनांचा रसग्रहणात्मक आढावा घेतला. सूत्रसंचालनाची जबाबदारी डॉ. मानसी पाटील यांनी अत्यंत ओघवत्या आणि संवेदनशील शैलीत पार पाडली. अल्पोपहाराची शानदार व्यवस्था डॉ. मानसी पाटील आणि डॉ. अनुज केसरकर यांनी केली. कार्यक्रमाचे छायाचित्रण विक्रांत लाळे यांनी व्यावसायिक खुबीने केले. संपूर्ण कार्यक्रमात साहित्यिक शिस्त, वेळेचे काटेकोर पालन आणि रसिकांचा उत्स्फूर्त प्रतिसाद हे विशेष लक्षवेधी ठरले.

शब्दसंपदा, वैचारिक समृद्धी आणि सांस्कृतिक जाणीव यांचा सुरेल संगम साधणारे हे तेवीसावे कविसंमेलन उपस्थित प्रत्येकाच्या मनात दीर्घकाळ रेंगाळणारा अनुभव ठरले. कार्यक्रमाच्या यशस्वी समारोपप्रसंगी आयोजकांनी पुढील उपक्रमाची घोषणा करत चोवीसावे कविसंमेलन रविवार, दिनांक ८ फेब्रुवारी २०२६ रोजी आयोजित करण्यात येणार असल्याची माहिती दिली. साहित्यसंवादाचा हा सन्माननीय मंच भविष्यातही मराठी साहित्यविश्वाला नवी दिशा देत राहील, असा विश्वास यावेळी व्यक्त करण्यात आला.