Follow us on   

कराड: कराड तालुक्यातील शेणोली स्टेशनजवळ शनिवारी सकाळी सह्याद्री एक्सप्रेस (कोल्हापूर-पुणे) गाडीवर चोरट्यांनी मोठा दरोडा टाकला. चोरट्यांनी रेल्वेच्या सिग्नल यंत्रणेशी छेडछाड करून गाडी अचानक थांबवली आणि प्रवाशांवर धाड घातली. त्यांनी प्रवाशांच्या मोबाइल फोन, सोन्याचे दागिने आणि इतर मौल्यवान वस्तू लुटल्या.

ही घटना पहाटेच्या सुमारास घडल्याने प्रवासी घाबरले होते.रेल्वे प्रशासन आणि स्थानिक पोलिसांनी दिलेल्या माहितीनुसार, चोरट्यांनी सिग्नल बिघडवून गाडी थांबवल्याची ही पहिलीच घटना नाही, मात्र एक्सप्रेस गाडीवर अशा पद्धतीने दरोडा टाकणे ही दुर्मीळ आणि अतिशय धोकादायक घटना आहे. चोरांनी गाडी थांबताच काही मिनिटांतच लूट केली आणि अंधाराचा फायदा घेत पळ काढला.

प्रवाशांनी दिलेल्या माहितीनुसार, चोरांची संख्या चार ते पाच होती.मिरज रेल्वे पोलिसांनी या प्रकरणी गुन्हा दाखल करून तपास सुरू केला आहे. पोलिसांनी सीसीटीव्ही फुटेज, प्रवाशांच्या जबानी आणि अन्य पुराव्यांच्या आधारे आरोपींचा शोध घेण्यास सुरुवात केली आहे. रेल्वे सुरक्षा यंत्रणेच्या कमकुवतपणामुळे ही घटना घडल्याची चर्चा रेल्वे वर्तुळात सुरू झाली आहे.

प्रवाशांनी अशा घटनांपासून सावध राहावे, मौल्यवान वस्तू जवळ ठेवू नयेत आणि संशयास्पद व्यक्ती दिसल्यास तत्काळ रेल्वे कर्मचाऱ्यांना किंवा पोलिसांना कळवावे, असे आवाहन करण्यात आले आहे. या घटनेमुळे कोल्हापूर-पुणे मार्गावरील रेल्वे प्रवाशांमध्ये भीतीचे वातावरण निर्माण झाले आहे.

   Follow us on   

​मुंबई:कोकणातील रेल्वेचे अनेक वर्षांपासून प्रलंबित असलेले प्रश्न मार्गी लावण्यासाठी आणि रेल्वे प्रशासनाच्या आडमुठ्या धोरणांविरुद्ध आवाज उठवण्यासाठी आगामी रविवार, २६ एप्रिल रोजी सकाळी १० वाजता मुंबईत भव्य ‘महाराष्ट्र रेल्वे परिषद’ आयोजित करण्यात येणार आहे. ‘अखंड कोकण रेल्वे प्रवासी सेवा समिती, महाराष्ट्र’ यांच्या कार्यकारिणी सभेत या परिषदेची संकल्पना मांडण्यात आली असून, आता प्रत्यक्ष कार्यवाहीला सुरुवात झाली आहे.

​२८ ते ३० गाड्यांचा प्रश्न ऐरणीवर

​या परिषदेचा मुख्य हेतू दादर-रत्नागिरी पॅसेंजर आणि सह्याद्री एक्सप्रेस यांसारख्या महाराष्ट्रातील बंद केलेल्या किंवा शहरांतील मुख्य स्थानकाबाहेर (उदा. पनवेल, पुणे किंवा दिवा) फेकलेल्या २८ ते ३० महत्त्वाच्या गाड्यांबाबत जनजागृती करणे हा आहे. रेल्वे प्रशासनाने घेतलेल्या या निर्णयामुळे चाकरमान्यांचे प्रचंड हाल होत असून, या अन्यायाविरुद्ध प्रशासनाला इशारा देण्यासाठी राज्यातील सर्व प्रवासी संघटनांना एका छत्रछायेखाली आणून पुढील आंदोलनाची दिशा ठरवली जाणार आहे.

​दीर्घकाळ रखडलेले प्रकल्प आणि सुविधा

​केवळ गाड्याच नव्हे, तर कोकण रेल्वे मार्गावरील दीर्घकाळ रखडलेले प्रकल्प, सावंतवाडी रेल्वे टर्मिनसचे अपूर्ण काम आणि स्थानकांवरील पायाभूत सुविधांचा अभाव यावरही या परिषदेत सविस्तर चर्चा होणार आहे. कोकण रेल्वे प्रवासी संघटना, सावंतवाडीचे उपाध्यक्ष सागर तळवडेकर यांनी या परिषदेचे नियोजन केले असून, कोकणवासीयांनी या लढ्यात आता एकजुटीने सहभागी होणे काळाची गरज असल्याचे त्यांनी म्हटले आहे.

​सामान्यांचा लढा, सामान्यांसाठी!

​या उपक्रमाचे सर्वात मोठे वैशिष्ट्य म्हणजे हे कोणतेही राजकीय आंदोलन नसून, तुमच्या-आमच्यासारख्या सामान्य कष्टकरी आणि कोकणी चाकरमान्यांनी पुकारलेला हा हक्काचा लढा आहे. या परिषदेला कोणतेही मोठे राजकीय किंवा आर्थिक पाठबळ नाही. त्यामुळे ही परिषद यशस्वी करण्यासाठी मोठ्या प्रमाणावर मनुष्यबळ आणि आर्थिक नियोजनाची गरज आहे.

​”ही परिषद यशस्वी करण्यासाठी स्वतः आयोजक म्हणून पुढे यावे. तसेच ज्यांना या सामाजिक कार्यात प्रत्यक्ष सहभाग घ्यायचा आहे किंवा आर्थिक मदत करायची आहे, त्यांनी त्वरित संपर्क साधावा,” असे आवाहन समितीचे सचिव अक्षय महापदी यांनी आयोजन समितीच्या वतीने करण्यात आले आहे.

​कोकणच्या रेल्वे विकासासाठी आणि हक्काच्या प्रवासासाठी होणारी ही परिषद कोकण रेल्वेच्या इतिहासातील एक निर्णायक वळण ठरण्याची शक्यता आहे.

   Follow us on   

मुंबई: पश्चिम महाराष्ट्रातील प्रवाशांची आणि मुंबईकर चाकरमान्यांची हक्काची असलेली ‘सह्याद्री एक्सप्रेस’ पुन्हा तिच्या मूळ स्वरूपात (कोल्हापूर ते मुंबई) धावेल, ही आशा आता पूर्णपणे मावळली आहे. रेल्वे प्रशासनाने घेतलेल्या नव्या निर्णयानुसार, ही गाडी आता कायमस्वरूपी ‘कोल्हापूर-खडकी एक्सप्रेस’ (गाडी क्र. ११४१९/२०) म्हणून चालवली जाणार आहे. कोरोना महामारीच्या काळात खबरदारीचा उपाय म्हणून बंद करण्यात आलेली ही सेवा, त्यानंतर ‘स्पेशल’ म्हणून काही काळ सुरू राहिली. मात्र, आता ती नियमित करताना तिचा मार्ग खडकीपर्यंतच मर्यादित करण्यात आला आहे. यामुळे दादर-रत्नागिरी पॅसेंजरपाठोपाठ मुंबईला जोडणारी अजून एक महत्त्वाची गाडी मुंबईकरांनी कायमची गमावली असल्याची भावना प्रवाशांमध्ये निर्माण झाली आहे.

​या निर्णयामुळे कोल्हापूर, सांगली, सातारा आणि कराड या भागातून मुंबईला जाणाऱ्या प्रवाशांना मोठा फटका बसला आहे. सध्या महालक्ष्मी एक्सप्रेसवर प्रवाशांचा प्रचंड ताण असून, एलएचबी (LHB) कोचमुळे डब्यांची संख्या कमी झाल्याने तिथे कायम वेटिंग लिस्ट असते. अशा परिस्थितीत सह्याद्री एक्सप्रेस मुंबईपर्यंत सुरू होणे गरजेचे होते. मात्र, रेल्वेने ‘झिरो टाइम टेबल’च्या नावाखाली या गाडीचा मुंबईपर्यंतचा प्रवास कापून तो खडकीपर्यंतच ठेवला आहे. जरी ही गाडी आता नियमित झाल्याने प्रवाशांना वाढीव तिकीट दरातून दिलासा मिळाला असला, तरी प्रवासाचे मुख्य उद्दिष्ट असलेल्या मुंबईपर्यंत पोहोचण्यासाठी आता प्रवाशांना पुण्यातून इतर पर्यायांचा शोध घ्यावा लागणार आहे.

​या अन्यायाविरुद्ध रेल्वे प्रवासी संघटना आणि सल्लागार समितीचे सदस्य आक्रमक झाले आहेत. मध्य रेल्वे विभागीय सल्लागार समितीचे सदस्य किशोर भोरवत यांनी ही गाडी किमान पनवेल, दादर किंवा छत्रपती शिवाजी महाराज टर्मिनसपर्यंत विस्तारित करण्याची मागणी लावून धरली आहे. विशेषतः नवी मुंबईचा विस्तार आणि तिथे वाढलेली रोजगाराची संधी पाहता, ही गाडी पनवेलमार्गे सोडल्यास हजारो प्रवाशांना त्याचा लाभ होऊ शकतो. मात्र, प्रवाशांच्या या रास्त मागणीकडे रेल्वे प्रशासन जाणीवपूर्वक दुर्लक्ष करत असल्याचा आरोप होत असून, मुंबईची कनेक्टिव्हिटी कमी होत असल्याने प्रवाशांमधून तीव्र संताप व्यक्त केला जात आहे.

   Follow us on   

मुंबई: गेल्या वर्षभरात भारतीय रेल्वेने महाराष्ट्रातील प्रवाशांच्या पदरात निराशाच टाकली आहे. राज्यातील अंतर्गत प्रवासासाठी वर्षभरात केवळ एकच नवीन रेल्वे सुरू करण्यात आली असून, याउलट राज्याबाहेर जाणाऱ्या सहा गाड्यांना प्राधान्य देण्यात आले आहे. रेल्वे प्रशासनाच्या या भूमिकेमुळे स्थानिक प्रवाशांमध्ये मोठ्या प्रमाणावर नाराजीचा सूर उमटत आहे.

​राज्यांतर्गत केवळ एकच गाडी

​मागील आर्थिक वर्षात महाराष्ट्रातील महत्त्वाच्या शहरांना जोडणारी फक्त एकच नवीन गाडी धावली:

• ​पुणे – अजनी वंदे भारत एक्सप्रेस

​राज्याबाहेर जाणाऱ्या सहा नवीन गाड्या

​रेल्वेने राज्याबाहेर जाणाऱ्या लांब पल्ल्याच्या गाड्यांना हिरवा कंदील दाखवला आहे. यात खालील गाड्यांचा समावेश आहे:

​एलटीटी – सहरसा: अमृत भारत एक्सप्रेस

• ​पनवेल – अलीपूरद्वार: अमृत भारत एक्सप्रेस
• ​हडपसर – जोधपूर: एक्सप्रेस
• ​हडपसर – रेवा: एक्सप्रेस
• ​हडपसर – मुझफ्फरपूर: एक्सप्रेस
• ​साईनगर शिर्डी – तिरुपती: एक्सप्रेस

​मुंबई, पुणे, नाशिक, नागपूर आणि छत्रपती संभाजीनगर यांसारख्या प्रमुख शहरांमधील प्रवाशांची संख्या सातत्याने वाढत आहे. असे असतानाही नवीन गाड्या सुरू करण्याऐवजी, पूर्वी सुरू असलेल्या काही गाड्या बंद केल्या गेल्याचा आरोप प्रवाशांकडून होत आहे.

​राज्यांतर्गत रेल्वे गाड्यांची संख्या वाढल्यास रस्त्यावरील वाहनांचा ताण कमी होऊ शकतो. यामुळे वाहतूक कोंडी सुटेल आणि अपघातांचे प्रमाणही घटण्यास मदत होईल. त्यामुळे अंतर्गत रेल्वे सेवा वाढवणे ही काळाची गरज आहे.

— अक्षय महापदी, रेल्वे अभ्यासक

​रेल्वे प्रशासनाचे स्पष्टीकरण

​मध्य रेल्वेचे मुख्य जनसंपर्क अधिकारी डॉ. स्वप्निल नीला यांनी सांगितले की, “गेल्या आर्थिक वर्षात सुरू करण्यात आलेल्या अनेक रेल्वे गाड्यांना महाराष्ट्रातील महत्त्वाच्या स्थानकांवर थांबे देण्यात आले आहेत, ज्याचा फायदा स्थानिक प्रवाशांना होत आहे. तसेच भाविकांच्या सुविधेसाठी देवदर्शनाच्या ठिकाणांना जोडणाऱ्या गाड्यांवरही भर दिला जात आहे.”

​थोडक्यात राज्याबाहेरील प्रवाशांना दिलासा मिळाला असला तरी, महाराष्ट्रातील अंतर्गत रेल्वे प्रवाशांच्या मूलभूत गरजांकडे दुर्लक्ष होत असल्याची टीका रेल्वे प्रवासी संघटनांकडून केली जात आहे.

खासदार अरविंद सावंत यांचा लोकसभेत प्रश्न 

   Follow us on   

नवी दिल्ली: मध्य रेल्वेच्या धोरणांवर पक्षपातीपणाचे आरोप करत महाराष्ट्रातील, विशेषतः कोकण आणि मराठी जनतेत तीव्र नाराजी पसरली आहे. विशेष गाड्यांच्या घोषणेमध्ये बिहारसाठी ४५०, उत्तर प्रदेशसाठी ३३२ गाड्या देण्यात आल्या असताना कोकणाच्या वाट्याला केवळ ३६ गाड्या आल्याने संताप व्यक्त केला जात आहे. यासोबतच दादर-रत्नागिरी ही महत्त्वाची गाडी बंद केल्याने कोकणवासीयांमध्ये असंतोष अधिक वाढला आहे. आधीच हिंदी भाषेच्या सक्तीच्या मुद्द्यावरून नाराजी असताना, आता गाड्यांच्या वाटपातही भेदभाव होत असल्याचा आरोप करण्यात येत आहे.

या पार्श्वभूमीवर खासदार अरविंद सावंत यांनी लोकसभेतील शून्य प्रहरामध्ये हा मुद्दा उपस्थित केला. सीएसएमटी-गोरखपूर ही गाडी दररोज धावत असताना सीएसएमटी-मडगाव गाडी आठवड्यातून केवळ एकदाच का चालवली जाते, असा सवाल त्यांनी केला. तसेच कोकणातील दादर-रत्नागिरी गाडी बंद करण्यामागील कारण काय, पुणे-नांदेड आणि नांदेड-हडपसर यांसारख्या गाड्यांची क्षमता का कमी करण्यात आली, असे प्रश्नही त्यांनी उपस्थित केले. कोकण रेल्वेसाठी लढा देणाऱ्या कोकणवासीयांवरच अन्याय का केला जात आहे, असा सवालही त्यांनी सरकारला विचारला. “मध्य रेल्वे ही खरोखर ‘मध्य रेल्वे’ आहे की ‘उत्तर भारतीय रेल्वे’?” असा उपरोधिक टोला त्यांनी लगावला.

यावेळी त्यांनी रेल्वे मंत्र्यांकडे काही महत्त्वाच्या मागण्या मांडल्या. दादर-रत्नागिरी गाडी तात्काळ पुन्हा सुरू करावी, कोकणासाठी गाड्यांची संख्या वाढवावी आणि हडपसर येथे मर्यादित केलेल्या गाड्या पुन्हा पूर्ण क्षमतेने चालवाव्यात, अशी मागणी त्यांनी केली. या मुद्द्यावर लवकरात लवकर सकारात्मक निर्णय घेण्याची अपेक्षा व्यक्त करण्यात येत आहे.

   Follow us on   

मुंबई: राज्य शासनाने उपमुख्यमंत्री देवेंद्र फडणवीस यांचा ‘ड्रीम प्रोजेक्ट’ असलेल्या शक्तिपीठ महामार्गाच्या सुधारित आखणीला अधिकृत मंजुरी दिली आहे. या निर्णयानुसार आता महामार्गाची एकूण लांबी ८५६ किलोमीटर झाली असून, यामध्ये सातारा जिल्ह्याचा नव्याने समावेश करण्यात आला आहे. फेब्रुवारी २०२४ च्या प्रस्तावानुसार हा महामार्ग ८०२ किलोमीटरचा होता, मात्र सांगली आणि कोल्हापूर जिल्ह्यातील बागायती जमिनींच्या संपादनाला शेतकऱ्यांनी केलेल्या तीव्र विरोधामुळे या प्रकल्पाच्या आखणीत मोठे बदल करण्यात आले आहेत.

​बदललेली जिल्हावार आखणी:

सुधारित आराखड्यानुसार, वर्धा, यवतमाळ, बीड आणि लातूर या जिल्ह्यांतील मार्गामध्ये कोणताही बदल करण्यात आलेला नाही. मात्र, नांदेड, हिंगोली, परभणी, धाराशिव, सोलापूर, सांगली, कोल्हापूर आणि सिंधुदुर्ग जिल्ह्यांमधील मार्गामध्ये महत्त्वाच्या सुधारणा करण्यात आल्या आहेत. सातारा जिल्ह्याचा समावेश झाल्याने आता हा मार्ग सातारा आणि सांगलीतून कोल्हापूरमार्गे चंदगड आणि तेथून दोडामार्ग तालुक्यातील बांद्याजवळून थेट गोव्यात प्रवेश करेल.

​सोलापूर आणि सातारा जिल्ह्यातील मार्ग:

सोलापूर जिल्ह्यातील पूर्वीच्या आखणीत मोठे बदल झाले असून उत्तर सोलापूर आणि सांगोला हे तालुके आता या मार्गातून वगळण्यात आले आहेत. त्याऐवजी माढा आणि माळशिरस या नवीन तालुक्यांचा समावेश करण्यात आला आहे. बार्शी, मोहोळ आणि पंढरपूर तालुक्यातील बाधित गावांच्या यादीतही काही बदल झाले आहेत. सोलापूरच्या गारवडमधून हा महामार्ग साताऱ्यातील कारखेल येथे प्रवेश करेल. तेथून दिवड, कुकुडवाडवरून खटावमधील पडळनंतर मायणीजवळून तो सांगली जिल्ह्यात मार्गस्थ होईल.

​धार्मिक पर्यटनाला चालना:

या नवीन आखणीमुळे सातारा जिल्ह्यातील शिखर शिंगणापूर आणि गोंदवले बुद्रुक ही दोन महत्त्वाची तीर्थक्षेत्रे महामार्गाशी जोडली जाणार आहेत. विधानसभा निवडणुकीच्या पार्श्वभूमीवर शेतकऱ्यांच्या रोषाचा फटका बसू नये म्हणून हा प्रकल्प मागे पडला होता, मात्र आता सुधारित आखणीच्या शासन निर्णयामुळे या महामार्गाच्या कामाला पुन्हा गती मिळण्याचे संकेत मिळत आहेत.