Follow us on   

मंगळूर:कोकण रेल्वे कॉर्पोरेशन लिमिटेडने (KRCL) प्रवाशांची सुरक्षा आणि रेल्वे सेवा सुरळीत ठेवण्याच्या उद्देशाने मान्सूनपूर्व ट्रॅक तपासणी तसेच प्रतिबंधात्मक कामांना सुरुवात केली आहे. कोकण रेल्वेचा मार्ग एकेरी (सिंगल-लाईन) असून या मार्गावर गाड्यांची वर्दळ खूप जास्त असते, त्यामुळे याचे व्यवस्थापन अत्यंत काटेकोरपणे करावे लागते. हा रेल्वे मार्ग अत्यंत खडतर भूप्रदेश आणि मुसळधार पावसाच्या क्षेत्रातून जात असल्याने, रेल्वेच्या पायाभूत सुविधा अधिक बळकट करण्यासाठी सध्या विविध तांत्रिक व अभियांत्रिकी कामे वेगाने केली जात आहेत.

​या मान्सूनपूर्व कामांमध्ये कटिंग लोअरिंग (डोंगराचे कडे कमी करणे), बीएलटी (BLT) दुरुस्ती, ट्रॅक लिफ्टिंग, डीप स्क्रीनिंग, थ्रू-ट्रॅक नूतनीकरण आणि पीक्यूआरएस (PQRS) देखभालीचा समावेश आहे. ट्रॅकची क्षमता आणि प्रवाशांचा प्रवास सुखकर व्हावा यासाठी ही कामे केली जात आहेत. या दुरुस्तीच्या कामांमुळे मार्गावर तात्पुरते गती निर्बंध (स्पीड रिस्ट्रिक्शन्स) आणि ब्लॉक घेतले जाऊ शकतात, ज्यामुळे गाड्यांना काही प्रमाणात उशीर होण्याची शक्यता आहे. कोकण रेल्वेने दिलेल्या माहितीनुसार, बहुतांश मान्सूनपूर्व कामे मे महिन्याच्या अखेरीस पूर्ण केली जातील, त्यानंतर गाड्यांच्या वक्तशीरपणात सुधारणा होईल. प्रवाशांनी वेळापत्रकातील बदलांची माहिती मिळवण्यासाठी स्टेशनवरील घोषणा, इलेक्ट्रॉनिक डिस्प्ले, अधिकृत वेबसाइट आणि मोबाईल ॲप्सचा वापर करावा, असे आवाहन रेल्वे प्रशासनाने केले आहे.

   Follow us on   

सावंतवाडी:कोरोना महामारीच्या काळात सावंतवाडी रोड रेल्वे स्थानकावरून बंद करण्यात आलेले प्रमुख एक्सप्रेस गाड्यांचे थांबे पुन्हा सुरू करण्याबाबत पालकमंत्री नितेश राणे यांनी अत्यंत सकारात्मक भूमिका घेतली आहे. सावंतवाडीकर रेल्वे प्रवाशांना लवकरच या संदर्भात आनंदाची बातमी मिळेल, असे आश्वासन देत त्यांनी या विषयात स्वतः लक्ष घालणार असल्याचे स्पष्ट केले आहे.

​कोकण रेल्वे प्रवासी संघटना (सावंतवाडी) आणि माहिती अधिकार महासंघ (महाराष्ट्र राज्य) यांच्या वतीने अध्यक्ष विनोद नाईक यांनी मंगळवारी पालकमंत्री नितेश राणे यांची सदिच्छा भेट घेतली. या भेटीदरम्यान त्यांनी सावंतवाडीकरांच्या प्रलंबित मागण्यांचे निवेदन पालकमंत्र्यांना सादर केले. या बैठकीत प्रामुख्याने गरीब रथ एक्सप्रेस (१२२०२), राजधानी एक्सप्रेस आणि मंगळूरू एक्सप्रेस (१२४३४) या गाड्यांना सावंतवाडी येथे पुन्हा थांबा देण्यात यावा, अशी आग्रही मागणी करण्यात आली.

​यापूर्वी २६ जानेवारी २०२५ रोजी कोकण रेल्वे प्रवासी संघटनेचे प्रतिनिधी प्रकाश येडगे यांनी मुंबई येथे पालकमंत्र्यांच्या निवासस्थानी भेट घेऊन यासंदर्भात निवेदन सादर केले होते. आजच्या बैठकीत त्या जुन्या निवेदनाची आठवण करून देत, हे थांबे सावंतवाडीकरांसाठी किती गरजेचे आहेत हे पुन्हा एकदा पालकमंत्र्यांच्या निदर्शनास आणून देण्यात आले.

​कोरोना काळात बंद झालेल्या थांब्यांमुळे सावंतवाडी परिसरातील विद्यार्थी, नोकरदार, व्यापारी आणि सर्वसामान्य प्रवाशांना सध्या मुंबई किंवा इतर राज्यांत प्रवास करताना मोठ्या गैरसोयीला सामोरे जावे लागत आहे. त्यामुळे हे हक्काचे थांबे पुन्हा सुरू व्हावेत, अशी जनतेची मागणी आहे. पालकमंत्र्यांनी यावर तातडीने सकारात्मक पावले उचलण्याचे आश्वासित केले आहे. या गाड्यांचे थांबे पूर्ववत सुरू झाल्यास चाकरमान्यांसह सर्वांनाच खूप मोठा दिलासा मिळणार असून, पालकमंत्र्यांच्या या आश्वासक भूमिकेमुळे आता सावंतवाडीकरांच्या आशा पल्लवित झाल्या आहेत.

   Follow us on   

​कोल्हापूर: देशातील वाढती इंधन आयात, परकीय चलनाची घसरण आणि वाहतुकीच्या समस्यांवर मात करण्यासाठी कोल्हापूर व कोकण विभागातील प्रलंबित रेल्वे मार्ग तातडीने विकसित करण्यात यावेत, अशी मागणी ‘कोल्हापूर जिल्हा रहिवासी सामाजिक प्रवासी संघ’ यांच्या वतीने महाराष्ट्र राज्याचे मुख्यमंत्री देवेंद्र फडणवीस यांच्याकडे एका पत्राद्वारे करण्यात आली आहे. देशाची आर्थिक गंगाजळी वाचवण्यासाठी आणि शाश्वत विकासाला चालना देण्यासाठी केवळ रस्ते विकास पुरेसा नसून, रेल्वे जाळ्याचा विस्तार करणे अत्यंत आवश्यक असल्याचे संघाने या पत्रात अधोरेखित केले आहे.

​प्रवासी संघाने मुख्यमंत्र्यांचे लक्ष वेधताना म्हटले आहे की, सध्या मुंबई-पुणे-कोल्हापूर आणि इतर जिल्ह्यांदरम्यान रोज हजारो खाजगी वाहनांमुळे लाखो लीटर पेट्रोल व डिझेल वाया जात असून अब्जावधी रुपयांचे परकीय चलन देशाबाहेर जात आहे. ‘शक्तीपीठ महामार्ग’ सारख्या प्रकल्पांवर लाखो कोटी रुपये खर्च केले जात असले, तरी त्यामुळे भविष्यात परकीय इंधनावरील अवलंबित्व कमी होणार नाही. याला उत्तम पर्याय म्हणून १) कोल्हापूर – आजरा – गडहिंग्लज – चंदगड – बेळगाव, २) सावंतवाडी – चंदगड – बेळगाव आणि ३) कोल्हापूर – वैभववाडी या तीन महत्त्वाच्या रेल्वे मार्गांचे नियोजन मुंबई-अहमदाबाद बुलेट ट्रेनच्या धर्तीवर जलद गतीने करून पुढील पाच वर्षांत ते प्रत्यक्ष पूर्ण करावेत, अशी आग्रही मागणी करण्यात आली आहे.

​या रेल्वे मार्गांमुळे संपूर्ण पश्चिम महाराष्ट्र, कोकण आणि सीमाभागाचा आर्थिक, औद्योगिक, पर्यटन व सामाजिक विकास होईल, असा विश्वास व्यक्त करण्यात आला आहे. रेल्वे वाहतूक वाढल्यास पेट्रोल-डिझेलवरील अवलंबित्व कमी होईल, परकीय चलनाची बचत होईल, रस्ते अपघात व पर्यावरण प्रदूषण कमी होऊन ग्रामीण भागातील रोजगार निर्मितीला मोठी चालना मिळेल, असेही पत्रात नमूद केले आहे. केंद्र व राज्य शासनाने केवळ “पेट्रोल वाचवा” असे आवाहन करण्यापुरते मर्यादित न राहता रेल्वे आणि जलमार्गासारख्या शाश्वत वाहतूक सुविधांना सर्वोच्च प्राधान्य देणे गरजेचे आहे. या मागणीबाबत सकारात्मक विचार करून केंद्र शासन, रेल्वेमंत्री अश्विनी वैष्णव आणि संबंधित विभागांशी समन्वय साधून त्वरित योग्य ती कारवाई करावी, अन्यथा शासन फक्त कंत्राटदार व उद्योगपतींच्या हितासाठी कार्यरत असून सर्वसामान्यांकडे दुर्लक्ष करत आहे, अशी भावना जनतेत निर्माण होईल, असा इशारा ‘कोल्हापूर जिल्हा रहिवासी सामाजिक प्रवासी संघा’चे अध्यक्ष ॲड. चंद्रकांत निकम यांनी दिला आहे. या पत्राच्या प्रती पंतप्रधान नरेंद्र मोदी आणि रेल्वेमंत्री अश्विनी वैष्णव यांनाही पाठवण्यात आल्या आहेत.

   Follow us on   

​खेड: गणेशोत्सव तसेच इतर सणासुदीच्या काळात दिवा स्थानकावरून सुटणाऱ्या विशेष ‘दिवा-चिपळूण मेमू रेल्वे’ सेवेचा विस्तार करावा आणि ती थेट दिवा ते संगमेश्वर मार्गावर सुरू करण्यात यावी, अशी मागणी ‘निसर्गरम्य चिपळूण आणि संगमेश्वर रेल्वे ग्रुप’च्या वतीने कोकण रेल्वे प्रशासनाकडे करण्यात आली आहे. यासंदर्भात कोकण रेल्वेला एक रीतसर निवेदनही देण्यात आले आहे. ही मेमू सेवा भविष्यात संगमेश्वरपर्यंत सुरू झाल्यास कामथे, सावर्डे, आरवली, कढवई तसेच परिसरातील प्रवाशांना खूप मोठा दिलासा मिळणार असल्याचे या निवेदनात म्हटले आहे.

​विशेषतः गणेशोत्सव आणि इतर सणांच्या काळात गावी ये-जा करताना चाकरमान्यांना व प्रवाशांना मोठ्या अडचणींचा सामना करावा लागतो. अनेकवेळा प्रवाशांना प्रचंड गर्दीतून जीव मुठीत धरून प्रवास करावा लागत असल्याचे चित्र पाहायला मिळते. तसेच या भागातील अनेक नागरिक रोजगार, शिक्षण, व्यवसाय आणि वैद्यकीय कारणांसाठी मुंबई व उपनगरांकडे नियमित प्रवास करत असतात. त्यामुळे या मार्गावर एक स्वतंत्र मेमू सेवा सुरू होणे अत्यंत गरजेचे असल्याचे मत निवेदनातून व्यक्त करण्यात आले आहे.

​दिवा-संगमेश्वर मेमू सेवा सुरू झाल्यास प्रवाशांचा प्रवास अधिक सुरक्षित, जलद आणि सुखकर होण्यास मदत होईल. शिवाय सणासुदीच्या काळात तसेच नियमित दिवसांमध्येही या मार्गावर मोठ्या प्रमाणात प्रवासी संख्या असल्याने या गाडीला उत्तम प्रतिसाद मिळेल, असा विश्वास रेल्वे ग्रुपच्या वतीने व्यक्त करण्यात आला आहे. प्रवाशांच्या हिताचा विचार करून कोकण रेल्वे प्रशासनाने यावर सकारात्मक निर्णय घ्यावा, अशी मागणी ‘निसर्गरम्य चिपळूण आणि संगमेश्वर रेल्वे ग्रुप’चे प्रमुख संदेश जिमन यांनी केली आहे.

   Follow us on   

​नवी मुंबई: उन्हाळी सुट्ट्यांमुळे होणारी प्रवाशांची अतिरिक्त गर्दी लक्षात घेता, कोकण रेल्वेने मध्य रेल्वेच्या समन्वयाने सावंतवाडी रोड ते पनवेल दरम्यान साप्ताहिक विशेष ट्रेन चालवण्याचा निर्णय घेतला आहे. ही ट्रेन ‘ट्रेन ऑन डिमांड’ (TOD) अंतर्गत एकूण ४ फेऱ्या पूर्ण करेल.

​गाडीचे वेळापत्रक आणि मार्ग:

गाडी क्रमांक ०१००८ सावंतवाडी रोड – पनवेल स्पेशल दर शनिवारी सकाळी ०७:२० वाजता सावंतवाडीहून सुटेल आणि त्याच दिवशी संध्याकाळी १७:०० वाजता पनवेलला पोहोचेल. परतीच्या प्रवासात, गाडी क्रमांक ०१००७ पनवेल – सावंतवाडी स्पेशल दर शनिवारी संध्याकाळी १८:१० वाजता पनवेलहून सुटेल आणि रविवारी पहाटे ०४:३० वाजता सावंतवाडी रोड येथे पोहोचेल. प्रवासादरम्यान ही ट्रेन कुडाळ, सिंधुदुर्ग, कणकवली, नांदगाव रोड, वैभववाडी रोड, राजापूर रोड, विलवडे, आडवली, रत्नागिरी, संगमेश्वर रोड, चिपळूण, खेड, माणगाव, रोहा आणि पेण या स्थानकांवर थांबेल.

ही ट्रेन १६ मे २०२६ ते ०६ जून २०२६ या कालावधीत धावणार असून दोन्ही बाजूंनी प्रत्येकी ४ फेऱ्या होतील. या गाडीला एकूण २० एलएचबी (LHB) कोच असतील, ज्यामध्ये वातानुकूलित (AC) आणि शयनयान (Sleeper) डब्यांचा समावेश आहे. ही ट्रेन पूर्णपणे विजेवर चालणारी (Electric Traction) असेल. कोकण रेल्वेने प्रवाशांना या सुविधेचा लाभ घेण्याचे आवाहन केले असून, स्थानकांवर या संदर्भात फलक आणि उद्घोषणांद्वारे माहिती दिली जाणार आहे.

   Follow us on   

नागपूर: नागपूर आणि कोकण रेल्वे मार्गावरून गोव्याला जाणाऱ्या प्रवाशांसाठी रेल्वे प्रशासनाने एक मोठा आणि दिलासादायक निर्णय घेतला आहे. नागपूर-मडगाव (NGP-MAO) दरम्यान चालवली जाणारी विशेष ट्रेन आता नियमित (Regularize) करण्यात आली आहे. या गाडीला आता नवीन क्रमांक देण्यात आला असून ती द्वि-साप्ताहिक (Bi-weekly) स्वरूपात धावणार आहे.

​नवीन गाडी क्रमांक आणि वेळापत्रक

​मिळालेल्या अधिकृत माहितीनुसार, जुनी विशेष ट्रेन (०११३९/०११४०) आता ११२०३/११२०४ नागपूर-मडगाव एक्सप्रेस या नवीन क्रमांकाने ओळखली जाईल.

​गाडी क्र. ११२०३ (नागपूर ते मडगाव):

​ही गाडी नागपूरवरून दर बुधवारी आणि शनिवारी दुपारी १५:०५ वाजता सुटेल.

​ही ट्रेन दुसऱ्या दिवशी सकाळी १७:४५ वाजता मडगाव जंक्शनला पोहोचेल.

​या नवीन वेळापत्रकाची अंमलबजावणी १६ मे २०२६ पासून होईल.

​गाडी क्र. ११२०४ (मडगाव ते नागपूर):

​ही गाडी मडगाववरून दर शुक्रवारी आणि सोमवारी रात्री २०:०० वाजता सुटेल.

​नागपूरला ही ट्रेन दुसऱ्या दिवशी रात्री २१:२५ वाजता पोहोचेल.

​या गाडीची नियमित सेवा मडगाववरून १७ मे २०२६ पासून सुरू होईल.

​ही एक्सप्रेस ट्रेन प्रवासादरम्यान खालील  स्थानकांवर थांबेल:

नागपूर जंक्शन, वर्धा जंक्शन, पुलगाव जंक्शन, धामणगाव, बडनेरा जंक्शन, अकोला जंक्शन, शेगाव, मलकापूर, भुसावळ जंक्शन, नाशिक रोड, इगतपुरी, कल्याण जंक्शन, पनवेल, रोहा, माणगाव, खेड, चिपळूण, संगमेश्वर रोड, रत्नागिरी, राजापूर रोड, कणकवली, कुडाळ, सावंतवाडी रोड, थिविम, करमळी आणि मडगाव जंक्शन.

​प्रवासाचा तपशील

​एकूण अंतर: १३४२ किलोमीटर.

​सरासरी वेग: ५० ते ५२ किमी प्रति तास.

​प्रवासाचा वेळ: साधारण २६ तास ४० मिनिटे (नागपूर-मडगाव).

​ही ट्रेन नियमित झाल्यामुळे विदर्भ आणि खानदेशातील प्रवाशांना थेट गोव्याला जाण्यासाठी कायमस्वरूपी सोय उपलब्ध झाली आहे. विशेषतः सुट्ट्यांच्या काळात आणि पर्यटनासाठी जाणाऱ्या नागरिकांसाठी ही मोठी पर्वणी ठरणार आहे.

   Follow us on   

कणकवली:कोकण रेल्वे मार्गावरून धावणाऱ्या गाडी क्रमांक १२६१७ एर्नाकुलम जंक्शन – ह. निजामुद्दीन ‘मंगला लक्षद्वीप’ एक्सप्रेसच्या मान्सूनपूर्व (Non-Monsoon) वेळापत्रकात अंशतः बदल करण्याचा निर्णय रेल्वे प्रशासनाने घेतला आहे. या नवीन निर्णयानुसार, कणकवली स्थानकावरील या गाडीच्या वेळेत बदल करण्यात आला असून सुधारित वेळापत्रक १४ मे २०२६ पासून लागू होणार आहे.

​कणकवली स्थानकावर ही गाडी सध्या पहाटे ०४:४२ वाजता येऊन ०४:४४ वाजता सुटते. मात्र, नवीन बदलानुसार ही गाडी आता पहाटे ०५:२० वाजता कणकवलीत पोहोचेल आणि ०५:२२ वाजता पुढील प्रवासासाठी रवाना होईल. प्रवाशांनी या बदललेल्या वेळेची नोंद घेऊन आपला प्रवास सुकर करावा, असे आवाहन कोकण रेल्वे प्रशासनातर्फे करण्यात आले आहे. तसेच अधिक माहिती आणि ताज्या अपडेट्ससाठी प्रवाशांनी ‘KR Mirror’ ॲपचा वापर करावा, असेही कळवण्यात आले आहे.

   Follow us on   

मडगाव: दिल्ली येथे दि. २४ मे २०२६ रोजी आयोजित करण्यात आलेल्या ‘जन जातीय सांस्कृतिक संमेलना’साठी प्रवाशांची होणारी अतिरिक्त गर्दी लक्षात घेता, रेल्वे प्रशासनाने मडगाव जंक्शन आणि शकूर बस्ती (दिल्ली) दरम्यान विशेष ट्रेन चालवण्याचा निर्णय घेतला आहे. गाडी क्रमांक ०११०८ मडगाव जंक्शन – शकूर बस्ती स्पेशल ही रेल्वे शुक्रवार, दि. २२ मे २०२६ रोजी पहाटे ०२:३० वाजता मडगाव येथून सुटेल आणि दुसऱ्या दिवशी संध्याकाळी १७:१५ वाजता शकूर बस्ती येथे पोहोचेल. परतीच्या प्रवासात, गाडी क्रमांक ०११०७ शकूर बस्ती – मडगाव जंक्शन स्पेशल ही रेल्वे सोमवार, दि. २५ मे २०२६ रोजी मध्यरात्री ०१:०० वाजता सुटेल आणि दुसऱ्या दिवशी संध्याकाळी १७:४५ वाजता मडगाव जंक्शनला पोहोचेल.

​या विशेष ट्रेनला प्रवासादरम्यान करमळी, थिवी, रत्नागिरी, चिपळूण, रोहा, पनवेल, कामण रोड, वसई रोड, उधना जंक्शन, सुरत, वडोदरा जंक्शन, गोधरा जंक्शन, दाहोद, रतलाम जंक्शन, नागदा जंक्शन, कोटा जंक्शन, मथुरा जंक्शन आणि पलवल या स्थानकांवर थांबा देण्यात आला आहे. या गाडीची रचना एकूण २२ डब्यांची असून, त्यामध्ये १८ शयनयान (Sleeper), २ जनरल आणि २ एसएलआर (SLR) डब्यांचा समावेश असेल. प्रवाशांनी या विशेष सुविधेचा लाभ घेण्याचे आवाहन रेल्वे प्रशासनाकडून करण्यात आले आहे.

   Follow us on   

सिंधुदुर्ग: कोकण रेल्वे प्रकल्पासाठी सिंधुदुर्ग जिल्ह्यातील ज्या स्थानिक नागरिकांच्या जमिनी संपादित करण्यात आल्या आहेत, त्यांना रोजगाराच्या संधी उपलब्ध करून देण्यासाठी आमदार नितेश राणे यांनी पुढाकार घेतला आहे. यासंदर्भात आज त्यांच्या शासकीय निवासस्थानी एक विशेष बैठक पार पडली. या बैठकीत प्रकल्पग्रस्तांच्या प्रलंबित प्रश्नांवर सविस्तर चर्चा करण्यात आली.

​अनेक वर्षांपूर्वी जमिनी देऊनही अद्याप अनेक प्रकल्पग्रस्त रोजगाराच्या प्रतीक्षेत आहेत, ही बाब नितेश राणे यांनी रेल्वे प्रशासनाच्या निदर्शनास आणून दिली. रेल्वे प्रशासनाने तातडीने अशा नागरिकांची एक स्वतंत्र यादी तयार करावी आणि त्यांना नोकरीमध्ये प्राधान्य द्यावे, अशा स्पष्ट सूचना त्यांनी यावेळी दिल्या. केवळ थेट नोकरीच नव्हे, तर रेल्वे स्थानकांवरील स्टॉल्सचे वाटप आणि अनुकंपा तत्त्वावरील भरतीमध्येही प्रकल्पग्रस्तांच्या कुटुंबांना प्राधान्याने संधी मिळावी, असे निर्देशही त्यांनी दिले.

​या महत्त्वपूर्ण बैठकीला कोकण रेल्वेचे व्यवस्थापकीय संचालक संतोष कुमार झा आणि मुख्य जनसंपर्क अधिकारी सुनील नारकर उपस्थित होते. रेल्वे प्रशासनाने यावर तातडीने सकारात्मक कार्यवाही करावी, अशी मागणी नितेश राणे यांनी केली असून, यामुळे जिल्ह्यातील अनेक बेरोजगारांना दिलासा मिळण्याची शक्यता निर्माण झाली आहे.

   Follow us on   

वैभववाडी: सिंधुदुर्ग जिल्ह्यातील वैभववाडी तालुक्यात रेल्वे स्टेशन सुशोभीकरण आणि मुख्य रस्त्यांच्या काँक्रिटीकरणाची मागणी जोर धरू लागली आहे. स्थानिक नागरिक ओंकार लाड यांनी मुख्यमंत्री देवेंद्र फडणवीस, मुख्यमंत्री कार्यालय आणि कोकण रेल्वे प्रशासनाला टॅग करत सोशल मीडियावरून तीव्र नाराजी व्यक्त केली. त्यांनी शेअर केलेल्या व्हिडिओत वैभववाडी परिसरातील रस्त्यांची दयनीय अवस्था स्पष्ट दिसत आहे. खड्डे, गाळ, खडी आणि पाण्याचे डबके यामुळे वाहनचालक आणि नागरिकांना मोठा त्रास सहन करावा लागत आहे.

“आम्ही आयुष्यभर हाच त्रास सहन करायचा का? अशा रस्त्यावरून प्रवास म्हणजे तालुक्यातील लोकांचा अपमान आहे,” असे भावनिक आवाहन करत त्यांनी त्वरित लक्ष घालण्याची विनंती केली आहे.

सद्यस्थितीत कोकणातील आंबा महोत्सव आणि शेतकऱ्यांच्या विकासावर चर्चा सुरू असताना, स्थानिक पातळीवरील मूलभूत सुविधांबाबतची ही तक्रार वैभववाडीतील विकासकामांवर प्रश्नचिन्ह उभे करते. नागरिक आता प्रशासनाकडून लवकरात लवकर या समस्येवर तोडगा निघण्याची अपेक्षा करत आहेत.

वैभववाडी रेल्वे स्टेशन चे सुशोभीकरण आणि रस्त्याचे काँक्रिटीकरण कधी होणार ? आम्ही आयुष्यभर हाच त्रास सहन करायचा का ? अश्या रस्त्यावरून प्रवास म्हणजे तालुक्यातील लोकांचा अपमान आहे .. कृपया त्वरित लक्ष घालावे.. @KonkanRailway @Dev_Fadnavis @CMOMaharashtra pic.twitter.com/0awAvOtI6z

— ONKAR LAD (@ONKARLAD27) May 10, 2026