मुंबई : मुंबई उपनगरीय रेल्वेच्या प्रवासी क्षमतेत मोठी वाढ करण्याच्या दृष्टीने पश्चिम रेल्वेने एक क्रांतिकारी पाऊल उचलले आहे. वाढत्या गर्दीवर नियंत्रण मिळवण्यासाठी आणि प्रवाशांचा प्रवास सुखकर करण्यासाठी विरार-डहाणू रोड विभागावर १८ डब्यांच्या लोकल ट्रेनची विशेष चाचणी घेण्याचे निश्चित करण्यात आले आहे. ही चाचणी १४ आणि १५ जानेवारी २०२६ रोजी पार पडणार असून, याद्वारे मुंबईच्या रेल्वे प्रवासाचा चेहरामोहरा बदलण्याच्या हालचालींना वेग आला आहे. या चाचणीमध्ये प्रामुख्याने ‘इमर्जन्सी ब्रेकिंग डिस्टन्स’ (EBD) आणि ‘कपलर फोर्स’ म्हणजेच डब्यांमधील जोडणीवर येणारा ताण यांची तांत्रिक तपासणी केली जाईल. आपत्कालीन परिस्थितीत वेगाने धावणारी १८ डब्यांची गाडी किती अंतरावर सुरक्षितपणे थांबू शकते, हे पाहणे या चाचणीचा मुख्य उद्देश आहे.
या प्रक्रियेत बॉम्बार्डियर (Bombardier) आणि मेधा (Medha) या दोन वेगवेगळ्या बनावटीच्या १८ डब्यांच्या गाड्यांची ताकद अजमावली जाणार आहे. बॉम्बार्डियर क्लासची चाचणी ११० किमी प्रतितास, तर मेधा इलेक्ट्रिकलची चाचणी १०५ किमी प्रतितास या वेगाने घेतली जाईल. विरार-डहाणू पट्टा हा विनाअडथळा वेगवान धावण्यासाठी योग्य असल्याने या भागाची निवड करण्यात आली आहे. सध्या मुंबईत १२ आणि १५ डब्यांच्या लोकल धावत असल्या तरी १८ डब्यांची सेवा सुरू झाल्यास एकाच वेळी हजारो जादा प्रवाशांना प्रवास करता येईल. या चाचण्यांचे निकाल सकारात्मक आल्यास, मुंबईच्या रेल्वे इतिहासात हा एक ऐतिहासिक बदल ठरेल आणि भविष्यात गर्दीच्या समस्येवर हा एक प्रभावी उपाय ठरणार आहे.
