Follow us on   

सिंधुदुर्ग: जिल्हा परिषदेच्या अंतर्गत शिक्षकांच्या २८२ रिक्त पदांसाठी भरतीची मोहीम आता गती घेत आहे. ही संपूर्ण भरती प्रक्रिया महाराष्ट्र राज्य सरकारच्या ‘पवित्र’ प्रणालीच्या माध्यमातून पारदर्शकपणे राबवली जात आहे.

​या भरतीसाठी शिक्षक अभियोग्यता व बुद्धिमत्ता चाचणी-२०२५ मधील गुण हे मुख्य आधार मानले गेले आहेत. या परीक्षेच्या निकालांनंतर, उपलब्ध रिक्त पदे आणि सरकारी आरक्षण धोरणानुसार अधिकृत जाहिरात पोर्टलवर प्रसिद्ध करण्यात आली आहे.

​भरती प्रक्रियेत सामाजिक न्याय टिकवून ठेवण्यासाठी अनुसूचित जाती, जमाती, विमुक्त व भटक्या जमातींसह आर्थिकदृष्ट्या दुर्बल घटकांसाठी आरक्षण निश्चित करण्यात आले आहे. यासोबतच महिला, माजी सैनिक आणि विविध प्रकल्पग्रस्तांसाठी समांतर आरक्षणाची तरतूदही करण्यात आली आहे.

​पात्र उमेदवारांनी १३ ऑगस्ट ही अंतिम तारीख लक्षात घेऊन पवित्र पोर्टलवर लॉग-इन करावे आणि आपल्या पसंतीनुसार पदांचा प्राधान्यक्रम नोंदवून तो वेळेत लॉक करणे आवश्यक आहे. प्राधान्यक्रम लॉक केल्यावरच उमेदवारांचा अंतिम निवड प्रक्रियेत विचार केला जाईल.

​उमेदवारांना आवाहन करण्यात आले आहे की, फॉर्म भरण्यापूर्वी पोर्टलवरील सर्व अटी, पात्रता आणि रिक्त पदांचा तपशील काळजीपूर्वक तपासावा. प्रक्रियेत काही तांत्रिक अडचण किंवा आक्षेप असल्यास, ते अधिकृत ई-मेलद्वारे नोंदवण्याची सुविधाही उपलब्ध करून देण्यात आली आहे.

   Follow us on   

नवी मुंबई: ​कोकण रेल्वेमध्ये विविध तांत्रिक आणि अतांत्रिक अशा दोनशेहून अधिक रिक्त जागा भरण्यासाठी भरतीची अधिकृत अधिसूचना शनिवारी प्रसिद्ध करण्यात आली असून, इच्छुक उमेदवारांना आता नोकरीची मोठी संधी उपलब्ध झाली आहे. या प्रक्रियेअंतर्गत कनिष्ठ अभियंता, स्टेशन मास्टर, ट्रॅक मेंटेनर आणि सहाय्यक लोको पायलट यांसारख्या महत्त्वाच्या पदांवर उमेदवारांची निवड केली जाणार आहे.

​रेल्वे प्रशासनाने जाहीर केलेल्या या भरतीमध्ये विविध श्रेणींमधील रिक्त पदांचा तपशील देण्यात आला आहे. यामध्ये कनिष्ठ अभियंता (सिव्हील) २५, ट्रॅक मेंटेनर ५७, वरिष्ठ विभाग अभियंता (एस अँड टी) ५ आणि ईएसटीएम-III १५ अशा पदांचा समावेश आहे. तसेच, नियंत्रक पदासाठी ९, स्टेशन मास्टरसाठी १५, मालगाडी व्यवस्थापकासाठी १० आणि सहाय्यक लोको पायलटसाठी ३० जागा भरल्या जाणार आहेत.

​याशिवाय, या भरतीमध्ये वरिष्ठ विभाग अभियंता (मेकॅनिकल) साठी ६, कनिष्ठ अभियंता (मेकॅनिकल) साठी ७, तंत्रज्ञ-III (मेकॅनिकल) साठी १५ आणि वाणिज्य पर्यवेक्षक पदासाठी ७ जागा निश्चित करण्यात आल्या आहेत. या सर्व पदांच्या भरतीमुळे रेल्वेच्या विविध विभागांमधील मनुष्यबळाची कमतरता भरून काढण्यास मदत होणार आहे.

​एकूण भरती प्रक्रियेत राखीव जागांची तरतूदही करण्यात आली असून, यामध्ये माजी सैनिकांसाठी १९ पदे, तर दिव्यांग उमेदवारांसाठी १ जागा आरक्षित ठेवण्यात आली आहे. सामाजिक न्याय आणि नियमांच्या अधीन राहून ही पदे भरली जाणार असल्याने पात्र उमेदवारांसाठी ही एक महत्त्वाची बातमी आहे.

​उमेदवारांनी या भरती प्रक्रियेची शैक्षणिक पात्रता, अर्जाच्या अटी आणि इतर सविस्तर माहिती जाणून घेण्यासाठी कोकण रेल्वेच्या अधिकृत संकेतस्थळाला (www.konkanrailway.com) भेट द्यावी. अर्ज करण्याची प्रक्रिया ऑनलाईन असून, संकेतस्थळावरील ‘Recruitment’ विभागातील ‘Current Notification’ या लिंकवर जाऊन उमेदवार आपला अर्ज सादर करू शकतात.

   Follow us on   

राज्यातील स्थानिक स्वराज्य संस्था तसेच खाजगी व्यवस्थापनाच्या शाळांमधील शिक्षण सेवक व शिक्षक पदांसाठी पवित्र पोर्टलच्या माध्यमातून पारदर्शक आणि गुणवत्ताधारित पद्धतीने भरती प्रक्रिया सुरू करण्यात आली आहे. शालेय शिक्षण आयुक्त सच्चिंद्रप्रताप सिंह यांनी दिलेल्या माहितीनुसार, राज्यभरात एकूण ३० हजार २०९ रिक्त पदांची भरती मागणी नोंदविण्यात आली आहे.

​या भरती प्रक्रियेसाठी शिक्षक अभियोग्यता व बुद्धिमत्ता चाचणी (टीएआयटी) -२०२५ ऑनलाईन पद्धतीने २७ मे ते ५ जून २०२५ या कालावधीत पार पडली होती. या परीक्षेसाठी २ लाख २८ हजार ८०८ उमेदवारांनी नोंदणी केली होती, त्यापैकी २ लाख ११ हजार ३०८ उमेदवार प्रविष्ट झाले असून १ लाख ७० हजार १०८ उमेदवारांनी आपली स्वप्रमाणपत्र प्रक्रिया पूर्ण केली आहे.

​प्रसिद्ध करण्यात आलेल्या रिक्त पदांच्या तपशिलानुसार, जिल्हा परिषदांच्या १३,३५१, महानगरपालिकांच्या १,९५४, नगर पालिका/परिषदांच्या २८०, खाजगी संस्थांच्या १२,१४८, आदिवासी विकास विभागाच्या शाळांमधील २,४२१ आणि शासकीय विद्यानिकेतनांच्या ५६ पदांचा यामध्ये समावेश आहे. यातील १९,८८१ पदे मुलाखतीशिवाय तर १०,३२८ पदे मुलाखतीसह भरली जाणार आहेत.

​वर्गनिवार विचार केल्यास, इयत्ता पहिली ते पाचवीसाठी १४,३२०, सहावी ते आठवीसाठी १०,०१२, नववी व दहावीसाठी ५,५१३ आणि अकरावी व बारावीसाठी ३६४ पदांची भरती केली जाणार आहे. उमेदवारांना पदभरतीसाठी ठरवून दिलेल्या अधिकृत संकेतस्थळावर जाऊन ६ ऑगस्ट २०२६ पासून प्राधान्यक्रम निश्चित करण्याची सुविधा उपलब्ध करून देण्यात आली आहे.

​सर्व पात्र उमेदवारांनी पदनिहाय पसंतीक्रम नोंदवून तो ११ ऑगस्ट २०२६ पर्यंत अनिवार्यपणे लॉक करणे आवश्यक आहे, त्यानंतर मुलाखतीशिवायच्या पदांची गुणवत्तायादी प्रसिद्ध केली जाईल. या संपूर्ण प्रक्रियेशी संबंधित काही सूचना किंवा तक्रार असल्यास उमेदवारांनी ठरवून दिलेल्या ई-मेल पत्त्यावर संपर्क साधण्याचे आवाहन शालेय शिक्षण विभागाने केले आहे.

   Follow us on   

नवी मुंबई:

महाराष्ट्र लोकसेवा आयोगाने (MPSC) ‘महाराष्ट्र गट-क सेवा संयुक्त पूर्व परीक्षा – २०२६’ बाबत अत्यंत महत्त्वाचे शुद्धीपत्रक जारी केले आहे. स्पर्धा परीक्षेची तयारी करणाऱ्या उमेदवारांसाठी ही मोठी दिलासादायक बातमी असून, या भरतीमध्ये नवीन पदांचा समावेश करण्यात आला आहे तसेच अर्ज भरण्यासाठी मुदतवाढ देण्यात आली आहे.

​महत्त्वाचे बदल आणि ठळक मुद्दे:

​एकूण पदसंख्या: यापूर्वी २६१९ पदांसाठी जाहिरात प्रसिद्ध करण्यात आली होती. मात्र, शासनाकडून प्राप्त झालेल्या नवीन मागणीपत्रानुसार आता एकूण ३०८८ पदांचा समावेश या परीक्षेत करण्यात आला आहे.

​अर्ज भरण्यासाठी मुदतवाढ: उमेदवारांना अर्ज सादर करण्यासाठी आता ३१ जुलै, २०२६ पर्यंत मुदतवाढ देण्यात आली आहे.

​परीक्षेची तारीख: सदर पूर्व परीक्षा २५ ऑक्टोबर, २०२६ रोजी प्रचलित पद्धतीने (Offline – OMR आधारित) घेतली जाणार आहे.

​समाविष्ट करण्यात आलेली प्रमुख पदे:

​१. ग्राम महसूल अधिकारी (तलाठी), गट-क: १५३९ पदे

२. सहाय्यक मत्स्यव्यवसाय विकास अधिकारी (तांत्रिक), गट-क: २५४ पदे

३. लिपिक-टंकलेखक (विविध विभाग): एकूण ९२४ पदे (नियंत्रक शिधावाटप, अन्न व नागरी पुरवठा, आदिवासी विकास आणि महसूल व वन विभाग)

४. लिपिक-टंकलेखक (नोंदणी व मुद्रांक विभाग): ३३१ पदे

५. वरिष्ठ अभिलेखपाल / वरिष्ठ लिपिक व सहाय्यक अधीक्षक: २२ पदे

​विविध संवर्गातील वयोमर्यादा, शैक्षणिक पात्रता आणि इतर सविस्तर अटींसाठी उमेदवारांनी MPSC च्या अधिकृत संकेतस्थळाला (mpsc.gov.in) भेट देऊन अधिकृत प्रसिद्धीपत्रक तपासावे.

   Follow us on   

​मुंबई:

महाराष्ट्र शासनाचा अंगीकृत उपक्रम असलेल्या ‘महाराष्ट्र गृहनिर्माण विकास महामंडळा’तर्फे (Maha Housing Corporation) विविध पदांसाठी कंत्राटी व तात्पुरत्या स्वरूपात भरती प्रक्रिया राबविण्यात येत आहे. महामंडळामार्फत प्रधानमंत्री आवास योजनेअंतर्गत सोलापूर, नागपूर, बारामती येथे गृहनिर्माण प्रकल्प राबविण्यात येत असून, आगामी काळात राज्यातील विविध ठिकाणी नवीन प्रकल्प नियोजित आहेत. या पार्श्वभूमीवर पात्र आणि अनुभवी उमेदवारांकडून अर्ज मागविण्यात आले आहेत.

​भरतीची सविस्तर माहिती खालीलप्रमाणे:

​१. पदांचा तपशील आणि एकूण संख्या:

महामंडळातील एकूण ३३ रिक्त पदांसाठी ही भरती होणार आहे. यामध्ये खालील पदांचा समावेश आहे:

• ​संचालक (तांत्रिक) – ०१ पद
• ​संचालक (लेखा व वित्त) – ०१ पद
• ​कनिष्ठ अधिकारी (जमीन) (नायब तहसीलदार) – ०१ पद
• ​सहाय्यक / कनिष्ठ अधिकारी (प्रशासन / जमीन) – ०२ पदे
• ​कार्यकारी अभियंता (स्थापत्य) – ०१ पद
• ​उपअभियंता (स्थापत्य) – ०१ पद
• ​कनिष्ठ अभियंता (स्थापत्य) – ०७ पदे
• ​कनिष्ठ अभियंता (विद्युत) – ०१ पद
• ​सहाय्यक नगररचनाकार – ०१ पद
• ​वास्तुविशारद – ०१ पद
• ​आरेखक (Draftsman) – ०१ पद
• ​लेखाधिकारी – ०१ पद
• ​सहाय्यक विपणन अधिकारी – ०१ पद
• ​लिपिक-टंकलेखक – ०८ पदे
• ​शिपाई – ०५ पदे

​२. नियुक्तीचे स्वरूप व कालावधी:

• ​सेवानिवृत्त अधिकारी/कर्मचारी: शासकीय कार्यालये, शासकीय उपक्रम, संविधिक संस्था, मंडळे, महामंडळे किंवा स्थानिक स्वराज्य संस्थांमधील सेवानिवृत्त अधिकाऱ्यांमधून कंत्राटी पद्धतीने तात्पुरत्या स्वरूपात १ वर्षाच्या कालावधीकरिता पदे भरली जातील.
• ​खाजगी क्षेत्रातील उमेदवार: खाजगी क्षेत्रातून प्राप्त अर्जांमधून पात्रता व अनुभवाच्या आधारे कंत्राटी तत्त्वावर तात्पुरत्या स्वरूपात ११ महिन्यांच्या कालावधीकरिता नियुक्ती केली जाईल.

​३. अर्ज कसा करावा?

इच्छुक आणि पात्र उमेदवारांनी विहित नमुन्यातील अर्ज, आपल्या आवश्यक शैक्षणिक व अनुभवाच्या प्रमाणपत्रांच्या साक्षांकित प्रतींसह दि. २६.०७.२०२६ पर्यंत जाहिरातीत नमूद पत्त्यावर (३रा मजला, साखर भवन, रामनाथ गोयंका मार्ग, नरिमन पॉईंट, मुंबई – ४०००२१) किंवा [email protected] या ई-मेल आयडीवर पाठवावे.

​४. मानधन आणि अधिकृत संकेतस्थळ:

उमेदवारांची गुणवत्ता व अनुभव विचारात घेऊन दरमहा ठोक पारिश्रमिक (मानधन) निश्चित करण्याचे अधिकार महामंडळास राहतील. या पदभरतीबाबतची सविस्तर माहिती, पात्रता निकष, अटी व शर्ती तसेच अर्जाचा विहित नमुना https://mahahousing.mahaonline.gov.in या संकेतस्थळावर उपलब्ध आहे.

   Follow us on   

सिंधुदुर्गनगरी:

कोकण रेल्वे महामंडळाने १४ तारखेला प्रसिद्ध केलेल्या परिपत्रकानुसार १३२ पदांच्या भरतीसाठी प्रक्रिया सुरू केली आहे. या अंतर्गत २२ जूनपासून ऑफलाइन पद्धतीने मुलाखतींचे आयोजन करण्यात आले आहे. मात्र, या मुलाखतींचे केंद्र थेट आंध्र प्रदेशातील विशाखापट्टणम येथे निश्चित करण्यात आले आहे. मुलाखतींचे केंद्र राज्याबाहेर ठेवण्यात आल्यामुळे कोकणातील सुशिक्षित आणि बेरोजगार तरुणांमध्ये तीव्र नाराजी आणि असंतोष पसरला आहे. या पार्श्वभूमीवर, मुलाखती महाराष्ट्राबाहेर न घेता त्या रत्नागिरी येथे आयोजित करण्यात याव्यात, अशी आग्रही मागणी ‘कोकण रेल्वे प्रवासी समन्वय संघर्ष समितीने’ केली आहे. या संदर्भात समितीच्या वतीने पालकमंत्री नितेश राणे यांना एक निवेदनही सुपूर्द करण्यात आले आहे.

​समितीने आपल्या निवेदनात स्थानिक उमेदवारांच्या व्यथा मांडल्या आहेत. कोकण रेल्वेच्या भरती प्रक्रियेमध्ये यापूर्वीही स्थानिक उमेदवारांवर सतत अन्याय झाल्याच्या तक्रारी पुढे आल्या आहेत. कोकणातील अनेक स्थानिक युवकांनी परीक्षा देऊनही त्यांना योग्य संधी मिळाली नाही, उलट परप्रांतीय उमेदवारांना जाणीवपूर्वक प्राधान्य दिले जात असल्याचा गंभीर आरोपही यावेळी करण्यात आला आहे. त्यामुळे स्थानिकांना न्याय मिळवून देण्यासाठी या मुलाखती विशाखापट्टणमऐवजी तात्काळ रत्नागिरीत वर्ग कराव्यात, अशी मागणी जोर धरत आहे.

   Follow us on   

मुंबई: बँकिंग क्षेत्रात करिअर करू इच्छिणाऱ्या तरुणांसाठी एक सुवर्णसंधी चालून आली आहे. स्टेट बँक ऑफ इंडिया (SBI) ने अप्रेंटिस कायदा १९६१ अंतर्गत विविध राज्यांमध्ये एकूण ७,१५० अप्रेंटिस (Apprentices) पदांच्या भरतीसाठी अधिकृत अधिसूचना (Advt.No. CRPD/APPR/2026-27/07) जारी केली आहे. महाराष्ट्रात ५०४ जागा रिक्त असून, ८ जून २०२६ पर्यंत ऑनलाईन अर्ज मागविण्यात येत आहेत.

​रिक्त पदांचा तपशील आणि महाराष्ट्रातील स्थिती:

​या भरती प्रक्रियेत राज्यानुसार जागांची विभागणी करण्यात आली असून, उमेदवारांना संबंधित राज्याच्या स्थानिक भाषेचे ज्ञान होना आवश्यक आहे.

​महाराष्ट्र (मराठी): ५०४ पदे (खुला प्रवर्ग – २२५, इमाव – १३५, अजा – ५०, अज – ४४, ईडब्ल्यूएस – ५०). यामध्ये २१ पदे दिव्यांग प्रवर्गासाठी राखीव आहेत.

​इतर राज्ये: गुजरात (२१७ पदे), आंध्र प्रदेश (७०९ पदे), कर्नाटक (२७६ पदे), मध्य प्रदेश (२८५ पदे), गोवा (१६ पदे).

​महाराष्ट्रातील प्रमुख जिल्ह्यांनुसार रिक्त जागा:

​पुणे (२०), नाशिक (१६), रायगड (१५), औरंगाबाद/छ. संभाजीनगर (१४), सोलापूर (१४), कोल्हापूर (१३), सांगली (१३), नागपूर (१३), सातारा (१३), अहमदनगर (१३), अकोला (१२), अमरावती (१२), लातूर (१२), नांदेड (१२), उस्मानाबाद (१२), परभणी (१२), जळगाव (१२), बीड (११), जालना (११), गडचिरोली (११), गोंदिया (११), धुळे (११), नंदुरबार (११), बुलढाणा (१०), वाशिम (१०), भंडारा (१०), चंद्रपूर (१०), वर्धा (१०), हिंगोली (१०), मुंबई आणि मुंबई उपनगरे (१०), रत्नागिरी (४), सिंधुदुर्ग (३).

​पात्रतेचे निकष:

​१. शैक्षणिक पात्रता: मान्यताप्राप्त विद्यापीठाकडून कोणत्याही शाखेतील पदवी (Graduation) उत्तीर्ण असणे आवश्यक आहे.

२. वयोमर्यादा (दि. १ एप्रिल २०२६ रोजी): उमेदवाराचे वय २० ते २८ वर्षे दरम्यान असावे (उमेदवाराचा जन्म १ एप्रिल २००६ ते २ एप्रिल १९९८ च्या दरम्यान असावा). नियमांनुसार उच्च वयोमर्यादेत सूट दिली जाईल: इमाव (OBC) – ३ वर्षे, अजा/अज (SC/ST) – ५ वर्षे, दिव्यांग – १० वर्षे.

​ट्रेनिंग कालावधी आणि विद्यावेतन (Stipend):

​निवड झालेल्या उमेदवारांना १ वर्षाचा ट्रेनिंग कालावधी पूर्ण करावा लागेल. या कालावधीत अप्रेंटिसना दरमहा रु. १५,०००/- स्टायपेंड दिले जाईल.

​निवड पद्धती आणि परीक्षा स्वरूप:

​उमेदवारांची निवड ऑनलाईन लेखी परीक्षा आणि स्थानिक भाषेची परीक्षा या आधारे केली जाईल.

​ऑनलाईन परीक्षा: ही परीक्षा जुलै २०२६ मध्ये महाराष्ट्रातील प्रमुख केंद्रांवर आयोजित केली जाईल. यामध्ये ऑब्जेक्टिव्ह टाईप १०० प्रश्न (१०० गुण) असतील आणि वेळ ६० मिनिटे असेल.

​विषय: (१) जनरल/फायनान्शियल अवेअरनेस, (२) जनरल इंग्लिश, (३) क्वांटिटेटिव्ह ॲप्टीट्यूड, (४) रिझनिंग ॲबिलिटी अँड कॉम्प्युटर ॲप्टीट्यूड. प्रत्येक विषयाला २५ प्रश्न असतील.

​नकारात्मक गुण: चुकीच्या उत्तरासाठी १/४ गुण वजा केले जातील.

​स्थानिक भाषेची परीक्षा: ऑनलाईन परीक्षा उत्तीर्ण झाल्यानंतर ही परीक्षा होईल. मात्र, ज्या उमेदवारांनी १० वी किंवा १२ वीत स्थानिक भाषा (मराठी) अभ्यासली आहे, त्यांना ही परीक्षा देण्याची गरज नाही.

​परीक्षा शुल्क:

​खुला/इमाव/ईडब्ल्यूएस (General/OBC/EWS): रु. ३००/-

​अजा/अज/दिव्यांग (SC/ST/PWD): परीक्षा शुल्क नाही (मोफत).

​भविष्यातील मोठा फायदा:

​स्टेट बँक ऑफ इंडियामधून अप्रेंटिसशिप यशस्वीरीत्या पूर्ण करणाऱ्या उमेदवारांना बँकेतील ‘ज्युनिअर असोसिएट’ (Junior Associate – लिपिक वर्ग) पदाच्या भविष्यातील भरतीमध्ये विशेष वेटेज / सूट देण्यात येईल.

​अर्ज कसा करावा?

​इच्छुक उमेदवारांनी https://bank.sbi/careers किंवा https://sbi.co.in/careers या संकेतस्थळावर जाऊन ८ जून २०२६ पर्यंत ऑनलाईन अर्ज सादर करावा. अर्ज करण्यापूर्वी उमेदवारांनी https://bfsissc.com किंवा NAPS पोर्टल https://apprenticeshipindia.gov.in वर नोंदणी करणे बंधनकारक आहे.

   Follow us on   

ठाणे:

महाराष्ट्र शासनाच्या कौशल्य विकास, रोजगार, उद्योजकता व नावीन्यता विभागामार्फत ठाणे जिल्ह्यातील युवक-युवतींसाठी इस्राईलमध्ये रोजगाराची एक मोठी आणि सुवर्णसंधी उपलब्ध झाली आहे. इस्राईलमध्ये ‘होम बेस्ड केअरगिव्हर’ (Home Based Caregiver) या क्षेत्रात तब्बल ५ हजार पदांसाठी मोठी भरती प्रक्रिया राबविण्यात येत आहे. पात्र उमेदवारांनी या संधीचा जास्तीत जास्त लाभ घ्यावा, असे आवाहन जिल्हा कौशल्य विकास, रोजगार व उद्योजकता मार्गदर्शन केंद्राच्या सहाय्यक आयुक्त संध्या साळुंखे यांनी केले आहे.

​या भरतीसाठी उमेदवारांचे वय २५ ते ४५ वर्षे वयोगटात असणे आवश्यक असून, त्यांना इंग्रजी भाषेचे सामान्य ज्ञान असणे गरजेचे आहे. पात्रतेसाठी उमेदवारांकडे घरगुती सहाय्यक सेवांसाठी भारतातील मान्यताप्राप्त नियामक संस्थेकडून प्रमाणित केलेला किमान १९० तासांचा प्रशिक्षण अभ्यासक्रम पूर्ण केल्याचे प्रमाणपत्र असणे आवश्यक आहे. याशिवाय मिडवाइफरी, नर्सिंग, फिजिओथेरपी, नर्स असिस्टंट यांसारख्या आरोग्य क्षेत्रातील प्रशिक्षण पूर्ण केलेले उमेदवार किंवा GD, ANM, GNM, B.Sc Nursing किंवा Post B.Sc Nursing यांपैकी कोणतीही शैक्षणिक पात्रता असलेले उमेदवार यासाठी पात्र मानले जातील.

​या भरती प्रक्रियेचे मुख्य वैशिष्ट्य म्हणजे इस्राईलमधील या नोकरीसाठीची निवड प्रक्रिया आणि नियुक्ती पत्रांचे वाटप महाराष्ट्रातच होणार आहे. अंतिम निवड झालेल्या उमेदवारांना वैद्यकीय विमा (मेडिकल विमा), निवास (राहण्याची सोय) आणि भोजनाची सुविधा उपलब्ध करून दिली जाणार आहे. तसेच, या नोकरीच्या माध्यमातून उमेदवारांना दरमहा १ लाख ६१ हजार रुपयांपर्यंत आकर्षक वेतन मिळण्याची संधी उपलब्ध आहे.

​इच्छुक आणि पात्र उमेदवारांनी या सुवर्णसंधीचा लाभ घेण्यासाठी maharashtrainternational.com या अधिकृत संकेतस्थळावर जाऊन आपली नोंदणी करावी व अर्ज सादर करावा. या भरती संदर्भातील अधिक माहितीसाठी उमेदवारांनी ‘जिल्हा कौशल्य विकास, रोजगार व उद्योजकता मार्गदर्शन केंद्र, ठाणे’ येथे संपर्क साधावा, असे आवाहन करण्यात आले आहे.