Follow us on   

नवी दिल्ली: राजधानी दिल्लीमध्ये नुकताच बारामती लोकसभा मतदारसंघाच्या खासदार सुप्रिया सुळे यांच्या कन्या रेवती सुळे आणि जावई सारंग लखाणी यांचा विवाह रिसोप्शन सोहळा मोठ्या दिमाखात पार पडला. या उच्च-स्तरीय सोहळ्यामध्ये देश-विदेशातील आणि विविध क्षेत्रातील अनेक दिग्गज आणि मोठे राजकीय नेते उपस्थित राहिल्याचे पाहायला मिळाले.

​या भव्य कार्यक्रमाला सत्ताधारी आणि विरोधक असे दोन्ही बाजूंचे नेते एकाच छताखाली एकत्र आल्याचे दिसून आले. यामध्ये विशेष करून पंतप्रधान नरेंद्र मोदी, गृहमंत्री अमित शाह, विरोधी पक्षनेते राहुल गांधी आणि खासदार प्रियांका वाड्रा यांसारख्या प्रमुख नेत्यांची उपस्थिती लक्षवेधी ठरली.

​याच शानदार सोहळ्यातील एक व्हिडिओ सध्या सोशल मीडियावर तुफान व्हायरल होत असून, यामध्ये कोकणातील एक तरुण थेट देशाचे पंतप्रधान नरेंद्र मोदी यांच्याशी संवाद साधताना दिसत आहे. ‘फणसाचा राजा’ म्हणून ओळखल्या जाणाऱ्या या तरुणने उपस्थितांचे लक्ष वेधून घेतले असून त्याची सर्वत्र चर्चा होत आहे.

​व्हिडिओमध्ये झळकणारा हा तरुण कोकणातील रत्नागिरी जिल्ह्यातील लांजा तालुक्यातील झोपडे गावचा रहिवासी असून त्याचे नाव मिथिलेश देसाई आहे. त्यांना ‘फणस किंग’ म्हणूनही ओळखले जाते आणि त्यांनी रत्नागिरीमध्ये खास फणसाची एक वेगळी बाग तयार केली आहे.

​मिथिलेश देसाई यांनी आपल्या शैक्षणिक पार्श्वभूमीबद्दल बोलायचे तर, त्यांनी राहूरी कृषी विद्यापीठातून BTech ॲग्रिकल्चरल इंजिनिअरिंग या विषयात पदवी प्राप्त केली आहे. दिल्लीच्या या खास सोहळ्यात त्यांनी पंतप्रधान नरेंद्र मोदी यांची भेट घेऊन आपल्या फणसाच्या कार्याविषयी आणि प्रकल्पाविषयी थेट पंतप्रधानांना सविस्तर माहिती दिली.

   Follow us on   

रत्नागिरी:

​रत्नागिरी जिल्ह्यातील भगवती बंदर येथे अत्याधुनिक क्रूझ टर्मिनल विकसित करण्याच्या प्रकल्पाला गती देण्यात येणार आहे. या महत्त्वाच्या प्रकल्पाळुळे कोकणातील सागरी पर्यटन, स्थानिक रोजगार आणि आर्थिक विकासाला मोठी चालना मिळेल, असा ठाम विश्वास मत्स्यव्यवसाय व बंदरे मंत्री नितेश राणे यांनी व्यक्त केला आहे.

​या प्रकल्पाबाबत मंत्रालयात एका विशेष आढावा बैठकीचे आयोजन करण्यात आले होते, ज्यामध्ये मंत्री नितेश राणे बोलत होते. या बैठकीला महाराष्ट्र मेरिटाइम बोर्डाचे मुख्य कार्यकारी अधिकारी प्रदीप पी. तसेच संबंधित विभागांचे वरिष्ठ अधिकारी उपस्थित होते.

​मंत्री नितेश राणे यांनी बैठकीत सांगितले की, कोकण किनारपट्टीची नैसर्गिक संपन्नता, ऐतिहासिक वारसा आणि पर्यटन क्षमता लक्षात घेता भगवती बंदर येथे होणारे क्रूझ टर्मिनल राज्याच्या सागरी पर्यटन क्षेत्रासाठी अत्यंत महत्त्वाचा टप्पा ठरणार आहे.

​या प्रकल्पाची अंमलबजावणी झाल्यास देशांतर्गत तसेच आंतरराष्ट्रीय पर्यटकांना दर्जेदार सुविधा उपलब्ध होऊ शकतील. यामुळे रत्नागिरी पर्यटन जागतिक नकाशावर अधिक ठळकपणे झळकण्यास मोठी मदत होईल.

​मुख्यमंत्री देवेंद्र फडणवीस यांच्या नेतृत्वाखाली राज्य शासन कोकणातील बंदर विकास आणि सागरी पर्यटनाला सर्वोच प्राधान्य देत आहे, असेही मंत्री नितेश राणे यांनी शेवटी सांगितले.

   Follow us on        

रायगड: पावसाचा लहरीपणा, अतिवृष्टी आणि नैसर्गिक अडचणींवर यशस्वी मात करत पनवेल तालुक्यातील गुळसुंदे येथील प्रयोगशील ‘कृषी भूषण’ शेतकरी मिनेश गाडगीळ यांनी जागतिक स्तरावर प्रसिद्ध असलेल्या थायलंडच्या ‘जस्मिन राइस’ची यंदा यशस्वी लागवड केली आहे. पूर्णपणे स्व-संशोधित सेंद्रिय द्रव्यांच्या जिरावर घेतलेला हा प्रयोग रायगडच्या कृषी क्षेत्रात विशेष चर्चेचा आणि कौतुकाचा विषय ठरत आहे.

​गेल्या वर्षी गाडगीळ यांनी थायलंडमधून जस्मिन राइसचे बियाणे मागवले होते. पहिल्या वर्षी विविध नैसर्गिक अडचणींचा सामना करत सुमारे दोन किलो भाताचे उत्पन्न मिळाले. यंदा याच धान्यापासून पुनरुत्पादन करण्याचे नियोजन त्यांनी केले. मात्र, यंदा मुळातच मान्सून लांबल्याने पेरणी वेळेत करता आली नाही. त्यानंतर सुरू झालेल्या धोधाम पावसामुळे रायगड जिल्ह्यात हाहाकार माजवला. नद्या, नाले आणि शेते तुडूंब भरल्याने अनेकांची पेरलेली धान्ये उगवली नाहीत, तर कमी प्रमाणात उगवली रोपे कुजून गेली.

​या काळात योग्य संधी साधत मिनेश गाडगीळ यांनी २२ जून रोजी पेरणी केली आणि सुरुवातीला बोरवेलच्या साहाय्याने पाणी दिले. अवघ्या चार ते पाच दिवसांत धान्य व्यवस्थित उगवून आले आणि त्यानंतर सुरू झालेल्या पावसाचा रोपांना मोठा फायदा झाला. सध्या भाताची नर्सरी अत्यंत उत्तम स्थितीत असून याचा फायदा शेतकऱ्यांना होत आहे.

​सुगंधी आणि आरोग्यदायी तांदूळ:

जस्मिन राइस हा जगातील सर्वाधिक सुगंधी तांदळांपैकी एक मानला जातो. हा तांदूळ पूर्णपणे झिरो ग्लुटन (Zero Gluten) असून त्यात फॅट्सचे प्रमाण अत्यंत अल्प असते. याशिवाय यामध्ये मोठ्या प्रमाणावर कार्बोहायड्रेट्स, आयरन (लोह), मॅग्नेशियम, कॅल्शियम, व्हिटॅमिन बी-९ (फॉलिक एसिड) आणि अँटीऑक्सिडंट गुणधर्म मुबलक प्रमाणात आढळतात.

​योग्य नियोजन, चिकाटी आणि सेंद्रिय शेतीची जोड दिली तर प्रतिकूल हवामानातही परदेशी व उच्च दर्जाची पिके यशस्वीरीत्या घेता येतात, हे मिनेश गाडगीळ यांनी आपल्या या प्रयोगातून पुन्हा एकदा सिद्ध केले आहे.

या प्रयोगाबद्दल बोलताना मिनेश गाडगीळ म्हणाले, “कोणतेही रासायनिक खत न वापरता, केवळ मी स्वतः संशोधन केलेल्या सेंद्रिय द्रव्यांची फवारणी या पिकावर केली आहे. आता पुढे निसर्गाची अनुकूल साथ लाभल्यास यातून सुमारे १०० किलोपर्यंत शुद्ध बियाणे उपलब्ध होईल.”

   Follow us on   

गुहागर शहर : तालुक्यातील कुटगिरी गावठाणवाडी परिसरातील नदीवरील लोखंडी पूल सोमवारी सायंकाळी ७:३० वाजता अचानक कोसळल्याची मोठी दुर्घटना घडली. पूल कोसळत असताना त्यावरून जात असलेली सुमारे १० ते १२ जनावरे पुलाखाली अडकल्याची प्राथमिक माहिती समोर आली होती. या दुर्घटनेमध्ये दिलीप गुरव यांच्या मालकीच्या एका बैलाचा मृत्यू झाला असून, अन्य ६ जनावरे गंभीर जखमी झाल्याची माहिती गुहागर आपत्ती विभागाकडून प्राप्त झाली आहे.

​घटना घडताच स्थानिक ग्रामस्थांनी तातडीने घटनास्थळी धाव घेतली. मात्र, नदीत मोठ्या प्रमाणात पाणी असल्याने तसेच पुलाचे जड लोखंडी साहित्य जनावरांवर कोसळल्यामुळे बचावकार्य करताना मोठ्या अडचणी निर्माण झाल्या होत्या. काही ग्रामस्थ नदीत उतरून जनावरे वाचवण्याचा प्रयत्न करत असले तरी, लोखंडी रचना हटवल्याशिवाय अनेक जनावरांना बाहेर काढणे शक्य होत नव्हते.

​घटनेची माहिती मिळताच मंडळ अधिकारी तात्काळ घटनास्थळी दाखल झाले. तसेच, जिल्हा परिषद बांधकाम उपअभियंता व पशुवैद्यकीय अधिकारी यांना घटनास्थळी पोहोचण्याच्या सूचना गुहागर आपत्ती विभागाकडून देण्यात आल्या होत्या. त्यानंतर स्थानिक नागरिक व प्रशासनाच्या मदतीने दुर्घटनेत मृत झालेल्या बैलासह सर्व जखमी ६ जनावरांना अखेर सुखरूप बाहेर काढण्यात आले आहे.

   Follow us on   

दापोली तालुक्यातील मळे-सुतारवाडी परिसरात मुसळधार पावसामुळे निसर्गाचा मोठा प्रकोप पाहायला मिळत आहे. येथील स्थानिक डोंगराला अचानक मोठ्या प्रमाणात भेगा पडल्याची घटना समोर आली आहे. पावसाचा जोर कायम असल्याने भूस्खलनाचा गंभीर धोका निर्माण झाला असून, यामुळे संपूर्ण परिसरात प्रचंड घबराटीचे वातावरण पसरले आहे.

​प्रशासनाने केलेल्या प्राथमिक पाहणीत या भेगांची तीव्रता अत्यंत चिंताजनक असल्याचे स्पष्ट झाले आहे. डोंगराला तब्बल दोन किलोमीटर अंतरापर्यंत आणि सुमारे दोन ते चार फूट खोल भेगा पडल्याचे निदर्शनास आले आहे. पावसाच्या पाण्यामुळे डोंगर खचण्याची शक्यता अधिक वाढल्याने स्थानिक सुतारवाडी गावाला थेट धोका निर्माण झाला आहे.

​डोंगराला भेगा पडल्याची माहिती मिळताच दाभोळ पोलिस ठाण्याचे पोलिस निरीक्षक आणि नायब तहसीलदार यांनी आपल्या टीमसह तत्काळ घटनास्थळी धाव घेतली. महसूल विभागाच्या अधिकाऱ्यांनी परिसराची सखोल पाहणी करून पंचनामा केला असून, या संपूर्ण घटनेचा सविस्तर अहवाल वरिष्ठ कार्यालयाकडे पुढील कार्यवाहीसाठी पाठवण्यात आला आहे.

​संभाव्य आपत्ती लक्षात घेता महसूल प्रशासनाने सुतारवाडीतील ग्रामस्थांचे तातडीने सुरक्षित ठिकाणी स्थलांतर करण्यास सुरुवात केली आहे. डोंगराच्या पायथ्याशी राहणाऱ्या कुटुंबांमध्ये भीतीचे सावट असून, भूस्खलनाच्या धास्तीने नागरिक रात्र जागून काढत आहेत. प्रशासनाने ग्रामस्थांना कोणत्याही अफवांवर विश्वास न ठेवता सतर्क राहण्याचे आणि सरकारी सूचनांचे पालन करण्याचे आवाहन केले आहे.

​घटनेचे गांभीर्य ओळखून डोंगराच्या स्थैर्याची तपासणी करण्यासाठी भूवैज्ञानिक तज्ज्ञांच्या पथकाला पाचारण करण्यात आले आहे. हे पथक डोंगराच्या भेगांची खोली आणि त्याच्या संरचनेची सखोल तपासणी करेल. तज्ज्ञांचा अहवाल प्राप्त झाल्यानंतरच या भागातील सुरक्षेच्या दृष्टीने पुढील कायमस्वरूपी उपाययोजना आणि धोरण निश्चित केले जाणार आहे