Follow us on   

लांजा (रत्नागिरी):

रत्नागिरी: जिल्ह्यातील लांजा तालुक्यातील वाकेड येथून ‘काळ आला होता पण वेळ आली नव्हती’ याचा प्रत्यय आणून देणारी एक अंगावर काटा आणणारी घटना समोर आली आहे. एका मानसिकदृष्ट्या अस्वस्थ व्यक्तीमुळे पेट्रोल पंपावरील तीन कर्मचाऱ्यांचे प्राण ऐनवेळी वाचले, मात्र दुर्दैवाने या घटनेत त्या अस्वस्थ व्यक्तीला आपला जीव गमवावा लागला. मुसळधार पाऊस सुरू असताना शनिवारी मध्यरात्रीनंतर हा निसर्गाचा चमत्कार आणि थरार वाकेड परिसरात घडला.

अचानक केबिनमध्ये घुसली व्यक्ती आणि…

शनिवारी रात्री सव्वा एक वाजण्याच्या सुमारास वाकेड येथील एका पेट्रोल पंपाच्या ऑफिस केबिनमध्ये मुसळधार पाऊस सुरू असताना, एक मानसिकदृष्ट्या अस्वस्थ असलेला नग्न इसम अचानक आत शिरला. मध्यरात्रीच्या वेळी अशा अनोळखी व्यक्तीला अचानक केबिनमध्ये आलेले पाहून तिथे कर्तव्यावर असलेले तिन्ही परप्रांतीय युवक प्रचंड घाबरले. जीवाच्या आकांताने त्यांनी तात्काळ केबिनमधून बाहेर पळ काढला.

अवघ्या काही सेकंदांत खेळ खलास!

ते युवक बाहेर पडताच, अवघ्या काही क्षणांत पाठीमागे मोठा आवाज झाला आणि पेट्रोल पंपाच्या त्या ऑफिस केबिनवर डोंगराची भलीमोठी दरड कोसळली. क्षणभरापूर्वी ज्या केबिनमध्ये हे युवक उभे होते, ती केबिन सेकंदाच्या आत मातीच्या ढिगाऱ्याखाली गाडली गेली. मृत्यू डोळ्यासमोरून गेल्याचे पाहून तिन्ही युवकांचा थरकाप उडाला. भीतीने गोंधळलेल्या अवस्थेत त्यांनी शेजारील नागरिकांकडे धाव घेत घडलेला प्रकार सांगितला. हे तिन्ही युवक बिहार राज्यातील असल्याची माहिती मिळाली आहे.

९ तासांच्या अथक प्रयत्नांनंतर मृतदेह बाहेर

केबिनमध्ये घुसलेला तो मानसिक अस्वस्थ इसम मात्र दुर्दैवाने वेळेत बाहेर पडू शकला नाही आणि तो दरडीखाली गाडला गेला. घटनेची माहिती मिळताच स्थानिक पोलीस, महसूल विभाग आणि राष्ट्रीय महामार्ग प्राधिकरणाची (NHAI) पथके तात्काळ घटनास्थळी दाखल झाली.

रात्रीपासूनच ४ जेसीबी, १ लोडर आणि पोकलेन मशीनच्या सहाय्याने युद्धपातळीवर ढिगारा उपसण्याचे काम सुरू करण्यात आले. तब्बल ९ तासांच्या अथक सर्च ऑपरेशननंतर रविवारी पहाटे साडेचार वाजण्याच्या सुमारास त्या अज्ञात व्यक्तीचा मृतदेह ढिगाऱ्याखालून बाहेर काढण्यात यश आले.

परिसरात एकच चर्चा…

केबिनमध्ये आलेल्या त्या अज्ञात व्यक्तीमुळे घाबरून या तरुणांनी तिथून पळ काढला आणि म्हणूनच त्यांचे प्राण वाचले. तो इसम या तिघांसाठी देवदूत ठरला, परंतु स्वतः मात्र काळाच्या पडद्याआड गेला. ‘दैव बलवत्तर म्हणूनच हे तरुण वाचले’ अशीच चर्चा आता संपूर्ण लांजा तालुक्यात रंगली आहे.

   Follow us on   

चिपळूण:

मुंबई-गोवा राष्ट्रीय महामार्गावरील साडेपाच किलोमीटर अंतराच्या परशुराम घाटात प्रवाशांच्या सुरक्षिततेसाठी आणि वाहतूक कोंडीवर कायमस्वरूपी तोडगा काढण्यासाठी राष्ट्रीय महामार्ग विभागाने एक महत्त्वाचे पाऊल उचलले आहे. मुंबई-पुणे द्रुतगती महामार्गावरील लोणावळा आणि खंडाळा घाटाच्या धर्तीवर आता परशुराम घाटातही आधुनिक ‘व्हाया डक्ट’ (उड्डाणपूल) उभारण्याच्या हालचाली सुरू झाल्या आहेत. घाटातील गॅबियन वॉलचा भराव खचल्याची घटना घडल्यानंतर प्रशासनाने हा निर्णय घेतला असून, यासाठी ‘थॉट कन्सल्टन्सी’ या नामांकित एजन्सीची नियुक्ती करण्यात आली आहे. ही एजन्सी पुलाचा सविस्तर आराखडा तयार करणार असून, मंजुरीसाठी तो प्रस्ताव केंद्र सरकारकडे पाठवला जाईल, अशी माहिती महामार्ग विभागाकडून देण्यात आली आहे.

​पावसामुळे गॅबियन वॉल ठरतेय डोकेदुखी

​परशुराम घाटातील सुरक्षिततेसाठी उभारण्यात आलेली गॅबियन वॉल गेल्या काही काळापासून प्रशासनासाठी मोठी डोकेदुखी ठरत आहे. गतवर्षी मे महिन्याच्या मध्यातच पावसाने हजेरी लावल्यामुळे येथील कामाचे नियोजन कोलमडले होते आणि अर्धवट अवस्थेत असलेली गॅबियन वॉल ठिकठिकाणी कोसळली होती. त्यानंतर सुरक्षेचा उपाय म्हणून वाहतूक एकेरी करण्यात आली होती. यंदा या भिंतीच्या रचनेत काही किरकोळ बदल करून अत्यंत घाईघाईने काम पूर्ण करण्यात आले, परंतु पहिल्याच पावसाने या कामाची पोलखोल केली. गॅबियन वॉलच्या पायथ्याशी असलेला मातीचा भराव वाहून गेला असून, नव्याने केलेले काँक्रिटीकरणही खचले आहे. सद्यस्थितीत तातडीची उपाययोजना म्हणून कोसळलेल्या संरक्षक भिंतीच्या ठिकाणी प्लास्टिकचे आच्छादन घालण्यात येत आहे.

​मूळ बांधकामाला धोका नाही: महामार्ग विभाग

​घाटातील या धोकादायक परिस्थितीच्या पार्श्वभूमीवर राष्ट्रीय महामार्ग विभाग, पेणचे अधिकारी पंकज गोसावी यांनी नागरिकांना धीर दिला आहे. त्यांनी स्पष्ट केले की, गॅबियन वॉलच्या मूळ बांधकामाला कोणताही धक्का लागलेला नाही आणि ती पूर्णपणे मजबूत आहे. केवळ वरचा मातीचा भराव वाहून गेला असून घाटातील चौपदरीकरणाच्या कामाला यामुळे कोणताही धोका निर्माण झालेला नाही. खबरदारीचा उपाय म्हणून आणि प्रवाशांची गैरसोय टाळण्यासाठी सध्या घाटातील दुहेरी वाहतूक पूर्ववत सुरू ठेवण्यात आली आहे. येत्या काही महिन्यांत ‘व्हाया डक्ट’ पुलाचा अंतिम आराखडा उपलब्ध झाल्यानंतर या मार्गावरील प्रवासाचा चेहरामोहरा बदलण्याची शक्यता आहे.

   Follow us on   

संगमेश्वर:

मुंबई-गोवा राष्ट्रीय महामार्गाचे (एनएच-६६) सध्या सुरू असलेले रुंदीकरणाचे काम या मार्गानजीक राहणाऱ्या स्थानिक रहिवाशांसाठी अत्यंत धोकादायक ठरत आहे. अनेक ठिकाणी महामार्गाचे काम अपूर्ण अवस्थेत असल्याने मोठ्या प्रमाणावर माती उघडी पडली असून, जमिनीचे उतार अस्थिर झाले आहेत. संगमेश्वर नजीक असलेल्या माभळे गावात या कमकुवत झालेल्या भागांची आता मोठ्या प्रमाणावर धूप होऊ लागली आहे. यामुळे या भागात केव्हाही मोठी दरड कोसळण्याची आणि स्थानिकांच्या घरांचे प्रचंड नुकसान होण्याची भीती निर्माण झाली आहे.

​या परिस्थितीमुळे येथील रहिवासी वसंत सोमा खापरे यांच्या घराला गंभीर धोका निर्माण झाला आहे. रस्त्याच्या कडेला करण्यात आलेल्या मोठ्या खोदकामामुळे त्यांच्या घराच्या खालचा बराचसा मातीचा भाग आधीच खचला आहे. घराचा पाया कमकुवत झाल्यामुळे हे घर आता पूर्णपणे असुरक्षित झाले आहे. विशेषतः सध्या सुरू असलेल्या सततच्या पावसामुळे हे घर कोणत्याही क्षणी कोसळू शकते, अशी तीव्र भीती स्थानिकांकडून व्यक्त केली जात आहे. संभाव्य दुर्घटना आणि जमिनीची धूप रोखण्यासाठी स्थानिक नागरिकांनी आपल्या पातळीवर उघड्या पडलेल्या भागावर प्लास्टिकचा कागद टाकणे आणि दगड रचणे यासारखे तात्पुरते उपाय केले आहेत. मात्र, प्रशासनाने यावर तातडीने कायमस्वरूपी उपाययोजना करावी, अशी मागणी करण्यात येत आहे.

   Follow us on   

राजापूर:

महाराष्ट्र राज्य परिवहन महामंडळाकडून प्रवाशांच्या सोयीसाठी आणि त्यांचा प्रवास अधिक सुकर व आरामदायी करण्यासाठी सातत्याने विविध उपक्रम व नवीन योजना राबविल्या जात आहेत. एस.टी. ने प्रवास करणाऱ्या प्रवाशांचा प्रवास अधिक सुखकर व्हावा यासाठी महामंडळाने यापूर्वी ताफ्यात ‘लालपरी’ आणली होती आणि आता नवीन ‘राजमाता जिजाऊ’ एस.टी. बस महामंडळाच्या सेवेत दाखल केल्या आहेत. रत्नागिरी विभागीय कार्यालयाकडून राजापूर आगाराला अशा पाच नवीन ‘राजमाता जिजाऊ’ गाड्या प्राप्त झाल्या असून, यामुळे आता राजापुरातील प्रवाशांचा प्रवास आणखी सुखकर होणार आहे.

​राज्याचे परिवहन मंत्री ना. प्रताप सरनाईक यांनी परिवहन मंत्री म्हणून कार्यभार घेतल्यानंतर राज्य परिवहन महामंडळाला नवीन दिशा देण्याचा प्रयत्न सुरू केला आहे. एस.टी. प्रवास करणाऱ्या प्रवाशांना अधिकाधिक चांगली सेवा देताना त्यांनी एस.टी. महामंडळाच्या ताफ्यात नवीन गाड्या आणण्यावर भर दिला असून, यापूर्वी राज्यातील सर्व आगारांमध्ये लालपरी या नवीन बस देण्यात आल्यानंतर आता नवीन ‘राजमाता जिजाऊ’ बसेस उपलब्ध करून दिल्या आहेत. राजापूर आगाराला यापूर्वी आमदार किरण सामंत यांच्या विशेष पाठपुराव्यामुळे दहा ‘लालपरी’ या नवीन बस उपलब्ध झाल्या होत्या. आता पुन्हा एकदा आमदार किरण सामंत यांनी विशेष लक्ष घातल्याने रविवार रोजी नवीन पाच ‘राजमाता जिजाऊ’ बसेस राजापूर आगारात दाखल झाल्या असून, रत्नागिरी विभाग नियंत्रकांकडून या गाड्या राजापूर आगाराला देण्यात आल्या आहेत.

​भगव्या व सफेद रंगाचा पट्टा असलेली आणि ‘२ बाय ३’ अशी प्रवाशांची आसन व्यवस्था असलेल्या या नवीन ‘राजमाता जिजाऊ’ बसमध्ये एकूण ५५ प्रवासी आसन क्षमता आहे. या बसेसचे मुख्य वैशिष्ट्य म्हणजे लांबच्या प्रवासात प्रवाशांना मोबाईल चार्जिंग करता यावे म्हणून आसनाच्या लगतच यु.एस.बी. चार्जिंग पॉईंटची (USB Charger) सोय करण्यात आली आहे, ज्याचा प्रवाशांना विशेष फायदा होणार आहे. राजापूर आगारात या पाच नवीन गाड्या उपलब्ध झाल्याने आगार प्रशासन व प्रवाशांनाही मोठा दिलासा मिळाला आहे. राजापूर आगार प्रमुख अजित गोसराडे यांनी दिलेल्या माहितीनुसार, या नवीन राजमाता जिजाऊ बसेस प्रारंभी ‘राजापूर ते रत्नागिरी’ या मार्गावर चालवल्या जातील आणि त्यानंतर विभाग नियंत्रकांच्या आदेशान्वये लांब पल्ल्याच्या मार्गांवर सोडण्यात येतील. राजापूर आगाराला आणखी लालपरी दहा व राजमाता जिजाऊ पाच अशा एकूण १५ नवीन गाड्या उपलब्ध झाल्यास आगारची प्रवासी सेवा अधिक दर्जेदार होणार असून, यासाठी आमदार किरण सामंत यांचा पाठपुरावा सातत्याने सुरू आहे.

   Follow us on   

कोकण, ९ जून २०२६: आंतरराष्ट्रीय लेव्हल क्रॉसिंग जनजागृती दिवस (ILCAD) निमित्त कोकण रेल्वे प्रशासनाच्या वतीने आज, ९ जून रोजी लेव्हल क्रॉसिंग क्रमांक ५२ (LC-52) वर एका विशेष सुरक्षितता संवेदनशीलता आणि जनजागृती कार्यक्रमाचे यशस्वी आयोजन करण्यात आले. रेल्वे मार्ग ओलांडताना नागरिकांनी घ्यावयाची काळजी, अपघात टाळण्यासाठी पाळावयाचे नियम आणि योग्य प्रोटोकॉल याविषयी या मोहिमेअंतर्गत प्रत्यक्ष घटनास्थळी मार्गदर्शन करण्यात आले.

​या उपक्रमामध्ये स्थानिक प्रवासी, ऑटोरिक्षा चालक आणि शालेय विद्यार्थ्यांना प्रामुख्याने लक्ष्य करण्यात आले होते. रेल्वे फाटकांजवळ होणारे संभाव्य धोके, सिग्नल्सचे काटेकोर पालन करण्याचे महत्त्व आणि गेटवरील सुरक्षितता बॅरियर्सचा योग्य वापर कसा करावा, याविषयी रेल्वेच्या सुरक्षा पथकाने उपस्थितांना सविस्तर माहिती दिली.

​सर्वसामान्यांपर्यंत हा संदेश प्रभावीपणे पोहोचवण्यासाठी प्रत्यक्ष रेल्वे ट्रॅकजवळ द्विभाषी बॅनर्स, सुरक्षितता अडथळे आणि माहितीपूर्ण जनजागृती पत्रकांचा (Leaflets) वापर करण्यात आला. स्थानिक समुदायाशी थेट संवाद साधून रेल्वे फाटकांवरील अपघातांचे प्रमाण शून्यावर आणणे, हा या मोहिमेचा मुख्य उद्देश आहे. आंतरराष्ट्रीय रेल्वे संघटनेने (UIC) सुरू केलेल्या जागतिक ILCAD मोहिमेला पूर्ण पाठिंबा देत कोकण रेल्वेने आपल्या सुरक्षिततेच्या वचनबद्धतेचा पुनरुच्चार केला आहे.

   Follow us on   

सावंतवाडी :

राज्यातील शेतकरी आणि जनतेसाठी एक मोठी आणि दिलासादायक बातमी आहे. नैऋत्य मोसमी वारे अर्थात मान्सूनने महाराष्ट्रात अधिकृतपणे प्रवेश केला असून, त्याची मजल आता रत्नागिरी जिल्ह्यातील दापोली तालुक्यातील ‘हर्णे’ बंदरापर्यंत पोहोचली आहे. भारतीय हवामान विभागाने यासंदर्भातील अधिकृत घोषणा केली आहे.

​हवामान विभागाने दिलेल्या माहितीनुसार, काल ८ जून रोजी मान्सूनची उत्तर सीमा महाराष्ट्रातील हर्णे (दापोली, रत्नागिरी) आणि सोलापूर या भागातून जात आहे. देशाचा विचार केला तर ही सीमा हर्णे, सोलापूर, कलबुर्गी, नंदीयाल, चेन्नई, लखीमपूर या भागांमधून जात आहे. मान्सूनने पश्चिम-मध्य आणि पूर्व-मध्य अरबी समुद्र, कर्नाटक, आंध्र प्रदेश आणि तेलंगणाचा आणखी काही भाग व्यापत पुढे कूच केली आहे, असे हवामान विभागाने म्हटले आहे.

​हवामान खात्याच्या अंदाजानुसार, पुढील २ ते ३ दिवसांत मान्सूनच्या पुढील वाटचालीसाठी अतिशय अनुकूल परिस्थिती निर्माण झाली आहे. या काळात मान्सून मध्य अरबी समुद्र, महाराष्ट्र, कर्नाटक, तेलंगणा आणि आंध्र प्रदेशचा उर्वरित भाग व्यापेल. याशिवाय तामिळनाडू, बंगालचा उपसागर, छत्तीसगड, ओडिशा, पश्चिम बंगाल, सिक्कीम आणि ईशान्येकडील राज्यांमध्येही मान्सून वेगाने पुढे सरकण्याची शक्यता वर्तवण्यात आली आहे. दरम्यान, सिंधुदुर्ग जिल्ह्यात मान्सूनच्या आगमनासोबतच दमदार पाऊस सुरू झाल्याने बळीराजा सुखावला आहे.

   Follow us on   

राजापूर: रत्नागिरी जिल्ह्यातील राजापूर तालुक्यातून एक अत्यंत महत्त्वाची आणि ऐतिहासिक बातमी समोर आली आहे. तालुक्यातल्या पन्हाळे तर्फे सौंदळ येथील पन्हाळे माळवाडी परिसरातील जांभ्या दगडाच्या विस्तीर्ण सड्यावर अश्मयुगीन (प्रागैतिहासिक) कालखंडाशी संबंधित एक वैशिष्ट्यपूर्ण मानवाकृती कातळशिल्प (Petroglyph) शोधण्यात यश आले आहे. इतिहास अभ्यासक तथा पत्रकार विनोद पवार यांनी हा अभूतपूर्व शोध लावला असून, यामुळे राजापूर तालुक्याच्या समृद्ध प्रागैतिहासिक ऐतिहासिक वारशात आणखी एका महत्त्वपूर्ण स्थळाची मोलाची भर पडली आहे.

​आढळून आलेले हे कातळशिल्प सुमारे चार फूट उंच आणि तीन फूट रुंद आकाराचे असून, ते एका मानवाकृतीच्या स्वरूपात आहे. या आकृतीचे दोन्ही हात बाजूला पसरलेल्या अवस्थेत कातळात कोरलेले असून, दगडात अंदाजे एक इंच खोलीपर्यंत हे खोदकाम करण्यात आले आहे. विशेष म्हणजे, दुरून पाहिल्यास एखाद्या व्यक्तीची हुबेहूब सावलीच कातळावर उमटली असल्याचा अनोखा भास या आकृतीमुळे होतो. प्राथमिक शोध लागल्यानंतर या परिसराची पद्धतशीर पाहणी, स्वच्छता आणि प्राथमिक दस्तऐवजीकरण (Documentation) करण्यात आले. या संशोधन मोहिमेमध्ये विनोद पवार यांना स्थानिक इतिहासप्रेमी पराग पारकर, वरद पवार, वरुण जाधव, यश इंगळे आणि समर्थ आबवले यांचे बहुमूल्य सहकार्य लाभले.

​कोकणच्या किनारपट्टीवर आढळणारी कातळशिल्पे ही प्रागैतिहासिक मानवाच्या जीवनशैली, त्यांच्या तत्कालीन श्रद्धा आणि आदिम ज्ञानपरंपरेची जिवंत साक्ष देणारी मानली जातात. पन्हाळे तर्फे सौंदळ येथे मिळालेली ही मानवाकृती देखील अशाच एका प्राचीन मानवी संस्कृतीच्या वारशाचा भाग असण्याची दाट शक्यता आहे. त्यामुळे या नवीन स्थळाचा पुरातत्त्वीय आणि वैज्ञानिक दृष्टिकोनातून सखोल अभ्यास होण्याची नितांत आवश्यकता व्यक्त होत आहे. इतिहासप्रेमी आणि संशोधकांनी या स्थळाला प्रत्यक्ष भेट देऊन व्यापक संशोधन करावे, तसेच शासनाच्या पुरातत्त्व व सांस्कृतिक विभागाने या प्राचीन अश्मयुगीन वारशाचे जतन आणि संवर्धन करण्यासाठी तातडीने पावले उचलावीत, अशी रास्त अपेक्षा आता कोकणातील इतिहास वर्तुळातून व्यक्त केली जात आहे.

   Follow us on   

मडगाव:

कोकण किनारपट्टीच्या निसर्गरम्य मार्गावरून धावणारी आणि लाखो प्रवाशांच्या गळ्यातील ताईत बनलेली ‘मांडवी एक्सप्रेस’ (गाडी क्रमांक १०१०३/१०१०४) ७ जून २०२६ रोजी आपल्या सेवेची यशस्वी २७ वर्षे पूर्ण करून २८ व्या वर्षात प्रविष्ट झाली आहे. मुंबई सीएसएमटी ते मडगाव दरम्यान धावणाऱ्या या ऐतिहासिक गाडीचा वर्धापन दिन कोकण रेल्वेचे अधिकारी, प्रवासी संघटना आणि रेल्वेप्रेमींच्या (रेलफॅन्स) उपस्थितीत अत्यंत उत्साहात व आगळ्यावेगळ्या पद्धतीने साजरा करण्यात आला.

​मडगाव स्थानकावर रेल्वेप्रेमींचा उत्साह

​या सोहळ्याचे मुख्य आकर्षण मडगाव स्थानकावर पाहायला मिळाले. रविवार, ७ जून रोजी सकाळी ८ वाजल्यापासून ‘रेलफॅन क्लब’ आणि विविध प्रवासी संघटनांच्या वतीने येथे विशेष कार्यक्रमाचे आयोजन करण्यात आले होते. वर्धापन दिनाचे औचित्य साधून मांडवी एक्सप्रेसच्या इंजिनला (लोकोमोटिव्ह) फुलांच्या सुंदर माळा, केळीची पाने आणि ‘२७ वर्षे’ अशा सुशोभित फलकांनी आकर्षकपणे सजवण्यात आले होते. याप्रसंगी मान्यवरांच्या उपस्थितीत केक कापून आनंदोत्सव साजरा करण्यात आला. रेल्वेप्रेमी आणि प्रवाशांच्या एका मोठ्या समूहाने स्थानकावर एकत्र येत गाडीसमोर सामूहिक छायाचित्रे (ग्रुप फोटोज) काढून हा क्षण कॅमेऱ्यात कैद केला.

​रत्नागिरीत धावत्या प्रवासात छोटेखानी सोहळा

​मडगावप्रमाणेच रत्नागिरी स्थानकावरही या गाडीचे जंगी स्वागत करण्यात आले. रेल्वे प्रवाशांच्या आणि हितचिंतकांच्या वतीने गाडीच्या नियोजित थांब्यादरम्यान इंजिनजवळ एक छोटेखानी केक कापण्याचा सोहळा पार पडला. रेल्वेच्या वाहतुकीला आणि वेळापत्रकाला कोणताही अडथळा किंवा विलंब न आणता, अत्यंत शिस्तबद्ध पद्धतीने हा उपक्रम राबवण्यात आल्यामुळे रेल्वे प्रशासनानेही प्रवाशांच्या या उपक्रमाचे कौतुक केले.

​२७ वर्षांचा ऐतिहासिक प्रवास:

७ जून १९९९ रोजी सुरू झालेल्या मांडवी एक्सप्रेसने गेल्या २७ वर्षांत मुंबई, कोकण आणि गोवा यांना जोडण्यात ऐतिहासिक भूमिका बजावली आहे. कोकणातील निसर्गरम्य दृश्ये खिडकीतून अनुभवण्यासाठी पर्यटकांची ही नेहमीच पहिली पसंती राहिली आहे. या दीर्घ कालावधीत लाखो प्रवाशांना सुखद आणि स्मरणीय प्रवास देण्यासोबतच, कोकणच्या प्रादेशिक व आर्थिक विकासात आणि पर्यटनाला चालना देण्यात मांडवी एक्सप्रेसचे योगदान अतुलनीय आहे, अशी माहिती कोकण रेल्वेच्या वतीने देण्यात आली.