वरील फोटो कोलाड येथे मुंबई गोवा महामार्गावर पडलेल्या मोठ्या खड्ड्याचा आहे. या खड्ड्यात पाणी साचून अक्षरशः तळे बनले आहे. त्यामुळे रस्त्यात गाडी घेऊन उतरायचे कि होडी असा प्रश्न कोकणकरांना पडला आहे.

   Follow us on   

Mumbai Goa Highway: कोकणातील लोकप्रतिनिधींसाठी अत्यंत शरमेची गोष्ट बनलेल्या, गेल्या १७ वर्षे रखडलेल्या मुंबई गोवा महामार्गावर पुन्हा एकदा खड्ड्यांचे साम्राज्य पसरले आहे. या खड्डयांमुळे या मार्गावरून प्रवास करणे धोकादायक बनले आहे. काही ठिकणी परिस्थिती इतकी खराब झाली आहे कि या महामार्गाला राष्ट्रीय महामार्ग बोलणेच हास्यास्पद ठरेल. वरील फोटो कोलाड येथील असून अजून बर्‍याच ठिकाणी अशीच परिस्थिती आहे. गणेश चतुर्थीला आता फक्त एकच महिना बाकी आहे. मग काय लोकांच्या समाधानासाठी तात्पुरती डागडुगी होईल आणि पुढील वर्षी पुन्हा तेच. महामार्गबाबत लोकप्रतिनिधी उदासीन असून कोकणकर देखील कमालीचे शांत आहेत, या महामार्गाची गरज चाकरमान्यांना फक्त गणेशोत्सव आणि शिमगोत्सव मध्येच भासते उर्वरित वेळेस कोकणात माणसच राहत नाहीत का असा प्रश्न पडतो.

सरकार गणेशोत्सव आणि शिमगोत्सव मध्ये डागडुजी करतात आणि कोकणकर आनंद मानतात पण आपण कधी विचार केलाय का? हा महामार्ग गणेशोत्सव आणि शिमगोत्सव पुरता मर्यादित नसून विकासाचा महामार्ग आहे. दळणवळण सुविधा नसल्याने कोकणात रोजगार नाही परिणामी गावच्या-गाव ओसाड पडून कोकणकरांनी पुणे -मुंबईची वाट पकडली. पण ही वाट पकडावीच का लागली कारण आपण कोकणकर आपल्या मागण्यांसाठी एकत्र झालोच नाही आणि याचाच फायदा लोकप्रतिनिधीनी घेतला. गणेशोत्सव करीता एसटी बुकिंग साठी, रेल्वे तिकीट साठी धडपड सुरु झालेय पण एसटी ने आपल्या गावी जाण्यासाठी रस्ता सुरक्षित आहे का? रेल्वे तिकीट मिळतोय का? तर याचा उत्तर आपल्याकडे नाही असच असेल. मग आपल्या हक्काच्या मागण्यांसाठी, आपल्या महामार्गासाठी आपण पाठी का राहतोय? असा सवाल मुंबई गोवा महामार्गासाठी झटणाऱ्या जनआक्रोश समितीने केला आहे.

जनआक्रोश समिती तर्फे होमहवन

संकटे टाळण्यासाठी, सुखशांती आणण्यासाठी आपण आपल्या घरी होमहवन करतो. तसेच होमहवन आता या रखडलेल्या महामार्गाची आपल्याला करावयाचे आहे. त्यासाठी स्थळ आहे आता मागे न राहता २८ जुलै २०२४ रोजी माणगाव ST डेपोजवळ सकाळी ११:०० वाजता होमहवनकरीता एकत्रित येऊया आणि कोकणकरांची एकी दाखवूया असे आवाहन जनआक्रोश समितीचे सचिव रुपेश दर्गे यांनी केले आहे.