सावंतवाडी: कोकण रेल्वे प्रवासी संघटना, सावंतवाडी यांच्या सातत्यपूर्ण पाठपुराव्यामुळे सावंतवाडी रोड रेल्वे स्थानकावर प्रवाशांच्या सुविधेसाठी ‘डिजिटल कोच इंडिकेटर’ बसवण्याचे काम आता प्रत्यक्ष सुरू झाले आहे. गेल्या वर्षी २६ जानेवारी २०२५ रोजी करण्यात आलेल्या रेलरोको आंदोलनाच्या पार्श्वभूमीवर आणि १७ मार्च २०२५ रोजी कोकण रेल्वे महामंडळाच्या बेलापूर येथील वरिष्ठ अधिकाऱ्यांसोबत झालेल्या बैठकीत या सुविधेबाबत ठोस निर्णय घेण्यात आला होता.
या कामाची टेंडर प्रक्रिया २४ ऑक्टोबर २०२५ रोजी पूर्ण झाल्यानंतर आता प्रत्यक्ष कामाला सुरुवात झाली आहे. या डिजिटल इंडिकेटरमुळे प्रवाशांना आपली गाडी स्थानकात आल्यावर आपला डबा (कोच) नेमका कोणत्या ठिकाणी येणार आहे, याची अचूक माहिती मिळणार आहे. यामुळे प्रवाशांची होणारी धावपळ थांबणार असून प्रवास अधिक सुखकर होणार आहे. स्थानकावर यापूर्वी लिफ्टची सुविधा उपलब्ध झाली असून, आगामी काळात प्लॅटफॉर्म क्रमांक ३ वर १७० मीटरची निवारा शेड देखील उभी राहील, असा विश्वास संघटनेचे उपाध्यक्ष श्री. सागर तळवडेकर यांनी व्यक्त केला आहे.
