Follow us on   

Konkan Railway: कोकण रेल्वेवरील प्रवाशांची सुरक्षितता, संरक्षण आणि कल्याण सुनिश्चित करण्यासाठी रेल्वे संरक्षण दल (RPF) सातत्याने सतर्क, कार्यक्षम आणि संवेदनशील भूमिका बजावत आहे. प्रवासी सुरक्षेच्या दृष्टीने राबविण्यात येणाऱ्या विविध विशेष मोहिमा, तत्काळ कारवाई आणि लोकाभिमुख उपक्रमांमुळे RPF ने उल्लेखनीय यश संपादन केले आहे.

ऑपरेशन अमानत अंतर्गत RPF ने रेल्वे परिसरात प्रवाशांकडून चुकून राहिलेल्या वस्तू शोधून काढून तब्बल 47 प्रवाशांना ₹27.93 लाख किमतीचे मौल्यवान साहित्य सुरक्षितपणे परत केले. या कार्यामुळे रेल्वे सुरक्षेवरील प्रवाशांचा विश्वास अधिक दृढ झाला आहे.

बालसुरक्षेला सर्वोच्च प्राधान्य देत ऑपरेशन नन्हे फरिश्ते अंतर्गत RPF ने 42 अल्पवयीन मुलांची सुटका केली. या मुलांना पुढील काळजी, संरक्षण व पुनर्वसनासाठी चाइल्ड हेल्पलाईनकडे सुपूर्द करण्यात आले असून, संभाव्य शोषणापासून त्यांचे संरक्षण करण्यात आले आहे.

रेल्वे परिसरातील बेकायदेशीर हालचालींवर आळा घालण्यासाठी राबविण्यात आलेल्या ऑपरेशन सतर्क मोहिमेत RPF ने ₹5.31 लाख किमतीच्या 3,146 बेकायदेशीर दारूच्या बाटल्या जप्त केल्या. यासोबतच 38 दारू तस्करांना अटक करून त्यांच्या विरोधात कायदेशीर कारवाई करण्यात आली, ज्यामुळे रेल्वे परिसरातील अवैध व्यापाराला मोठा आळा बसला आहे.

कायदा व सुव्यवस्था राखण्यासाठी RPF ने ACP प्रकारातील 142 प्रकरणे उघडकीस आणून, संबंधित गुन्हेगारांवर रेल्वे कायदा कलम 141 अंतर्गत अटक व खटले दाखल केले. तसेच, जीवन रक्षा उपक्रम अंतर्गत RPF कर्मचाऱ्यांनी तीन प्रवाशांचे प्राण वाचवून आपली कर्तव्यनिष्ठा अधोरेखित केली.

प्रवाशांच्या सामान चोरीच्या घटनांवर कठोर कारवाई करत RPF ने नऊ गुन्हेगारांना अटक केली असून, त्यांच्याकडून ₹67.88 लाख किमतीचे चोरीचे साहित्य जप्त करण्यात आले आहे. या कारवाईमुळे प्रवाशांमध्ये सुरक्षिततेची भावना अधिक बळकट झाली आहे.

ही सर्व कामगिरी RPF च्या सतर्कता, समर्पण आणि प्रवासीहितैषी दृष्टिकोनाचे उत्तम उदाहरण आहे. कोकण रेल्वेवर सुरक्षित, संरक्षित आणि प्रवासीस्नेही प्रवास अनुभव देण्यासाठी RPF चे योगदान अत्यंत मोलाचे ठरत आहे.

​   Follow us on        

एर्नाकुलम: उत्तर भारत आणि दक्षिण भारताला जोडणाऱ्या प्रवाशांच्या सोयीसाठी रेल्वे प्रशासनाने योग नगरी ऋषिकेश – एर्नाकुलम जंक्शन – योग नगरी ऋषिकेश दरम्यान  स्पेशल एक्सप्रेस गाड्या चालवण्याचा निर्णय घेतला आहे. या विशेष गाड्यांमुळे उत्तराखंड, दिल्ली, महाराष्ट्र, गोवा आणि केरळ या राज्यांमधील प्रवाशांना मोठा दिलासा मिळणार आहे.

​गाड्यांचे वेळापत्रक आणि मार्ग

​१. ट्रेन क्र. ०४३६० (योग नगरी ऋषिकेश ते एर्नाकुलम जंक्शन): ही गाडी शुक्रवारी, ३० जानेवारी २०२६ रोजी सकाळी ०७:०० वाजता योग नगरी ऋषिकेश येथून सुटेल आणि तिसऱ्या दिवशी रात्री २३:३० वाजता एर्नाकुलम जंक्शनला पोहोचेल.

​२. ट्रेन क्र. ०४३५९ (एर्नाकुलम जंक्शन ते योग नगरी ऋषिकेश): परतीच्या प्रवासात ही गाडी मंगळवारी, ०३ फेब्रुवारी २०२६ रोजी रात्री २३:०० वाजता एर्नाकुलम येथून सुटेल आणि चौथ्या दिवशी दुपारी १६:१५ वाजता योग नगरी ऋषिकेशला पोहोचेल.

योग नगरी ऋषिकेश आणि एर्नाकुलम जंक्शन दरम्यान धावणारी ही विशेष एक्सप्रेस एकूण ३३ स्थानकांवर थांबणार असून, तिचा मार्ग हरिद्वार, मेरठ सिटी, हजरत निजामुद्दीन, मथुरा, कोटा, नागदा, रतलाम, वडोदरा, सुरत, वसई रोड, पनवेल, रोहा, चिपळूण, रत्नागिरी, कणकवली, कुडाळ, थिविम, मडगाव, कारवार, कुमटा, भटकळ, उडुपी, मंगळूर, कासारगोड, कन्नूर, कोझिकोड, तिरुर, कुट्टिपुरम, शोरानूर, थ्रिसूर आणि अलुआ असा आहे.

​कोचची रचना (Coach Composition) या गाडीत प्रवाशांच्या सोयीसाठी विविध श्रेणींचे एकूण १८ डबे असतील:

​१ डबा: प्रथम श्रेणी सह एसी टू टायर (1st Class Cum AC 2 Tier)

​१ डबा: एसी टू टायर (AC 2 Tier)

​३ डबे: एसी थ्री टायर (AC 3 Tier)

​७ डबे: स्लीपर क्लास (Sleeper Class)

​४ डबे: जनरल सेकंड क्लास (General Second Class)

​२ डबे: लगेज कम ब्रेक व्हॅन

​आरक्षणाबाबत माहिती या विशेष गाड्यांचे आगाऊ आरक्षण (Advance Reservation) २८ जानेवारी २०२६ रोजी सकाळी ०८:०० वाजेपासून दक्षिण रेल्वेच्या (Southern Railway) केंद्रांवरून आणि आयआरसीटीसीच्या (IRCTC) संकेतस्थळावर सुरू झाले आहे.

​प्रवाशांनी या विशेष सुविधेचा लाभ घ्यावा, असे आवाहन रेल्वे प्रशासनातर्फे करण्यात आले आहे.

   Follow us on   

सीबीडी बेलापूर: कोंकण रेल्वे कॉर्पोरेशनच्या मुख्य कार्यालयात २७ जानेवारी रोजी महाराष्ट्र रेल्वे प्रवासी महासंघ आणि रेल्वे अधिकारी यांच्यात एक महत्त्वाची बैठक पार पडली. या बैठकीत सिंधुदुर्ग (ओरस) रेल्वे स्थानकावरील आरक्षण प्रणाली (PRS) केंद्राबाबत रेल्वे प्रशासनाने चिंतेची बाब मांडली आहे. प्रवाशांच्या मागणीखातर सुरू करण्यात आलेल्या या आरक्षण खिडकीला सध्या अत्यंत अल्प प्रतिसाद मिळत असून, दिवसाला सरासरी केवळ ७ तिकिटांचे आरक्षण होत आहे. रेल्वेच्या नियमांनुसार, एखादे आरक्षण केंद्र सुरू ठेवण्यासाठी तिथून दिवसाला किमान २५ तिकिटांची विक्री होणे आवश्यक असते.

​प्रवासी महासंघाच्या विनंतीचा मान राखून रेल्वे अधिकाऱ्यांनी हे केंद्र सुरू ठेवण्यासाठी एक महिन्याची मुदतवाढ दिली आहे. जर या काळात प्रतिसादात सुधारणा झाली नाही, तर हे केंद्र कायमचे बंद केले जाण्याची शक्यता आहे. या पार्श्वभूमीवर, महाराष्ट्र रेल्वे प्रवासी महासंघाचे प्रसिद्धी प्रमुख अभिजित धुरत यांनी ओरस, कुडाळ आणि परिसरातील नागरिकांना कळकळीचे आवाहन केले आहे की, त्यांनी मोबाईल ॲपऐवजी प्रत्यक्ष रेल्वे खिडकीवर जाऊन आरक्षण करावे. अपेक्षित २५ किंवा त्याहून अधिक आरक्षणे नोंदवून हे केंद्र वाचवण्यासाठी सहकार्य करावे, अन्यथा हे केंद्र बंद झाल्यास महासंघ जबाबदार राहणार नाही, असेही त्यांनी स्पष्ट केले आहे.

   Follow us on   

बेलापूर: सावंतवाडी रेल्वे स्थानकाचे टर्मिनसमध्ये रूपांतर करण्याच्या मागणीसाठी कोकण रेल्वेचे संस्थापक सदस्य सुरेंद्र नेमळेकर यांनी पुकारलेले उपोषण स्थगित केल्यानंतर, आज बेलापूर येथील कोकण रेल्वेच्या मुख्य कार्यालयात एक महत्त्वाची सभा पार पडली. या सभेत बोलताना कोकण रेल्वेच्या (KRCL) वरिष्ठ अधिकाऱ्यांनी सावंतवाडी टर्मिनसबाबत प्रशासकीय अडथळे स्पष्ट करत तूर्त या प्रकल्पाबाबत असमर्थता दर्शविली आहे. ‘वर्तमान परिस्थितीत सावंतवाडी येथे टर्मिनस उभारणे कोकण रेल्वेसाठी निधी अभावी शक्य नाही’ असे स्पष्ट मत मुख्य वाणिज्य व्यवस्थापक (CCM) श्री. आशुतोष श्रीवास्तव आणि सिव्हिल विभागाचे श्री. एल. प्रकाश यांनी यावेळी व्यक्त केले.

​या प्रकल्पासाठी लागणारा निधी हा अत्यंत मोठा असून, रेल्वेच्या सध्याच्या बजेटमध्ये हे शक्य नसल्याचे प्रशासनाने म्हटले आहे. सावंतवाडी स्टेशनचे पूर्ण क्षमतेच्या टर्मिनसमध्ये रूपांतर करण्यासाठी मोठ्या प्रमाणात आर्थिक तरतूद (Huge Finance) आवश्यक आहे. हा निधी उभारणे कोकण रेल्वेच्या मर्यादेबाहेर असल्याने, या विषयावर आता थेट केंद्रीय रेल्वे मंत्रालयाकडे पाठपुरावा करणे हाच एकमेव मार्ग असल्याचे अधिकाऱ्यांनी सुचवले आहे. त्यामुळे आता या प्रकल्पाचा चेंडू केंद्र सरकारच्या कोर्टात गेला असून, मंत्रालयाकडून विशेष निधी मिळाल्याशिवाय टर्मिनसचे काम पुढे सरकणे कठीण दिसत आहे.

​या गंभीर परिस्थितीनंतर आता कोकणातील लोकप्रतिनिधींच्या भूमिकेकडे सर्वांचे लक्ष लागले आहे. सिंधुदुर्ग आणि रत्नागिरी जिल्ह्यातील प्रवाशांच्या हितासाठी विद्यमान खासदार नारायण राणे आणि खासदार सुनील तटकरे यांनी हा प्रश्न लोकसभेत लावून धरणे आवश्यक आहे. विशेष म्हणजे, मुंबई आणि ठाणे परिसरातील अनेक मतदारसंघांत कोकणी मतदारांचे मोठे प्राबल्य असल्याने, तेथील खासदारांनीही या मागणीकडे गांभीर्याने लक्ष देऊन रेल्वे मंत्रालयावर दबाव निर्माण करावा, अशी अपेक्षा व्यक्त होत आहे. एकूणच, प्रशासकीय पातळीवरून हा प्रश्न आता राजकीय इच्छाशक्तीच्या वळणावर येऊन थांबला आहे.

बेलापूर येथील आजच्या सभेत कोंकण रेल्वेचे अधिकारी आशुतोष श्रीवास्तव (कमर्शियल डिपार्टमेंट मॅनेजर),एल. प्रकाश (मेंटेनन्स आणि कन्स्ट्रक्शन डिपार्टमेंट),राजेंद्र कुमार शर्मा (यातायात विभाग),जुबेर पठाण (कोंकण रेल्वे सुरक्षा आयुक्त),राजेंद्र दिनकर घोलप (तक्रार निवारण अधिकारी), राजेश ठोंबल (ट्रॅफिक परिचालन),बाळासाहेब निकम (चिफ पर्सनल ऑफिसर).पी. जी. नायर ( डेप्यूटी चीफ इंजिनीअर )यांच्याशी बैठकीत चर्चा झाली

या वेळी महाराष्ट्र रेल्वे प्रवासी  महासंघाचे अध्यक्ष आणि ZRUCC कमिटी सदस्य अभिजीत धुरत, सल्लागार व कोंकण रेल्वे संस्थापक सदस्य सुरेंद्र नेमळेकर, गणेश परब , अमित नार्वेकर, शक्तीप्रसाद शिरोडकर, सचिन धाडवे, वासुदेव गुरव, पवन पांचाळ, विक्रम येलवे, विनायक राणे, संतोष पालकर, रमण सावंत, सुनील उतेकर, तानाजी परब, अमित दुखंडे या सर्व मान्यवरांच्या उपस्थितीत सभा संपन्न झाली. यावेळी कोकण रेल्वे संबधित इतरही महत्त्वाच्या प्रश्नांबद्दल सकारात्मक चर्चा करण्यात आली.

सावंतवाडी टर्मिनसची गरज

सावंतवाडी स्टेशनचे ‘टर्मिनस’मध्ये रूपांतर होणे हे केवळ तांत्रिक बदल नसून, संपूर्ण दक्षिण कोकणच्या दळणवळणासाठी आणि अर्थव्यवस्थेसाठी तो एक क्रांतीकारक टप्पा ठरणार आहे. टर्मिनसचे सर्वात मोठे महत्त्व म्हणजे यामुळे सावंतवाडी हे गाड्यांचे ‘उगमस्थान’ (Originating point) बनेल, ज्यामुळे कोकणातील प्रवाशांना आरक्षणासाठी स्वतंत्र कोटा उपलब्ध होऊन ‘कन्फर्म सीट’ मिळणे सोपे होईल. सध्या अनेक गाड्या गोव्याहून भरून येत असल्याने कोकणातील प्रवाशांना उभ्याने प्रवास करावा लागतो, ही समस्या टर्मिनसमुळे कायमची सुटू शकते. तसेच, टर्मिनसमध्ये गाड्यांच्या देखभालीसाठी लागणारी ‘पिट लाईन’ आणि साफसफाईची यंत्रणा उपलब्ध असल्याने, मुंबई किंवा पुण्याहून येणाऱ्या गाड्या मडगावपर्यंत न नेता थेट सावंतवाडीत थांबवता येतील, ज्यामुळे मडगाव स्थानकावरील अतिरिक्त ताण कमी होईल.

   Follow us on   

सिंधुदुर्ग: प्रशासकीय कामात पारदर्शकता आणण्याचे दावे केले जात असतानाच, सावंतवाडी तहसील कार्यालयातील एक धक्कादायक प्रकार समोर आला आहे. नवीन रेशनकार्ड बनवून देण्यासाठी एका महिला पुरवठा निरीक्षकाने चक्क चुलीवर भाजलेले काजू, साजूक तूप, गोड पपई आणि बकरीच्या दुधाची मागणी केल्याची तक्रार एका गरीब महिलेने केली आहे. या विचित्र मागणीमुळे जिल्ह्यात खळबळ उडाली आहे.

​नेमकी घटना काय?

​सावंतवाडी तालुक्यातील आंबोली येथील रहिवासी असलेल्या शालू जानू कोकरे या महिलेने ही तक्रार केली आहे. शालू कोकरे या धनगर समाजातील असून बकरी पालन आणि मजुरी करून आपला उदरनिर्वाह करतात. काही दिवसांपूर्वी त्या नवीन रेशनकार्ड काढण्यासाठी सावंतवाडी तहसील कार्यालयात गेल्या होत्या.

​तक्रारदार महिलेच्या म्हणण्यानुसार, तेथील पुरवठा निरीक्षण अधिकारी श्रीमती दिपाली सचितानंद गोटे/वाघमारे यांनी रेशनकार्डसाठी त्यांच्याकडे १०,००० रुपयांची मागणी केली.

​लाचेत मागितले ‘खाद्यपदार्थ’

​जेव्हा शालू कोकरे यांनी आपली आर्थिक परिस्थिती हलाखीची असल्याचे सांगितले आणि आपण पैसे देऊ शकत नाही असे स्पष्ट केले, तेव्हा संबंधित महिला अधिकाऱ्याने पैशांऐवजी पदार्थांची यादीच समोर ठेवली. तक्रार अर्जात नमूद केल्यानुसार, अधिकाऱ्याने खालील वस्तूंची मागणी केली:

​पेजेचे तांदूळ, चुलीवर भाजलेले काजूगर, साजूक तूप​, मोठ्या आकाराची गोड पपई​, बकरीचे दूध

​इतकेच नाही तर, हे सामान कार्यालयात न आणता बाजूच्या कॅन्टीनमध्ये ठेवण्यास आणि दूध फ्रिजमध्ये ठेवण्यास बजावले. ‘हे सामान दिले तर कागदपत्रे नसली तरी एका तासात रेशनकार्ड बनवून देईन’ असे आश्वासनही संबंधित अधिकाऱ्याने दिल्याचे तक्रारीत म्हटले आहे.

​अपमानास्पद वागणूक

​शालू कोकरे यांनी या वस्तू देण्यासही असमर्थता दर्शवली असता, संबंधित महिला अधिकाऱ्याने त्यांना “एकही वस्तू देता येत नसेल तर इथून चालती हो, माझा वेळ घालवू नको” अशा शब्दांत अपमानित करून कार्यालयातून हाकलून दिल्याचा आरोप करण्यात आला आहे.

​कठोर कारवाईची मागणी

​याप्रकरणी पीडित महिलेने सिंधुदुर्ग जिल्ह्याचे पालकमंत्री मा. नितेश राणे, जिल्हाधिकारी, उपविभागीय अधिकारी आणि तहसीलदारांकडे लेखी तक्रार केली आहे. एका गरीब आणि गरजू महिलेला अशा प्रकारे वेठीस धरणाऱ्या भ्रष्टाचार करणाऱ्या अधिकाऱ्याची चौकशी करून त्यांच्यावर कडक कारवाई करावी, अशी मागणी आता जोर धरत आहे.