मुंबई: कोकणवासीयांसाठी महत्त्वाची असलेली दादर-रत्नागिरी पॅसेंजर (गाडी क्र. ५०१०३/४) रद्द करून त्याऐवजी दादर-गोरखपूर गाडी सुरू करण्याच्या रेल्वे प्रशासनाच्या निर्णयाचा महाराष्ट्र नवनिर्माण सेनेने तीव्र निषेध केला आहे. मनसे नेते आणि माजी आमदार नितीन सरदेसाई यांच्या नेतृत्वाखालील शिष्टमंडळाने मध्य रेल्वेच्या वरिष्ठ अधिकाऱ्यांची भेट घेऊन या निर्णयाचा विरोध केला आणि मागणी मान्य न झाल्यास तीव्र आंदोलनाचा इशारा दिला.
स्थानिक प्रवाशांच्या अडचणींकडे दुर्लक्ष
नितीन सरदेसाई यांनी रेल्वे प्रशासनाला दिलेल्या पत्रात म्हटले आहे की, गेल्या काही काळापासून महाराष्ट्रांतर्गत धावणाऱ्या रेल्वे गाड्या रद्द करून परराज्यातील गाड्यांना प्राधान्य दिले जात आहे. कोविड काळात बंद झालेल्या मुंबई-कोल्हापूर सह्याद्री एक्सप्रेस, मुंबई-मनमाड गोदावरी एक्सप्रेस आणि पुणे-भुसावळ पॅसेंजर यांसारख्या अनेक गाड्या अद्याप सुरू करण्यात आलेल्या नाहीत. अशातच आता दादर-रत्नागिरी ही कोकणवासीयांची हक्काची गाडी रद्द करून त्याऐवजी गोरखपूर गाडी सुरू करणे, हा कोकणवासीयांवर अन्याय आहे.
प्रमुख मागण्या आणि इशारा:
दादर-रत्नागिरी पॅसेंजर पूर्ववत दादर स्थानकावरूनच सोडण्यात यावी.
कोविड काळात रद्द करण्यात आलेल्या महाराष्ट्रांतर्गत गाड्या पुन्हा त्वरित सुरू कराव्यात.
स्थानिक प्रवाशांना डावलून परराज्यातील प्रवाशांना झुकते माप देणे रेल्वेने थांबवावे.
”कोकणवासीयांना आणि महाराष्ट्रातील जनतेला डावलून परराज्यातील प्रवाशांना प्राधान्य देणे हा दुजाभाव रेल्वे प्रशासनाकडून वारंवार केला जात आहे. रेल्वेने या निर्णयाची तात्काळ दखल घेऊन कोकणवासीयांना दिलासा द्यावा, अन्यथा आम्हाला तीव्र आंदोलनाचा मार्ग स्वीकारावा लागेल,” असा सज्जड दम नितीन सरदेसाई यांनी दिला आहे.
या निवेदनाच्या प्रती रेल्वे मंत्री (नवी दिल्ली) आणि कोकण रेल्वेचे व्यवस्थापक (बेलापूर) यांनाही पाठवण्यात आल्या आहेत. या निर्णयामुळे कोकणवासीय आणि मुंबईकर प्रवाशांमध्ये प्रचंड संताप व्यक्त होत असून, आता रेल्वे प्रशासन यावर काय भूमिका घेते, याकडे सर्वांचे लक्ष लागले आहे.
