मुंबई, २४ मार्च २०२६: सिंधुदुर्ग जिल्ह्यातील वेंगुर्ला तालुक्यात ताज समूहाच्या माध्यमातून पहिले ५ स्टार हॉटेल उभारण्याच्या प्रकल्पाला नवीन गती मिळाली आहे. आज मंत्रालयात पालकमंत्री तथा मत्स्यव्यवसाय आणि बंदरे विकास मंत्री नितेश राणे यांच्या अध्यक्षतेखाली या प्रकल्पाची आढावा बैठक पार पडली.या बैठकीत २३ डिसेंबर २०२५ रोजी पर्यटनमंत्री शंभूराज देसाई यांच्या अध्यक्षतेखाली झालेल्या बैठकीतील निर्देशांची अंमलबजावणी तपासण्यात आली.
शिरोडा-वेळाघर येथे सुमारे ५२ ते ५४ हेक्टर जमिनीवर प्रस्तावित हा प्रकल्प जिल्ह्याच्या पर्यटन विकासासाठी अत्यंत महत्त्वाचा मानला जात आहे. सर्व संबंधित घटकांना सोबत घेऊन अंतिम मसुदा लवकरात लवकर तयार करण्याच्या सूचना देण्यात आल्या.
बैठकीला सिंधुदुर्ग जिल्हाधिकारी तृप्ती धोडमिसे (ऑनलाइन), दि इंडियन हॉटेल्स लिमिटेड (ताज समूह) चे प्रतिनिधी बिजल देसाई व सिंथिया नोरोन्हा, सिंधुदुर्ग जिल्हा बँक अध्यक्ष मनीष दळवी, जिल्हा परिषदेचे माजी अध्यक्ष सतीश सावंत यांच्यासह इतर अधिकारी उपस्थित होते.
सिंधुदुर्गच्या निसर्गरम्य किनारपट्टी, स्वच्छ समुद्र आणि यूनेस्कोच्या तात्पुरत्या वारसा यादीतील ठिकाणांमुळे हा प्रकल्प जिल्ह्याला आंतरराष्ट्रीय पर्यटन केंद्र बनवण्यास मदत करेल. यामुळे स्थानिक रोजगार वाढेल आणि कोकण पर्यटनाला मोठी चालना मिळेल, असे मानले जात आहे.पालकमंत्री नितेश राणे यांनी या प्रकल्पाला प्राधान्य दिले असून, सर्व अडचणी दूर करून तो लवकर पूर्ण करण्यावर भर दिला आहे. हा प्रकल्प अनेक वर्षांपासून प्रलंबित होता, मात्र आता त्याला ठोस आकार येत आहे.
