मुंबई: कोकणात जाणाऱ्या सामान्य चाकरमान्यांच्या हक्काची आणि जिव्हाळ्याची असलेली ‘रत्नागिरी-दादर पॅसेंजर’ रेल्वे आता कायमची इतिहासजमा होणार असल्याचे चिन्ह दिसत आहे. कोरोना काळात बंद करण्यात आलेली ही गाडी पुन्हा दादरपर्यंत सुरू करावी, ही कोकणवासीयांची अत्यंत रास्त मागणी रेल्वे प्रशासनाने अत्यंत उद्धटपणे फेटाळून लावली आहे.
शिंदे गटाचे खासदार रवींद्र वायकर यांनी नुकतीच दिल्लीत रेल्वेच्या वरिष्ठ अधिकाऱ्यांची भेट घेतली. मात्र, रेल्वे अधिकाऱ्यांनी दादर किंवा सीएसटीएम येथून रत्नागिरीसाठी गाडी सुरू करणे ‘शक्यच नाही’ असे स्पष्टपणे सांगून कोकणच्या जनतेच्या तोंडाला पाने पुसली आहेत.
विशेष म्हणजे, आता ही गाडी दिवा स्थानकावरून वसईमार्गे वळवण्यात येणार आहे. म्हणजेच, मुंबईत राहणाऱ्या चाकरमान्याला ही गाडी पकडण्यासाठी थेट दिवा किंवा वसई गाठावी लागणार आहे.
उपनगरीय लोकल सेवेचा वक्तशीरपणासाठी कोकणकरांच्या सोयीचा बळी.
रेल्वे अधिकार्यांनी दिलेल्या माहितीनुसार उपनगरीय लोकल सेवेचा वक्तशीरपणा वाढविण्यासाठी काही ठोस पावले उचलत आहे. त्यात कोकण रेल्वे मार्गे जाणार्या गाड्या कायमस्वरूपी पनवेल, बोरिवली येथील प्रस्तावित टर्मिनसवर शिफ्ट करण्याचा विचार असल्याची माहिती समोर येत आहे.
एका आघाडीच्या मराठी वृत्तपत्राने दिलेल्या माहितीनुसार भविष्यात कोकणात जाणाऱ्या सर्व एक्स्प्रेस गाड्या आता पश्चिम रेल्वेच्या बोरीवली स्थानकातून सुटतील. या गाड्या पुढील दीड ते दोन वर्षात पूर्ण होणार्या नव्या रेल्वे मार्गाने म्हणजेच जुचंद्र, कमान रोड, खारबाव, भिवंडी रोड, नवी डोंबिवली, कोपर, नांदवली, तळोजे आणि कळंबोलीमार्गे पनवेलला जातील.
एकदंरीत मध्यरेल्वे कोकणरेल्वेशी असलेली लिंक संपूर्णपणे तोडणार असून या गाड्या पाश्चिम रेल्वेच्या समन्वयाने चालविण्यात येणार असल्याची माहिती समोर येत आहे.
प्रवासी वर्गात नाराजी.
आधीच दादर रत्नागिरी एक्सप्रेस गाडी बंद केल्याने नाराज झालेला कोकणातील प्रवासी वर्ग या बातमीने सुन्न झाला आहे. कोकणातील जनतेचा कोणी नसल्याची भावना त्यांच्याकडून व्यक्त होत आहे.
