Follow us on   

सिंधुदुर्ग: जिल्ह्यासाठी एक अत्यंत आनंदाची आणि महत्त्वाची बातमी समोर आली आहे. जिल्ह्याचे पालकमंत्री नितेश राणे यांनी सिंधुदुर्गवासियांना १५० कोटी रुपयांच्या गुंतवणुकीची ‘गुड न्यूज’ दिली आहे. मंत्रालयामध्ये ‘जोया मरीन कंपनी’ आणि ‘महाराष्ट्र मेरिटाईम बोर्ड बंदर मंत्रालय’ यांच्यात एक महत्त्वपूर्ण सामंजस्य करार (MoU) स्वाक्षरित करण्यात आला आहे. या करारानुसार, मुख्यमंत्री एकनाथ शिंदे यांच्या ड्रीम प्रोजेक्ट असलेल्या ‘मुंबई वॉटर मेट्रो’साठी लागणाऱ्या ५० आणि १०० पॅसेंजरच्या बोटी या प्रकल्पांतर्गत बनवल्या जाणार आहेत. पहिल्या टप्प्यात अशा जवळपास १०० बोटी बनवण्याचे उद्दिष्ट ठेवण्यात आले आहे.

​हा भव्य बोट निर्मितीचा कारखाना सिंधुदुर्ग जिल्ह्यातील सावंतवाडी येथील तळवणे गावात उभा राहणार आहे. बोट क्राफ्ट, येल्लो फ्लीट यांसारख्या कंपन्यांनी एकत्र येऊन हा प्रकल्प जिल्ह्यात आणला आहे. या प्रकल्पामुळे कोकणातील तरुणांसाठी मोठ्या प्रमाणावर रोजगार निर्मिती होणार आहे. नोकरी-धंद्यासाठी मुंबई किंवा इतर ठिकाणी गेलेल्या कोकणातील तरुणांना पुन्हा आपल्या मातृभूमीत परत आणणे (रिव्हर्स मायग्रेशन), हाच यामागचा मुख्य उद्देश असल्याचे पालकमंत्री नितेश राणे यांनी सांगितले.

​या पर्यावरणपूरक प्रकल्पामुळे स्थानिक अर्थकारणाला मोठी गती मिळणार आहे. या कारखान्यात विविध प्रकारच्या नोकऱ्या आणि कौशल्य विकासाच्या संधी उपलब्ध होणार असल्याने, पालकमंत्र्यांनी स्थानिक तरुण-तरुणींना या क्षेत्रातील आवश्यक कौशल्ये (Skills) आत्मसात करण्याचे आवाहन केले आहे. तसेच, येत्या ५ वर्षांत जहाज बांधणी, मत्स व्यवसाय आणि पर्यटन क्षेत्रात असे अनेक मोठे प्रकल्प सिंधुदुर्गात आणून रोजगार निर्मितीला प्राधान्य दिले जाईल, असा विश्वासही त्यांनी यावेळी व्यक्त केला आहे.

   Follow us on   

गोवा:

कोकण रेल्वेच्या थिविम रेल्वे स्टेशनवर रेल्वे संरक्षण दलाने (आरपीएफ) सीसीटीव्ही कॅमेऱ्यांच्या मदतीने एक मोठी आणि यशस्वी कारवाई केली आहे. स्टेशन परिसरात संशयास्पद रित्या फिरणाऱ्या तीन आरोपींना आरपीएफ जवानांनी तत्परता दाखवत रंगेहात ताब्यात घेतले. या आरोपींकडून तब्बल १५ महागडे मोबाईल फोन आणि ५ लॅपटॉप असा एकूण ३.५ लाख रुपये किमतीचा मुद्देमाल जप्त करण्यात आला आहे. थिविम हे गोव्यातील एक अत्यंत महत्त्वाचे स्टेशन असून, प्रवाशांच्या सुरक्षेसाठी तैनात असलेल्या आरपीएफच्या चोख नजरतेमुळे या चोरांचा डाव उधळून लावण्यात यश आले.

​मंगळवारी स्टेशनवरील सीसीटीव्ही फुटेजची तपासणी करत असताना आरपीएफ कर्मचाऱ्यांना काही जणांच्या हालचाली संशयास्पद आढळल्या. या आरोपींकडे चोरीच्या महागड्या इलेक्ट्रॉनिक वस्तू असल्याचे कॅमेऱ्यात स्पष्ट झाल्यानंतर, आरपीएफ आउटपोस्टच्या जवानांनी क्षणाचाही विलंब न लावता त्यांना वेढा घातला आणि पळून जाण्याच्या तयारीत असलेल्या तिघांनाही अटक केली. या धडक कारवाईनंतर आरपीएफने पुढील कायदेशीर प्रक्रियेसाठी तीनही आरोपींना जप्त केलेल्या मालासह अंजुना पोलिसांच्या स्वाधीन केले आहे. सध्या अंजुना पोलीस ठाण्यात गुन्हा दाखल करण्यात आला असून पोलिसांकडून या टोळीची कसून चौकशी सुरू आहे.

​कोकण रेल्वे प्रशासनाने आरपीएफ जवानांच्या या कामगिरीचे भरभरून कौतुक केले आहे. आरपीएफच्या ‘#सदारसेवा’ या उपक्रमांतर्गत रेल्वे क्षेत्रातील गुन्हेगारी मोडीत काढण्यासाठी अशा कारवाया सातत्याने केल्या जात आहेत. सीसीटीव्ही तंत्रज्ञान आणि जवानांची सतर्कता यामुळे रेल्वे प्रवास अधिक सुरक्षित होत असल्याचे पुन्हा एकदा सिद्ध झाले असून, प्रवाशांनीही प्रवास करताना आपल्या साहित्याबाबत सतर्क राहावे, असे आवाहन रेल्वे प्रशासनाने केले आहे.

   Follow us on   

गणेशोत्सव हा संपूर्ण कोकणवासीयांसाठी अत्यंत जिव्हाळ्याचा आणि वर्षातील सर्वात मोठा सण मानला जातो. दरवर्षी लाखो चाकरमानी बाप्पाच्या आणि गौरीच्या उत्सवासाठी मुंबई-पुण्यासारख्या शहरांतून न चुकता आपल्या कुटुंबासह गावी जात असतात. यंदा २०२६ मध्ये सोमवार, १४ सप्टेंबर रोजी श्रीगणेश चतुर्थी आहे. या निमित्ताने कोकणात जाणाऱ्या भाविकांची गर्दी लक्षात घेता, कोकण रेल्वे मार्गावरील ‘कोकणकन्या एक्सप्रेस’, ‘मांडवी एक्सप्रेस’, ‘तुतारी’ आणि ‘मत्स्यगंधा’ यांसारख्या नियमित गाड्यांचे आगाऊ तिकीट आरक्षण चालू झाले आहे. नियमित गाड्यांचे तिकीट मिळवण्यासाठी दरवर्षी मोठी चुरस पाहायला मिळत असल्याने चाकरमान्यांना आतापासूनच तयारी करावी लागणार आहे.

​यंदा शुक्रवार, ११ सप्टेंबर रोजी श्रावणी अमावस्या सकाळी ८:५६ वाजता संपत आहे, त्यामुळे चाकरमानी मोठ्या संख्येने याच रात्री गावाकडे निघण्याची शक्यता आहे. या ११ सप्टेंबरच्या प्रवासासाठीचे रेल्वे आरक्षण १३ जुलै रोजी सकाळी सुरू होणार आहे. त्यानंतर १२ आणि १३ सप्टेंबर (शनिवार व रविवार) रोजीच्या प्रवासासाठी नियमित गाड्यांचे तिकीट आरक्षण अनुक्रमे १४ जुलै आणि १५ जुलै रोजी खुले केले जाईल. रेल्वेचे हे आरक्षण प्रवासाच्या ६० दिवस आधी उपलब्ध होत असल्याने प्रवाशांना वेळेत तिकीट बुक करावे लागेल.

​यासोबतच, कोकणात गौरीच्या सणासाठी जाणाऱ्या भाविकांची संख्याही खूप मोठी असते. यंदा गुरुवारी, १७ सप्टेंबर रोजी गौरी आगमन असून शुक्रवारी, १८ सप्टेंबर रोजी गौरीपूजन आहे. त्यामुळे १८ सप्टेंबरच्या महत्त्वाच्या दिवशी गावात पोहोचण्यासाठी १७ सप्टेंबर रोजी सुटणाऱ्या नियमित गाड्यांच्या आरक्षणासाठी प्रवाशांची मोठी झुंबड उडण्याची चिन्हे आहेत. या १७ सप्टेंबरच्या प्रवासाचे आरक्षण १९ जुलै रोजी सुरू होणार आहे. जर प्रवाशांना या नियमित गाड्यांचे तिकीट मिळाले नाही, तर त्यांना नंतर मध्य व कोकण रेल्वेकडून सोडल्या जाणाऱ्या विशेष (स्पेशल) गाड्यांवर अवलंबून राहावे लागेल. म्हणूनच कोकणवासीयांनी आरक्षणाच्या या महत्त्वाच्या तारखा लक्षात ठेवून वेळेत आपले नियोजन करणे फायदेशीर ठरेल.

कोकण रेल्वे प्रवासी संघटनेच्या प्रयत्नांना अखेर यश!

   Follow us on   

सिंधुदुर्ग:

कोकणातील रेल्वे कनेक्टिव्हिटी अधिक सक्षम करण्याच्या दृष्टीने एक अत्यंत महत्त्वाचा निर्णय घेण्यात आला आहे. सिंधुदुर्ग जिल्ह्यातील सावंतवाडी रोड रेल्वे स्थानकावर आता ३ प्रमुख एक्स्प्रेस गाड्यांना नवीन थांबा (Stoppage) मंजूर करण्यात आला आहे. केंद्रीय रेल्वे मंत्री अश्विनी वैष्णव यांनी या संदर्भातील मंजुरी दिली असून, महाराष्ट्राचे मुख्यमंत्री देवेंद्र फडणवीस यांनी सोशल मीडियाद्वारे ही माहिती देत केंद्र सरकारचे आभार मानले आहेत.

‘या’ ३ गाड्यांना मिळाला थांबा:

सावंतवाडी रोड स्थानकावर आता खालील गाड्या थांबतील:

१. गाडी संख्या १२१३३/१२१३४: छत्रपती शिवाजी महाराज टर्मिनस (CSMT) – मंगळुरू एक्स्प्रेस

२. गाडी संख्या १२४३१/१२४३२: तिरुवनंतपुरम सेंट्रल – हजरत निजामुद्दीन राजधानी एक्स्प्रेस

३. गाडी संख्या १२२०१/१२२०२: लोकमान्य टिळक टर्मिनस (LTT) – तिरुवनंतपुरम उत्तर (कोचुवेली) गरीब रथ एक्स्प्रेस

देवेंद्र फडणवीस यांच्या पाठपुराव्याला यश

जनसामान्यांच्या सुविधेसाठी सावंतवाडी रोड रेल्वे स्थानकावर विविध गाड्यांना थांबा मिळवा, यासाठी देवेंद्र फडणवीस यांनी २५ मार्च २०२६ रोजी केंद्रीय रेल्वे मंत्र्यांकडे पत्राद्वारे विनंती केली होती. त्यांच्या या मागणीची दखल घेत रेल्वे मंत्रालयाने ७ जुलै २०२६ रोजी अधिकृत पत्र जारी करून या तिन्ही गाड्यांच्या थांब्याला मंजुरी दिली आहे.

संघटनेच्या विविध माध्यमांतील प्रयत्नांना अखेर यश!

सावंतवाडी रोड रेल्वे स्थानकावर प्रवाशांच्या सुविधेसाठी प्रमुख गाड्या थांबवण्यात याव्यात, यासाठी कोकण रेल्वे प्रवासी संघटना (सावंतवाडी) ने विविध माध्यमातून मोठा पाठपुरावा केला होता. संघटनेच्या वतीने वेळोवेळी आंदोलने करण्यात आली, विविध स्तरांवर प्रशासनाचे लक्ष वेधण्यात आले, तसेच स्थानिक लोकप्रतिनिधींना मागण्यांची निवेदनेही देण्यात आली होती. यासोबतच, या मागणीला जनआंदोलनाचे रूप देण्यासाठी समितीने सोशल मीडियाचाही पुरेपूर वापर करून प्रवाशांचा आवाज शासनापर्यंत पोहोचवला. संघटनेच्या याच चौफेर प्रयत्नांची आणि जनभावनेची दखल अखेर प्रशासनाला घ्यावी लागली आहे.

कोकण रेल्वेच्या प्रवाशांच्या हितासाठी मिळालेल्या अभूतपूर्व यशाबद्दल कोकण रेल्वे प्रवासी संघटना, सावंतवाडीच्या वतीने परिसरातील सर्व सन्माननीय खासदार, आमदार आणि पालकमंत्री यांचे जाहीर आभार मानण्यात आले आहेत. लोकप्रतिनिधींच्या खंबीर पाठपुराव्यामुळेच प्रवाशांच्या मागण्यांना यश आले असल्याचे संघटनेने म्हटले आहे.

​या यशाबद्दल खासदार श्री. नारायण राणे साहेब, श्री. श्रीकांत शिंदे, श्री. नरेश म्हस्के, आणि श्रीमती मेधाताई कुलकर्णी, पालकमंत्री श्री. नितेश राणे, आमदार श्री. दीपक केसरकर, आमदार श्री. रवींद्र चव्हाण, आमदार श्रीमती सुलभा गायकवाड ताई, आमदार श्री. कुमार आयलानी, आणि आमदार श्री. बाळा नर आदींचे संघटनेच्या वतीने लोकप्रतिनिधींचे विशेष आभार मानण्यात आले आहेत.

​”आमच्या सर्व लोकप्रतिनिधींनी रेल्वे प्रवाशांच्या प्रश्नांवर नेहमीच सकारात्मक भूमिका घेतली आहे. त्यांच्या एकत्रित प्रयत्नांमुळे आणि सातत्यपूर्ण पाठपुराव्यामुळे हे यश मिळाले आहे. भविष्यातही प्रवासी बांधवांच्या हितासाठी आणि हक्कासाठी आपले असेच मोलाचे सहकार्य व मार्गदर्शन लाभत राहील, हा विश्वास आहे.”

— कोकण रेल्वे प्रवासी संघटना, सावंतवाडी

​या यशस्वी प्रयत्नांमुळे कोकण रेल्वेच्या प्रवाशांमध्ये समाधानाचे वातावरण असून, सर्व स्तरांतून या लोकप्रतिनिधींचे कौतुक होत आहे.

   Follow us on   

Konkan Railway:गेल्या चार दिवसांपासून सुरू असलेल्या मुसळधार पावसामुळे कोकण रेल्वेच्या वाहतुकीवर मोठा परिणाम झाला असून, रेल्वेचे वेळापत्रक पूर्णपणे कोलमडले आहे. मुंबईहून मडगावच्या दिशेने जाणाऱ्या बहुतांश एक्सप्रेस गाड्या तीन ते सहा तास उशिराने धावत असल्यामुळे प्रवाशांना मोठा मनस्ताप सहन करावा लागत आहे. या विलंबाचा सर्वाधिक फटका ‘कोकणकन्या एक्सप्रेस’ला बसला आहे. ही गाडी सिंधुदुर्ग जिल्ह्यात तब्बल सात तास उशिराने पोहोचली असून, गेल्या आठ दिवसांपासून तिचे उशिरा धावणे सुरूच आहे. याव्यतिरिक्त तुतारी एक्सप्रेस (५ तास), मांडवी एक्सप्रेस (५ तास) आणि दिवा एक्सप्रेस (६ तास) या गाड्याही मोठ्या विलंबाने धावत आहेत. या गाड्या रात्री उशिरा कोकणातील स्थानकांवर पोहोचणार असल्याने, पुढील प्रवासासाठी प्रवाशांना नाईलाजाने खाजगी वाहनांचा आधार घ्यावा लागणार आहे.

या प्रमुख गाड्यांसोबतच वंदे भारत, जनशताब्दी, कोचुवेली, नेत्रावती, आणि मंगला एक्सप्रेस यांसारख्या लांब पल्ल्याच्या गाड्यांनाही अडीच ते साडेपाच तासांचा विलंब होत आहे. मात्र, या सर्व गोंधळात प्रवाशांसाठी एक दिलासादायक बाब म्हणजे, मुंबईच्या दिशेने परतीच्या प्रवासाला असणाऱ्या गाड्यांच्या वेळापत्रकावर कोणताही परिणाम झालेला नाही. मुंबईकडे जाणारी तुतारी, जनशताब्दी, कोकणकन्या, मडगाव-एलटीटी आणि दिल्लीला जाणारी मंगला एक्सप्रेस या सर्व गाड्या आपल्या निर्धारित वेळेनुसारच धावत आहेत.