Follow us on   

सावंतवाडी: लोकप्रतिनिधींच्या उदासीनतेमुळे सिंधुदुर्ग जिल्हा आजही कोकण रेल्वेच्या मूलभूत सुविधांपासून वंचित असल्याचा आरोप कोकण रेल्वे प्रवासी संघटनेचे उपाध्यक्ष सागर तळवडेकर यांनी केला आहे. कोकण रेल्वेमुळे गोवा, कर्नाटक आणि केरळ या राज्यांना विकासाचा मोठा फायदा झाला असताना महाराष्ट्रातील सिंधुदुर्गकडे मात्र दुर्लक्ष झाले असल्याचे त्यांनी नमूद केले.

कोकण रेल्वेच्या रत्नागिरी विभागातील सिंधुदुर्ग जिल्ह्याला सुविधांच्या बाबतीत मागे ठेवण्यात आल्याची खंत त्यांनी व्यक्त केली. गोवा आणि कर्नाटक राज्यांना आधुनिक डेमू आणि मेमू गाड्यांचे जाळे उपलब्ध झाले आहे, तर सिंधुदुर्गमधील प्रवाशांना अद्यापही मर्यादित सेवा आणि अडचणींचा सामना करावा लागत आहे.

जिल्ह्यातील प्रवाशांना कमी तिकिट दरात सेवा मिळत असली तरी महत्त्वाच्या गाड्यांना थांबे मिळत नसल्याने स्थानिकांना मोठ्या गैरसोयीला सामोरे जावे लागत आहे. अनेक गाड्या जिल्ह्यातून धावत असल्या तरी त्यांचा लाभ स्थानिकांना पुरेसा मिळत नाही, ही वस्तुस्थिती असल्याचे तळवडेकर यांनी स्पष्ट केले.

सावंतवाडी टर्मिनस हा केवळ एक प्रकल्प नसून कोकणाच्या विकासासाठी अत्यंत महत्त्वाचा टप्पा आहे. या प्रकल्पामुळे पर्यटन आणि हॉटेल उद्योगाला चालना मिळून मोठ्या प्रमाणात रोजगारनिर्मिती होऊ शकते. मोपा विमानतळ आणि प्रस्तावित पंचतारांकित हॉटेल प्रकल्पांमुळे सावंतवाडी परिसर पर्यटनदृष्ट्या अधिक सक्षम होणार आहे.

मात्र सध्या कोकणातून धावणाऱ्या बहुतांश गाड्या गोवा किंवा दक्षिण भारताकडे वळवल्या जात असल्याने स्थानिक प्रवाशांना आरक्षणाची समस्या भेडसावत आहे. गणेशोत्सव, होळी यांसारख्या सणांच्या काळात ही अडचण अधिक तीव्र होते. त्यामुळे स्थानिक नागरिक आणि मुंबईतील चाकरमान्यांनी एकत्र येऊन या प्रश्नावर आवाज उठवावा, असे आवाहन सागर तळवडेकर यांनी केले आहे.

   Follow us on   

मुंबई: महाराष्ट्र  सरकारने कोकणातील पर्यटन आणि स्थानिक अर्थव्यवस्थेला चालना देण्यासाठी एक महत्त्वपूर्ण निर्णय घेतला आहे. सिंधुदुर्ग जिल्ह्यातील चिपी विमानतळावरून मुंबईकडे जाणाऱ्या विमानसेवेसाठी १०० टक्के व्हायाबिलिटी गॅप फंडिंग (VGF) मंजूर करण्यात आले आहे. या निर्णयामुळे विमानसेवा आर्थिकदृष्ट्या व्यवहार्य ठरणार असून, नियमित उड्डाणांना चालना मिळणार आहे.

या निर्णयानंतर मुंबई ते चिपी (सिंधुदुर्ग) हा प्रवास आता केवळ एका तासात पूर्ण होणार आहे. ही सेवा आठवड्यातील सातही दिवस सुरू राहणार असल्याने प्रवाशांना मोठा दिलासा मिळणार आहे. यामुळे वेळेची मोठी बचत होणार असून, प्रवास अधिक सुलभ आणि सोयीस्कर होईल.

कोकणातील पर्यटनासाठी हा निर्णय अत्यंत महत्त्वाचा ठरणार आहे. जलद आणि सुलभ हवाई सेवा उपलब्ध झाल्याने देशभरातील पर्यटकांना सिंधुदुर्ग आणि आसपासच्या पर्यटनस्थळांना भेट देणे अधिक सोपे होईल. त्यामुळे कोकण पर्यटनाचा ‘टेक ऑफ’ होईल, अशी अपेक्षा व्यक्त केली जात आहे.

याशिवाय, या निर्णयाचा स्थानिक अर्थव्यवस्थेवरही सकारात्मक परिणाम होणार आहे. हॉटेल उद्योग, पर्यटनाशी संबंधित व्यवसाय आणि स्थानिक रोजगाराच्या संधींना मोठी चालना मिळणार आहे. यामुळे कोकणातील विकास प्रक्रियेला वेग येण्याची शक्यता आहे.

विधानभवनातील कॅबिनेट बैठकीत घेतलेल्या या निर्णयाचे सिंधुदुर्गचे पालकमंत्री नितेश राणे यांनी स्वागत केले आहे. त्यांनी सांगितले की, ही सेवा सुरू होणे ही प्रवाशांची दीर्घकाळाची मागणी होती. त्यामुळे हा निर्णय कोकणवासीयांसाठी दिलासादायक ठरला असून, प्रदेशाच्या विकासासाठी एक महत्त्वाचे पाऊल मानले जात आहे.

   Follow us on   

चिपळूण:- चिपळूण तालुक्यातील दसपटी विभागातील निसर्गरम्य श्री क्षेत्र टेरव या पुरातन व सुप्रसिद्ध देवस्थानचे ग्रामदैवत श्री वाघजाई देवी आणि कुलदैवत श्री कुलस्वामिनी भवानी देवी आहे. श्री काळकाई देवी ही माहेरवाशिणींची रक्षणकर्ती देवी म्हणून प्रसिद्ध आहे. तसेच जागृत आणि नवसाला पावणाऱ्या देवता असा या देवतांचा लौकीक आहे. शक्ती, युक्ती, बुद्धी व भक्ती यांचा अजोड मिलाप असलेल्या महाबली श्री हनुमान जन्मोत्सव चैत्र पौर्णिमेला साजरा करण्यात येतो, यंदा हा उत्सव गुरूवार दिनांक २ एप्रिल रोजी मोठ्या जल्लोषात साजरा होणार आहे. श्री भवानी वाघजाई व हनुमान मंदिराची अप्रतिम रंगरंगोटी करून मंदिर यात्रोत्सवासाठी सजविण्यात आले आहे. सदर रंगकाम ज्येष्ठ आर्किटेक्ट श्री सतीश राव, सीपीएमसी, मुंबई यांच्या सल्ल्याने व देखरेखीखाली ठेकेदार श्री अमित पारकर, आकार आविष्कार इन्फ्रा, मुंबई यांनी केले आहे.

चैत्र पौर्णिमेला रुढी परंपरेनुसार सूर्योदय झाल्यावर ब्राम्हण, मानकरी, ग्रामस्थ आणि पुजारी यांच्या उपस्थितीत मंदिरात हनुमान जन्मोत्सव साजरा करतील. दुपारी १२ वाजता ग्रामस्थांच्या उपस्थितीत दोन्ही मानकरी श्रीफळाच्या तीन जोड्या श्री कुलस्वामिनी भवानी मातेसमोर ठेवून व गाऱ्हाणे घालून पुजारी ते श्रीफळ वाढवतील व प्रसाद म्हणून मानाप्रमाणे त्याचे वाटप करतील. तसेच मंदिराच्या पोवळीबाहेर पूर्व दिशेस देवीचे देणे मागणे दिले जाईल. मंदिराच्या बाहेर पावट्याच्या घुगऱ्या व देवीच्या देण्या मागण्याचा प्रसाद दिला जाईल. रुढी परंपरेनुसार पूजाविधी संपन्न झाल्यावर, पुजारी पालखीत *कुलदैवत श्री भवानी, ग्रामदैवत श्री वाघजाई, भैरी, केदार, महालक्ष्मी व कुलस्वामिनी* या देवतांची रुपी लावतील. शतकाच्या दिशेने वाटचाल करणारा टेरव गावचा चैत्रपौर्णिमा जत्रोत्सव म्हणजेच ग्रामस्थ, माहेरवाशिणी, चाकरमानी आणि भक्तांच्या आनंदाला उधाण आणणारा दिवस असतो. चैत्र पौर्णिमे निमित्त पंचक्रोशीतील मौजे कामथे व चिंचघरी येथील पालख्यांचे मिरवणुकीने वाजतगाजत रात्रौ टेरव येथे आगमन होईल. पालख्या विद्युत रोषणाईंनी तसेच विविध प्रकारच्या फुलांनी सजविलेल्या जातील. ढोल ताशांच्या गजरात गुलाल उधळीत तिन्ही पालख्यांची मिरवणूक मंदिराकडे मार्गस्थ होईल. तिन्ही पालख्या नाचत उंचावून एकमेकींना भेटतात ते दृश्य विलोभनीय असते. मंदिरात तिन्ही पालख्या स्थानापन्न झाल्यावर दर्शनासाठी आणि ओटी भरण्यासाठी प्रचंड गर्दी होते. त्या नंतर सालाबादप्रमाणे रात्रौ मनोरंजनात्मक कार्यक्रमाचे आयोजन केले जाईल.

दुसऱ्या दिवशी सकाळी दोन्ही पालख्यांची पूजा व सन्मान केल्यावर आपआपल्या गावी मार्गस्थ होतील. सदर वेळी श्री क्षेत्र टेरवची पालखी मंदिराच्या उत्तरेच्या प्रवेशद्वारापर्यंत निरोप देण्यासाठी नेली जाईल आणि अशाप्रकारे जत्रोत्सवाची सांगता होईल.

तरी सर्व भाविक, चाकरमानी, माहेरवाशिणी व हितचिंतक यांनी वार्षिक जत्रोत्सवानिमित्त दर्शनाचा लाभ घ्यावा अशी विनंती ग्रामस्थांच्या वतीने करण्यात आली आहे.

   Follow us on   

​मुंबई: उन्हाळी सुट्ट्यांमधील प्रवाशांची वाढती गर्दी लक्षात घेता, कोकण रेल्वेने मुंबई छत्रपती शिवाजी महाराज टर्मिनस (CSMT) ते मडगाव (गोवा) दरम्यान चालवल्या जाणाऱ्या साप्ताहिक ‘उन्हाळी विशेष’ ट्रेनच्या (०१०१९/०१०२०) वेळापत्रकात महत्त्वपूर्ण बदल केला आहे. पूर्व नियोजित वेळापत्रकानुसार ही गाडी ५ एप्रिल २०२६ पासून सुरू होणार होती, मात्र आता ही सेवा १२ एप्रिल २०२६ पासून प्रवाशांच्या सेवेत दाखल होईल. ही विशेष रेल्वे १२ एप्रिल ते ७ जून २०२६ या कालावधीत दर रविवारी चालवली जाणार आहे.

फेर्‍यांमध्ये केलेल्या कपातीमुळे प्रवाशांनी आपली नाराजी व्यक्त केली आहे. याआधीच कोकण रेल्वे मार्गावर उन्हाळी सुट्ट्यांसाठी पुरेशा गाड्यांची घोषणा केली नसल्याचा सूर होता. आता ही गाडी ऐन हंगामात जेव्हा चाकरमानी गावी जाण्याची योजना आखतात तेव्हाच रद्द केली गेली असल्याने प्रवाशांची मोठी गैरसोय होणार आहे.

​सुधारित वेळापत्रकानुसार, गाडी क्रमांक ०१०१९ मुंबई सीएसएमटीहून दर रविवारी मध्यरात्री ००:५५ वाजता सुटेल आणि त्याच दिवशी दुपारी १५:१५ वाजता मडगावला पोहोचेल. परतीच्या प्रवासात गाडी क्रमांक ०१०२० मडगावहून रविवारी सायंकाळी १६:०० वाजता रवाना होईल आणि दुसऱ्या दिवशी (सोमवारी) पहाटे ०३:५० वाजता मुंबईत पोहोचेल. या विशेष गाडीचे बुकिंग १ एप्रिल २०२६ पासून आयआरसीटीसीच्या (IRCTC) संकेतस्थळावर सुरू होणार आहे. तरी प्रवाशांनी या बदललेल्या तारखांची नोंद घेऊन आपल्या प्रवासाचे नियोजन करावे, असे आवाहन कोकण रेल्वे प्रशासनातर्फे करण्यात आले आहे.