Follow us on   

पनवेल: प्रवाशांसाठी एक आनंदाची बातमी आहे. कोकण रेल्वेमार्गावर धावणाऱ्या पश्चिम रेल्वेच्या उन्हाळी विशेष गाड्यांना मुदतवाढ देण्यात आली आहे. वाढत्या प्रवासी गर्दीच्या पार्श्वभूमीवर रेल्वे प्रशासनाने हा निर्णय घेतला आहे.

०९०५७ सुरत–मंगळुरू जंक्शन विशेष (बुधवार, रविवार) ही गाडी २ एप्रिल २०२६ ते ३१ मे २०२६ दरम्यान धावणार आहे. तसेच ०९०५८ मंगळुरू जंक्शन–सुरत विशेष (गुरुवार, सोमवार) ही गाडी २ एप्रिल २०२६ ते १ जून २०२६ पर्यंत चालवण्यात येणार आहे.

याशिवाय ०९४२४ अहमदाबाद–मंगळुरू जंक्शन विशेष (शुक्रवार) २७ मार्च २०२६ ते २९ मे २०२६ दरम्यान धावेल, तर ०९४२३ मंगळुरू जंक्शन–अहमदाबाद विशेष (शनिवार) २८ मार्च २०२६ ते ३० मे २०२६ या कालावधीत प्रवाशांच्या सेवेत राहणार आहे.

रेल्वे प्रशासनाने स्पष्ट केले आहे की, या गाड्यांच्या थांब्यांमध्ये किंवा डब्यांच्या रचनेत कोणताही बदल करण्यात आलेला नाही.

दरम्यान, ०९०५७ या गाडीचे आरक्षण २७ मार्च २०२६ रोजी सकाळी ८ वाजल्यापासून सुरू झाले आहे, तर ०९४२४ गाडीचे आरक्षण २६ मार्च २०२६ पासून उपलब्ध करण्यात आले आहे. प्रवाशांनी अधिक माहितीसाठी www.enquiry.indianrail.gov.in⁠� या संकेतस्थळाला भेट द्यावी किंवा RailOne/N TES अ‍ॅपचा वापर करावा, असे आवाहन रेल्वेकडून करण्यात आले आहे.

रेल्वे मंत्री अश्विनी वैष्णव यांनी लोकसभेत दिलेल्या लेखी उत्तरातून माहिती समोर.

   Follow us on   

मुंबई, 25 मार्च 2026 : कोल्हापूर (श्री छत्रपती शाहू महाराज टर्मिनस) ते वैभववाडी दरम्यान 108 किमी लांबीच्या नव्या रेल्वे मार्गासाठीचा सविस्तर प्रकल्प अहवाल (DPR) तयार करण्यात आला आहे. या महत्त्वाच्या प्रकल्पामुळे कोकण आणि पश्चिम महाराष्ट्रातील कनेक्टिव्हिटी अधिक मजबूत होण्याची अपेक्षा आहे.

डीपीआर तयार झाल्यानंतर आता या प्रकल्पासाठी राज्य सरकार आणि इतर संबंधित भागधारकांशी सल्लामसलत केली जाणार आहे. त्यानंतर नीती आयोग, केंद्रीय अर्थ मंत्रालय आदी संस्थांकडून आवश्यक मंजुरी प्रक्रिया पूर्ण करावी लागेल. विविध स्तरांवरील मंजुरी आणि मूल्यांकनांवर प्रकल्पाची अंतिम अंमलबजावणी अवलंबून असणार आहे.

सध्या कोल्हापूर स्थानकावरून 30 रेल्वेगाड्या धावतात, ज्यामुळे मुंबई, पुणे, दिल्ली, अहमदाबाद आणि नागपूरसारख्या प्रमुख शहरांशी थेट जोडणी उपलब्ध आहे. वंदे भारत, कोयना, महालक्ष्मी, हरिप्रिया आणि दीक्षाभूमी एक्सप्रेससारख्या महत्त्वाच्या गाड्या कोल्हापूरला सेवा देत आहेत.

दरम्यान, रेल्वे प्रकल्पांच्या अंमलबजावणीसाठी जमीन अधिग्रहण, वनखात्याची मंजुरी, अतिक्रमण हटवणे, भौगोलिक परिस्थिती, कायदा-सुव्यवस्था आणि निधीची उपलब्धता हे महत्त्वाचे घटक ठरतात. तसेच मार्गावरील वाहतूक, कनेक्टिव्हिटी, सामाजिक-आर्थिक गरजा आणि राज्य व केंद्र सरकारांकडून होणारी मागणी यावरही प्रकल्पाच्या मंजुरीचा निर्णय घेतला जातो.

🛑 कोल्हापूर ते वैभववाडी या नवीन रेल्वे मार्गाचा DPR तयार: केंद्रीय रेल्वेमंत्री @AshwiniVaishnaw

सविस्तर माहिती या लिंक वर 🔗:https://t.co/ZflbrTsgTf@RailMinIndia

— PIB in Maharashtra 🇮🇳 (@PIBMumbai) March 25, 2026

   Follow us on   

Konkan Railway: भारतीय रेल्वे मंत्रालयाने प्रवाशांसाठी महत्त्वाचा निर्णय घेत 09057/09058 सुरत–मंगळुरू विशेष गाडीला आता कायमस्वरूपी “सुरत–मंगळुरू एक्सप्रेस” म्हणून नियमित करण्यास मंजुरी दिली आहे. 20 मार्च 2026 रोजी जारी करण्यात आलेल्या रेल्वे बोर्डाच्या आदेशानुसार, देशभरातील एकूण 10 जोड गाड्यांचे नियमितीकरण करण्यात येत असून त्यात या गाडीचा समावेश आहे.

नवीन वेळापत्रकानुसार, 19057 सुरत–मंगळुरू एक्सप्रेस ही गाडी सुरत येथून बुधवारी आणि रविवारी सायंकाळी 7:35 वाजता सुटून मंगळुरू येथे दुसऱ्या दिवशी सायंकाळी 7:45 वाजता पोहोचेल. तर 19058 मंगळुरू–सुरत एक्सप्रेस ही गाडी मंगळुरूहून गुरुवारी आणि सोमवारी रात्री 10:30 वाजता सुटून सुरत येथे मंगळवारी व शुक्रवारी रात्री 11:45 वाजता पोहोचणार आहे.

या गाडीला उधना, वलसाड, वापी, पालघर, वसई रोड, भिवंडी रोड, पनवेल, रोहा, माणगाव, खेड, चिपळूण, संगमेश्वर, रत्नागिरी, राजापूर रोड, कणकवली, कुडाळ, सावंतवाडी रोड, थिवीम, मडगाव, कारवार, गोकर्ण रोड, कुमटा, भाटकल, उडुपी, सुरथकल आदी प्रमुख स्थानकांवर थांबे देण्यात आले आहेत.

या निर्णयामुळे कोकण रेल्वे मार्गावरील तसेच महाराष्ट्र–कर्नाटक दरम्यान प्रवास करणाऱ्या हजारो प्रवाशांना मोठा दिलासा मिळणार असून नियमित सेवा सुरू झाल्याने प्रवास अधिक सोयीस्कर होणार आहे.

Konkan Railway: प्रवाशांसाठी आनंदाची बातमी! 🚆
सुरत–मंगळुरू विशेष गाडीला नवीन वेळापत्रकासह कायमस्वरूपी एक्सप्रेसचा दर्जा मिळाला.

अधिक वाचा👇https://t.co/wfHhUVOOJx#KonkanRailway #IndianRailways #TrainNews pic.twitter.com/bXtIdqPJyq

— Kokanai Digital News Channel (@kokanai21) March 25, 2026

   Follow us on   

मुंबई : दादर-रत्नागिरी पॅसेंजर ट्रेन बंद करून त्याच वेळापत्रकात आणि प्लॅटफॉर्मवरून दादर-गोरखपूर एक्सप्रेस गाडी कायमस्वरूपी सुरू करण्याच्या रेल्वे प्रशासनाच्या निर्णयाविरोधात महाराष्ट्र नवनिर्माण सेना (मनसे) आक्रमक झाली आहे.

उद्या, दिनांक २४ मार्च २०२६ रोजी सकाळी ११ वाजता मनसे नेते छत्रपती शिवाजी महाराज रेल्वे स्थानक येथे रेल्वेच्या मुख्य अधिकाऱ्यांना थेट जाब विचारण्यासाठी उपस्थित राहणार आहेत. या आंदोलनात महाराष्ट्र सैनिकांसह कोकणवासी नागरिकांनी मोठ्या संख्येने उपस्थित राहावे, असे आवाहन मनसेने केले आहे.

रेल्वे मंत्रालयाने दादर-रत्नागिरी पॅसेंजर सेवा कायमची बंद करून तिच्या जागी उत्तर प्रदेशातील गोरखपूरला जाणारी एक्सप्रेस सुरू केल्याने कोकणातील प्रवाशांना मोठा त्रास सहन करावा लागत आहे. पूर्वी दादरहून सुटणारी ही पॅसेंजर आता दिवा जंक्शनवरून चालवली जात असल्याने कोकणवासीयांना अतिरिक्त प्रवास आणि असुविधा भोगावी लागत आहेत. हा निर्णय कोकणातील स्थानिकांच्या हक्कांवर हल्ला असल्याचे मत मनसेने व्यक्त केले आहे.

“प्रश्न जिथे जनतेचा मार्ग, तिथे मनसेचा” या घोषणेनुसार मनसे या मुद्द्यावर ठाम भूमिका घेत आहे. कोकणातील भावना लक्षात घेऊन रेल्वे प्रशासनाने तातडीने दादर-रत्नागिरी पॅसेंजर पूर्ववत सुरू करावी, अन्यथा तीव्र आंदोलन करण्याचा इशारा देण्यात आला आहे.

कोकणवासी आणि महाराष्ट्र सैनिकांनी या आंदोलनात सामील होऊन आपली एकजूट दाखवावी, असे मनसेने म्हटले आहे. अधिक माहितीसाठी मनसेच्या स्थानिक नेत्यांशी संपर्क साधावा.