लोणावळा:
पुण्यातील ऐतिहासिक लोहगड किल्ल्यावर व्यावसायिक केतन अग्रवाल यांच्या झालेल्या धक्कादायक खून प्रकरणानंतर एक वेगळेच चित्र पाहायला मिळत आहे. ज्या दरीतून केतन यांना खाली ढकलून देण्यात आले, त्या अनधिकृत कथित घटनास्थळाला पर्यटकांकडून ‘सिया पॉईंट’ असे संबोधले जात असून, हा पॉईंट पाहण्यासाठी सध्या लोहगड किल्ल्यावर पर्यटकांची मोठी गर्दी उसळत आहे. गेल्या काही दिवसांत लोहगडावर येणाऱ्या पर्यटकांच्या संख्येत सुमारे २५ टक्क्यांनी वाढ झाली आहे. नेहमी ऐतिहासिक वारसा आणि ट्रेकिंगसाठी प्रसिद्ध असलेल्या या किल्ल्याला आता या भयानक गुन्ह्यामुळे एक अनपेक्षित आणि वेदनादायी वळण मिळाले आहे.
किल्ल्यावर येणारे अनेक पर्यटक तेथील स्थानिक नागरिक, गाईड्स आणि सुरक्षा कर्मचाऱ्यांकडे ‘सिया पॉईंट’ नेमका कुठे आहे, याची चौकशी करत असल्याचे समोर आले आहे. या प्रकरणातील मुख्य आरोपी सिया गोयल आणि तिचा प्रियकर चेतन चौधरी यांनी पूर्वनियोजित कट रचून १८ जून रोजी केतन अग्रवाल यांना लोहगडावरून दरीत ढकलून दिले होते. या घटनेच्या पार्श्वभूमीवर, ऐतिहासिक वारसास्थळाचे गुन्हेगारी पर्यटनात (True Crime Tourism) रूपांतर होत असल्याबद्दल स्थानिक नागरिक आणि इतिहासप्रेमींमधून तीव्र संताप व्यक्त केला जात आहे. वाढत्या गर्दीमुळे आणि तपासाच्या कारणास्तव पोलिसांनी सध्या या घटनास्थळाची जागा बंद केली आहे.
दुसरीकडे, या नृशंस हत्याकांडामुळे संपूर्ण परिसरात आणि समाजमाध्यमांवर नागरिकांमधून प्रचंड संतापाची लाट आहे. लोहगडावर येणारे अनेक पर्यटक आणि स्थानिक नागरिक या प्रकरणातील नराधम आरोपींना कठोर कारवाई करून थेट फाशीची शिक्षा द्यावी, अशी जोरदार मागणी करत आहेत. केतन अग्रवाल यांच्या कुटुंबीयांनीही हा खटला फास्ट ट्रॅक कोर्टात चालवून आरोपी सिया गोयल आणि चेतन चौधरी यांना फाशीच्या फंद्यापर्यंत पोहोचवण्याची मागणी केली आहे. या गुन्ह्याचा कट उघड करण्यासाठी पोलिसांनी तांत्रिक पुरावे गोळा केले असून, या प्रकरणातील आरोपींना जास्तीत जास्त कडक शिक्षा व्हावी, अशी भावना जनतेतून व्यक्त होत आहे.
