Follow us on   

रत्नागिरी

रत्नागिरी शहराजवळील भाट्ये येथील झरी विनायक मंदिरा जवळील चढाावर शनिवारी सकाळी दोन एसटी बस आणि एका कारचा विचित्र अपघात झाला. रत्नागिरीहून पावसकडे जाणारी आणि पावसकडून रत्नागिरीकडे येणाऱ्या दोन एसटी बस समोरासमोर धडकल्या. या अपघातानंतर पाठीमागून वेगाने येणारी कार अनियंत्रित होऊन एसटी बसवर आदळली.

​या विचित्र तिहेरी अपघातात बसमधील तसेच कारमधील मिळून २२ प्रवासी जखमी झाले आहेत. जखमींना तातडीने उपचारासाठी शासकीय रुग्णालयात दाखल करण्यात आले असून, त्यांच्यावर उपचार सुरू आहेत. अपघाताची माहिती मिळताच स्थानिक नागरिक आणि प्रशासनाने घटनास्थलळी धाव घेत मदतकार्य सुरू केले.

​अपघातामुळे रत्नागिरी-पावस मार्गावरील वाहतूक काही काळ पूर्णपणे ठप्प झाली. रस्त्याच्या दोन्ही बाजूूना वाहनांच्या लांबच लांब रांगा लागल्या होत्या. दरम्यान, अपघातग्रस्त वाहने रस्त्यावरून बाजूला करण्याचे काम प्रशासनाकडून हाती घेण्यात आले.

   Follow us on   

Konkan Railway: कोंकण रेल्वे मार्गावरील सुरतकळ रेल्वे स्थानकावर एका सतर्क आणि कर्तव्यकठोर कर्मचाऱ्यामुळे एकाचा जीव वाचला आहे. शनिवार, १० ऑगस्ट २०२६ रोजी दुपारी बरोबर १२ वाजून १२ मिनिटांच्या सुमारास एक थरारक घटना घडली. माडगाव येथून निघून मंगळुरू सेंट्रलकडे जाणारी मेमू एक्स्प्रेस (गाडी क्रमांक १०१०७) सुरतकळ स्थानकावरून मार्गस्थ होत असताना हा प्रकार समोर आला. चालती झालेली ट्रेन पकडण्याच्या प्रयत्नात एका प्रवाशाचा जीव धोक्यात आला होता, मात्र कर्मचाऱ्याच्या तत्परतेने अनर्थ टळला.

​मिळालेल्या माहितीनुसार, संबंधित ट्रेन स्थानकावरून हळूहळू पुढे जात असताना एक प्रवासी धावत फलाटावर आला. त्याने चालत्या ट्रेनमध्ये चढण्याचा प्रयत्न केला, परंतु यादरम्यान अचानक त्याचा तोल गेला. तोल गेल्यामुळे हा प्रवासी थेट धावती ट्रेन आणि रेल्वे फलाट यांच्यातील संकटाच्या फटीमध्ये पडण्याच्या अत्यंत धोकादायक स्थितीत पोहोचला. परिस्थितीचे गांभीर्य समजण्यास सेकंदाचाही अवकाश नव्हता आणि प्रवाशाचा जीव जाऊ शकला असता.

​त्याच वेळी घटनास्थळावर अत्यंत सतर्क असलेले कोंकण रेल्वेचे पॉईंट्समन संदीप नाईक हे कर्तव्यावर हजर होते. प्रवाशाचा अपघाताच्या दिशेने जाणारा तोल आणि निर्माण झालेला जीवघेणा धोका त्यांनी क्षणात हेरला. क्षणाचाही विलंब न करता संदीप नाईक यांनी जीवाची पर्वा न करता त्या दिशेने विजेच्या वेगाने धाव घेतली. आपल्या जीवाची बाजी लावत त्यांनी धावत्या ट्रेनजवळ पोहोचून त्या प्रवाशाला घट्ट धरले आणि फटीत जाण्यापासून ओढून सुरक्षित ठिकाणी आणले.

​संदीप नाईक यांच्या या उत्कृष्ट उपस्थितीमुळे आणि प्रसंगावधानामुळे एका निष्पाप प्रवाशाचा जीव वाचलाच, शिवाय एक मोठी रेल्वे दुर्घटना टळली. त्यांच्या या साहसी आणि धाडसी कृत्याची दखल कोंकण रेल्वे प्रशासनाने तातडीने घेतली. प्रवाशांच्या सुरक्षेबाबत दाखवलेली ही अतूट कर्तव्यनिष्ठा आणि शौर्य पाहून कोंकण रेल्वेच्या सीएमडी यांनी संदीप नाईक यांच्या पाठीवर कौतुकाची थाप दिली.

​या धाडसी कामगिरीबद्दल कोंकण रेल्वेच्या वतीने संदीप नाईक यांना १०,००० रुपयांचे रोख बक्षीस देऊन सन्मानित करण्यात आले. सुरतकळ रेल्वे स्थानकावर घडलेल्या या घटनेची माहिती वाऱ्यासारखी पसरल्यानंतर सर्वत्र संदीप नाईक यांच्या तत्परतेचे आणि धाडसाचे कौतुक होत आहे.

 

View this post on Instagram

 

   Follow us on   

​आंबोली:

वर्षा पर्यटनाचा मनसोक्त आनंद घेण्यासाठी आलेले बेळगाव जिल्ह्यातील निपाणी येथील डॉ. आयूब सय्यद (वय ४५, रा. जत्राट, निपाणी, जि. बेळगाव) हे मंगळवारी सायंकाळी पाच वाजण्याच्या सुमारास आंबोलीतील महादेवगड पॉईंटवरून सुमारे ४०० फूट खोल दरीत कोसळल्याची दुर्देवी घटना घडली आहे. डॉ. सय्यद हे आपल्या नऊ सहकाऱ्यांसोबत मंगळवारी सकाळी आंबोलीत आले होते. सायंकाळी महादेवगड पॉईंट परिसरात फिरत असताना, लघुशंकेसाठी ते दरीच्या बाजूला असलेल्या सुरक्षेच्या रेलिंगवरून पलीकडे गेले आणि अचानक त्यांचा तोल गेल्याने ते थेट दरीत कोसळले. पॉईंटवर मक्याची कणसे विकणाऱ्या एका स्थानिक विक्रेत्याने हा अपघात पाहताच त्यांच्या सहकाऱ्यांना तात्काळ याची माहिती दिली.

​घटनेची माहिती मिळताच सावंतवाडी पोलीस ठाण्याचे पोलीस निरीक्षक राजेंद्र मगदूम आपल्या पथкаसह आणि आंबोलीतील ‘सह्याद्री एडव्हेंचर रेस्क्यू टीम’ने तातडीने घटनास्थळी धाव घेत शोधमोहीम हाती घेतली. मात्र, परिसरात सुरू असलेला संततधार पाऊस, दाट धुके आणि अंधार यामुळे मंगळवारी सायंकाळी सात वाजण्याच्या सुमारास ही शोधमोहीम तात्पुरती थांबवावी लागली.

​रेस्क्यू टीमच्या माहितीनुसार, संबंधित पर्यटक पारपोली येथील सिद्धेश्वर मंदिरापासून सुमारे दोनशे फूट पुढे असलेल्या जंगल भागात कोसळला असण्याची शक्यता वर्तवली जात आहे. अपघाताच्या ठिकाणीच संबंधित व्यक्तीचा मोबाईल राहिल्यामुळे मोबाईल लोकेशनच्या आधारे शोध घेणे अशक्य झाले आहे. या प्रतिकूल हवामानामुळे थांबवण्यात आलेली रेस्क्यू मोहीम बुधवारी सकाळी लवकर पुन्हा सुरू करण्यात येणार असून, त्यानंतरच नेमकी परिस्थिती स्पष्ट होईल अशी माहिती पोलिसांनी दिली आहे.

   Follow us on   

सावंतवाडी : गोवा राज्याची कदंबा प्रवासी बस आजगावकडून दुचाकी वाहन चालकाला वाचवताना कलंडली, ज्यामध्ये ४५ प्रवासी बालबाल बचावले असून चालकाच्या प्रसंगवधानामुळे मोठी हानी टळली आहे. गोवा येथील पणजी येथून संध्याकाळी साडेचार वाजता सुटणारी पणजी शिरोडा मार्गे वेंगुर्ला ही वस्तीची गाडी शिरोडाच्या दिशेने येत असताना आजगाव वाघबीळाजवळ आली. या वेळी मळेवाडच्या दिशेने चार चाकी गाडी जात असताना त्या घातक वळणावर दुचाकी वाहन चालकाने ओव्हर टेक करण्याचा प्रयत्न केला, आणि त्या दुचाकीस्वाराला वाचवण्याच्या नादात ही बस खोलदूरीच्या काही फूट अंतरावर कलंडली.

​या बसमध्ये एकूण ४५ प्रवासी प्रवास करत होते, ज्यांना आपत्कालीन दरवाज्यातून बाहेर काढण्यात आले. या बसचे चालक धनंजय आसोलकर व वाहक सर्वेश नाईक यांनी प्रवाशांना सुखरूप बाहेर काढले, तसेच या वेळी परिसरातील ग्रामस्थांनी धाव घेऊन प्रवाशांना वाचवण्यात मदत केली.

या प्रवाशांपैकी कोणालाही दुखापत झालेली नाही, परंतु काही फूट अंतरावर जर ही बस कलंडली असती तर किमान २०० फूट खोल दरीत ही बस कोसळून मोठा अपघात झाला असता. बस चालकाच्या प्रसंगवधानामुळे बस अलिकडेच कलंडली आणि दुचाकीस्वाराच्या चुकीमुळे ४५ प्रवाशांचे जीव धोक्यात जाणार होते, मात्र चालकाच्या सतर्कतेमुळे मोठी दुर्घटना टळली.

   Follow us on   

सामंतवाडी:

सावंतवाडी-कुडाळ रस्त्यावरील कोलगाव मियासाब दर्ग्या जवळ (समाधीजवळ) दुचाकी आणि स्विफ्ट कार यांच्यात भीषण रस्ता अपघात घडला. या अपघातात दुचाकीवरून जाणाऱ्या तरुण आणि तरुणीचा दुर्दैवी मृत्यू झाला आहे. आयुषी देसाई असे तरुणीचे नाव असून तिचा जागीच मृत्यू झाला, तर कार्तिक परब या तरुणाचा उपचारादरम्यान मृत्यू झाला.

​मिळालेल्या माहितीनुसार, कुडाळच्या दिशेने जाणारी दुचाकी (क्रमांक GA 03 AB 7501) आणि सावंतवाडीच्या दिशेने येणारी स्विफ्ट कार (क्रमांक MH 07 AG 7801) यांच्यात जोरदार धडक झाली. ही धडक इतकी भीषण होती की दुचाकीवरील दोघेही उडून रस्त्यावर फेकल गेले. अपघाताच्या तीव्रतेमुळे स्विफ्ट कार रस्त्याशेजारील गटारात जाऊन कोसळली आणि कारच्या पुढील भागाचे मोठे नुकसान झाले.

​घटनेनंतर स्थानिक नागरिक महेश बांदेकर, कृष्णा धुळपनावर आणि लाडू रायका यांनी तातडीने घटनास्थळी धाव घेत जखमींना उपचारासाठी उपजिल्हा रुग्णालयात दाखल केले. डॉक्टरांनी उपचारास सुरुवात केली, मात्र उपचारादरम्यान कार्तिक परब यांची प्राणज्योत मालवली. माहिती मिळताच पोलिसांनी तात्काळ घटनास्थळी धाव घेतली. अपघातानंतर स्विफ्ट कारच्या चालकाचा पोलीस शोध घेत आहेत. या प्रकरणाचा पुढील तपास सहाय्यक पोलीस फौजदार राऊत, पोलीस हवालदार सुरेश पाटील, पोलीस हवालदार धोत्रे आणि पोलीस कॉन्स्टेबल पवन परब करत आहेत.