​कोकण रेल्वे प्रवासी संघटना सावंतवाडीने केंद्रीय रेल्वे मंत्री अश्विनी वैष्णव यांना पत्र पाठवून सावंतवाडी रेल्वे टर्मिनसच्या दुसऱ्या टप्प्यातील कामांचा समावेश तिसऱ्या पुनर्रचना पॅकेजमध्ये करण्याची मागणी केली आहे.  

​सावंतवाडी स्थानकात अतिरिक्त प्लॅटफॉर्म, लूप लाईन्स आणि वॉशिंग पिट लाईन उभारल्यास मडगाव स्थानकावरील ताण कमी होऊन मुंबई-दक्षिण कोकण मार्गावरील गाड्यांचे नियोजन अधिक सुरळीत होईल.  

   Follow us on        

​कोकण रेल्वे कॉर्पोरेशन लिमिटेड (KRCL) च्या ३ऱ्या आर्थिक पुनर्रचना योजनेमध्ये सावंतवाडी रेल्वे टर्मिनसच्या प्रलंबित विस्तारीकरणाचा तात्काळ समावेश करावा, अशी आग्रही मागणी कोकण रेल्वे प्रवासी संघटना सावंतवाडीच्या वतीने केंद्रीय रेल्वे मंत्री अश्विनी वैष्णव यांच्याकडे निवेदनाद्वारे करण्यात आली आहे. ‘पीएम गती शक्ती’ राष्ट्रीय मास्टर प्लॅनअंतर्गत नेटवर्क प्लॅनिंग ग्रुपने (NPG) या पुनर्रचना प्रस्तावाचा आढावा घेतला असून, यामध्ये पेरणेम आणि जुने गोवा येथील बोगदे तसेच नवीन क्रॉसिंग स्थानकांसाठी भरीव निधीची तरतूद करण्यात आली आहे. मात्र, २०१५ मध्ये भूमिपूजन होऊनही दीर्घकाळापासून प्रलंबित असलेल्या सावंतवाडी टर्मिनस प्रकल्पाकडे सातत्याने दुर्लक्ष होत असल्याबद्दल संघटनेने तीव्र चिंता व्यक्त केली आहे.

​कोकण रेल्वेचे भारतीय रेल्वेत पूर्ण विलीनीकरण आणि इतर तांत्रिक प्रक्रिया विविध राज्यांतील भागभांडवलाच्या वाटाघाटींमुळे प्रलंबित आहेत. अशा स्थितीत संपूर्ण मार्गाचे दुहेरीकरण होईपर्यंत प्रवाशांना तातडीने दिलासा देण्यासाठी सावंतवाडी येथे पूर्ण क्षमतेचे टर्मिनस उभारणे हाच सर्वात व्यावहारिक पर्याय आहे. सध्या सावंतवाडी हे केवळ एक साधे स्थानक म्हणून कार्यरत असल्याने दक्षिण कोकणात जाणाऱ्या गाड्यांना तिथे टर्मिनेट करण्याची सुविधा उपलब्ध नाही, परिणामी या गाड्यांना पुढे मडगावपर्यंत चालवावे लागते.

​मुंबई क्षेत्रातून सुटणाऱ्या अनेक गाड्यांना सावंतवाडीत ‘टर्न-अराउंड’ आणि देखभाल सुविधा नसल्याने मडगाव स्थानकावर तसेच एकेरी मार्गावर प्रचंड वाहतूक कोंडी निर्माण होते. जर सावंतवाडी स्थानकाचा विस्तार करून तेथे गाड्या थांबवण्याची व माघारी फिरवण्याची सोय झाली, तर रेल्वेच्या डब्यांचा (रोलिंग स्टॉक) प्रभावी वापर होईल आणि मडगाव यार्डवरील ताण मोठ्या प्रमाणावर कमी होण्यास मदत होईल.

​या समस्येवर कायमस्वरूपी तोडगा काढण्यासाठी सावंतवाडी स्थानकात दोन अतिरिक्त हाय-लेव्हल आयलंड प्लॅटफॉर्म्स, स्वतंत्र लूप लाईन्स, स्टॅबलिंग ट्रॅक्स आणि गाड्यांच्या देखभालीसाठी तसेच धुण्यासाठी एक मानक पिट लाईन उभारणे अत्यंत आवश्यक आहे. संघटनेने आपल्या निवेदनात या सर्व कामांचा समावेश तिसऱ्या आर्थिक पुनर्रचना योजनेमध्ये करून, त्यासंदर्भातील सुधारित तांत्रिक प्रस्ताव रेल्वे बोर्डाकडे मंजुरीसाठी तात्काळ पाठवण्याचे निर्देश KRCL ला द्यावेत, अशी मागणी केली आहे.

​विशेषतः गणेशोत्सवासारख्या महत्त्वाच्या सण-उत्सवांच्या काळात कोकणात जाणाऱ्या प्रवाशांची संख्या प्रचंड वाढते आणि या काळात वाहतुकीचे व्यवस्थापन करणे कठीण होते. त्यामुळे प्रवाशांची वाढती गैरसोय लक्षात घेता, केंद्रीय रेल्वे मंत्र्यांनी या विषयात वैयक्तिकरीत्या लक्ष घालून रेल्वे बोर्ड आणि कोकण रेल्वेच्या व्यवस्थापकीय संचालकांना सावंतवाडी टर्मिनससाठी निधी मंजूर करण्याचे स्पष्ट निर्देश द्यावेत, अशी विनंती संघटनेचे उपाध्यक्ष सागर तळवडेकर यांनी पत्राद्वारे केली आहे.

सावंतवाडी रेल्वे स्थानकाला ‘लोकमान्य मधू दंडवते टर्मिनस’ नाव देणे आणि नव्या ट्रेन सुरू केल्याबद्दल राज्य सरकार व लोकप्रतिनिधींचे आभार मानत, टर्मिनसचे अपूर्ण काम पूर्ण करण्याकडे दुर्लक्ष होत असल्याबद्दल कोकण रेल्वे प्रवासी संघटनेने तीव्र नाराजी व्यक्त केली आहे.

​केंद्र शासनाकडून मिळालेल्या १५०० कोटींच्या ‘पीएम गतिशक्ती’ निधीतून सावंतवाडी टर्मिनसचे काम तत्काळ पूर्ण करून ते कोकणवासियांच्या सेवेत दाखल करावे, अशी मागणी संघटनेने केली आहे.

   Follow us on        

​राज्य शासन, रेल्वे बोर्ड आणि कोकण रेल्वेच्या समन्वयाने सावंतवाडी टर्मिनससाठी नवी सीएसटी – सावंतवाडी नियमित एक्स्प्रेस मंजूर करण्यात आली असून ती नुकतीच सुरू झाली आहे. याशिवाय मंगळूर एक्स्प्रेस, गरीब रथ एक्स्प्रेस आणि राजधानी एक्स्प्रेस यांसारख्या महत्त्वाच्या गाड्या सावंतवाडीकरांना मिळाल्या आहेत. कोकण रेल्वेच्या शिल्पकारांना शासनाने दिलेली ही मानवंदना कौतुकास्पद असून, सावंतवाडी स्थानकाला ‘लोकमान्य मधू दंडवते टर्मिनस’ नाव जाहीर केल्याबद्दल कोकण रेल्वे प्रवासी संघटनेचे सचिव मिहीर मठकर यांनी आयोजित पत्रकार परिषदेत राज्य शासन, खासदार नारायण राणे, खासदार नरेश म्हस्के, खासदार श्रीकांत शिंदे, पालकमंत्री नितेश राणे, आमदार सुलभाताई गायकवाड आणि आमदार दीपक केसरकर यांचे जाहीर आभार मानले.

​परंतु, एकीकडे नवीन रेल्वे गाड्या आणि नामकरणाचा निर्णय झालेला असतानाच, प्रत्यक्ष सावंतवाडी टर्मिनसच्या अपूर्ण कामांकडे मात्र पूर्णपणे दुर्लक्ष होत असल्याने प्रवासी संघटनेने गंभीर चिंता व्यक्त केली आहे. “सावंतवाडी रेल्वे टर्मिनसचे काम नक्की कधी पूर्ण होणार? ते अजुनही वेटिंगवर का ठेवण्यात आले आहे?” असा परखड सवाल मिहीर मठकर यांनी उपस्थित केला आहे. स्थानकाला नाव दिले गेले असले तरी त्या नावाला शोभेल असे सर्वसुविधायुक्त टर्मिनस अजूनही प्रत्यक्षात साकारलेले नाही, ही वस्तुस्थिती त्यांनी मांडली.

​टर्मिनसचे काम पूर्ण न झाल्यामुळे अनेक तांत्रिक अडचणी निर्माण होत आहेत. सध्या नवीन प्लॅटफॉर्मची उभारणी करणे आणि तिलारी आंतरराज्य योजनेअंतर्गत टर्मिनसला पुरेसा पाणीपुरवठा उपलब्ध करून देणे अत्यंत गरजेचे आहे. या मूलभूत सुविधा वेळेत न मिळाल्यास भविष्यात सावंतवाडीपर्यंत मर्यादित असणाऱ्या नवीन रेल्वे गाड्या येथे येऊ शकणार नाहीत. जोपर्यंत हे पूर्ण क्षमतेचे (फुल फ्लेज) टर्मिनस होत नाही, तोपर्यंत रेल्वे सेवेचा पूर्ण फायदा प्रवाशांना मिळणार नाही, याकडे लक्ष वेधत प्रवासी संघटनेने राज्य सरकारकडे सतत पाठपुरावा सुरू ठेवला आहे.

​या पार्श्वभूमीवर, केंद्र सरकारच्या माध्यमातून नुकताच कोकण रेल्वेला तब्बल १५०० कोटी रुपयांचा निधी मंजूर झाला आहे. ‘पीएम गतिशक्ती’ योजनेअंतर्गत मिळालेल्या या मोठ्या निधीचा वापर सावंतवाडी टर्मिनसचे अपूर्ण काम पूर्ण करण्यासाठी केला जावा, अशी मागणी केली जात आहे. राज्य शासन आणि केंद्र शासन या कामासाठी प्रयत्नशील असताना कोकण रेल्वे प्रशासन या कामात नेमकी कोणती अडकाठी आणत आहे आणि निधी उपलब्ध असतानाही काम का रखडले आहे, असा मोठा प्रश्नचिन्ह सध्या निर्माण झाला आहे.

​कोकण रेल्वेने तातडीने ‘पीएम गतिशक्ती’ योजनेत सावंतवाडी टर्मिनसचा समावेश करून राहिलेली सर्व कामे वेगाने पूर्ण करावीत, असे आवाहन संघटनेने केले आहे. टर्मिनसचा लढा अद्याप संपलेला नसून तो आता अंतिम टप्प्यात पोहोचला आहे. हा शेवटचा टप्पा लवकरात लवकर पार पाडून सावंतवाडी आणि कोकणच्या जनतेला त्यांच्या हक्काचे पूर्ण क्षमतेचे टर्मिनस मिळवून दिले जाईल, असा ठाम विश्वास मिहीर मठकर यांनी व्यक्त केला. या पत्रकार परिषदेला प्रवासी संघटनेचे सुभाष शिरसाट, ऋत्विक गवस, रामकृष्ण मुंज आदी पदाधिकारी व कार्यकर्ते उपस्थित होते.

   Follow us on        

 

Konkan Railway : कोकणात जाणाऱ्या प्रवाशांसाठी रेल्वे प्रशासनाकडून मोठी खूशखबर आली आहे. रेल्वे बोर्डाने मान्यता दिलेल्या १५०८७/१५०८८ मुंबई छत्रपती शिवाजी महाराज टर्मिनस (CSMT) ते सावंतवाडी रोड या नवीन दैनिक (Daily) एक्सप्रेसचा उद्घाटन सोहळा गुरुवार, ३ सप्टेंबर २०२६ रोजी दुपारी १२:०० वाजता CSMT येथून होणार आहे. या विशेष उद्घाटनानंतर ट्रेनच्या नियमित फेऱ्यांची तारीख जाहीर केली जाईल.

उद्घाटन सोहळा:

* दिनांक: गुरुवार, ३ सप्टेंबर २०२६

* वेळ: दुपारी १२:०० वाजता

* स्थान: छत्रपती शिवाजी महाराज टर्मिनस (CSMT), मुंबई

नियमित वेळापत्रक (Timings):

* ट्रेन क्रमांक १५०८७ (मुंबई CSMT ते सावंतवाडी रोड):

ही गाडी मुंबई CSMT वरून दररोज रात्री ११:५५ (२३:५५) वाजता सुटेल आणि दुसऱ्या दिवशी दुपारी २:१५ (१४:१५) वाजता सावंतवाडी रोड येथे पोहोचेल.

* ट्रेन क्रमांक १५०८८ (सावंतवाडी रोड ते मुंबई CSMT):

ही गाडी सावंतवाडी रोडवरून दररोज सायंकाळी ५:२० (१७:२०) वाजता सुटेल आणि दुसऱ्या दिवशी सकाळी ६:४० (०६:४०) वाजता मुंबई CSMT येथे पोहोचेल.

गाडीचे सर्व थांबे (All Stoppages):

प्रवाशांच्या सोयीसाठी या ट्रेनला कोकण रेल्वे मार्गावरील खालील सर्व प्रमुख स्थानकांवर थांबे (Commercial Stoppages) देण्यात आले आहेत:

१. दादर (Dadar)

२. ठाणे (Thane)

३. पनवेल (Panvel)

४. पेन (Pen)

५. रोहा (Roha)

६. माणगाव (Mangaon)

७. वीर (Veer)

८. खेड (Khed)

९. चिपळूण (Chiplun)

१०. सावर्डे (Savarda)

११. आरवली रोड (Aravali Road)

१२. संगमेश्वर रोड (Sangameshwar Road)

१३. रत्नागिरी (Ratnagiri)

१४. आडवली (Adavali)

१५. विलवडे (Valivade)

१६. राजापूर रोड (Rajapur Road)

१७. वैभववाडी रोड (Vaibhavwadi Road)

१८. नांदगाव रोड (Nandgaon Road)

१९. कणकवली (Kankavli)

२०. सिंधुदुर्ग (Sindhudurg)

२१. कुडाळ (Kudal)

डब्यांची रचना (Coach Composition):

ही गाडी आधुनिक २३ एलएचबी (LHB) डब्यांसह धावेल. डब्यांची सविस्तर रचना खालीलप्रमाणे असेल:

* फर्स्ट एसी (First AC – LWFAC): १ डबा

* सेकंड एसी (2 Tier AC – LWACCW): २ डबे

* थर्ड एसी (3 Tier AC – LWACCN): ५ डबे (३ नियमित + २ अतिरिक्त)

* स्लीपर क्लास (Sleeper Class – LWSCN): ४ डबे

* जनरल / सेकंड क्लास (General Unreserved – LWS): ४ डबे

* पँट्री कार / पॅन्ट्री कार (Pantry/Buffet Car – LWCBAC): १ डबा

* पार्सल व्हॅन (Luggage/VPH – LVPH): १ डबा

* ब्रेक व्हॅन / गार्ड डबा (LSLRD / LWLRRM): २ डबे

(ही गाडी १२५३३/१२५३४ गोमती नगर – CSMT ‘पुष्पक एक्सप्रेस’च्या रेक सोबत एकात्मिक (Integrated Rake Link) करून चालवली जाणार आहे.)

इतर महत्त्वाची माहिती:

* पाण्याची सोय (Watering Station): गाड्यांमध्ये पाण्याची सुविधा चिपळूण स्थानकात उपलब्ध असेल.

* अधिकृत माहितीसाठी: गाड्यांच्या सविस्तर वेळेसाठी आणि अद्ययावत स्थितीसाठी www.enquiry.indianrail.gov.in ला भेट द्या किंवा IRCTC, RailOne अथवा NTES ॲपचा वापर करा.

या नवीन एक्सप्रेसमुळे गणेशोत्सव, दिवाळी आणि इतर सुट्ट्यांच्या काळात कोकणात जाणाऱ्या चाकरमान्यांचा प्रवास अत्यंत सोयीचा आणि आरामदायी होणार आहे.

 

   Follow us on        

मुंबई: गणेशोत्सवाच्या सणासाठी दरवर्षी मुंबई आणि परिसरातून लाखो चाकरमानी कोकणातील आपल्या गावी जात असतात. या प्रवाशांची सोय व्हावी यासाठी विशेष रेल्वे गाड्यांचे आयोजन केले जाते. यंदाही चाकरमान्यांच्या सोयीसाठी सोडण्यात येणाऱ्या ‘मोदी एक्सप्रेस’च्या वेळापत्रकात काही बदल करण्याची मागणी प्रवाशांकडून आणि स्थानिक कोकणवासीयांकडून सातत्याने केली जात होती. या आग्रही मागणीची दखल घेत प्रशासनाने आणि लोकप्रतिनिधींनी ट्रेनच्या तारखांमध्ये बदल करण्याचा महत्त्वपूर्ण निर्णय घेतला आहे.

​सिंधुदुर्ग जिल्ह्याचे पालकमंत्री तसेच मत्स्य विकास व बंदरे विकास मंत्री नितेश राणे यांनी यासंदर्भात अधिकृत घोषणा केली आहे. त्यांनी दिलेल्या माहितीनुसार, चाकरमान्यांच्या भावना आणि त्यांची सोय विचारात घेऊन आधी जाहीर करण्यात आलेल्या वेळापत्रकात सुधारणा करण्यात आली आहे. या निर्णयामुळे सणाच्या काळात गावी जाणाऱ्या हजारो भाविकांना आणि प्रवाशांना मोठा दिलासा मिळाला असून त्यांचा प्रवास अधिक सुकर होण्यास मदत होणार आहे.

​यापूर्वी जाहीर करण्यात आलेल्या नियोजनानुसार ‘मोदी एक्सप्रेस’ ही १ आणि ११ सप्टेंबर रोजी कोकणाच्या दिशेने सोडण्यात येणार होती. मात्र, या तारखा सोयीच्या नसल्याने असंख्य चाकरमान्यांनी यामध्ये बदल करण्याची विनंती केली होती. त्यांच्या या सकारात्मक मागणीचा मान राखत आधीची ९ सप्टेंबरची तारीख बदलून आता नवीन वेळापत्रकानुसार ११ आणि १३ सप्टेंबर रोजी ही विशेष रेल्वे चालवण्याचा निर्णय अंतिम करण्यात आला आहे.

​नव्या वेळापत्रकानुसार, ११ आणि १३ सप्टेंबर रोजी सकाळी १०:३० वाजता ही ‘मोदी एक्सप्रेस’ मुंबईतील दादर रेल्वे स्थानकाच्या प्लॅटफॉर्म क्रमांक १४ वरून कोकणाच्या दिशेने प्रवासाला सुरुवात करेल. प्रवाशांना नियोजित वेळेत आणि सुरक्षितपणे गावी पोहोचता यावे, यासाठी रेल्वे प्रशासनाकडून या गाडीचे नियोजन करण्यात येत असून दादर स्थानकावर आवश्यक त्या सर्व सोयी-सुविधा पुरवण्यावर भर दिला जात आहे.

​दरम्यान, या विशेष ट्रेनने प्रवास करू इच्छिणाऱ्या सर्व चाकरमान्यांनी भारतीय जनता पक्षाच्या स्थानिक मंडळ अध्यक्षांशी त्वरित संपर्क साधावा, असे आवाहन मंत्री नितेश राणे यांनी केले आहे. प्रवाशांनी वेळेवर संपर्क साधून आपल्या तिकिटांचे बुकिंग लवकरात लवकर पूर्ण करून घ्यावे, जेणेकरून ऐनवेळी होणारी धावपळ व गैरसोय टाळता येईल, असेही प्रशासनाकडून स्पष्ट करण्यात आले आहे.

३ सप्टेंबरला धावणार उद्घाटनाची विशेष गाडी

   Follow us on        

मुंबई : कोकणवासीयांसाठी आणि मध्य रेल्वेच्या प्रवाशांसाठी एक मोठी आनंदाची बातमी आहे. रेल्वे मंत्रालयाने मुंबई छत्रपती शिवाजी महाराज टर्मिनस (CSMT) ते सावंतवाडी रोड दरम्यान नवीन दैनिक एक्सप्रेस ट्रेन (गाडी क्र. १५०८७/१५०८८) सुरू करण्यास मंजुरी दिली आहे. या नव्या सेवा पर्वाचा प्रारंभ करण्यासाठी गुरुवारी, ३ सप्टेंबर २०२६ रोजी ‘मुंबई सीएसएमटी – सावंतवाडी रोड उद्घाटन विशेष गाडी’ (गाडी क्र. ०१००१) चालवण्यात येणार आहे.

उद्घाटन विशेष गाडीची वेळ आणि वेळापत्रक (गाडी क्र. ०१००१):

ही विशेष गाडी ३ सप्टेंबर २०२६ रोजी दुपारी १४:३० वाजता मुंबई सीएसएमटी येथून सुटेल आणि दुसऱ्या दिवशी (४ सप्टेंबर) पहाटे ०३:३० वाजता सावंतवाडी रोड येथे पोहोचेल. ५०९ किलोमीटरचे हे अंतर ही गाडी १३ तासांत पूर्ण करेल.

* मुंबई सीएसएमटी: दुपारी १४:३० (प्रस्थान)

* दादर: १४:४२ / १४:४५

* ठाणे: १५:०२ / १५:०५

* पनवेल: १५:४७ / १५:५०

* पेण: १६:३८ / १६:४०

* रोहा: १७:५७ / १८:००

* रत्नागिरी: रात्री २२:०५ / २२:१०

* कणकवली: मध्यरात्री ००:४० / ००:४२

* कुडाळ: पहाटे ०१:४० / ०१:४२

* सावंतवाडी रोड: पहाटे ०३:३० (आगमन)

(याशिवाय माणगाव, वीर, खेड, चिपळूण, सावर्डे, अरावली रोड, संगमेस्वर रोड, अडवली, विलवडे, राजापूर रोड, वैभववाडी रोड, नांदगाव रोड आणि सिंधुदुर्ग या स्थानकांवरही गाडीला व्यावसायिक थांबे देण्यात आले आहेत).

आधुनिक एलएचबी (LHB) डब्यांची सोय:

ही ट्रेन अत्याधुनिक १६ एलएचबी (LHB) डब्यांसह धावेल. यामध्ये १ फर्स्ट एसी, २ सेकंद एसी, ३ थर्ड एसी, ४ स्लीपर क्लास आणि ४ सामान्य डबे समाविष्ट असतील.

या नियमित दैनिक एक्सप्रेस ट्रेनचे (१५०८७/१५०८८) नियमित वेळापत्रक लवकरच जाहीर करण्यात येणार आहे. प्रवाशांनी या नवीन सेवेची नोंद घेऊन लाभ घ्यावा, असे आवाहन रेल्वे प्रशासनातर्फे करण्यात आले आहे.

 

 

कमी प्रवासी संख्येमुळे कोकण रेल्वेने मडगाव ते नागपूर आणि नागपूर ते मडगाव दरम्यान चालवण्यात येणारी साप्ताहिक विशेष ट्रेन पूर्णपणे रद्द करण्याचा निर्णय घेतला आहे.

   Follow us on        

​कोकण रेल्वेच्या वतीने प्रवाशांच्या सोयीसाठी विविध मार्गांवर विशेष गाड्या चालवल्या जात असल्या, तरी काही मार्गांवर प्रवाशांचा अल्प प्रतिसाद मिळत असल्याचे समोर आले आहे. याचे ताजे उदाहरण म्हणजे मडगाव जंक्शन आणि नागपूर दरम्यान धावणारी साप्ताहिक विशेष ट्रेन होय.

​या विशेष रेल्वे गाडीला प्रवाशांचा अत्यंत कमी प्रतिसाद (पुअर ऑक्यूपेंसी) मिळाल्यामुळे रेल्वे प्रशासनाने ही सेवा पूर्णपणे बंद करण्याचा कठोर निर्णय घेतला आहे. प्रशासनाकडून मिळालेल्या अधिकृत माहितीनुसार, या गाडीच्या फेऱ्या रद्द करण्यामागचे हेच एकमेव मुख्य कारण आहे.

​रद्द करण्यात आलेल्या गाड्यांच्या तपशिलानुसार, ट्रेन क्रमांक ०११४० (मडगाव जंक्शन – नागपूर साप्ताहिक विशेष) ची १५ सप्टेंबर २०२६ रोजी मंगळवारी सुटणारी नियोजित फेरी पूर्णपणे रद्द करण्यात आली आहे.

​तसेच परतीच्या प्रवासाबाबत बोलताना, ट्रेन क्रमांक ०११३९ (नागपूर – मडगाव जंक्शन साप्ताहिक विशेष) जी १६ सप्टेंबर २०२६ रोजी बुधवारी नागपूरहून निघणार होती, ती सुद्धा पूर्णपणे रद्द करण्यात आली आहे.

​या बदलामुळे प्रवाशांना काही प्रमाणात गैरसोय सहन करावी लागू शकते, त्यामुळे रेल्वे प्रशासनाने सर्व संबंधित प्रवाशांना या बदलाची गांभीर्याने नोंद घेण्याचे आणि त्यानुसार प्रवासाचे नियोजन करण्याचे आवाहन केले आहे.

   Follow us on        

Konkan Railway : प्रवाशांच्या सोयीसाठी आणि अतिरिक्त गर्दी लक्षात घेता, रेल्वे प्रशासनाने अहमदाबाद जंक्शन ते मंगळूरू जंक्शन दरम्यान धावणाऱ्या साप्ताहिक विशेष ट्रेनच्या (Train No. 09424 / 09423) फेऱ्यांच्या मुदतीत वाढ करण्याचा निर्णय घेतला आहे.

​गाडी क्रमांक ०९४२४ (अहमदाबाद – मंगळूरू जंक्शन साप्ताहिक विशेष): ही ट्रेन आता २७ नोव्हेंबर २०२६ पर्यंत वाढविण्यात आली असून, दर शुक्रवारी नियमितपणे धावेल.

​गाडी क्रमांक ०९४२३ (मंगळूरू जंक्शन – अहमदाबाद साप्ताहिक विशेष): ही ट्रेन २८ नोव्हेंबर २०२६ पर्यंत वाढविण्यात आली असून, दर शनिवारी धावेल.

​वेळापत्रक आणि पावसाळी/विना-पावसाळी वेळा:

​दोन्ही गाड्या १६ ऑक्टोबर २०२६ (गाडी क्र. ०९४२४) आणि १७ ऑक्टोबर २०२६ (गाडी क्र. ०९४२३) पर्यंत सध्याच्या पावसाळी वेळापत्रकानुसार धावतील.

​२३ ऑक्टोबर २०२६ पासून सुरू होणाऱ्या फेऱ्यांसाठी नवीन विना-पावसाळी (Non-Monsoon) वेळापत्रक लागू होईल:

​गाडी क्र. ०९४२४: अहमदाबादहून दर शुक्रवारी दुपारी १६:०० वाजता सुटेल आणि दुसऱ्या दिवशी रात्री २०:०० वाजता मंगळूरू जंक्शनला पोहोचेल (२३ ऑक्टोबर ते २७ नोव्हेंबर २०२६).

​गाडी क्र. ०९४२३: मंगळूरू जंक्शनहून दर शनिवारी रात्री २२:३० वाजता सुटेल आणि तिसऱ्या दिवशी पहाटे ०२:१५ वाजता अहमदाबाद जंक्शनला पोहोचेल (२४ ऑक्टोबर ते २८ नोव्हेंबर २०२६).

​प्रमुख थांबे:

ही विशेष ट्रेन नडियाद, आणंद, वडोदरा, भरूच, सुरत, वापी, पालघर, वसई रोड, भिवंडी रोड, पनवेल, पेण, रोहा, माणगाव, खेड, चिपळूण, सावर्डा, संगमेश्वर रोड, रत्नागिरी, राजापूर रोड, वैभववाडी रोड, कणकवली, सिंधुदुर्ग, कुडाळ, सावंतवाडी रोड, थिविम, करमळी, मडगाव जंक्शन, काणकोण, कारवार, अंकोला, गोकर्ण रोड, कुमटा, मुरुडेश्वर, भटकळ, मूकांबिका रोड बायंदूर, कुंदानपूर, उडुपी, मुल्की आणि सुरतकल या स्थानकांवर थांबेल.

​प्रवाशांनी या विस्तारित सेवेचा लाभ घ्यावा, असे आवाहन कोकण रेल्वेच्या वतीने मुख्य जनसंपर्क अधिकारी सुनील बी. नरकार यांनी केले आहे. अधिक माहितीसाठी www.enquiry.indianrail.gov.in या संकेतस्थळाला भेट द्यावी.

गणपतीसाठी गावी जाणाऱ्या प्रवाशांची वाढती संख्या आणि रेल्वे तिकिटांची कमतरता लक्षात घेता, प्रवाशांच्या सोयीसाठी अहमदाबाद-मंगळुरु साप्ताहिक विशेष ट्रेनला पालघर रेल्वे स्थानकावर अतिरिक्त थांबा देण्यात आला आहे.

   Follow us on        

​कोकण रेल्वे मार्गावरून धावणाऱ्या सर्वच गाड्यांमध्ये सध्या क्षमतेपेक्षा बरीच जास्त प्रवासी संख्या दिसून येत आहे. विशेषतः गणपती उत्सवाच्या निमित्ताने कोकणात जाणाऱ्या चाकरमान्यांची गर्दी मोठ्या प्रमाणावर वाढली असून, लाखो इच्छुकांना अजूनही रेल्वेची तिकिटे मिळालेली नाहीत. या प्रचंड गर्दीला आळा घालण्यासाठी भारतीय रेल्वेने आधीच शेकडो विशेष फेऱ्या सुरू केल्या आहेत.

​याच पार्श्वभूमीवर, कोकण आणि गोव्याच्या दिशेने प्रवास करू इच्छिणाऱ्या प्रवाशांसाठी रेल्वे प्रशासनाकडून आणखी एक नवा पर्याय उपलब्ध करून देण्यात येत आहे. पश्चिम रेल्वेच्या वतीने चालवल्या जाणाऱ्या अहमदाबाद-मंगळुरू-अहमदाबाद साप्ताहिक विशेष ट्रेनला पालघर रेल्वे स्थानकावर अतिरिक्त थांबा मंजूर करण्यात आला आहे.

​ही विशेष प्रवासी सुविधा येत्या २८ ऑगस्ट २०२६ पासून अधिकृतपणे सुरू होणार आहे. यामुळे डहाणू आणि पालघर परिसरातील चाकरमान्यांना कोकणात जाण्यासाठी थेट रेल्वेचा सोयीस्कर पर्याय उपलब्ध होणार असल्याची माहिती प्रशासनाकडून देण्यात आली आहे.

​वेळापत्रकानुसार, अहमदाबाद-मंगळुरू साप्ताहिक विशेष गाडी (क्रमांक ०१९२४) पालघरला रात्री १० वाजून २ मिनिटांनी पोहोचेल आणि दोन मिनिटांच्या थांब्यानंतर रात्री १० वाजून ४ मिनिटांनी मंगळुरूच्या दिशेने रवाना होईल. तसेच परतीच्या प्रवासात, मंगळुरु-अहमदाबाद विशेष गाडी (क्रमांक ०१९२३) पालघर येथे संध्याकाळी ७ वाजून १० मिनिटांनी पोहचून ७ वाजून १२ मिनिटांनी अहमदाबादकडे सुटेल.

​ही विशेष ट्रेन अहमदाबाद येथून प्रत्येक शुक्रवारी सायंकाळी ४ वाजता निघून पालघर, वसई रोड, रत्नागिरी आणि मडगाव मार्गे दुसऱ्या दिवशी रात्री ९ वाजता मंगळुरू जंक्शनला पोहोचते. परतीच्या प्रवासात ही गाडी दर रविवारी रात्री १० वाजून ३० मिनिटांनी मंगळुरूहून सुटून तिसऱ्या दिवशी मध्यरात्री २ वाजून १५ मिनिटांनी अहमदाबादला पोहोचेल, जी विशेष भाडे आकारणीसह धावणार असून प्रवाशांनी अधिक माहितीसाठी www.enquiry.indianrail.gov.in या संकेतस्थळाला भेट द्यावी असे आवाहन केले आहे.

Konkan Railway: 

गणेशोत्सवाच्या निमित्ताने मध्य रेल्वेने प्रवाशांच्या सोयीसाठी छत्रपती शिवाजी महाराज टर्मिनस (CSMT) आणि मडगांव दरम्यान ४ अतिरिक्त विशेष गाड्या चालवण्याचा निर्णय घेतला आहे.

​या विशेष गाड्यांची सविस्तर माहिती खालीलप्रमाणे आहे:

​गाडीचे वेळापत्रक आणि फेऱ्या:

​गाडी क्रमांक 01007 (CSMT – मडगांव विशेष):

​छत्रपती शिवाजी महाराज टर्मिनस येथून मध्यरात्री १२:४० वाजता सुटून त्याच दिवशी दुपारी ०३:३० वाजता मडगांव येथे पोहोचेल.

​दिनांक: ११.०९.२०२६ (शुक्रवार) आणि १३.०९.२०२६ (रविवार). (एकूण २ फेऱ्या)

​गाडी क्रमांक 01008 (मडगांव – CSMT विशेष):

​मडगांव येथून सायंकाकाळी ०४:३० वाजता सुटून दुसऱ्या दिवशी सकाळी ०८:१५ वाजता छत्रपती शिवाजी महाराज टर्मिनस येथे पोहोचेल.

​दिनांक: ११.०९.२०२६ (शुक्रवार) आणि १३.०९.२०२६ (रविवार). (एकूण २ फेऱ्या)

​गाडीची रचना (Composition):

​या विशेष ट्रेनमध्ये एकूण २२ आयसीएफ (ICF) कोच असतील, ज्यामध्ये २ वातानुकूलित तृतीय (3AC), १२ शयनयान (Sleeper), ६ सामान्य द्वितीय श्रेणी (GS) आणि २ द्वितीय आसनासह गार्ड्स ब्रेक व्हॅन (SLRD) समाविष्ट आहेत.

या गाडीचे थांबे

• ​दादर
• ​ठाणे
• ​पनवेल
• ​पेण
• ​रोहा
• ​माणगाव
• ​वीर
• ​खेड
• ​चिपळूण
• ​सावर्डे
• ​आरवली रोड
• ​संगमेश्वर रोड
• ​रत्नागिरी
• ​आडवली
• ​विलवडे
• ​राजापूर रोड
• ​वैभववाडी रोड
• ​नांदगाव रोड
• ​कणकवली
• ​सिंधुदुर्ग
• ​कुडाळ
• ​सावंतवाडी रोड
• ​थिवी
• ​करमळी

​आरक्षण आणि तिकीट बुकिंग

​आरक्षण सुरू होण्याची तारीख: शनिवार, २९ ऑगस्ट, २०२६ रोजी सकाळी ८ वाजेपासून आयआरसीटीसी (IRCTC) आणि RailOne वर आरक्षण सुरू होईल.

​महत्त्वाची टीप: या गाडीच्या तपशीलवार वेळेसाठी कृपया www.enquiry.indianrail.gov.in ला भेट द्या किंवा RailOne अथवा NTES ॲप डाऊनलोड करा. याव्यतिरिक्त इतर कोणत्याही ॲपचा वापर केल्यास अधिकृत माहिती मिळेलच याची शाश्वती नाही.