Konkan Railway: केरळमधील कासरगोड येथे राहणारे मोहम्मद अशरफ एम. एन. हे ३ ऑगस्ट रोजी मंगला लक्षद्वीप एक्सप्रेसने मुंबईकडे प्रवास करत होते. ते इंजिनिअर म्हणून कार्यरत असून, एस-६ कोचमधील ७२ क्रमांकाच्या सीटवरून ते प्रवास करत असताना त्यांनी आपला बहुमूल्य स्मार्टफोन सीटजवळ ठेवला होता.
रात्री साडेदहाच्या सुमारास गाडी उडुपी रेल्वे स्थानकाजवळ आली असता त्यांनी झोपण्यापूर्वी मोबाईल जागेवरच ठेवला होता. त्यानंतर दुसऱ्या दिवशी म्हणजेच ४ ऑगस्ट रोजी सकाळी सहाच्या सुमारास कणकवली रेल्वे स्थानकानजीक त्यांना जाग आली, तेव्हा त्यांचा मोबाईल तिथे दिसून आला नाही.
मोबाईल जागेवर नसल्याचे लक्षात आल्यावर त्यांनी त्वरित आपल्या सीटभोवती तसेच संपूर्ण डब्यात आणि आजूबाजूला कसून शोध घेतला. परंतु, लाखमोलाचा मोबाईल कुठेही सापडला नाही, ज्यामुळे प्रवाशाची चिंता वाढली.
गाडी रत्नागिरी रेल्वे स्थानकावर पोहोचल्यानंतर त्यांनी तात्काळ चालत्या गाडीतील टीसीची भेट घेऊन घडलेल्या प्रकाराची संपूर्ण माहिती दिली. त्यानंतर टीसीने टीटी फॉर्ममध्ये त्यांची अधिकृत तक्रार लिहून घेतली.
सदर प्रकरणाची नोंद प्रथम कल्याण रेल्वे पोलीस ठाण्यात करण्यात आली आणि नंतर पुढील कायदेशीर कारवाईसाठी ती कणकवली पोलीस ठाकडे वर्ग करण्यात आली असून, पोलिसांनी अज्ञात चोराविरुद्ध गुन्हा दाखल केला आहे.
