मुंबई: मुंबईतील लाखो लोकल प्रवाशांसाठी पश्चिम रेल्वेने एक अत्यंत दिलासादायक निर्णय घेतला असून, १९ मार्च २०२६ म्हणजेच गुढीपाडव्याच्या शुभमुहूर्तापासून १६ उपनगरीय लोकल सेवांचा विस्तार करण्यात येणार आहे. सध्या १२ डब्यांच्या असलेल्या या १६ सेवा आता १५ डब्यांच्या करण्यात येणार आहेत. पश्चिम रेल्वेच्या या निर्णयामुळे चर्चगेट-विरार-डहाणू मार्गावरील प्रवाशांची वाढती गर्दी कमी होण्यास मोठी मदत होणार आहे.
या नवीन बदलामुळे पश्चिम रेल्वेवरील १५ डब्यांच्या एकूण फेऱ्यांची संख्या आता २११ वरून २२७ वर पोहोचणार आहे. विशेष म्हणजे, एकूण उपनगरीय सेवांची संख्या १,४१४ इतकीच राहणार असली, तरी डब्यांच्या वाढीमुळे एकाच वेळी प्रवास करणाऱ्या प्रवाशांची क्षमता लक्षणीयरीत्या वाढणार आहे. प्रत्येक १५ डब्यांच्या ट्रेनमुळे साधारणपणे २० ते २५ टक्के अतिरिक्त प्रवाशांना सामावून घेता येईल, जे विशेषतः सकाळी आणि संध्याकाळी ऑफिसच्या वेळेत (पीक आवर्स) प्रवाशांसाठी अत्यंत फायदेशीर ठरेल.
एकीकडे पश्चिम रेल्वेने आपल्या ताफ्यात सुधारणा केल्याने समाधान व्यक्त होत असताना, दुसरीकडे मध्य रेल्वेच्या प्रवाशांनी मात्र नाराजी व्यक्त केली आहे. मध्य रेल्वेवर अद्यापही १५ डब्यांच्या गाड्यांची संख्या कमी असून प्लॅटफॉर्म विस्तारीकरणाचे काम धीम्या गतीने सुरू असल्याकडे प्रवाशांनी लक्ष वेधले आहे. मात्र, पश्चिम रेल्वेच्या या महत्त्वाच्या पावलामुळे मुंबईच्या उपनगरीय रेल्वे प्रवासात प्रवाशांना अधिक मोकळी जागा आणि सुखकर प्रवास मिळणार आहे.
