सिंधुदुर्ग: जिल्हा नियोजन समितीच्या निधीतून सिंधुदुर्ग जिल्हा पोलीस दलाच्या आधुनिकीकरणाला मोठी चालना मिळाली असून, पोलीस दलासाठी प्राप्त झालेल्या नवीन वाहनांचा हस्तांतरण सोहळा आज, १९ मार्च २०२६ रोजी पोलीस मुख्यालयातील कवायत मैदानावर उत्साहात पार पडला.
या कार्यक्रमाचे उद्घाटन राज्याचे मत्स्यव्यवसाय व बंदरे विकास मंत्री तथा सिंधुदुर्गचे पालकमंत्री नितेश राणे आणि गृहराज्यमंत्री (ग्रामीण) डॉ. पंकज भोयर यांच्या हस्ते करण्यात आले. यावेळी जिल्हाधिकारी तृप्ती धोडमिसे, जिल्हा परिषदेचे मुख्य कार्यकारी अधिकारी रवींद्र खेबुडकर, पोलीस अधीक्षक डॉ. मोहन दहिकर आणि अपर पोलीस अधीक्षक नयोमी साटम यांच्यासह जिल्हा परिषदेचे पदाधिकारी व पोलीस अधिकारी मोठ्या संख्येने उपस्थित होते.
कार्यक्रमादरम्यान नवीन वाहनांची पारंपरिक पद्धतीने पूजा करून ती पोलीस दलाच्या सेवेत समर्पित करण्यात आली. या नवीन वाहनांमुळे पोलिसांची गस्त अधिक प्रभावी होणार असून, कोणत्याही आपत्कालीन परिस्थितीत तात्काळ प्रतिसाद देणे शक्य होणार आहे. यामुळे जिल्ह्याची कायदा व सुव्यवस्था अधिक सक्षम होण्यास मदत होईल.
पालकमंत्री नितेश राणे यांनी यावेळी बोलताना स्पष्ट केले की, या वाहनांमुळे स्थानिक पोलिसांच्या कामाला अधिक गती मिळेल आणि सर्वसामान्यांच्या सुरक्षिततेसाठी हे एक महत्त्वाचे पाऊल ठरेल. पोलीस दलाच्या सुसज्जतेसाठी जिल्हा प्रशासन सातत्याने प्रयत्नशील असल्याचेही यावेळी अधोरेखित करण्यात आले.
