Follow us on   

मुंबई, दि. ८: मान्सून दक्षिण कोकणात दाखल झाला असून सिंधुदुर्ग व रत्नागिरी जिल्ह्यांतील काही भागांमध्ये ९ जूनपर्यंत मध्यम ते जोरदार पावसाचा अंदाज आहे. मात्र, त्यानंतर किमान १५ जूनपर्यंत राज्यातील पावसाचा एकंदरीत जोर तसेच मान्सूनच्या प्रगतीचा वेग कमी होण्याची शक्यता हवामानाच्या सध्याच्या अंदाजातून दिसून येत आहे. त्यामुळे या कालावधीत राज्यात सर्वत्र समाधानकारक पावसाची शक्यता कमी आहे.

सध्याच्या हवामान अंदाजानुसार किमान १५ जूनपर्यंत विदर्भ, मराठवाडा, खानदेश आणि मध्य महाराष्ट्रातील काही भागांमध्ये दुपारनंतर ढग आणि विखुरलेल्या स्वरूपाचा मेघगर्जनेसह वादळी पाऊस पडण्याची शक्यता आहे. तथापि, हा पाऊस व्यापक क्षेत्रात पेरणीस पोषक ठरेल, अशी परिस्थिती अद्याप दिसत नाही.

दरम्यान, किमान १२ जूनपर्यंत राज्यातील अनेक भागांमध्ये कमाल तापमान सध्याप्रमाणेच उच्च राहण्याची शक्यता आहे. विदर्भ व खानदेशात कमाल तापमान ४० अंश सेल्सिअसपेक्षा अधिक, तर मराठवाड्यात ३५ ते ४० अंश सेल्सिअस दरम्यान राहण्याचा अंदाज आहे.

कृषी व आपत्ती व्यवस्थापन विभागाकडून शेतकरी व नागरिकांना पुढीलप्रमाणे आवाहन करण्यात येत आहे :

आगामी वादळी पावसावर अवलंबून राहून पेरणीची घाई करू नये.

विजांच्या कडकडाटावेळी झाड, टिनशेडखाली तसेच विद्युत ट्रान्सफॉर्मर, वीज खांब आणि विद्युत वाहिन्यांच्या जवळ थांबणे टाळावे.

   Follow us on   

सिंधुदुर्ग, ६ जून २०२६:

महाराष्ट्रातील तमाम जनतेला आणि बळीराजाला ज्या क्षणाची आतुरतेने प्रतीक्षा होती, तो क्षण अखेर उजाडला आहे. नैऋत्य मान्सूनने आज, ६ जून २०२६ रोजी महाराष्ट्रात अधिकृतपणे प्रवेश केला असून, सिंधुदुर्ग जिल्ह्यातील देवगड येथे मान्सूनचे पहिले पाऊल पडले आहे. भारतीय हवामान विभागाने मान्सूनच्या या प्रगतीची अधिकृत घोषणा केली असून, ग्रामीण कृषी मौसम सेवा, मुळदे यांनी यासंदर्भातील वृत्त प्रसिद्ध केले आहे.

​हवामान विभागाने दिलेल्या माहितीनुसार, मान्सूनने अरबी समुद्रासह देशाच्या विविध भागांत वेगाने आगेकूच केली आहे. आज मान्सूनने अरबी समुद्राचा पश्चिम-मध्य व पूर्व-मध्य भाग, संपूर्ण कर्नाटक आणि गोवा राज्य पूर्णपणे व्यापले आहे. महाराष्ट्राच्या दक्षिण कोकण भागासह आंध्र प्रदेशचा काही भाग, तामिळनाडू आणि नैऋत्य बंगालच्या उपसागराच्या बहुतांश भागात पावसाने प्रगती केली आहे. याशिवाय बंगालच्या उपसागराचा पश्चिम-मध्य, ईशान्य, संपूर्ण पूर्व-मध्य आणि वायव्य भाग, तसेच ईशान्येकडील मिझोराम व मणिपूर या राज्यांमध्येही मान्सून सक्रिय झाला आहे.

​मान्सूनची सद्यस्थिती (उत्तरी सीमा):

६ जून रोजी मान्सूनची उत्तरेकडील सीमा आता महाराष्ट्रातील देवगड, कर्नाटकचे कोप्पल, आंध्र प्रदेशचे अनंतपुरमू, तामिळनाडूचे चेन्नई आणि मिझोराममधील ऐझॉल या शहरांवरून जात आहे.

​कोकण किनारपट्टीवर मान्सूनचे आगमन झाल्यामुळे हवेत सुखद गारवा निर्माण झाला असून, शेतीच्या कामांना आता वेग येणार आहे. दक्षिण कोकणात दाखल झालेला हा मान्सून पुढील काही दिवसांत महाराष्ट्राच्या उर्वरित भागात किती वेगाने प्रगती करतो, याकडे आता सर्वांचे लक्ष लागले आहे.

   Follow us on   

Mansoon Updates: भारतीय हवामान विभागाने (IMD) २ जून २०२६ रोजी दिलेल्या अद्ययावत माहितीनुसार, यंदा नैऋत्य मान्सून केरळमध्ये ४ जूनच्या आसपास दाखल होण्याची शक्यता आहे. सामान्यतः मान्सून १ जूनला केरळात येतो, मात्र यावर्षी थोडी उशीर झाल्याचे दिसत आहे.

IMDने सांगितले की, केरळ, तामिळनाडू, लक्षद्वीप आणि आसपासच्या समुद्र भागात पुढील काही दिवसांत मान्सूनची प्रगती होण्यासाठी अनुकूल परिस्थिती आहे. केरळमध्ये पुढील ६-७ दिवसांत काही ठिकाणी मुसळधार ते अतिवृष्टी (७ ते २० सेंटीमीटर) होण्याची शक्यता वर्तवण्यात आली आहे. तामिळनाडू आणि कर्नाटकातही जोरदार पावसाची शक्यता आहे.

शेतकरी आणि सामान्य नागरिकांसाठी ही माहिती महत्त्वाची आहे, कारण मान्सूनच्या आगमनानंतर खरीप हंगामातील पेरणीला वेग येईल. हवामान विभाग सतत निरीक्षण करत असून, पुढील अपडेट्स लवकरच जाहीर केले जातील.