Follow us on   

आंबोली: सावंतवाडी तालुक्यातील चौकुळ येथील बाबा धबधब्यावर येणाऱ्या पर्यटकांच्या अनियंत्रित गर्दीमुळे निर्माण झालेले सुरक्षिततेचे प्रश्न आणि स्थानिकांवर होणारे हल्ले यामुळे ग्रामस्थांनी धबधबा बंद ठेवण्याचा महत्त्वाचा निर्णय घेतला आहे. या निर्णयाची अंमलबजावणी स्थानिक युवकांच्या पुढाकाराने आणि संयमाने चर्चेच्या माध्यमातून करण्यात आली आहे.

​चौकुळ परिसरातील बाबा धबधब्याकडे येणाऱ्या पर्यटकांच्या गर्दीमुळे स्थानिक नागरिक अनेक दिवसांपासून त्रस्त होते. वाहतूक कोंडी, सुरक्षिततेचा अभाव आणि सोयीसुविधांचा अभाव अशा अनेक समस्यांनी या भागाला ग्रासले होते. या पर्यटनातून स्थानिकांना कोणताही आर्थिक लाभ मिळत नसतानाही त्यांना विविध समस्यांना तोंड द्यावे लागत असल्याने लोकांमध्ये कमालीची नाराजी होती.

​वातावरण अधिक गंभीर तेव्हा झाले जेव्हा काल वाहतूक सुरळीत करण्यासाठी गेलेल्या केगदवाडीच्या पोलीस पाटलांवरच काही पर्यटकांनी हल्ला करण्याचा प्रयत्न केला. या धक्कादायक घटनेनंतर संतप्त झालेल्या ग्रामस्थांनी आज स्वतःहून ग्रामपंचायत बंद ठेवून आपला निषेध नोंदवला. या घटनेने स्थानिक सुरक्षेचा प्रश्न ऐरणीवर आणला असून, परिसरातील नागरिकांमध्ये मोठी खळबळ उडाली आहे.

​या आणीबाणीच्या परिस्थितीत स्थानिक तरुणांनी अत्यंत जबाबदारीने पुढाकार घेतला. युवकांनी एकजूट होऊन धबधब्याच्या मालकांशी थेट संवाद साधला आणि स्थानिकांच्या सुरक्षेचा मुद्दा ठामपणे मांडला. पर्यटनापेक्षा स्थानिकांची सुरक्षा आणि स्वाभिमान महत्त्वाचा असल्याचे स्पष्ट करत, युवकांनी धबधबा बंद ठेवण्याची आग्रही मागणी केली.

​युवकांच्या या ठाम भूमिकेमुळे आणि निर्माण झालेल्या गंभीर परिस्थितीचे गांभीर्य ओळखून धबधबा मालकांनी धबधबा बंद ठेवण्यास सहमती दर्शवली आहे. ही घटना पर्यटनाच्या नावाखाली स्थानिकांना होणाऱ्या त्रासाबाबत प्रशासनाला विचार करायला लावणारी आहे. आजच्या या घटनेने ‘स्थानिकांची सुरक्षितता प्रथम’ हा संदेश स्पष्टपणे दिला आहे.

   Follow us on   

रत्नागिरी:

​रत्नागिरी जिल्ह्यातील भगवती बंदर येथे अत्याधुनिक क्रूझ टर्मिनल विकसित करण्याच्या प्रकल्पाला गती देण्यात येणार आहे. या महत्त्वाच्या प्रकल्पाळुळे कोकणातील सागरी पर्यटन, स्थानिक रोजगार आणि आर्थिक विकासाला मोठी चालना मिळेल, असा ठाम विश्वास मत्स्यव्यवसाय व बंदरे मंत्री नितेश राणे यांनी व्यक्त केला आहे.

​या प्रकल्पाबाबत मंत्रालयात एका विशेष आढावा बैठकीचे आयोजन करण्यात आले होते, ज्यामध्ये मंत्री नितेश राणे बोलत होते. या बैठकीला महाराष्ट्र मेरिटाइम बोर्डाचे मुख्य कार्यकारी अधिकारी प्रदीप पी. तसेच संबंधित विभागांचे वरिष्ठ अधिकारी उपस्थित होते.

​मंत्री नितेश राणे यांनी बैठकीत सांगितले की, कोकण किनारपट्टीची नैसर्गिक संपन्नता, ऐतिहासिक वारसा आणि पर्यटन क्षमता लक्षात घेता भगवती बंदर येथे होणारे क्रूझ टर्मिनल राज्याच्या सागरी पर्यटन क्षेत्रासाठी अत्यंत महत्त्वाचा टप्पा ठरणार आहे.

​या प्रकल्पाची अंमलबजावणी झाल्यास देशांतर्गत तसेच आंतरराष्ट्रीय पर्यटकांना दर्जेदार सुविधा उपलब्ध होऊ शकतील. यामुळे रत्नागिरी पर्यटन जागतिक नकाशावर अधिक ठळकपणे झळकण्यास मोठी मदत होईल.

​मुख्यमंत्री देवेंद्र फडणवीस यांच्या नेतृत्वाखाली राज्य शासन कोकणातील बंदर विकास आणि सागरी पर्यटनाला सर्वोच प्राधान्य देत आहे, असेही मंत्री नितेश राणे यांनी शेवटी सांगितले.

   Follow us on   

कणकवली तालुक्यातील सावडाव धबधबा येथे पर्यटन कराच्या मुद्द्यावरून दाजीपूर आणि इचलकरंजी येथून आलेल्या पर्यटक आणि स्थानिक ग्रामस्थांमध्ये मोठा वाद झाला. ही घटना दुपारी साडेतीन वाजण्याच्या सुमारास घडली. सावडाव ग्रामपंचायतीकडून धबधब्याकडे जाणाऱ्या प्रत्येक व्यक्तीमागे दहा रुपये पर्यटन कर घेतला जातो. याच कराच्या वसुलीवरून १० ते १२ पर्यटकांनी तिथल्या कर्मचाऱ्यांशी वाद घातला आणि त्यांना बेदम मारहाण केली.

​मारहाणीचा हा प्रकार पाहून जेव्हा स्थानिक ग्रामस्थ तिथे जमा झाले, तेव्हा पर्यटकांनी त्यांच्यावरही दगडफेक केली. जसजसे अधिक ग्रामस्थ तिथे गोळा होऊ लागले, ते पाहून पर्यटकांनी आपल्या वाहनांसह मुंबई-गोवा महामार्गाच्या दिशेने पळ काढला. मात्र, या घटनेत गावकऱ्यांनी एका पर्यटकाला जागीच पकडले आणि त्याला पोलिसांच्या स्वाधीन केले.

पोलिसांनी घटनास्थळी पोहोचून त्या पर्यटकाला ताब्यात घेतले असून, मारहाण करणाऱ्या सर्व पर्यटकांवर गुन्हा दाखल करण्याची प्रक्रिया कणकवली पोलीस ठाण्यात सायंकाळी उशिरापर्यंत सुरू होती. पर्यटनाच्या नावाखाली येऊन स्थानिकांवर दादागिरी करणाऱ्या अशा हुल्लडबाजांवर कडक कारवाई करावी, अशी जोरदार मागणी सावडाव ग्रामस्थांनी पोलिसांकडे केली आहे.

   Follow us on   

सिंधुदुर्ग:

सिंधुदुर्ग जिल्ह्यासाठी अत्यंत अभिमानास्पद आणि स्थानिक विकासाला कमालीची गती देणारी एक मोठी बातमी समोर आली आहे. ‘सिंधुदुर्गचे ॲमेझॉन’ म्हणून जगभरात ओळखल्या जाणाऱ्या दोडामार्ग तालुक्यातील तिलारी खोऱ्याला आता ‘राष्ट्रीय उद्यान’ (National Park) म्हणून घोषित केले जाण्याचे संकेत मिळाले आहेत. या महत्त्वपूर्ण निर्णयामुळे संपूर्ण जिल्ह्यात आनंदाचे वातावरण पसरले आहे.

​शासनाची तातडीने दखल आणि मंजुरी

​विधानमंडळात या संदर्भातील मागणी उपस्थित होताच राज्य शासनाने त्याची तातडीने दखल घेतली आहे. वनमंत्री गणेश नाईक यांनी या मागणीचे गांभीर्य ओळखून तिलारी परिसरात राष्ट्रीय उद्यान उभारण्यास तत्त्वतः मंजुरी दिली आहे. शासनाच्या या सकारात्मक प्रतिसादामुळे आता तिलारी खोऱ्याच्या वैभवात अधिकृतपणे भर पडणार असून, पुढील प्रशासकीय प्रक्रियेला वेग येण्याची चिन्हे आहेत.

​जैवविविधतेचे नंदनवन ‘तिलारी’

​सह्याद्रीच्या कुशीत वसलेले तिलारी खोरे हे आपल्या अथांग आणि समृद्ध जैवविविधतेसाठी ओळखले जाते. दाट सदाहरित जंगले, दुर्मीळ वनौषधी व वनस्पती, विविध प्रजातींचे रंगीबेरंगी पक्षी आणि जंगली हत्तींचे नैसर्गिक वास्तव्य ही या परिसराची मुख्य वैशिष्ट्ये आहेत. या भागाला राष्ट्रीय उद्यानाचा दर्जा मिळाल्यास येथील वन्यजीव संवर्धनाला आणि पर्यावरणाच्या रक्षणाला कायद्याचे मोठे बळ मिळणार आहे.

​पर्यटन आणि अर्थव्यवस्थेला मोठी उभारी

​या ऐतिहासिक निर्णयामुळे केवळ वन्यजीव संवर्धनालाच फायदा होणार नाही, तर स्थानिक विकासाचे नवे मार्ग खुले होणार आहेत. तिलारीला राष्ट्रीय उद्यानाचा दर्जा मिळाल्यास या भागात पायाभूत सुविधांचा विकास होईल. तसेच, मोठ्या प्रमाणावर पर्यटकांचा ओघ वाढल्यामुळे स्थानिक रोजगार, हॉटेल व्यवसाय, वाहतूक व्यवस्था आणि इतर छोट्या-मोठ्या स्थानिक व्यवसायांना कमालीची चालना मिळणार आहे.

​गोवा-सिंधुदुर्ग पर्यटन साखळी अधिक मजबूत होणार

​विशेष बाब म्हणजे, गोव्यातील मोपा आंतरराष्ट्रीय विमानतळापासून तिलारी हे ठिकाण अतिशय जवळ आहे. यामुळे गोव्यात येणाऱ्या देशी-विदेशी पर्यटकांसाठी तिलारी हे एक प्रमुख आणि हक्काचे आकर्षण ठरेल. या भौगोलिक सुविधेमुळे गोवा-सिंधुदुर्ग पर्यटन साखळी अधिक बळकट होणार असून, आंतरराष्ट्रीय पर्यटन नकाशावर सिंधुदुर्गचे नाव आणखी ठळकपणे अधोरेखित होणार आहे.

   Follow us on   

मुंबई (प्रतिनिधी) :

रस्ते, रेल्वे आणि मेट्रोच्या जाळ्यानंतर आता महाराष्ट्र राज्य जलवाहतूक क्षेत्रात जागतिक दर्जाची भारी झेप घेण्यासाठी सज्ज झाले आहे. कोकणातील धार्मिक पर्यटनाला चालना देण्यासाठी सिंधुदुर्ग, रत्नागिरी आणि रायगडमधील प्रमुख तीर्थस्थळे आता जलमार्गांनी जोडली जाणार आहेत. “आंगणेवाडी ते कुणकेश्वर, कुणकेश्वर ते गणपतीपुळे आणि गणपतीपुळे ते पाली अशा प्रसिद्ध श्रद्धास्थानांना ५० ते ३० प्रवासी क्षमतेच्या लहान व वेगवान बोटींच्या माध्यमातून जोडण्याची आमची योजना असून, यासाठी आवश्यक जेटी बांधण्याची तयारी वेगाने सुरू आहे,” अशी माहिती मत्स्यव्यवसाय आणि बंदरे विकास मंत्री नितेश राणे यांनी दिली. एका विशेष मुलाखतीत बोलताना त्यांनी राज्याला जलवाहतुकीत अग्रेसर बनवण्याचा आपला महत्त्वाकांक्षी आराखडा मांडला.

​मुंबई आणि लगतच्या महानगर प्रदेशातील (एमएमआर) वाहतूक कोंडी फोडण्यासाठी ‘मुंबई वॉटर मेट्रो’ची संकल्पना राबवण्यात येत असून, २०२८ पर्यंत सुमारे ३ ते ४ जलमार्ग प्रत्यक्ष सुरू होतील, असा विश्वास मंत्री राणे यांनी व्यक्त केला. मुंबई वॉटर मेट्रोसाठी एकूण २१ जलमार्ग अंतिम करण्यात आले आहेत. यामध्ये प्रामुख्याने मुंबईतील रेडिओ क्लब ते नवी मुंबई विमानतळ या जलमार्गाचा समावेश आहे. सध्या या प्रवासासाठी सव्वा तास लागतो, मात्र वॉटर मेट्रोमुळे अवघ्या १६ मिनिटांत हे अंतर कापता येणार आहे. याशिवाय नरिमन पॉईंट ते जुहू आणि वांद्रे ते वर्सोवा अशा असंख्य मार्गांचा यात समावेश असेल.

​गेटवे ऑफ इंडिया ते अलिबाग या पारंपरिक जलमार्गाव्यतिरिक्त आता मुंबईच्या पश्चिम उपनगरातून अलिबाग गाठणे शक्य होणार आहे. यामुळे पश्चिम उपनगरातील नागरिकांना अलिबागला जाण्यासाठी एक सोयीस्कर पर्याय उपलब्ध होईल.

​स्वीडन, इटलीप्रमाणे महाराष्ट्रातही जलवाहतुकीचे जाळे:

युरोपियन देशांमधील प्रगत जलवाहतूक व्यवस्थेचा दाखला देत मंत्री नितेश राणे म्हणाले, “तुम्ही स्वीडन, रोम, इटली किंवा नॉर्वेला गेल्यास तिथे तुम्हाला जलवाहतुकीचे एक सुसज्ज जाळे दिसते. अगदी त्याच धर्तीवर आगामी ५ वर्षांच्या काळात महाराष्ट्र जलवाहतूक क्षेत्रात देशात अग्रेसर दिसेल. रस्ते, रेल्वे आणि मेट्रोप्रमाणेच जलवाहतूक हा महाराष्ट्रातील जनतेच्या दैनंदिन प्रवासाचा एक मुख्य आणि तितकाच वेगवान पर्याय बनेल.”

​जहाज बांधणीला (शिपयार्ड) मिळणार चालना:

मुंबई वॉटर मेट्रोसह राज्यातील विविध जलवाहतूक प्रकल्पांसाठी तब्बल २७० लहान-मोठ्या बोटींची आवश्यकता आहे. हे उद्दिष्ट लक्षात घेऊन राज्य सरकार आता ‘शिपयार्ड’ आणि जहाज बांधणी उद्योगाला मोठ्या प्रमाणावर प्रोत्साहन देत आहे. यासाठी आवश्यक असणाऱ्या बोटींची ऑर्डर आधीच देण्यात आली आहे. आगामी काळात महाराष्ट्राच्या विस्तीर्ण समुद्रकिनाऱ्यावर बोटी बनवण्याचे अनेक मोठे कारखाने आणि फॅक्टऱ्या पाहायला मिळतील, ज्यामुळे स्थानिक पातळीवर मोठ्या प्रमाणावर रोजगार निर्माण होईल, असा विश्वास मंत्री नितेश राणे यांनी व्यक्त केला.