Follow us on   

Konkan Railway: गणपती बाप्पाच्या आगमनावेळी कोकणात जाणाऱ्या प्रवाशांसाठी एक आनंदाची बातमी समोर आली आहे. २०२६ च्या गणेशोत्सवा दरम्यान प्रवाशांच्या सोयीसाठी सापे वामने, विन्हेरे आणि कडवई स्थानकांवर काही विशेष रेल्वे गाड्यांना अतिरिक्त थांबे देण्याचा निर्णय घेण्यात आला आहे.

​अतिरिक्त थांब्यांचा तपशील:

​गाडी क्र. ०११०३ (मुंबई सीएसएमटी – सावंतवाडी रोड विशेष):

​सापे वामने स्थानकावर वेळ: २०:३८ / २०:४० (दिनांक ११/०९/२०२६ ते २६/०९/२०२६ पर्यंत)

​विन्हेरे स्थानकावर वेळ: २०:५८ / २१:०० (दिनांक ११/०९/२०२६ ते २६/०९/२०२६ पर्यंत)

​गाडी क्र. ०११०४ (सावंतवाडी रोड – मुंबई सीएसएमटी विशेष):

​सापे वामने स्थानकावर वेळ: १०:४० / १०:४२ (दिनांक १२/०९/२०२६ ते २७/०९/२०२६ पर्यंत)

​विन्हेरे स्थानकावर वेळ: १०:१२ / १०:१४ (दिनांक १२/०९/२०२६ ते २७/०९/२०२६ पर्यंत)

​गाडी क्र. ०११५३ (मुंबई सीएसएमटी – रत्नागिरी विशेष):

​कडवई स्थानकावर वेळ: १८:२३ / १८:२४ (दिनांक ११/०९/२०२६ ते २६/०९/२०२६ पर्यंत)

​गाडी क्र. ०११५४ (रत्नागिरी – मुंबई सीएसएमटी विशेष):

​कडवई स्थानकावर वेळ: ०४:४८ / ०४:४९ (दिनांक १२/०९/२०२६ ते २७/०९/२०२६ पर्यंत)

​टीप: वरील गाड्यांच्या सविस्तर वेळा आणि थांब्यांची माहिती मिळवण्यासाठी प्रवाशांनी www.enquiry.indianrail.gov.in या संकेतस्थळाला भेट द्यावी, असे आवाहन रेल्वे प्रशासनाकडून (मुख्य जनसंपर्क अधिकारी सुनील बी. नारकर) करण्यात आले आहे.

   Follow us on   

वैभववाडी: महागड्या भेटवस्तूंचे प्रलोभन दाखवून ग्रामीण भागातील भोळ्या भाबड्या नागरिकांना गंडा घालणाऱ्या भामट्यांच्या टोळीचा भांडाफोड झाला आहे. लकी ड्रॉच्या नावाखाली हजारो रुपयांची फसवणूक करणाऱ्या या टोळीतील तिघांना खांबाळे (ता. वैभववाडी) येथील जागरूक ग्रामस्थांनी रंगेहाथ पकडून थेट पोलिसांच्या ताब्यात दिले आहे. नुकत्याच कोकिसरे आणि एडगाव परिसरात घडलेल्या फसवणुकीच्या प्रकारांमुळे स्थानिक ग्रामस्थ सतर्क होते, त्याचाच फायदा या भामट्यांच्या ‘खेळाचा’ पर्दाफाश करण्यासाठी झाला आहे.

​मिळालेल्या माहितीनुसार, १३ तारखेला सकाळी नऊ वाजण्याच्या सुमारास दोन महिला आणि एक पुरुष चारचाकी वाहनातून खांबाळे गावात आले. त्यांनी ग्रामस्थांना लकी ड्रॉचे कुपन दाखवून त्यात गॅस शेगडी, टीव्ही, फ्रीज यांसारख्या मौल्यवान वस्तू बक्षीस म्हणून मिळतील, असे आमिष दाखवले. या टोळीने घरोघरी जाऊन नागरिकांना या कथित योजनेची माहिती दिली होती.

​याआधी कोकिसरे आणि एडगाव भागात अशाच प्रकारे नागरिकांची आर्थिक फसवणूक झाल्याची बातमी ग्रामस्थांच्या कानावर आली होती. त्यामुळे खांबाळे येथील तरुण या तिघांच्या संशयास्पद हालचालींवर लक्ष ठेवून होते. अखेर ग्रामस्थांनी त्यांना अडवून विचारपूस केली असता, त्यांच्याकडे गावात वस्तू विक्रीची कोणतीही अधिकृत परवानगी नसल्याचे दिसून आले. ग्रामस्थांच्या सतर्कतेमुळे भामट्यांचा पळ काढण्याचा प्रयत्न हाणून पाडला गेला आणि त्यांना पोलिसांच्या स्वाधीन करण्यात आले.

​लकी ड्रॉच्या या ‘खेळा’मागील कार्यपद्धती मोठी गुंतागुंतीची आहे. सुरुवातीला नागरिकांना आकर्षक वस्तूंचे स्वप्न दाखवून कमी किमतीचे कुपन घ्यायला प्रवृत्त केले जाते आणि एक छोटी वस्तू बक्षीस म्हणून दिली जाते, ज्यामुळे लोकांचा विश्वास बसतो. त्यानंतर, टीव्ही किंवा फ्रीजसारख्या महागड्या वस्तू अत्यंत कमी किमतीत मिळतील असे सांगून, कुपनमध्ये मोठे बक्षीस लागल्याचे भासवले जाते. बक्षीस मिळवण्यासाठी नागरिकांकडून हजारो रुपये उकळले जातात आणि त्यानंतर हे भामटे आपला फोन बंद करून किंवा गाव सोडून पसार होतात.

​या कारवाईनंतर पोलिसांनी या प्रकरणाचा अधिक तपास केला असता, संबंधित संशयित हे कोल्हापूर येथील असल्याचे निष्पन्न झाले आहे. या टोळीने एका नागरिकाकडून टीव्ही देण्याचे सांगून सुमारे ३० हजार रुपये उकळले होते. दरम्यान, कोकिसरे येथील फसवणुकीप्रकरणी आणखी दोन संशयितांना ताब्यात घेण्यात आले असून, पोलिसांनी सर्वांविरोधात प्रतिबंधात्मक कारवाई केली आहे. नागरिकांनी अशा अनोळखी व्यक्तींच्या महागड्या वस्तूंच्या आमिषाला बळी पडू नये, असे आवाहन प्रशासनाकडून करण्यात आले आहे.

   Follow us on   

मुंबई:

आगामी गणेशोत्सवाच्या पार्श्वभूमीवर कोकणात जाणाऱ्या चाकरमान्यांची होणारी गर्दी लक्षात घेता, मध्य रेल्वे आणि कोकण रेल्वेच्या वतीने अनेक विशेष गाड्या चालवल्या जाणार आहेत. दरम्यान, लोकमान्य टिळक टर्मिनस (LTT) ते रत्नागिरी दरम्यान चालवली जाणारी गणपती विशेष गाडी (०११६७/०११६८) आठवड्यातून पाच दिवस धावते आणि दर सोमवार व शुक्रवारी ती बंद असते. या दोन दिवशी रिकाम्या राहणाऱ्या गाडीच्या डब्यांचा (रॅक) कार्यक्षम वापर करत, याच दिवशी लोकमान्य टिळक टर्मिनस ते चिपळूण दरम्यान विशेष गाडी चालवावी, अशी महत्त्वाची मागणी ‘कोकण विकास समिती’च्या वतीने रेल्वे प्रशासनाकडे करण्यात आली आहे.

​कोकण विकास समितीने दिलेल्या निवेदनात म्हटले आहे की, LTT-रत्नागिरी विशेष गाडी सोमवार आणि शुक्रवार या दोन दिवशी इतर पुणे-रत्नागिरी सेवांच्या ऑपरेशनमुळे चालवली जात नाही. मात्र, या दोन दिवशी रॅक निरुपयोगी न ठेवता त्याचा उत्पादक आणि पर्यायी वापर म्हणून एलटीटी ते चिपळूण दरम्यान विशेष गाडी सुरू केल्यास मध्य कोकणातील प्रवाशांना मोठा दिलासा मिळू शकतो.

​चिपळूण, खेड, महाडसह परिसरातील प्रवाशांना होणार फायदा

​सध्याच्या काळात गणेशोत्सवासाठी कोकणात जाणाऱ्या गाड्यांचे आरक्षण काही मिनिटांत फुुल होते. अशा वेळी एलटीटी ते चिपळूण दरम्यान ही अतिरिक्त सेवा सुरू झाल्यास केवळ चिपळूणच नव्हे, तर खेड, महाड, माणगाव आणि लगतच्या परिसरातील प्रवाशांची सोय होईल. तसेच उपलब्ध रेल्वे संसाधनांचा आणि रॅकचा अत्यंत उत्तम प्रकारे सदुपयोग होईल, असे समितीचे म्हणणे आहे.

​वेळापत्रक कसे असेल?

​प्रस्तावित LTT-चिपळूण विशेष गाडीचे वेळापत्रक अशा प्रकारे आखावे, जेणेकरून ही रॅक दुसऱ्या दिवशीच्या ठरवलेल्या ०११७१ LTT-सावंतवाडी सेवेसाठी वेळेत उपलब्ध होईल. रेल्वे प्रशासनाने गाड्यांच्या देखभालीच्या (maintenance) गरजा आणि मार्गावरील उपलब्धतेचा (path availability) अभ्यास करून यावर तातडीने निर्णय घ्यावा, अशी विनंती करण्यात आली आहे.

​या संदर्भातील सविस्तर प्रस्ताव कोकण विकास समितीच्या शहरी व ग्रामीण विभागाचे जयवंत शंकर दरेकर आणि अक्षय मधुकर महापदी यांनी रेल्वे प्रशासनाकडे पाठवला असून, गणेशोत्सवाच्या ऐन गर्दीच्या काळात या प्रस्तावावर सकारात्मक विचार करून लवकरात लवकर अंमलबजावणी करावी, अशी आग्रही मागणी प्रवाशांच्या वतीने करण्यात आली आहे.

   Follow us on   

मुंबई: गणेशोत्सवाच्या निमित्ताने मुंबईत वास्तव्य करणाऱ्या कोकणातील नागरिकांसाठी एक अत्यंत आनंदाची बातमी समोर आली आहे. बाप्पाच्या आगमनावेळी टाळ-मृदुंगाच्या साथीने आणि गावाकडे जाणाऱ्या आनंदाच्या ओढीला साथ देण्यासाठी यंदा विशेष उपक्रम हाती घेण्यात आला आहे. कोकणवासीयांचा हा प्रवास अधिक सुकर आणि आनंददायी व्हावा, या उद्देशाने ‘शिवसेना एक्सप्रेस’ ही विशेष मोफत रेल्वे चालवण्यात येणार आहे.

​कुडाळ-मालवण विधानसभा मतदारसंघाचे आमदार निलेश नारायणराव राणे यांच्या माध्यमातून या विशेष मोफत रेल्वे प्रवासाचे यशस्वी आयोजन करण्यात आले आहे. या पत्रकावर शिवसेना पक्षातील अनेक प्रमुख नेत्यांचे व पदाधिकाऱ्यांचे छायाचित्र देखील पाहायला मिळत आहेत. आयोजकांकडून प्रवाशांना आवाहन करण्यात आले आहे की, त्यांनी या मोफत प्रवासाच्या सुविधेचा लाभ घेण्यासाठी लवकरात लवकर आपली नोंदणी किंवा बुकिंग निश्चित करून घ्यावी.

​ही विशेष ‘शिवसेना एक्सप्रेस’ आगामी १२ सप्टेंबर २०२६ रोजी म्हणजेच शनिवारी सकाळी बरोबर १० वाजता दादर रेल्वे स्थानकातून कुडाळसाठी रवाना होईल. प्रवाशांनी ऐनवेळी कोणतीही गैरसोय टाळण्यासाठी वेळेवर आपली बुकिंगे करून घ्यावीत, असे विशेष नमूद केले गेले आहे. या प्रवासाचे बुकिंग करण्यासाठी सोमवार ते शनिवार या कालावधीत सकाळी ११ ते संध्याकाळी ५ वाजेपर्यंतची वेळ ठरवून देण्यात आली आहे.

​या मोफत रेल्वे प्रवासाचा लाभ घेण्यासाठी काही कागदपत्रांची पूर्तता करणे बंधनकारक करण्यात आले आहे. प्रामुख्याने कुडाळ आणि मालवण तालुक्यातील रहिवाशांसाठी प्रवासादरम्यान मतदान कार्ड तसेच आधार कार्ड जवळ बाळगणे आणि दाखवणे अनिवार्य असणार आहे. या नियमांची पूर्तता करणाऱ्या प्रवाशांनाच या मोफत प्रवासाचा लाभ घेता येणार आहे.

​उत्सवाच्या काळात कोकणात जाणाऱ्या चाकरमान्यांच्या सोयीसाठी सुरू करण्यात आलेल्या या उपक्रमाबद्दल अधिक माहिती किंवा संपर्कासाठी ८४२५९०१२०२ आणि ८४२५९०१५४५ हे संपर्क क्रमांक उपलब्ध करून देण्यात आले आहेत. इच्छुक नागरिकांनी या नंबरवर संपर्क साधून प्रवासासंबंधित अधिक तपशील जाणून घ्यावा आणि वेळेत नोंदणी करून या सुविधेचा लाभ घ्यावा.

   Follow us on   

सिंधुदुर्ग: पर्यावरणदृष्ट्या अत्यंत संवेदनशील असलेल्या सिंधुदुर्ग जिल्ह्यावर परप्रांतीय भूमाफियांची नजर पडली असून, संपूर्ण जिल्हा त्यांच्या विळख्यात सापडला असल्याचा गंभीर आरोप राष्ट्रवादी काँग्रेस (शरदचंद्र पवार) पक्षाचे ज्येष्ठ नेते जयंत पाटील यांनी केला आहे. स्थानिकांच्या जमिनी बळकावण्यापासून ते हजारो वृक्षांची सर्रास कत्तल करण्यापर्यंतचे प्रकार सुरू असल्याचा दावा करत, त्यांनी यासंदर्भात महसूलमंत्री चंद्रशेखर बावनकुळे यांना सविस्तर पत्र पाठवले आहे.

​पावसाळी अधिवेशनादरम्यान, जयंत पाटील यांनी दोडामार्ग तालुक्यातील सासोली येथील जमिनीच्या गैरव्यवहाराचा मुद्दा उपस्थित केला होता. त्यावेळी या प्रकरणाची चौकशी करून कारवाई करण्याचे आश्वासन महसूलमंत्र्यांनी सभागृहात दिले होते, असे त्यांनी आपल्या पत्रात नमूद केले आहे. मात्र, शासनाकडून ठोस कारवाईचे आश्वासन मिळूनही, सध्या त्या जमिनीवरील सहा हजारांहून अधिक वृक्षांची विनापरवाना कत्तल सुरू असल्याचे पाटील यांनी म्हटले आहे.

​दोडामार्ग तालुक्यातील सासोली येथे डोंगरांचे सपाटीकरण केले जात असून, सर्वेश पेडणेकर या तरुणाने अत्यंत निडरपणे हा सर्व प्रकार चव्हाट्यावर आणला असल्याचेही त्यांनी पत्रात स्पष्ट केले आहे. तत्कालीन तहसीलदारांनी बनावट कागदपत्रांच्या आधारे, तसेच सहहिस्सेदारांची कोणतीही पूर्वपरवानगी न घेता, परप्रांतीयांना अकृषक (NA) आणि विकासाची परवानगी दिली होती, हा गंभीर प्रकार आता उघडकीस आला आहे.

​केवळ सासोलीच नव्हे, तर दोडामार्ग तालुक्यातील धारपी-उडेली गावामध्येही अशाच प्रकारे जमिनी हडपण्याचे प्रकार सुरू आहेत, असा आरोपही पाटील यांनी केला आहे. येथील नैसर्गिक पाण्याचे प्रवाह बांध घालून अडवले जात असून, बेकायदेशीरपणे गौण खनिजाचे उत्खनन करून त्याची विक्री केली जात असल्याचे त्यांनी पत्रात निदर्शनास आणून दिले आहे. या सर्व अनधिकृत प्रकारांची तातडीने चौकशी करून दोषींवर कठोर कारवाई करावी, अशी मागणी त्यांनी महसूलमंत्री चंद्रशेखर बावनकुळे यांच्याकडे केली आहे.

​भूमाफियांची हिंमत इतकी वाढली आहे की त्यांना आता शासनाचीही भीती राहिलेली नाही, असा जोरदार हल्लाबोल जयंत पाटील यांनी केला आहे. त्यामुळे सिंधुदुर्ग जिल्ह्यातील जमिनी आणि येथील अमूल्य नैसर्गिक जैवसंपदा या भूमाफियांच्या तावडीतून तातडीने वाचवावी, तसेच स्थानिक नागरिकांना न्याय मिळवून द्यावा, अशी आग्रही मागणीही त्यांनी या पत्राद्वारे केली आहे.

   Follow us on   

मुंबई: वनमंत्री गणेश नाईक यांच्या अध्यक्षतेखाली झालेल्या बैठकीत तिलारी परिसरात हत्ती अधिवास विकसित करण्यासाठी १२ कोटी रुपये, तर आजरा घाटघर येथे हत्ती ग्राम उभारण्यासाठी १० कोटी रुपयांच्या निधीला मंजुरी देण्यात आली आहे.

​सिंधुदुर्ग जिल्ह्यातील वन विभागाच्या विविध समस्यांबाबत मंत्रालयात एका महत्त्वाच्या बैठकीचे आयोजन करण्यात आले होते. या बैठकीला माजी मंत्री दीपक केसरकर आणि आमदार निलेश राणे यांच्यासह वन विभागाचे वरिष्ठ अधिकारी उपस्थित होते. जिल्ह्यातील हत्तींच्या वाढत्या त्रासावर आणि वन्यजीव व्यवस्थापनावर या बैठकीत सविस्तर चर्चा करण्यात आली.

​बैठकीत तिलारी राखीव वन क्षेत्रात हत्तींसाठी आवश्यक अन्न उपलब्ध करून देणे आणि संपूर्ण परिसरात फेन्सिंग (कुंपण) करून त्यांचा कायमस्वरूपी अधिवास तयार करण्याचे निर्देश देण्यात आले आहेत. यासाठी १२ कोटी रुपयांची तरतूद मंजूर करण्यात आली आहे. या उपाययोजनांमुळे हत्तींच्या हालचालींवर नियंत्रण राहून मानवी वस्त्यांवरील हल्ले कमी होण्यास मदत होईल.

​यासोबतच आजरा घाटघर येथे हत्ती ग्राम उभारण्यासाठी १० कोटी रुपयांच्या निधीला मान्यता देण्यात आली. तसेच, शेतकऱ्यांच्या पिकांचे होणारे नुकसान लक्षात घेऊन नुकसान भरपाईच्या धोरणात सुधारणा करण्याचे ठरले. यापूर्वी मिळणारी नुकसान भरपाई अपुरी असल्यामुळे ती वाढवण्याबाबत आणि बांबू तसेच फणस, काजूच्या बोंडांच्या नुकसानीचा प्रस्ताव सादर करण्याबाबतही अधिकाऱ्यांना सूचना देण्यात आल्या आहेत.

​वन्यजीवांच्या हल्ल्यात होणाऱ्या जीवितहानीबाबतही बैठकीत संवेदनशील निर्णय घेण्यात आला. आता वनक्षेत्रात सर्पदंशाने किंवा अन्य कारणाने जीवितहानी झाल्यास, हत्तीच्या हल्ल्याप्रमाणेच २५ लाख रुपयांची आर्थिक मदत दिली जाणार आहे. या बैठकीला स्थानिक लोकप्रतिनिधी आणि संबंधित वन अधिकारी मोठ्या संख्येने उपस्थित होते.

   Follow us on   

नवी दिल्ली: आज लोकसभेत श्री. कोटा श्रीनिवास पुजारी (Shri Kota Srinivas Poojary) यांनी विचारलेल्या तारांकित नसलेल्या प्रश्न क्रमांकप्रश्न क्रमांक ४१०४ च्या उत्तरात कोकण रेल्वे कॉर्पोरेशन लिमिटेडच्या (KRCL) विलीनीकरणाबाबत महत्वाची माहिती समोर आली आहे.

१९९० मध्ये स्थापन झालेली कोकण रेल्वे ही रोहा (महाराष्ट्र) ते ठोकूर (कर्नाटक) या ७३९ किलोमीटर लांबीच्या पश्चिम किनारपट्टीवरील मार्गावर धावते, जी मुंबईला मंगळूरशी जोडते. या महामंडळामध्ये रेल्वे मंत्रालयाशिवाय महाराष्ट्र, कर्नाटक, गोवा आणि केरळ ही चार राज्य सरकारे भागधारक आहेत. सध्याच्या शेअरहोल्डर रचनेनुसार केंद्र सरकारकडे (रेल्वे मंत्रालयामार्फत) ६६.७९ टक्के, महाराष्ट्र सरकारकडे १४.९१ टक्के, कर्नाटक सरकारकडे १०.१७ टक्के, तर गोवा आणि केरळ सरकारकडे प्रत्येकी ४.०७ टक्के हिस्सा आहे.

​कोकण रेल्वेच्या पायाभूत सुविधा आता जवळपास ३० वर्षां जुन्या झाल्या असून, प्रवाशांची सुरक्षा सुनिश्चित करण्यासाठी तसेच क्षमता वाढवण्यासाठी बोगद्यांच्या पुनर्वसनासह मालमत्तांच्या नूतनीकरणासाठी मोठ्या प्रमाणावर गुंतवणुकीची आवश्यकता निर्माण झाली आहे. या निधीची गरज भागवण्यासाठी रेल्वे मंत्रालयाने सर्व भागधारक राज्यांना त्यांच्या समभागांच्या प्रमाणात भांडवली खर्चात योगदान देण्यास किंवा मंत्रालयाच्या बाजूने आपली इक्विटी सोडून देण्यास सांगितले होते.

यावर प्रतिक्रिया देताना केवळ गोवा सरकारने आपला हिस्सा रेल्वे मंत्रालयाला हस्तांतरित करण्यास मंजुरी दिली आहे. दुसरीकडे, महाराष्ट्र सरकारने आपल्या शेअर कॅपिटल योगदानाच्या परताव्याची मागणी केली आहे, तर कर्नाटक सरकारने बाहेर पडण्यासाठी विविध पर्याय मागितले आहेत.

​कोकण रेल्वेचे भारतीय रेल्वेमध्ये विलीनीकरण किंवा एकत्रीकरण होण्यासाठी ही संस्था पूर्णपणे (शंभर टक्के) केंद्र सरकारच्या मालकीची असणे आवश्यक आहे. सहभागी राज्य सरकारांनी त्यांचा हिस्सा सोडून दिल्यानंतर किंवा हस्तांतरित केल्यानंतरच ही प्रक्रिया पुढे जाऊ शकते. ही सर्व प्रक्रिया कॉर्पोरेशनच्या सर्व दायित्त्वांची पूर्तता होईपर्यंत वैध असणाऱ्या ‘शेअरहोल्डर करारानुसार’ आणि आवश्यक कॉर्पोरेट, कायदेशीर व प्रशासकीय मंजुऱ्यांच्या अधीन राहून पार पाडावी लागेल.

​दरम्यान, कोकण रेल्वेच्या अधिकारक्षेत्रातील ७३९ किलोमीटर मार्गापैकी रोहा-वीर आणि मडगाव-माजोर्डा विभागातील सुमारे ५५ किलोमीटरचे दुहेरीकरण पूर्ण झाले आहे. तसेच, मार्गाची क्षमता वाढवण्यासाठी चिन्हांकित केलेल्या २६३ किलोमीटर लांबीच्या टप्प्यांवर दुहेरीकरणासाठी व्यवहार्यता सर्वेक्षण करण्याचे काम मंजूर करण्यात आले आहे. KRCL च्या तिसऱ्या आर्थिक पुनर्रचनेमध्ये (Third Financial Restructuring) सुरक्षेशी संबंधित कॅपेक्स कामे, क्षमता वाढवणे, मालमत्ता बदलणे आणि प्रवासी सुविधांचा समावेश करण्यात आला आहे.

   Follow us on   

मालवण तालुक्यातील कुंभारमाठ येथील रहिवासी असलेले शैलेश शिवाजी कांबळे हे सहलीसाठी भूतानला गेले होते. तिथे असताना एका पुलावरून दुचाकीवरून जात असताना त्यांचा दुर्दैवी अपघात झाला आणि ते थेट खालील नदीच्या पात्रात पडले. या घटनेत त्यांचा मृत्यू झाल्याची हृदयद्रावक माहिती समोर आली आहे.

​मिळालेल्या माहितीनुसार, शैलेश हे व्यवसायाने संगणक अभियंता होते. ते १ जुलै रोजी भूतानला सहलीसाठी रवाना झाले होते. त्यांचा दौरा ६ जुलैपर्यंत निश्चित होता, परंतु त्यांनी तिथे मुक्काम वाढवून ११ जुलैपर्यंत पर्यटन करण्याचा निर्णय घेतला होता. ११ जुलै रोजी सकाळी ते परत येणार होते, मात्र त्याच दिवशी हा काळा दिवस उजाडला.

​अपघाताची बातमी समजताच कांबळे कुटुंबावर दुःखाचा डोंगर कोसळला. त्यांच्या मुलाचा तातडीने शोध घेण्यासाठी कुटुंबीयांनी प्रशासनाकडे पाठपुरावा केला आणि भारतीय दूतावासाकडे मदतीची याचना केली. यानंतर शैलेश यांचे वडील आणि काही नातेवाईक तातडीने भूतानला पोहोचले, जिथे स्थानिक पोलीस प्रशासनाने शोधमोहीम राबवली.

​अनेक दिवसांच्या अथक प्रयत्नानंतर शैलेश यांचा मृतदेह सापडला. आवश्यक ती कायदेशीर प्रक्रिया आणि ओळख पटवल्यानंतर भूतान प्रशासनाने मृतदेह त्यांच्या नातेवाईकांच्या ताब्यात दिला. १० ऑगस्ट रोजी शैलेश यांच्यावर भूतानमध्येच शोकसागरात अंत्यसंस्कार करण्यात आले.

​ऐन तारुण्यात शैलेशचा अशा प्रकारे दुर्दैवी अंत झाल्याने कुंभारमाठ परिसर आणि संपूर्ण मालवण शहरात मोठी हळहळ व्यक्त केली जात आहे. त्यांच्या जाण्याने कुटुंबाची कधीही भरून न येणारी हानी झाली आहे.

   Follow us on   

नवी दिल्ली: राजधानी दिल्लीमध्ये नुकताच बारामती लोकसभा मतदारसंघाच्या खासदार सुप्रिया सुळे यांच्या कन्या रेवती सुळे आणि जावई सारंग लखाणी यांचा विवाह रिसोप्शन सोहळा मोठ्या दिमाखात पार पडला. या उच्च-स्तरीय सोहळ्यामध्ये देश-विदेशातील आणि विविध क्षेत्रातील अनेक दिग्गज आणि मोठे राजकीय नेते उपस्थित राहिल्याचे पाहायला मिळाले.

​या भव्य कार्यक्रमाला सत्ताधारी आणि विरोधक असे दोन्ही बाजूंचे नेते एकाच छताखाली एकत्र आल्याचे दिसून आले. यामध्ये विशेष करून पंतप्रधान नरेंद्र मोदी, गृहमंत्री अमित शाह, विरोधी पक्षनेते राहुल गांधी आणि खासदार प्रियांका वाड्रा यांसारख्या प्रमुख नेत्यांची उपस्थिती लक्षवेधी ठरली.

​याच शानदार सोहळ्यातील एक व्हिडिओ सध्या सोशल मीडियावर तुफान व्हायरल होत असून, यामध्ये कोकणातील एक तरुण थेट देशाचे पंतप्रधान नरेंद्र मोदी यांच्याशी संवाद साधताना दिसत आहे. ‘फणसाचा राजा’ म्हणून ओळखल्या जाणाऱ्या या तरुणने उपस्थितांचे लक्ष वेधून घेतले असून त्याची सर्वत्र चर्चा होत आहे.

​व्हिडिओमध्ये झळकणारा हा तरुण कोकणातील रत्नागिरी जिल्ह्यातील लांजा तालुक्यातील झोपडे गावचा रहिवासी असून त्याचे नाव मिथिलेश देसाई आहे. त्यांना ‘फणस किंग’ म्हणूनही ओळखले जाते आणि त्यांनी रत्नागिरीमध्ये खास फणसाची एक वेगळी बाग तयार केली आहे.

​मिथिलेश देसाई यांनी आपल्या शैक्षणिक पार्श्वभूमीबद्दल बोलायचे तर, त्यांनी राहूरी कृषी विद्यापीठातून BTech ॲग्रिकल्चरल इंजिनिअरिंग या विषयात पदवी प्राप्त केली आहे. दिल्लीच्या या खास सोहळ्यात त्यांनी पंतप्रधान नरेंद्र मोदी यांची भेट घेऊन आपल्या फणसाच्या कार्याविषयी आणि प्रकल्पाविषयी थेट पंतप्रधानांना सविस्तर माहिती दिली.