मुंबई: मुंबईकरांसाठी आणि कोकणात जाणाऱ्या पर्यटकांसाठी एक दिलासादायक बातमी आहे. मुंबई ते सिंधुदुर्ग हे अंतर आता केवळ ५ तासांत पार करणे शक्य होणार आहे. रस्ते मार्गे या प्रवासासाठी साधारण १० ते १२ तास लागतात, मात्र एप्रिल २०२६ पासून सुरू होणाऱ्या ‘रो-रो फेरी’ (Ro-Ro Ferry) सेवेमुळे प्रवाशांचा वेळ निम्म्याने वाचणार आहे. ही सेवा थेट मुंबई ते विजयदुर्ग दरम्यान चालवली जाणार असून, यामुळे कोकणच्या किनारपट्टीवरील पर्यटनाला मोठी चालना मिळण्याची शक्यता आहे.
या रो-रो सेवेचे सर्वात मोठे वैशिष्ट्य म्हणजे प्रवाशांना त्यांच्या स्वतःच्या चारचाकी आणि दुचाकी वाहनांसह प्रवास करता येणार आहे. यामुळे प्रवाशांना कोकणात पोहोचल्यावर स्वतःच्या गाडीने फिरणे सोपे जाईल. या जहाजांमध्ये प्रवाशांच्या आरामासाठी वातानुकूलित व्यवस्था, कॅफेटेरिया आणि विस्तीर्ण डेकची सुविधा असणार आहे, ज्यामुळे प्रवासाचा आनंद द्विगुणित होईल.
तिकीट दरांबाबत बोलायचे झाले तर, अद्याप अधिकृत दरपत्रक जाहीर झाले नसले तरी प्राथमिक माहितीनुसार, एका प्रवाशासाठी साधारण ८०० ते १,२०० रुपयांपर्यंत तिकीट असू शकते. वाहनांसाठीचे शुल्क त्यांच्या आकारानुसार वेगळे आकारले जाईल; ज्यामध्ये दुचाकीसाठी ५०० ते ८०० रुपये आणि चारचाकी गाड्यांसाठी २,५०० ते ४,००० रुपयांपर्यंत खर्च अपेक्षित आहे. लांबचा प्रवास आणि इंधनाचा खर्च विचारात घेता, ही सेवा सर्वसामान्यांसाठी फायदेशीर ठरेल असा अंदाज आहे.
