Follow us on        

कुडाळ: कुडाळ तालुक्यातील पिंगुळी गुढीपूर येथील  २१ प्रवासी अक्कलकोट येथे स्वामी समर्थांच्या दर्शनासाठी जात असताना आकेरी येथे त्यांच्या धावत्या गाडीवर अचानक एक मोठे आकाशिचे झाड कोसळल्याची भीषण दुर्घटना घडली. या अपघातात गाडीचे मोठे नुकसान झाले असले, तरी स्वामी समर्थांच्या कृपेने सर्व २१ प्रवासी सुदैवाने बालंबाल बचावले आहेत. या घटनेत गाडीचा चालक आणि अन्य एक जण किरकोळ जखमी झाले आहेत.

नेमकी घटना काय?

मिळालेल्या माहितीनुसार, कुडाळ गुढीपूर येथील रहिवासी राजेश सिंगनाथ आणि त्यांच्या कुटुंबातील सदस्य (एकूण २१ प्रवासी) ‘टेम्पो ट्रॅव्हलर’ (क्र. MH 48 K 1171) या गाडीने अक्कलकोट स्वामी समर्थांच्या दर्शनासाठी निघाले होते. ही गाडी सावंतवाडीजवळील आकेरी येथे पोहोचली असता, रस्त्याच्या कडेला असलेले एक मोठे आकाशिचे झाड अचानक चालत्या गाडीवर कोसळले.

झाड थेट गाडीवर पडल्याने वाहनाचा पुढचा भाग पूर्णपणे चेपला गेला आणि मोठे नुकसान झाले. मात्र, गाडीतील सर्व प्रवासी सुखरूप असून कोणालाही गंभीर दुखापत झालेली नाही. अपघात घडताच स्थानिक प्रशासन, पोलीस आणि रुग्णवाहिकेला पाचारण करण्यात आले. किरकोळ जखमी झालेल्या चालकाला तातडीने उपचारासाठी सावंतवाडी येथील रुग्णालयात दाखल करण्यात आले आहे.

स्थानिक ग्रामस्थांची समयसूचकता

अपघाताचा भीषण आवाज ऐकताच आकेरी येथील स्थानिक ग्रामस्थांनी तातडीने घटनास्थळाकडे धाव घेतली. त्यांनी कटरच्या साहाय्याने रस्त्यावर आणि गाडीवर पडलेले झाड वेगाने कापून बाजूला केले आणि वाहतुकीसाठी रस्ता मोकळा केला. ग्रामस्थांनी दाखवलेल्या या समयसूचकतेचे आणि मदतीचे सर्वत्र कौतुक होत आहे.

वणव्यांमुळे झाडे होताहेत पोकळ

पावसाळा सुरू होण्यापूर्वी ग्रामीण आणि डोंगरभागात मोठ्या प्रमाणावर वणवे पेटवले जातात. या वणव्यांच्या आगीमुळे रस्त्याशेजारील अनेक झाडे मुळापासून जळतात आणि आतून पोकळ होतात. वरून हिरवीगार दिसणारी ही झाडे आतून कमकुवत झालेली असतात, ज्यामुळे मे महिन्यातील वादळी वाऱ्यात ती अचानक उन्मळून पडतात. आजचा अपघातही अशाच एका जळालेल्या झाडामुळे घडल्याचे समोर आले आहे.

हे वणवे प्रवाशांच्या जीवावर बेतू लागल्याने त्यावर वेळीच नियंत्रण मिळवणे गरजेचे झाले आहे. या अपघातात मोठी जीवितहानी टळली असली, तरी वन विभाग आणि सार्वजनिक बांधकाम विभागाने रस्त्याशेजारील अशी धोकादायक व जळालेली झाडे तातडीने हटवावीत, अशी मागणी आता नागरिक आणि प्रवाशांमधून केली जात आहे.

   Follow us on   

मुंबई, २७ मे २०२६: महाराष्ट्र सरकारने मंगळवारी (२६ मे) मंत्रिमंडळ बैठकीत सावंतवाडी रोड रेल्वे स्थानकाचे नाव बदलून ‘लोकमान्य मधु दंडवते रेल्वे टर्मिनस’ करण्यास मंजुरी दिली. हा निर्णय कोकण रेल्वेच्या शिल्पकार आणि ज्येष्ठ समाजवादी नेते स्वर्गीय मधु दंडवते यांच्या सन्मानार्थ घेण्यात आला असून, तो कोकणवासीयांच्या दीर्घकाळाच्या मागणीचा परिपाक मानला जात आहे. मात्र, या निर्णयाने काहींमध्ये ऐतिहासिक ओळख हरवण्याची भीतीही निर्माण झाली आहे.

मुख्यमंत्री देवेंद्र फडणवीस यांच्या अध्यक्षतेखाली झालेल्या बैठकीत हा प्रस्ताव मंजूर झाला. आता हा प्रस्ताव केंद्र सरकारच्या (रेल्वे आणि गृह मंत्रालय) अंतिम मंजुरीसाठी पाठवण्यात येणार आहे. मंजुरी मिळाल्यानंतर सावंतवाडी रोड हे नाव अधिकृतपणे बदलले जाईल.

या निर्णयाचे कोकणात मोठ्या प्रमाणात स्वागत झाले आहे. कोकण रेल्वे प्रवासी संघटना, स्थानिक नेते आणि सामान्य जनतेकडून आनंद व्यक्त करण्यात येत आहे.

“कोकण रेल्वेचे स्वप्न साकार करणाऱ्या मधु दंडवते यांना योग्य सन्मान मिळाला,” अशी प्रतिक्रिया अनेकांनी दिली.

स्थानिक लोकप्रतिनिधी आणि संघटनांनी सांगितले की, ही मागणी अनेक वर्षांपासून प्रलंबित होती. “कोकणवासीयांच्या हृदयातील नेत्याला त्यांच्या योगदानानुसार गौरव मिळाला,” असे मत व्यक्त होत आहे.

सोशल मीडियावर अनेकांनी “ऐतिहासिक निर्णय”, “अभिमानाची बाब” आणि “पुढील पिढ्यांसाठी प्रेरणा” असे शब्द वापरले.

मधु दंडवते यांनी कोकण रेल्वे प्रकल्पासाठी केंद्रीय रेल्वे मंत्री म्हणून महत्त्वपूर्ण भूमिका बजावली होती. त्यामुळे हा निर्णय त्यांच्या वारशाचा सन्मान मानला जातो.

काही आक्षेप: “सावंतवाडी नाव जपावे”

जरी सकारात्मक प्रतिसाद प्रबळ असला तरी, काही लोकांनी नकारात्मक प्रतिक्रिया व्यक्त केल्या आहेत. हे मुख्यतः सोशल मीडियावर दिसले:

“सावंतवाडी हे नाव शतकानुशतके जुने आणि स्थानिक इतिहास, संस्कृतीशी जोडलेले आहे. त्यामुळे मूळ नाव बदलल्याने स्थानिक ओळख हरपेल,” असा आक्षेप काहींनी नोंदवला.

काहींना वाटते की मधु दंडवते यांचा जास्त संबंध राजापूरशी होता, त्यामुळे त्या स्टेशनला नाव देणे अधिक योग्य ठरले असते.

“नेत्यांचा आदर दुसऱ्या माध्यमातून करावा, पण रेल्वे स्थानकाचे मूळ नाव कायम ठेवावे,” असे मतही व्यक्त झाले.

मात्र, हे आक्षेप व्यक्तिगत पातळीवर आहेत आणि मोठ्या संघटना किंवा मुख्य माध्यमांमध्ये तीव्र विरोध दिसला नाही.

सरकारने स्पष्ट केले की, हा निर्णय कोकणातील जनभावनांचा आदर करणारा आहे. प्रस्ताव केंद्राकडे पाठवण्यात येत असल्याने लवकरच अंतिम निर्णय अपेक्षित आहे.

सावंतवाडी रेल्वे स्थानक कोकण रेल्वेवरील महत्त्वाचे स्टेशन आहे. नामकरणानंतर प्रवाशांना नव्या नावाची सवय होण्यास काही काळ लागेल, असे प्रवासी म्हणतात. हा निर्णय कोकण रेल्वेच्या विकासात एक नवा अध्याय ठरू शकतो.

   Follow us on   

ओटवणे (प्रतिनिधी): येथील देऊळवाडीमध्ये भिवसेन गावकर यांच्या घरासमोरील जागेत अज्ञात शिवप्रेमींनी रविवारी मध्यरात्रीच्या सुमारास छत्रपती शिवाजी महाराजांचा पुतळा रातोरात उभारल्याची घटना समोर आली आहे. पहाटे ही बाब ग्रामस्थांच्या लक्षात येताच आश्चर्य व्यक्त होत असतानाच गावात उत्साहाचे वातावरण निर्माण झाले. मनात असलेली इच्छा अज्ञात शिवप्रेमींनी प्रत्यक्षात उतरवली, अशा भावना ग्रामस्थांनी व्यक्त केल्या. ही बातमी वाऱ्यासारखी संपूर्ण गावात पसरताच पुतळ्याचे दर्शन घेण्यासाठी ग्रामस्थांनी मोठी गर्दी केली. आराध्य दैवत असलेल्या छत्रपती शिवाजी महाराजांचा मनमोहक पुतळा पाहून अनेक जण नतमस्तक झाले आणि राजांनी मानाचा मुजरा अर्पण केला.

​दरम्यान, पुतळा उभारल्याची माहिती पोलीस प्रशासनालाही मिळाल्यानंतर नियमानुसार चौकशी करण्यात आली. मात्र, हा पुतळा नेमका कोणी उभारला याचा उलगाडा होऊ शकला नाही. तरीही स्थानिक युवकांनी अज्ञात शिवप्रेमींच्या या कार्याबद्दल कृतज्ञता व्यक्त करत पुतळ्याची पुढील जबाबदारी स्वीकारण्याची ग्वाही पोलीस प्रशासनाला दिली आहे. ओटवणे येथील रावळनाथ विद्यामंदिर येथे छत्रपती शिवाजी महाराजांचा पूर्णाकृती पुतळा पूर्वीपासून असला तरी सार्वजनिक ठिकाणीही पुतळा असावा, ही स्थानिकांची इच्छा होती. देऊळवाडीत नव्याने पूर्णाकृती पुतळा उभारण्यात आल्याने शिवप्रेमींमध्ये समाधान आणि उत्साहाचे वातावरण निर्माण झाले आहे.

​या पुतळ्याचे दर्शन घेण्यासाठी अनेक शिवभक्तांनी गर्दी केली. पुतळ्याचे पवित्र्य जपण्याबरोबरच त्याची संपूर्ण जबाबदारी वाडीतील युवकांनी स्वीकारली असून, ही जबाबदारी सर्व ओटवणेकरांची असल्याची भावना व्यक्त होत आहे. एका रात्रीत उभारलेल्या या पुतळ्याची ओटवणे दशक्रोशी परिसरात जोरदार चर्चा सुरू आहे. पुढील काळात येथे शिवजयंतीसह विविध कार्यक्रम जल्लोषात साजरे करण्यात येणार असल्याने शिवप्रेमींमध्ये आनंदाचे वातावरण निर्माण झाले आहे.

   Follow us on   

सावंतवाडी: कोकण रेल्वेचे शिल्पकार आणि ज्येष्ठ नेते प्रा. मधु दंडवते यांचे नाव सावंतवाडी रेल्वे टर्मिनसला देण्याच्या प्रस्तावाला राज्य सरकारच्या कॅबिनेट बैठकीत अधिकृत मंजुरी देण्यात आली आहे. या टर्मिनसचे नाव आता “लोकमान्य मधु दंडवते रेल्वे टर्मिनस” असे होणार असून, राज्य सरकारकडून हा प्रस्ताव अंतिम मंजुरीसाठी केंद्र सरकारकडे पाठवला जाणार आहे. कोकणातील जनतेची आणि रेल्वे प्रवासी संघटनेची ही अनेक वर्षांची मागणी अखेर मार्गी लागल्याने सावंतवाडीत प्रचंड आनंदोत्सव साजरा करण्यात आला. या ऐतिहासिक निर्णयाचे वृत्त समजताच सावंतवाडी कोकण रेल्वे प्रवासी संघटनेच्या वतीने शहरात व रेल्वे स्थानकावर पेढे वाटून आनंद व्यक्त करण्यात आला, तर सावंतवाडी येथील ऐतिहासिक गांधी चौक येथे फटाक्यांची आतिषबाजी करून या निर्णयाचे जोरदार स्वागत करण्यात आले.

​हा ऐतिहासिक निर्णय मिळवून देण्यासाठी ‘कोकण रेल्वे प्रवासी संघटना, सावंतवाडी’च्या वतीने गेल्या अनेक महिन्यांपासून सातत्याने रस्त्यावरील आंदोलनापासून ते मंत्रालयापर्यंत मोठा संघर्ष केला गेला. संघटनेने जानेवारी २०२४ मध्ये स्थानक नामकरण व टर्मिनसच्या रखडलेल्या कामासाठी २६ जानेवारी रोजी बेमुदत उपोषणाचा इशारा दिला होता. या इशाऱ्याची दखल घेत सावंतवाडीच्या उपविभागीय अधिकाऱ्यांनी कोकण रेल्वे प्रशासनाला तातडीने पत्र पाठवले होते. त्यानंतर २३ ऑगस्ट २०२४ रोजी रेल्वे प्रशासनाने हा विषय राज्य शासनाचा असल्याचे स्पष्ट केल्यावर संघटनेने आपला मोर्चा राज्य सरकारकडे वळवला. आमदार दीपक केसरकर यांच्या पाठपुराव्यामुळे ४ सप्टेंबर २०२४ रोजी मंत्रालयात या विषयावर उच्चस्तरीय बैठक झाली, ज्यामध्ये संघटनेच्या वतीने सागर तळवडेकर, मिहिर मठकर आणि भूषण बांदिवडेकर यांनी प्रवाशांची बाजू भक्कमपणे मांडली.

​या संपूर्ण लढ्यात लोकप्रतिनिधींचा आणि विविध शासकीय स्तरावरील बैठकांचा मोठा वाटा राहिला. मागील आठवड्यात १८ मे रोजी संघटनेच्या मुंबई विभागाचे अध्यक्ष विनोद नाईक यांनी मंत्रालयात जाऊन पालकमंत्री नितेश राणे यांची भेट घेतली होती, ज्यावर त्यांनी अवघ्या चार दिवसांत सकारात्मक निर्णय मिळवून दिला. तसेच माजी मंत्री तथा आमदार दीपक केसरकर यांनी रेल्वेमंत्री अश्विनी वैष्णव यांची भेट घेऊन निवेदन दिले होते. याशिवाय माजी पालकमंत्री रवींद्र चव्हाण यांनीही विधानसभा निवडणुकीनंतर या विषयाकडे गांभीर्याने लक्ष देण्याचे आश्वासन दिले होते. हा लढा केवळ कागदपत्रांपुरता मर्यादित न ठेवता संघटनेने एक्स (Twitter), फेसबुक आणि इन्स्टाग्राम यांसारख्या सोशल मीडियावर ‘ई-मेल आणि तक्रार मोहीम’ राबवून डिजिटल जनआंदोलन उभे केले, ज्यामुळे सरकारला याची दखल घेणे भाग पडले.

​हे यश कोणा एकाचे नसून सर्वांच्या एकीचे फळ असल्याचे सांगत संघटनेचे उपाध्यक्ष सागर तळवडेकर यांनी ‘कोकण विकास समिती’चे जयवंत दरेकर, अक्षय महापदी तसेच ‘कोकण रेल्वे प्रवासी सेवा संघ’ व ‘जनजागृती सेवा संस्था’ यांचे विशेष आभार मानले. त्याचप्रमाणे मुख्यमंत्री देवेंद्र फडणवीस, उपमुख्यमंत्री एकनाथ शिंदे, सुनेत्रा पवार, केंद्रीय मंत्री नारायण राणे, पालकमंत्री नितेश राणे, आमदार दीपक केसरकर, रवींद्र चव्हाण यांच्यासह सर्वपक्षीय खासदार, आमदार आणि पत्रकार बांधवांचे मनःपूर्वक आभार मानण्यात आले. प्रा. मधु दंडवते साहेबांचे नाव स्थानकाला मिळाल्याने सावंतवाडीच्या शिरपेचात मानाचा तुरा खोवला गेला असून, आगामी काळात सावंतवाडी टर्मिनसचे रखडलेले काम पूर्ण करणे, नवीन कामे समाविष्ट करणे आणि कोरोना काळात बंद झालेले थांबे व गाड्या पूर्ववत करण्यासाठी संघटना आपला लढा अविरत सुरू ठेवणार असल्याचा ठाम निर्धार व्यक्त करण्यात आला आहे.

   Follow us on   

सावंतवाडी:झाराप-कामळेवीर परिसरात भीतीचे वातावरण निर्माण करणारी तब्बल सहा ते सात फूट लांबीची मगर अखेर “वाइल्ड लाइफ रेस्क्यूअर सिंधुदुर्ग” संस्थेच्या धाडसी टीमने मध्यरात्रीच्या थरारक मोहिमेत पकडून वनविभागाच्या ताब्यात दिली आहे. ही घटना नितीन मांजरेकर यांच्या घराजवळ घडली असून, रात्री सुमारे १२.३० वाजण्याच्या सुमारास मगर दिसल्याने संपूर्ण परिसरात मोठी धावपळ उडाली होती.

​मगरीच्या हालचालींची माहिती मिळताच “वाइल्ड लाइफ रेस्क्यूअर सिंधुदुर्ग” संस्थेची टीम तातडीने घटनास्थळी दाखल झाली. ग्रामस्थांच्या मदतीने अत्यंत सावधगिरीने आणि शिताफीने रेस्क्यू ऑपरेशन राबविण्यात आले. अखेर काही तासांच्या प्रयत्नांनंतर मगरीला सुरक्षितरित्या पकडण्यात यश आले. ही मोहीम सावंतवाडीचे ACF वैभव बोराटे तसेच मठ वनपरिक्षेत्र अधिकारी सावळा कामळी यांच्या मार्गदर्शनाखाली पार पडली. पकडलेली मगर पुढील कार्यवाहीसाठी आकेरी वनविभागाच्या ताब्यात देण्यात आली आहे.

​रेस्क्यू टीम आणि ग्रामस्थांचे सहकार्य

​या धाडसी मोहिमेत संस्थेचे अध्यक्ष विष्णू मस्के, डॉ. प्रसाद धुमकर, दीपक दुतोडकर, सिद्धेश ठाकूर, प्रसन्न गंगावणे आणि मंदार गावडे यांनी सक्रिय सहभाग घेतला. तसेच नितीन मांजरेकर, शिरिधर मांजरेकर, केशव होडावडेकर, संतोष पेडणेकर, शुभम पेडणेकर, प्रमोद सावळ आदि ग्रामस्थांनीही मोलाची मदत केली. या संपूर्ण रेस्क्यू ऑपरेशनची परिसरात मोठी चर्चा सुरू असून, नागरिकांनी संस्थेच्या कार्याचे कौतुक केले आहे.

​नागरिकांना आवाहन:

दरम्यान, संस्थेचे अध्यक्ष विष्णू मस्के यांनी नागरिकांना आवाहन करताना सांगितले की, “मगर किंवा अन्य वन्यजीव परिसरात आढळल्यास घाबरून न जाता स्वतःहून कोणतीही धोकादायक कृती करू नये. तात्काळ संस्थेच्या हेल्पलाईन क्रमांक 9545436244 किंवा वनविभागाच्या 1926 या क्रमांकावर संपर्क साधावा.”

   Follow us on   

सिंधुदुर्ग: मुंबई-गोवा राष्ट्रीय महामार्गावरून प्रवास करणाऱ्या पर्यटकांची आणि ग्राहकांची ‘देवगड हापूस’च्या नावाखाली होणारी मोठी फसवणूक उघडकीस आली आहे. कणकवली तालुक्यातील ओसरगाव टोलनाक्याजवळ काही विक्रेते महामार्गाच्या कडेला स्टॉल लावून कर्नाटकवरून आणलेला आंबा अस्सल देवगड हापूस सांगून विकत होते. विशेष म्हणजे ग्राहकांचा विश्वास संपादन करण्यासाठी देवगड हापूसचे ब्रँडिंग असलेल्या पेट्यांचा वापर केला जात होता. मात्र, शनिवार २३ मे रोजी संध्याकाळच्या सुमारास स्थानिक आंबा बागायतदार आणि जागरूक नागरिकांनी या स्टॉलवर अचानक धाड टाकत या काळ्या धंद्याचा पर्दाफाश केला.

​संशयावरून नागरिकांनी जेव्हा आंब्याच्या बॉक्सची बारकाईने पाहणी केली, तेव्हा त्यामध्ये खाली कर्नाटक (कन्नड) भाषेतील वृत्तपत्रांचे रद्दी कागद अंथरल्याचे उघड झाले. तसेच त्यातील आंबे हे हापूस नसून परराज्यातील असल्याचे स्पष्ट झाले. या लबाडीमुळे संतापलेल्या स्थानिक नागरिकांनी संबंधित विक्रेत्याला चांगलाच जाब विचारला. हा राडा पाहून महामार्गावरील इतर स्टॉलधारकांनीही कारवाईच्या भीतीने आपले आंबे घाईघाईने टेम्पोमध्ये भरून तिथून पळ काढला.

​सध्या कोकणातील आंबा उत्पादक शेतकरी आधीच विविध नैसर्गिक व आर्थिक अडचणींचा सामना करत आहे. त्यातच अशा प्रकारे परराज्यातील स्वस्त आंबे देवगडच्या नावावर खपवले जात असल्याच्या तक्रारी देवगड आंबा-काजू बागायतदार संघटनेकडे सातत्याने येत होत्या. या बनावटगिरीमुळे मूळ देवगड हापूसच्या बाजारपेठेचे आणि नावाचे मोठे नुकसान होत असून, स्थानिक शेतकऱ्यांना याचा मोठा आर्थिक फटका बसत असल्याची चिंता यावेळी बागायतदारांनी व्यक्त केली.

Photo Credit – Google