मुंबई: कोकण रेल्वेचे शिल्पकार आणि ज्येष्ठ नेते स्व. मधु दंडवते यांच्या ऐतिहासिक योगदानाचा गौरव करत सावंतवाडी रेल्वे स्थानकाला त्यांचे नाव देण्याचा महत्त्वपूर्ण निर्णय आज झालेल्या राज्य मंत्रिमंडळाच्या बैठकीत घेण्यात आला. सावंतवाडी रेल्वे स्थानकाचे नाव आता ‘लोकमान्य मधु दंडवते रेल्वे टर्मिनस’ असे करण्यास मंत्रिमंडळाने अधिकृत मंजुरी दिली असून, याबाबतचा अंतिम प्रस्ताव केंद्र शासनाकडे पाठविण्यात येणार असल्याची माहिती परिवहन विभागाने दिली आहे. या निर्णयामुळे कोकणातील जनतेची आणि विविध प्रवासी संघटनांची अनेक वर्षांची प्रलंबित मागणी अखेर मार्गी लागली आहे. यासाठी  कोकण विकास समिती, कोकण रेल्वे प्रवासी संघटना सावंतवाडी, कोकण रेल्वे प्रवासी सेवा संघ आदी संघटनांनी प्रयत्न केले होते.

स्व. मधु दंडवते साहेबांचे नाव सावंतवाडी रेल्वे टर्मिनसला देण्यात यावे, यासाठी कोकण विकास समितीने विशेष प्रयत्न केले होते. समिती मार्च २०२१ पासून सातत्याने पाठपुरावा करत होती. सुरुवातीला कोकण रेल्वे प्रशासनाने हे प्रकरण राज्य शासनाच्या अखत्यारीत येत असल्याचे स्पष्ट केल्यावर, समितीने जून २०२३ मध्ये मुख्यमंत्री महोदयांकडे सविस्तर प्रस्ताव सादर केला. त्यानंतर हा प्रस्ताव परिवहन विभाग, सिंधुदुर्ग जिल्हाधिकारी, सावंतवाडी पंचायत समिती आणि मळगाव ग्रामपंचायत अशा प्रशासकीय स्तरातून सकारात्मक अहवालांसह पुढे सरकला. या संपूर्ण प्रक्रियेत स्थानिक लोकप्रतिनिधी, अधिकारी आणि कोकण रेल्वे प्रवासी संघटनांनी महत्त्वाची भूमिका बजावली.

अखेर आज, २६ मे २०२६ रोजी झालेल्या मंत्रिमंडळ बैठकीत मुख्यमंत्री आणि त्यांच्या सहकारी मंत्र्यांनी या नामकरणाच्या प्रस्तावावर मंजुरीची मोहोर उमटवली. कोकणाच्या आर्थिक आणि सामाजिक विकासात मैलाचा दगड ठरलेल्या कोकण रेल्वेसाठी स्व. मधु दंडवते यांनी दिलेले अमूल्य योगदान अतुलनीय आहे. अखंड कोकणवासीयांच्या मनातील भावनांचा आदर करत राज्य सरकारने घेतलेला हा निर्णय आणि कोकण विकास समितीचा यशस्वी पाठपुरावा, ही संपूर्ण कोकणसाठी अत्यंत अभिमानाची बाब ठरली आहे.

Facebook Comments Box