दादर रेल्वे स्थानकाच्या नामकरणावरून वाद; स्थानिकांचा विचार न घेतल्याचा मनसेचा आरोप

   Follow us on        

मुंबईतील मध्यवर्ती आणि वर्दळीच्या दादर रेल्वे स्थानकाचे नाव ‘चैत्यभूमी’ करण्याच्या मुद्द्यावरून राजकीय वातावरण तापले आहे. आगामी विधिमंडळ अधिवेशनात या नामकरणाची प्रक्रिया पूर्ण करण्याचे आश्वासन मुख्यमंत्री देवेंद्र फडणवीस यांनी १८ नोव्हेंबर रोजी दिल्यानंतर नव्या वादाला तोंड फुटले आहे. या निर्णयाविरोधात महाराष्ट्र नवनिर्माण सेनेचे प्रभाग क्रमांक १९२ चे नगरसेवक यशवंत किल्लेदार यांनी आक्रमक पवित्रा घेत जोरदार विरोध दर्शवला आहे.

​यशवंत किल्लेदार यांनी ‘एक्स’वर पोस्ट करत स्थानिक दादरकरांना विश्वासात न घेताच हा निर्णय पुढे रेटला जात असल्याचा आरोप केला आहे. बाहेरच्या घटकांची मागणी स्थानिक रहिवाशांवर लादून दादरकरांची ओळख पुसण्याचा प्रयत्न सुरू असल्याचा दावा त्यांनी आपल्या पोस्टमधून केला आहे. यापूर्वीही जेव्हा हा विषय समोर आला होता, तेव्हा स्थानिकांनी त्याला विरोध केल्याची बाब त्यांनी अधोरेखित करत सरकारने मनमानी कारभार करू नये, असे आवाहन केले आहे.

​रेल्वे स्थानकाच्या नामकरणाचा विषय महापालिकेच्या कक्षेत येत नसून तो केंद्र सरकारच्या रेल्वे विभागाच्या अखत्यारीत येतो, याकडे किल्लेदार यांनी लक्ष वेधले आहे. नागरिकांची पसंती आणि नापसंती लक्षात घेऊनच सरकारांनी निर्णय घ्यायला हवेत, असे मत मांडत या निर्णयाबाबत दादरकरांची मते जाणून घेणे आवश्यक असल्याचे त्यांनी म्हटले आहे. दादरकरांच्या भावना पत्राद्वारे थेट पंतप्रधान आणि रेल्वे मंत्र्यांपर्यंत पोहोचवणार असल्याचेही त्यांनी स्पष्ट केले आहे.

​दादर रेल्वे स्थानकाची सुरुवात १८५३ मध्ये झाली असून पूर्वी या स्थानकाला ‘माहिम रोड’ म्हणून ओळखले जात होते, असे सांगितले जाते. मध्य आणि पश्चिम रेल्वे मार्गाला जोडणारे हे मुंबईतील अत्यंत महत्त्वाचे स्थानक आहे. ब्रिटिश काळात शहराचा विस्तार आणि वाढत्या प्रवासी संख्येचा विचार करून या स्थानकाचा विकास करण्यात आला होता.

​सध्या दादर रेल्वे स्थानकावर १४ फलाट असून ते मुंबईच्या उपनगरीय रेल्वे वाहतुकीचे प्रमुख केंद्र मानले जाते. दररोज लाखो प्रवासी येथून ये-जा करत असल्याने या स्थानकाच्या नामकरणाच्या निर्णयाकडे सर्वांचे लक्ष लागले आहे. एकीकडे राज्य सरकारकडून नामकरणाची प्रक्रिया पुढे नेण्याची तयारी सुरू असताना, दुसरीकडे स्थानिकांच्या भूमिकेवरून मनसेने दिलेल्या आव्हानामुळे हा मुद्दा अधिकच संवेदनशील बनला आहे.

Facebook Comments Box
   

Leave a Reply

Your email address will not be published. Required fields are marked *

Content Protected! Please Share it instead.  

Home
Kokan Blog
Downloads
Search