मुंबई: अटल सेतू (एमटीएचएल) ते मुंबई-पुणे द्रुतगती महामार्गाला जोडणाऱ्या महत्त्वाकांक्षी प्रकल्पाचे ६७ टक्के भौतिक काम यशस्वीरीत्या पूर्ण झाले आहे. मुंबई महानगर प्रदेश विकास प्राधिकरणाकडून (एमएमआरडीए) वेगाने सुरू असलेल्या या प्रकल्पामुळे मुंबई आणि पुणे दरम्यानचा प्रवास अधिक जलद आणि सुखकर होणार आहे.
या प्रकल्पांतर्गत चिर्ले आणि पळस्पे परिसरातून जाणारी ७.३५ किलोमीटर लांबीची आणि सहा पदरी उन्नत मार्गिका (एलिव्हेटेड कॉरिडॉर) उभारली जात आहे. हा उन्नत मार्ग पूर्ण झाल्यानंतर प्रवाशांना नेहमी वाहतूक कोंडीचा सामना करावा लागणाऱ्या पनवेल मुख्य जंक्शनला सहज वळसा घालणे शक्य होईल.
पनवेल परिसरातील वाहतूक कोंडी सुटल्यामुळे दैनंदिन प्रवासी आणि मालवाहतुकीला मोठा दिलासा मिळणार आहे. वाहतुकीच्या परिस्थितीनुसार या नवीन मार्गिकेमुळे दक्षिण मुंबई ते पुणे दरम्यानच्या प्रवासात तब्बल ६० ते ९० मिनिटांची बचत होईल, असा अंदाज व्यक्त करण्यात आला आहे.
अभियांत्रिकीच्या दृष्टीने हा प्रकल्प अत्यंत वैशिष्ट्यपूर्ण मानला जात आहे, कारण सध्या अस्तित्वात असलेल्या रस्ते आणि पुलांच्या वर थेट तिसऱ्या स्तरावर (Third Level) या उन्नत मार्गिकेची उभारणी केली जात आहे.
हा मार्ग केवळ मुंबई-पुणे प्रवासाचा वेळच कमी करणार नाही, तर प्रादेशिक कनेक्टिव्हिटीलाही मोठी चालना देईल. या प्रकल्पामुळे नवी मुंबई आंतरराष्ट्रीय विमानतळाकडे जाणारा मार्ग अधिक सक्षम होईल, तसेच जेएनपीए आणि गोवा महामार्गाच्या दिशेने जाणाऱ्या वाहनांना थेट व सुलभ संपर्क व्यवस्था उपलब्ध होऊन अटल सेतूचा फायदा संपूर्ण रस्ते जाळ्याला मिळेल.
