कोकण आणि पश्चिम महाराष्ट्र या दोन महत्त्वाच्या क्षेत्रांना थेट जोडणाऱ्या सातारा जिल्ह्यातील बहुप्रतिक्षित ‘केबल स्टेड ब्रिज’चे काम अखेर अंतिम टप्प्यात पोहोचले आहे. तब्बल १७५ कोटी रुपये खर्चून उभारण्यात आलेल्या या आधुनिक पुलाचे उद्घाटन येत्या दोन महिन्यांत, म्हणजेच डिसेंबर २०२६ पर्यंत होण्याची शक्यता प्रशासकीय सूत्रांनी वर्तवली आहे. मुंबईतील वरळी सी-लिंकच्या धर्तीवर पश्चिम महाराष्ट्रात उभारण्यात आलेला हा पहिलाच ५४० मीटर लांबीचा व १४ मीटर रुंदीचा भव्य पूल आहे. या प्रकल्पामुळे तापोळा ते गाढवली-आहिर हा परिसर जोडला जाऊन सह्याद्रीच्या खांदाटी खोऱ्यातील दुर्गम ग्रामीण भागातील दळणवळणाचा प्रश्न कायमचा सुटणार आहे.
या प्रकल्पामुळे रत्नागिरी जिल्ह्यातील खेड तालुक्यातून महाबळेश्वरला जाणाऱ्या पर्यटकांचे आणि प्रवाशांचे अंतर तब्बल ५० किलोमीटरने कमी होणार आहे. पावसाळ्याच्या दिवसांत कोयना नदीच्या पात्रातून बार्जद्वारे केला जाणारा धोकादायक आणि जीवघेणा प्रवास आता पूर्णपणे थांबणार आहे. या पुलामुळे कोकण आणि सातारा या दोन्ही भागांतील पर्यटन व्यवसायाला मोठी चालना मिळण्याची अपेक्षा व्यक्त केली जात आहे. चालू वर्षाच्या मे महिन्यात उपमुख्यमंत्र्यांनी प्रत्यक्ष पाहणी करून या पुलाची वाहनांद्वारे चाचणी (व्हिएकल ट्रायल) घेतली होती, तसेच नुकत्याच पार पडलेल्या गणेशोत्सवात काही काळासाठी हा पूल वाहतुकीसाठी प्रायोगिक तत्त्वावर खुला करण्यात आला होता.
पर्यटनाच्या दृष्टीने या पुलाचे मुख्य वैशिष्ट्य म्हणजे त्याच्या मध्यभागी तब्बल ४३ मीटर उंचीवर पर्यटकांसाठी तयार करण्यात आलेली विशेष व्ह्यू गॅलरी. या गॅलरीमध्ये पोहोचण्यासाठी कॅप्सूल लिफ्टसोबतच दोन्ही बाजूने पायऱ्यांची व्यवस्था करण्यात आली आहे. या व्ह्यू गॅलरीतून सह्याद्रीच्या कुशीतील कोयनेचे अथांग बॅकवॉटर, तसेच सूर्योदय आणि सूर्यास्ताचे नयनरम्य दृश्य पर्यटकांना अनुभवायला मिळणार आहे. टी अँड टी कंपनीच्या माध्यमातून अवघ्या तीन वर्षांत या आव्हानात्मक प्रकल्पाचे बांधकाम पूर्ण करण्यात आले आहे.
या भौगोलिकदृष्ट्या कठीण आणि अभियांत्रिकीच्या दृष्टीने आव्हानात्मक प्रकल्पाचे काम उच्च गुणवत्तेने आणि वेळेत पूर्ण केल्याबद्दल संबंधित अभियंत्यांचे योगदान महत्त्वाचे ठरले आहे. या कामात विशेष भूमिका बजावणारे महाबळेश्वरचे तत्कालीन उपअभियंता अजय देशपांडे यांच्यासह सार्वजनिक बांधकाम विभागातील पाच उपअभियंत्यांचा नुकताच राज्य शासनाच्या वतीने ‘उत्कृष्ट अभियंता’ म्हणून गौरव करण्यात आला. तांत्रिक अचूकता आणि सुरक्षेचे निकष पाळून हा प्रकल्प साकारल्याबद्दल सार्वजनिक बांधकाम मंत्री व वरिष्ठ अधिकाऱ्यांच्या हस्ते हा सत्कार पार पडला.
दरम्यान, या पुलामुळे दळणवळण सोपे होणार असले तरी रत्नागिरी जिल्ह्यातील खेड तालुक्यातील रघुवीर घाट मार्ग सध्या अत्यंत धोकादायक स्थितीत आहे. पुलाचे उद्घाटन होऊन वाहतूक वाढण्यापूर्वीच शासनाने या रघुवीर घाटाच्या दुरुस्तीचे व रुंदीकरणाचे काम तातडीने हाती घ्यावे, अशी जोरदार मागणी स्थानिक नागरिक आणि प्रवाशांकडून केली जात आहे.
