झारखंडमधील हटिया येथून उत्तर प्रदेशातील झांशीकडे एक रिकामी ‘चेअर कार’ वंदे भारत ट्रेन मालगाडीच्या इंजिनच्या सहाय्याने नेली जात होती. प्रवासादरम्यान ट्रेनची ब्रेक प्रणाली पूर्णपणे निकामी झालेली असतानाही ही गाडी सुमारे ४६३ किलोमीटर अंतरापर्यंत धावत राहिली. लोको पायलटनी वारंवार इशारा देऊनही डब्यांचे ब्रेक कार्यान्वित झाले नसल्यामुळे रेल्वेच्या कारभारातील मोठा निष्काळजीपणा समोर आला आहे.
ट्रेन हटिया येथून निघाल्यानंतर लोको पायलटनी ‘ब्रेक पॉवर टेस्ट’ केली असता ब्रेक प्रणाली अत्यंत खराब स्थितीत असल्याचे त्यांच्या निदर्शनास आले. रांची व मुरी स्थानकावर पायलटनी याविषयी संबंधित अधिकाऱ्यांकडे लेखी तक्रारी व सूचना करूनही ट्रेनला पुढे जाण्याची परवानगी देण्यात आली. त्यानंतर ही गाडी उत्तर प्रदेशातील चंदौली जिल्ह्यातील दीन दयाल उपाध्याय स्थानकावर पोहोचल्यावर डब्यांच्या ब्रेक प्रणाली विलग (आयसोलेट) केल्या गेल्याचे उघडकीस आले.
या गंभीर सुरक्षेतील त्रुटीची दखल घेत दक्षिण पूर्व रेल्वे विभागाने रांचीच्या विभागीय रेल्वे व्यवस्थापकांना या संपूर्ण प्रकरणाची सखोल चौकशी करून दोषी व्यक्तींची ओळख पटवण्याचे आदेश दिले आहेत. प्राथमिक तपासात देखभाल कर्मचारी, ट्रॅक्शन व सेक्शन नियंत्रक आणि रेल्वे कर्मचाऱ्यांकडून झालेल्या दुर्लक्षामुळे हा प्रकार घडल्याचे स्पष्ट झाले आहे. गाडी सोडण्यापूर्वी ब्रेक्सची प्रत्यक्ष पाहणी न करणे आणि कर्मचाऱ्यांना वंदे भारतच्या ब्रेक प्रणालीची पुरेशी माहिती नसणे ही यामागची मुख्य कारणे असल्याचे समोर आले आहे.


