मावळ लोकसभा मतदारसंघातील अत्यंत महत्त्वाकांक्षी पनवेल ते कर्जत नवीन रेल्वे मार्गिकेचे काम अंतिम टप्प्यात आले आहे. या प्रकल्पाचे सुमारे ९५ टक्के काम पूर्ण झाल्याने खासदार श्रीरंग अप्पा बारणे यांनी आज मंगळवार, २६ मे २०२६ रोजी सकाळी ११ वाजता रेल्वे विभागाच्या वरिष्ठ अधिकाऱ्यांसमवेत संपूर्ण मार्गाची प्रत्यक्ष पाहणी करण्याचा कार्यक्रम आखला आहे.
पनवेल रेल्वे स्थानकापासून सुरू होणारा हा पाहणी दौरा चिखले, पोयंजे, चौक आणि कर्जत रेल्वे स्थानकांवर थांबून पूर्ण होणार आहे. मुंबई रेल्वे विकास महामंडळ (MRVC) मार्फत मुंबई नागरी परिवहन प्रकल्प-३ (MUTP-3) अंतर्गत २,७८२ कोटी रुपयांच्या खर्चाने उभारण्यात येत असलेल्या या २९.६ किलोमीटर लांबीच्या दुहेरी रेल्वे मार्गामुळे पनवेल आणि कर्जत या दोन महत्त्वाच्या शहरांना थेट जोड मिळणार आहे. या नवीन मार्गामुळे मुंबई आणि आसपासच्या भागातील रेल्वे वाहतुकीला मोठा दिलासा मिळेल, पर्यायी लोकल सेवा सुरू होईल आणि कल्याणमार्गे धावणाऱ्या गाड्यांवरील गर्दीचा ताण लक्षणीयरीत्या कमी होईल, अशी अपेक्षा व्यक्त करण्यात येत आहे.
सध्या पूल, उड्डाणपूल, भुयारी मार्ग, बोगदे यांसारखी बहुतांश कामे पूर्ण झाली असून, कर्जत येथे रुळ जोडणी आणि पनवेल रेल्वे उड्डाणपुलाचे कामही शेवटच्या टप्प्यात आहे. लवकरात लवकर हा मार्ग प्रवाशांच्या सेवेत दाखल करण्यासाठी प्रशासन पूर्ण प्रयत्न करत आहे.
