Follow us on   

सामंतवाडी:

सावंतवाडी-कुडाळ रस्त्यावरील कोलगाव मियासाब दर्ग्या जवळ (समाधीजवळ) दुचाकी आणि स्विफ्ट कार यांच्यात भीषण रस्ता अपघात घडला. या अपघातात दुचाकीवरून जाणाऱ्या तरुण आणि तरुणीचा दुर्दैवी मृत्यू झाला आहे. आयुषी देसाई असे तरुणीचे नाव असून तिचा जागीच मृत्यू झाला, तर कार्तिक परब या तरुणाचा उपचारादरम्यान मृत्यू झाला.

​मिळालेल्या माहितीनुसार, कुडाळच्या दिशेने जाणारी दुचाकी (क्रमांक GA 03 AB 7501) आणि सावंतवाडीच्या दिशेने येणारी स्विफ्ट कार (क्रमांक MH 07 AG 7801) यांच्यात जोरदार धडक झाली. ही धडक इतकी भीषण होती की दुचाकीवरील दोघेही उडून रस्त्यावर फेकल गेले. अपघाताच्या तीव्रतेमुळे स्विफ्ट कार रस्त्याशेजारील गटारात जाऊन कोसळली आणि कारच्या पुढील भागाचे मोठे नुकसान झाले.

​घटनेनंतर स्थानिक नागरिक महेश बांदेकर, कृष्णा धुळपनावर आणि लाडू रायका यांनी तातडीने घटनास्थळी धाव घेत जखमींना उपचारासाठी उपजिल्हा रुग्णालयात दाखल केले. डॉक्टरांनी उपचारास सुरुवात केली, मात्र उपचारादरम्यान कार्तिक परब यांची प्राणज्योत मालवली. माहिती मिळताच पोलिसांनी तात्काळ घटनास्थळी धाव घेतली. अपघातानंतर स्विफ्ट कारच्या चालकाचा पोलीस शोध घेत आहेत. या प्रकरणाचा पुढील तपास सहाय्यक पोलीस फौजदार राऊत, पोलीस हवालदार सुरेश पाटील, पोलीस हवालदार धोत्रे आणि पोलीस कॉन्स्टेबल पवन परब करत आहेत.

   Follow us on   

​सिंधुदुर्ग:

सिंधुदुर्ग जिल्हाधिकारी कार्यालयाच्या वतीने जिल्ह्यातील रिक्त असलेल्या ३६५ ग्रामपंचायत क्षेत्रे आणि ३ नगरपरिषद व नगरपंचायत क्षेत्रांमध्ये नवीन ‘आपले सरकार सेवा केंद्र’ (ASSK) आयडी प्रदान करण्यासाठी अर्ज प्रक्रिया सुरू करण्यात आली आहे. ग्रामीण व शहरी भागातील नागरिकांना विविध शासकीय सेवा एकाच छताखाली सहजरीत्या उपलब्ध व्हाव्यात, या उद्देशाने जिल्हा प्रशासनाने इच्छुक आणि पात्र उमेदवारांकडून ऑनलाईन पद्धतीने अर्ज मागविले आहेत. या संदर्भातील अधिकृत जाहिरात २३ जुलै २०२६ रोजी प्रसिद्ध करण्यात आली आहे.

​या भरती प्रक्रियेसाठी इच्छुक उमेदवारांना २९ जुलै २०२६ ते ७ ऑगस्ट २०२६ या कालावधीत ऑनलाईन अर्ज सादर करता येतील. कार्यालयीन कामकाजाच्या दिवशी सकाळी १०.०० ते सायंकाळी ६.०० या वेळेतच हे अर्ज स्वीकारले जाणार आहेत. प्राप्त झालेल्या सर्व अर्जांची माहिती २० ऑगस्ट २०२६ रोजी संकेतस्थळावर प्रसिद्ध केली जाईल. त्यानंतर १ सप्टेंबर २०२६ रोजी प्राप्त हरकती आणि अपात्र अर्जांची छाननी केली जाईल. एखाद्या ठिकाणी एकापेक्षा जास्त अर्ज आल्यास उमेदवारांच्या मुलाखतीची तारीख स्वतंत्रपणे घोषित केली जाऊन अंतिम निवड यादी संकेतस्थळावर जाहीर केली जाईल.

​जिल्हा प्रशासनाने स्पष्ट केले आहे की अर्जाचा नमुना, आवश्यक अटी व शर्ती आणि कागदपत्रांची संपूर्ण माहिती सिंधुदुर्ग जिल्ह्याच्या अधिकृत संकेतस्थळावर (sindhudurg.nic.in) उपलब्ध आहे. तसेच, निवड प्रक्रियेदरम्यान कोणत्याही उमेदवाराशी फोन अथवा ई-मेलद्वारे वैयक्तिक संपर्क साधला जाणार नसल्यामुळे सर्व अपडेट्ससाठी उमेदवारांनी संकेतस्थळावरच लक्ष ठेवावे. स्थानिक पातळीवर रोजगाराची संधी शोधणाऱ्या तरुणांसाठी ही एक उत्तम संधी आहे.

   Follow us on   

सावंतवाडी: सावंतवाडी पंचायत समितीच्या मासिक सभेत शालेय पोषण आहार योजनेबाबत एक अत्यंत धक्कादायक प्रकार उघडकीस आला आहे. तालुक्यातील विविध शाळांमध्ये विद्यार्थ्यांना पुरवण्यात येणाऱ्या पोषण आहारातील धान्य अत्यंत निकृष्ट दर्जाचे असल्याचा गंभीर आरोप लोकप्रतिनिधींनी बैठकीदरम्यान केला आहे. लहान मुलांच्या आरोग्याशी थेट खेळणाऱ्या या प्रकारामुळे संपूर्ण तालुक्यात मोठी खळबळ उडाली आहे.

​पुरवठादाराकडून शाळांपर्यंत पोहोचवण्यात येणारे धान्य किडलेले, अस्वच्छ आणि लहान मुलांच्या खाण्यायोग्य अजिबात नसल्याचे सभेदरम्यान समोर आले. प्रशासकीय निष्काळजीपणामुळे अशा प्रकारचे अस्वच्छ धान्य विद्यार्थ्यांच्या ताटात पोहोचत असल्याचे पाहून लोकप्रतिनिधींनी आणि उपस्थितांनी यावर तीव्र संताप व्यक्त केला.

​या गंभीर बाबीची तातडीने दखल घेत पंचायत समितीच्या बैठकीत सदस्यांनी प्रशासनाला आक्रमकपणे जाब विचारला. सरकारी योजनांचा निधी मिळूनही विद्यार्थ्यांना निकृष्ट दर्जाचे अन्न दिले जात असल्याने संबंधित विभागाच्या ढिसाळ कारभारावर जोरदार ताशेरे ओढण्यात आले.

​विद्यार्थ्यांच्या जीवाशी आणि आरोग्याशी खेळ करणाऱ्या संबंधित ठेकेदारावर कठोर कारवाई करण्यात यावी, तसेच या संपूर्ण प्रकाराकडे दुर्लक्ष करणाऱ्या जबाबदार अधिकाऱ्यांवरही तात्काळ गुन्हे दाखल करण्याची मागणी लोकप्रतिनिधींनी लावून धरली आहे.

​शेवटी, या प्रकरणाची सखोल आणि निष्पक्ष चौकशी करून निकृष्ट धान्याचा पुरवठा त्वरित थांबवावा, असे स्पष्ट निर्देश देण्यात आले. शाळांमध्ये विद्यार्थ्यांना वेळेत, दर्जेदार आणि स्वच्छ पोषण आहार मिळेल याची खात्री प्रशासनाने तत्काळ करावी, अशी ठाम भूमिका बैठकीत घेण्यात आली.

   Follow us on   

सावंतवाडी:

येथील सालईवाडा भागात सकाळी फिरण्यासाठी बाहेर पडलेल्या एका महिलेच्या गळ्यातील सोन्याचे दागिने जबरदस्तीने हिसकावून पळून जाणाऱ्या दोन अट्टल चोरांना पोलिसांनी बेड्या ठोकल्या आहेत. कोल्हापूर स्थानिक गुन्हे अन्वेषण शाखेच्या (एलसीबी) पथकाने या आरोपींना आधी दुसऱ्या एका गुन्ह्यात अटक केली होती. तेथील तपासादरम्यान त्यांनी सावंतवाडी येथील गुन्ह्याचीही कबुली दिली. त्यानंतर सावंतवाडी पोलिसांनी या आरोपींचा ताबा घेऊन त्यांना न्यायालयात हजर केले असता, न्यायालयाने आरोपींना ३ दिवसांची पोलीस कोठडी सुनावली आहे.

​या कारवाईत अटक करण्यात आलेल्या आरोपींची नावे वैभव नारायणराव अडोळे (वय २६, रा. एरला, ता. मोर्शी, जि. अमरावती, सध्या रा. हिंजवडी, पुणे) आणि करण गोरखनाथ जगधने (वय १९, रा. पिंपळवाडी पिराची, ता. पैठण, जि. छत्रपती संभाजीनगर, सध्या रा. विधाते वस्ती, औंध गावठाण, पुणे) अशी आहेत.

​सकाळी चालताना घडली होती घटना

पोलिसांनी दिलेल्या माहितीनुसार, १० जून रोजी सकाळी साडेआठ वाजण्याच्या सुमारास श्रीमती रंजना ठाकूर (रा. साळईवाडा, सावंतवाडी) या बिल्डिंगखालील रस्त्यावरून चालत जात होत्या. याच वेळी दुचाकीवरून आलेल्या या दोन चोरट्यांनी त्यांच्या गळ्यातील सोन्याचा दागिना हिसकावून नेला आणि तेथून पोबारा केला होता. या घटनेनंतर सावंतवाडी शहरात प्रचंड खळबळ उडाली होती.

​कोल्हापूर पोलिसांच्या तपासात उघडकीस आला गुन्हा

सावंतवाडीतील या घटनेनंतर काही दिवसांतच कोल्हापूर भागातही अशाच प्रकारची चेन स्नॅचिंगची घटना घडली होती. कोल्हापूर स्थानिक गुन्हे अन्वेषण शाखेच्या पथकाने या गुन्ह्याचा छडा लावत वैभव अडोळे आणि करण जगधने यांना जेरबंद केले. कोल्हापूर पोलिसांनी केलेल्या सखोल चौकशीत आरोपींनी सावंतवाडीतही रंजना ठाकूर यांच्या गळ्यातील सोन्याचा दागिना चोरल्याची कबुली दिली. त्यानंतर चोरांकडून सोन्याचा दागिना हस्तगत करण्यात आला असून संशयितांना २० जुलैपर्यंत पोलीस कोठडी सुनावण्यात आली आहे.

​सावंतवाडी पोलीस ठाण्याचे पोलीस निरीक्षक अमोल चव्हाण यांच्या सूचनेनुसार, पोलीस उपनिरीक्षक श्री. प्रमोद पाटील यांनी आपल्या पथकासह कोल्हापूर कारागृहात जाऊन दोन्ही संशयित आरोपींचा रीतसर ताबा घेतला. संशयित आरोपींची ओळख परेड (टी.आय. परेड) करायची असल्याने, त्यांची ओळख उघड होऊ नये म्हणून त्यांना चेहरा मास्काने झाकूनच वेळोवेळी न्यायालयात हजर करण्यात येत होते. या प्रकरणाचा पुढील तपास पोलीस करत आहेत.

   Follow us on   

कणकवली:

कणकवली शहरात एटीएम धारकांसाठी एक अत्यंत धक्कादायक आणि डोळे उघडवणारी घटना समोर आली आहे. एटीएम मशीनमधून पैसे काढण्यासाठी अनोळखी व्यक्तीची मदत घेणे एका महिलेला भलतेच महागात पडले आहे. गुरुवारी (१६ जुलै) सायंकाळी चार वाजेच्या सुमारास घडलेल्या या घटनेत एका भामट्याने हातचलाखी करून महिलेचे एटीएम कार्ड बदलले आणि तिच्या बँक खात्यातून तब्बल ९ हजार रुपयांची रोकड लांबवून फसवणूक केली. या घटनेमुळे संपूर्ण परिसरात तीव्र खळबळ उडाली असून एटीएम वापरणाऱ्या नागरिकांमध्ये चिंतेचे वातावरण पसरले आहे.

​मिळालेल्या माहितीनुसार, आशिये रोड परिसरात राहणारी संबंधित पीडित महिला कणकवली शहरातील बँक ऑफ महाराष्ट्रच्या शाखेसमोरील एटीएम केंद्रामध्ये पैसे काढण्यासाठी गेली होती. एटीएम मशीनमध्ये कार्ड स्वाइप केल्यानंतर काही तांत्रिक अडचणींमुळे रक्कम बाहेर येत नव्हती. त्यामुळे व्यवहार पूर्ण होण्याची ती महिला वाट पाहत उभी होती. नेमकी याच वेळी तिची अडचण पाहून पाठीमागे उभा असलेला एक अज्ञात तरुण मदतीचा बहाणा करत पुढे आला.

​पैसे काढून देतो असे सांगून त्या भामट्याने महिलेच्या हातातील एटीएम कार्ड स्वतःकडे घेतले आणि मशीनमध्ये काहीतरी प्रक्रिया करू लागला. मात्र, पुन्हा प्रयत्न करूनही मशीनमधून पैसे आले नाहीत, असे भासवत त्याने अत्यंत हुशारीने मूळ एटीएम कार्ड स्वतःकडे ठेवून घेत त्याऐवजी दुसरेच हुबेहूब दिसणारे बनावट कार्ड महिलेच्या हातात सोपवले आणि तो तिथून पसार झाला.

​काही वेळानंतर, पीडित महिलेच्या मोबाईलवर बँक खात्यातून ९ हजार रुपये काढले गेल्याचा संदेश आला. हा मेसेज पाहताच महिलेच्या पायाखालची जमीन सरकली. तिने तात्काळ कणकवली येथील संबंधित बँकेत धाव घेऊन चौकशी केली असता, तिच्या खात्यातून सदर रक्कम काढली गेल्याचे स्पष्ट झाले. आपली फसवणूक झाल्याचे लक्षात येताच महिलेने थेट कणकवली पोलीस ठाणे गाठून या संपूर्ण प्रकाराबाबत लेखी तक्रार दाखल केली. पोलिसांनी घटनेचे गांभीर्य ओळखून एटीएम परिसरातील सीसीटीव्ही फुटेजची पडताळणी सुरू केली असून अज्ञात आरोपीचा कसून शोध घेतला जात आहे.