वैभववाडी:
खांबाळे मोहितेवाडी (खालचीवाडी) येथील ओढ्यावरील लोखंडी साकव मंगळवारी सकाळी अचानक कोसळला. या दुर्दैवी घटनेत कोणतीही जीवितहानी झाली नसली, तरी चार जनावरे जखमी झाली आहेत.
मौजे मोहितेवाडी येथील संजय गोविंद पवार हे आपल्या मालकीची सहा जुरे चराईसाठी घेऊन ओढ्यावरील लोखंडी साकवावरून जात असताना ही घटना घडली. साकव अचानक कोसळल्यामुळे जनावरे तिथेच अडकली. मात्र, ग्रामस्थांनी तात्काळ प्रसंगावधान राखून अडकलेल्या जुरेची सुरक्षित सुटका केली. या अपघातात चार जनावरांना दुखापत झाली आहे.
घटनेची माहिती मिळताच पंचायत समिती सदस्य मंगेश लोके यांनी घटनास्थळी भेट देऊन साकवाची पाहणी केली. यावेळी ग्रामपंचायत प्रशासक प्राजक्ता कदम, माजी सरपंच गणेश पवार तसेच विक्रांत पवार उपस्थित होते.
या घटनेत जखमी झालेल्या चार जनावरांवर आचिर्णे येथील पशुवैद्यकीय दवाखान्याचे पर्यवेक्षक डॉ. हेूळकर यांनी जनावरांच्या मालकाच्या घरी जाऊन उपचार केले. दरम्यान, तलाठी केदारी बागल यांनी घटनास्थळी पंचनामा करून संबंधितांचे जबाब नोंदवले व अहवाल वरिष्ठ कार्यालयाकडे सादर केला. याप्रसंगी पोलीस पाटील अस्मिता चव्हाण आणि कोतवाल संतोष काळे उपस्थित होते.
