ठाणे: मध्य रेल्वेच्या पळसदरी आणि कर्जत रेल्वे स्थानकांदरम्यान गुरुवारी एक थरारक घटना घडली. उतारावरून धावणाऱ्या एका मालगाडीवरील नियंत्रण सुटल्याने ही गाडी प्रचंड वेगात धावू लागली. सुदैवाने, या वेळी अपघात झाला नाही आणि मोठा अनर्थ टळला आहे. मात्र, या गंभीर प्रकारामुळे रेल्वे प्रशासनात मोठी खळबळ उडाली असून मध्य रेल्वेने तातडीने चौकशीचे आदेश दिले आहेत.
मिळालेल्या माहितीनुसार, तीन इंजिन असलेली ही मालगाडी मालवाहतूक करत असताना अचानक उतारावर तिचा वेग अनियंत्रित झाला. ही मालगाडी पळसदरी ते कर्जत दरम्यानच्या तीव्र उतारावरून धावत असताना रेल्वे कर्मचाऱ्यांच्या निदर्शनास आली. घटनेचे गांभीर्य ओळखून तातडीने रेल्वेच्या वरिष्ठ अधिकाऱ्यांना सतर्क करण्यात आले आणि पुढील धोके टाळण्यासाठी यंत्रणा कार्यान्वित करण्यात आली. सुदैवाने गाडी रुळावरून घसरली नाही किंवा दुसऱ्या कोणत्याही गाडीला धडकली नाही, ज्यामुळे मोठी दुर्घटना टळली.
प्राथमिक तपासात समोर आलेल्या माहितीनुसार, या मालगाडीच्या इंजिनमध्ये काही प्रशिक्षणार्थी लोको पायलट्स (Trainee Loco Pilots) कार्यरत होते. गाडी उतारावरून खाली येत असताना वेगावर योग्य नियंत्रण ठेवण्यास ते अपयशी ठरल्याचा संशय व्यक्त केला जात आहे. मध्य रेल्वेच्या अधिकाऱ्यांनी या घटनेची पुष्टी केली असून, तांत्रिक बिघाड होता की मानवी चूक, याचा शोध घेण्यासाठी उच्चस्तरीय चौकशी सुरू केली आहे. या घटनेचा व्हिडिओ सोशल मीडियावर व्हायरल झाला आहे.
व्हिडिओ येथे पहा 👇
कर्जत-पळसदरी घाटात उतारावर मालगाडीचे नियंत्रण सुटले; थोडक्यात अनर्थ टळला! थरारक व्हिडिओ समोर – Kokanai https://t.co/yjIpjnbR6E#IndianRailways #KarjatGhat #FreightTrain #NarrowEscape #मध्यरेल्वे #कर्जतपळसदरी #मालगाडीथरार #रेल्वेसुरक्षा #ठाणेन्यूज pic.twitter.com/CSHxBRh6tQ
— Kokanai Digital News Channel (@kokanai21) February 27, 2026
