Follow us on   

राजापूर:

राजापूर तालुक्यातील पांगरे येथे शनिवारी एक धक्कादायक घटना घडली असून, एका भीषण अपघातातून पुण्याच्या सात भाविकांचे प्राण थोडक्यात बचावले आहेत. दर्शनासाठी आलेल्या या भाविकांची चारचाकी गाडी सुमारे ५० फूट खोल दरीत कोसळण्याच्या बेतात असतानाच, दरीच्या कडेला असलेल्या दाट झुडपे आणि रानवेलींच्या आधारामुळे गाडी तिथेच अडकली आणि एक मोठी दुर्घटना टळली.

​मिळालेल्या माहितीनुसार, पुणे येथील काही भाविक पांगरे येथील स्वामी शिवानंद टेबे महाराज मठात दर्शनासाठी आले होते. मठात दर्शन घेऊन आणि समाधीस्थळाला भेट दिल्यानंतर, सायंकाळी सुमारे पाच वाजण्याच्या सुमारास हे सर्व भाविक आपल्या परतीच्या प्रवासाला निघाले. यावेळी पांगरे पुलाजवळ उभी असलेली त्यांची चारचाकी गाडी सुरू करत असताना, हँडब्रेक योग्यरीतीने लावलेला नसल्याने वाहन अचानक पाठीमागे सरकू लागले. वाहनाच्या अगदी मागेच खोल दरी असल्याने अवघ्या काही क्षणांतच गाडी दरीच्या दिशेने घसरली आणि तिचा मोठा भाग दरीकडे झुकला. मात्र, सुदैवाने दरीच्या कडेला असलेल्या दाट झुडपांमध्ये आणि रानवेलींमध्ये गाडी अडकून राहिल्याने ती खाली कोसळली नाही.

​या घटनेच्या वेळी वाहनामध्ये एकूण सात जण प्रवास करत होते. गाडी दरीच्या दिशेने घसरत असल्याचे लक्षात येताच, सर्वांनी अत्यंत प्रसंगावधान राखले आणि तातडीने पुढील पाठीमागच्या दारांतून बाहेर पडून स्वतःचे प्राण वाचवले. वाहनातून सुरक्षित बाहेर आल्यानंतर गाडीची ती धोकादायक स्थिती पाहून सर्वांनाच मोठा धक्का बसला. जर काही इंचांचाही फरक पडला असता, तर वाहन थेट ५० फूट खोल दरीत कोसळून मोठी जीवितहानी होण्याची शक्यता होती. या घटनेमुळे काही काळ परिसरात तणावाचे वातावरण निर्माण झाले होते. अपघाताची माहिती मिळताच स्थानिक नागरिकांनीही तातडीने घटनास्थळी धाव घेत मदतकार्य केले. सुदैवाने सर्व भाविक सुखरूप बचावल्याने उपस्थित सर्वांनीच सुटकेचा श्वास सोडला आणि समाधान व्यक्त केले.

   Follow us on        

कुडाळ: कुडाळ तालुक्यातील पिंगुळी गुढीपूर येथील  २१ प्रवासी अक्कलकोट येथे स्वामी समर्थांच्या दर्शनासाठी जात असताना आकेरी येथे त्यांच्या धावत्या गाडीवर अचानक एक मोठे आकाशिचे झाड कोसळल्याची भीषण दुर्घटना घडली. या अपघातात गाडीचे मोठे नुकसान झाले असले, तरी स्वामी समर्थांच्या कृपेने सर्व २१ प्रवासी सुदैवाने बालंबाल बचावले आहेत. या घटनेत गाडीचा चालक आणि अन्य एक जण किरकोळ जखमी झाले आहेत.

नेमकी घटना काय?

मिळालेल्या माहितीनुसार, कुडाळ गुढीपूर येथील रहिवासी राजेश सिंगनाथ आणि त्यांच्या कुटुंबातील सदस्य (एकूण २१ प्रवासी) ‘टेम्पो ट्रॅव्हलर’ (क्र. MH 48 K 1171) या गाडीने अक्कलकोट स्वामी समर्थांच्या दर्शनासाठी निघाले होते. ही गाडी सावंतवाडीजवळील आकेरी येथे पोहोचली असता, रस्त्याच्या कडेला असलेले एक मोठे आकाशिचे झाड अचानक चालत्या गाडीवर कोसळले.

झाड थेट गाडीवर पडल्याने वाहनाचा पुढचा भाग पूर्णपणे चेपला गेला आणि मोठे नुकसान झाले. मात्र, गाडीतील सर्व प्रवासी सुखरूप असून कोणालाही गंभीर दुखापत झालेली नाही. अपघात घडताच स्थानिक प्रशासन, पोलीस आणि रुग्णवाहिकेला पाचारण करण्यात आले. किरकोळ जखमी झालेल्या चालकाला तातडीने उपचारासाठी सावंतवाडी येथील रुग्णालयात दाखल करण्यात आले आहे.

स्थानिक ग्रामस्थांची समयसूचकता

अपघाताचा भीषण आवाज ऐकताच आकेरी येथील स्थानिक ग्रामस्थांनी तातडीने घटनास्थळाकडे धाव घेतली. त्यांनी कटरच्या साहाय्याने रस्त्यावर आणि गाडीवर पडलेले झाड वेगाने कापून बाजूला केले आणि वाहतुकीसाठी रस्ता मोकळा केला. ग्रामस्थांनी दाखवलेल्या या समयसूचकतेचे आणि मदतीचे सर्वत्र कौतुक होत आहे.

वणव्यांमुळे झाडे होताहेत पोकळ

पावसाळा सुरू होण्यापूर्वी ग्रामीण आणि डोंगरभागात मोठ्या प्रमाणावर वणवे पेटवले जातात. या वणव्यांच्या आगीमुळे रस्त्याशेजारील अनेक झाडे मुळापासून जळतात आणि आतून पोकळ होतात. वरून हिरवीगार दिसणारी ही झाडे आतून कमकुवत झालेली असतात, ज्यामुळे मे महिन्यातील वादळी वाऱ्यात ती अचानक उन्मळून पडतात. आजचा अपघातही अशाच एका जळालेल्या झाडामुळे घडल्याचे समोर आले आहे.

हे वणवे प्रवाशांच्या जीवावर बेतू लागल्याने त्यावर वेळीच नियंत्रण मिळवणे गरजेचे झाले आहे. या अपघातात मोठी जीवितहानी टळली असली, तरी वन विभाग आणि सार्वजनिक बांधकाम विभागाने रस्त्याशेजारील अशी धोकादायक व जळालेली झाडे तातडीने हटवावीत, अशी मागणी आता नागरिक आणि प्रवाशांमधून केली जात आहे.

   Follow us on   

वैभववाडी:रेल्वेची जोरदार धडक बसल्याने नाधवडे-हेलकरवाडी येथील अमोल प्रकाश खांडेकर (वय ३६) या युवकाचा जागीच दुर्दैवी मृत्यू झाल्याची धक्कादायक घटना घडली आहे. ही भीषण घटना सकाळी साडेआठच्या सुमारास शुकनदी पुलाजवळ घडली. अमोल खांडेकर हे मुंबईतील चिंचपाडा परिसरात आपल्या आई, पत्नी आणि मुलीसह राहत होते आणि एका नामांकित कंपनीत नोकरीला होते. ते आपल्या मालकीच्या जमिनीत काजू लागवडीची पूर्वतयारी करण्यासाठी गावी आले होते.

रविवारी सकाळी ते कोकणकन्या एक्सप्रेसने मुंबईहून वैभववाडी रेल्वे स्थानकावर उतरले आणि तिथून पायीच घराच्या दिशेने निघाले होते. दरम्यान, शुकनदी पुलाजवळ पोहोचताच गोव्याहून मुंबईकडे जाणाऱ्या निस्सार एक्सप्रेसची त्यांना जोरदार धडक बसली, ज्यात त्यांचा जागीच मृत्यू झाला. या अपघातानंतर संबंधित एक्सप्रेस सुमारे तासभर घटनास्थळी थांबवण्यात आली होती, ज्यामुळे रेल्वे वाहतुकीवर काही काळ परिणाम झाला होता.

​लोकप्रतिनिधींच्या दुर्लक्षामुळेच अपघात; ग्रामस्थांचा आरोप

​या भीषण अपघातानंतर हेलकरवाडी परिसरातील स्थानिक नागरिकांमधून तीव्र संताप व्यक्त होत आहे. ग्रामस्थांच्या म्हणण्यानुसार, या वाडीत जाण्यासाठी दुसरा कोणताही पर्यायी रस्ता उपलब्ध नाही. रस्त्याअभावी येथील लोकांना जीव मुठीत धरून रेल्वे रुळावरून किंवा पुलावरूनच ये-जा करावी लागते आणि याच मुख्य कारणामुळे हा भीषण अपघात घडला आहे. अनेक वर्षांपासून स्थानिक लोकप्रतिनिधींकडे हक्काच्या पर्यायी रस्त्यासाठी वारंवार तक्रारी व मागण्या करण्यात आल्या आहेत, मात्र लोकप्रतिनिधींनी या समस्येकडे सातत्याने दुर्लक्ष केले आहे. प्रशासनाच्या आणि लोकप्रतिनिधींच्या याच उदासीनतेमुळे आज एका निष्पाप युवकाला आपला जीव गमवावा लागल्याची भावना ग्रामस्थ व्यक्त करत आहेत.

​पोलिसांकडून तपास सुरू

​घटनेची माहिती मिळताच रेल्वे पोलीस दलाचे अधिकारी प्रवीण मोरे यांनी वैभववाडी पोलिसांना तात्काळ कल्पना दिली. त्यानंतर पोलीस निरीक्षक मनोज सोनलवलकर, पोलीस हवालदार धनाजी धडे व उद्धव साबळे यांनी घटनास्थळी धाव घेतली. पोलिसांनी घटनेचा पंचनामा करून मृतदेह शवविच्छेदनासाठी ग्रामीण रुग्णालयात पाठवला. अपघाताची माहिती मिळताच अमोल खांडेकर यांचे मुंबईतील नातेवाईक गावी रवाना झाले आहेत. त्यांच्या या अचानक जाण्याने हेलकरवाडी परिसरात आणि खांडेकर कुटुंबावर दुःखाचा डोंगर कोसळला असून, गावातून पर्यायी रस्त्याची मागणी आता अधिक आक्रमकपणे केली जात आहे.

   Follow us on   

मुरुड:पर्यटनासाठी प्रसिद्ध असलेल्या मुरुड तालुक्यातील काशिद बीचवर काल, शुक्रवारी (२२ मे २०२६) रायगड पोलिसांच्या सतर्कतेमुळे आणि तत्परतेमुळे एक मोठा अनर्थ टळला. समुद्रात आंघोळ करताना लाटांच्या तीव्र प्रवाहामुळे बुडणाऱ्या एका पती-पत्नीचे प्राण वाचवण्यात पोलिसांना यश आले आहे.

हे दांपत्य पुणे जिल्ह्यातील खेड येथील रहिवासी असून, काशिद बीचवर पर्यटनासाठी आले होते. समुद्रात आंघोळ करत असताना अचानक आलेल्या जोरदार लाटा आणि पाण्याच्या वेगवान प्रवाहामुळे हे दोघेही समुद्रात खोलवर खेचले गेले. स्वतःला सावरणे कठीण झाल्याने दोघेही बुडू लागले आणि त्यांनी मदतीसाठी एकच टाहो फोडला.

​त्याच वेळी किनाऱ्यावर तैनात असलेल्या रायगड पोलिसांच्या बचाव पथकातील सुरक्षा रक्षकांनी आणि अधिकाऱ्यांनी परिस्थितीचे गांभीर्य ओळखून त्वरित हालचाली केल्या. कोणतीही वेळ वाया न घालवता पोलिसांनी ‘वॉटर रेस्क्यू क्राफ्ट’च्या (जीवरक्षक नौका) सहाय्याने समुद्रात धाव घेतली.

अतिशय प्रतिकूल परिस्थितीत, वेगवान लाटांचा सामना करत पोलिसांनी कुशलतेने आणि वेगाने बचाव मोहीम राबवून या पती-पत्नीला सुखरूप पाण्यातून बाहेर काढले. पोलिसांच्या या धाडसी आणि कौतुकास्पद कामगिरीमुळे दोन निष्पाप जीवांना जीवदान मिळाले आहे. या घटनेनंतर रायगड पोलिसांनी पर्यटकांना सुरक्षेचे आवाहन केले असून, समुद्रात उतरताना पर्यटकांनी गाफील न राहता प्रशासनाने दिलेल्या सूचनांचे पालन करावे आणि केवळ अधिकृत व सुरक्षित ठिकाणीच आंघोळ करावी, असे म्हटले आहे.

   Follow us on   

​मालवण: मालवण येथील प्रसिद्ध दांडी समुद्रकिनाऱ्यावर वॉटरस्पोर्ट्सचा आनंद घेताना एक अत्यंत धक्कादायक आणि दुर्दैवी घटना घडली आहे. बनाना राईड (Banana Ride) करत असताना समुद्राच्या पाण्यात पडल्यामुळे मुंबईजवळील अंबरनाथ येथील रहिवासी असलेल्या शीतल शशिकांत मठकर (वय ४५) या महिला पर्यटकाचा मृत्यू झाला. ही दुर्घटना रविवारी सकाळी साडेआठ वाजण्याच्या सुमारास घडली असून, या घटनेमुळे संपूर्ण मालवण परिसरात आणि पर्यटन क्षेत्रात मोठी खळबळ उडाली आहे.

​मिळालेल्या माहितीनुसार, सौ. शीतल मठकर या आपल्या पती, मुलगा, दीर आणि भावजय यांच्यासह एकूण नऊ जणांच्या कुटुंबासोबत शुक्रवारी मालवण-देवबाग येथे पर्यटनासाठी आल्या होत्या. देवबाग येथील एका कॉटेजमध्ये त्यांचा मुक्काम होता. दोन दिवस विविध पर्यटन स्थळांचा आनंद घेतल्यानंतर, शनिवारी त्यांनी आपल्या दिराचा वाढदिवसही उत्साहात साजरा केला होता. त्यानंतर रविवारी सकाळी सर्व कुटुंब दांडी किनारपट्टीवर वॉटरस्पोर्ट्सचा आनंद घेण्यासाठी गेले होते.

​दांडी समुद्रात बनाना राईड करत असताना अचानक शीतल या समुद्राच्या पाण्यात पडल्या आणि त्यांची प्रकृती खालावली. त्या पाण्यात पडल्याचे लक्षात येताच स्थानिक यंत्रणा आणि कुटुंबियांनी त्यांना तातडीने पाण्याच्या बाहेर काढले. तिथे उपस्थित असलेल्या एका डॉक्टर पर्यटकाने त्यांच्यावर तात्काळ प्राथमिक उपचार (First Aid) केले. मात्र, त्यांच्याकडून कोणताही प्रतिसाद मिळत नसल्याने त्यांना तातडीने मालवण येथील एका खाजगी रुग्णालयात आणि त्यानंतर ग्रामीण रुग्णालयात दाखल करण्यात आले.

​ग्रामीण रुग्णालयातील वैद्यकीय अधिकारी डॉ. बालाजी पाटील यांनी शीतल यांची तपासणी केली, परंतु उपचारापूर्वीच त्यांचा मृत्यू झाल्याचे त्यांनी घोषित केले. आनंद घेण्यासाठी आलेल्या कुटुंबावर अचानक ओढवलेल्या या दुर्दैवी प्रसंगामुळे मठकर कुटुंबावर दुःखाचा डोंगर कोसळला आहे. याप्रकरणी मालवण पोलिसांनी आकस्मिक मृत्यूची नोंद केली असून, पोलीस हवालदार जनार्दन रेवंडकर या प्रकरणाचा अधिक तपास करत आहेत.

   Follow us on   

संगमेश्वर: रत्नागिरी-कोल्हापूर महामार्गावर सध्या सुरू असलेल्या रुंदीकरणाच्या कामामुळे अपघातांचे सत्र सुरूच असून, सोमवारी सायंकाळी नाणीज येथील जुन्या मठाजवळ एक भीषण अपघात घडला. या अपघातात रिक्षाचालकाचा जागीच मृत्यू झाला असून दोन महिला प्रवासी गंभीर जखमी झाल्या आहेत. प्रकाश शांताराम कांबळे (वय ४५, रा. दाभोळे बौद्धवाडी, ता. संगमेश्वर) असे मृत रिक्षाचालकाचे नाव आहे.

​मिळालेल्या माहितीनुसार, सोमवारी सायंकाळी ४.१५ वाजण्याच्या सुमारास दाभोळे परिसरातून रत्नागिरीच्या दिशेने रिक्ष (एमएच-०८ एक्यू ८८६६) जात होती. याच वेळी समोरून जाणाऱ्या एका ट्रॅक्टरचे टायर फुटल्याने चालकाने अचानक ब्रेक लावले. मागून भरधाव वेगाने येणारी रिक्षा या ट्रॅक्टरवर थेट जाऊन आदळली. ही धडक इतकी जोरदार होती की, रिक्षेचा चक्काचूर झाला आणि चालक प्रकाश कांबळे यांचा जागीच प्राण गेला.

​या भीषण अपघातात रिक्षेतील दोन महिला प्रवासी देखील गंभीर जखमी झाल्या आहेत. घटनेची माहिती मिळताच त्यांना मोफत रुग्णवाहिका सेवेमार्फत तातडीने पाली येथील ग्रामीण रुग्णालयात उपचारासाठी दाखल करण्यात आले आहे. महामार्गाच्या कामामुळे आणि वाहनांच्या वेगामुळे झालेल्या या अपघातामुळे परिसरात हळहळ व्यक्त केली जात आहे.