मुंबई : महाराष्ट्र राज्य मार्ग परिवहन महामंडळाची (MSRTC) ‘शिवनेरी’ बससेवा लवकरच मुंबई–पुणे मार्गाबाहेर राज्यातील इतर प्रमुख शहरांमध्ये सुरू होणार आहे. राज्याचे परिवहन मंत्री तथा MSRTC चे अध्यक्ष प्रताप सरनाईक यांनी ही घोषणा केली.
२००२ मध्ये सुरू झालेली शिवनेरी सेवा वेळेची काटेकोरता, आरामदायी आसनव्यवस्था आणि सुरक्षित प्रवासासाठी ओळखली जाते. सामान्य बसांच्या तुलनेत भाडे थोडे अधिक असले तरी प्रवाशांचा या सेवेला नेहमीच चांगला प्रतिसाद मिळाला आहे.
२०० नवीन व्होल्वो बसांची भर
राज्यभर विस्तारासाठी MSRTC ने २०० अत्याधुनिक व्होल्वो बस खरेदीची निविदा प्रक्रिया सुरू केली आहे. या बस पुढील प्रमुख मार्गांवर धावणार आहेत:
नाशिक–पुणे
नाशिक–छत्रपती संभाजीनगर
नाशिक–जळगाव–धुळे
पुणे–कोल्हापूर
पुणे–सांगली
पुणे –सोलापूर
नागपूर–चंद्रपूर
नागपूर–अमरावती–अकोला
ई-शिवनेरीला उत्स्फूर्त प्रतिसाद
सध्या दादर–स्वारगेट, दादर–शिवाजीनगर, बोरिवली–स्वारगेट, ठाणे–शिवाजीनगर आदी मार्गांवर ई-शिवनेरी (इलेक्ट्रिक) बस धावत आहेत. पर्यावरणपूरक या बसांना प्रवाशांचा चांगला प्रतिसाद मिळत आहे.
महिलांना व ६५ ते ७५ वयोगटातील ज्येष्ठ नागरिकांना ५० टक्के सवलत दिली जाते, तर ७५ वर्षांवरील नागरिकांना मोफत प्रवासाची सुविधा आहे.
‘स्लीपर शिवनेरी’चीही सुरूवात
नवीन २०० बसांपैकी ३० बस स्लीपर कोच असणार आहेत. या ‘स्लीपर शिवनेरी’ बस काही लांब पल्ल्याच्या मार्गांवरील नॉन-एसी स्लीपर बसांची जागा घेणार आहेत. आधुनिक तंत्रज्ञान, अधिक सुरक्षितता आणि आरामदायी बेड-कोच सुविधेमुळे रात्रीच्या प्रवासासाठी ही सेवा अधिक सोयीस्कर ठरणार आहे.
शिवनेरी सेवेचा हा विस्तार म्हणजे महाराष्ट्रातील सार्वजनिक वाहतुकीच्या नव्या पर्वाची सुरूवात असल्याचे प्रताप सरनाईक यांनी सांगितले.
