नवी दिल्ली: कोकण रेल्वेच्या दुहेरीकरणाचा आणि प्रवाशांच्या सुरक्षिततेचा प्रलंबित मुद्दा आज लोकसभेत गाजला. शिवसेना (शिंदे गट) खासदार रवींद्र वायकर यांनी शून्य प्रहरात हा विषय मांडत रेल्वे मंत्रालयाचे लक्ष वेधले.
कोकण रेल्वे हा देशातील अत्यंत महत्त्वाचा आणि वर्दळीचा मार्ग असूनही तो आजही ‘सिंगल ट्रॅक’वरच (एकेरी मार्ग) मर्यादित आहे. यामुळे पावसाळ्यात दरडी कोसळणे, गाड्यांना होणारा तासनतास विलंब आणि अपघातांचा धोका वाढला असून, प्रवाशांच्या सुरक्षेचा प्रश्न गंभीर झाला असल्याचे वायकर यांनी सभागृहात सांगितले.
खासदार वायकर यांनी माहिती दिली की, २०२३ च्या सर्वेक्षणानुसार कोकण रेल्वेच्या दुहेरीकरणासाठी सुमारे २५,००० कोटी रुपयांचा खर्च अपेक्षित आहे. हा प्रकल्प मार्गी लागण्यास होत असलेल्या विलंबाबाबत त्यांनी रेल्वे मंत्र्यांना जाब विचारला. जोपर्यंत या मार्गाचे पूर्णतः दुहेरीकरण होत नाही, तोपर्यंत प्रवाशांच्या सुरक्षेसाठी ‘कवच’ (Kavach) ही स्वदेशी सुरक्षा प्रणाली तातडीने कार्यान्वित करावी, अशी आग्रही मागणीही त्यांनी केली.
कोकणवासीयांचा प्रवास अधिक वेगवान, सुरक्षित आणि सुखकर होण्यासाठी केंद्र सरकारने या पायाभूत सुविधांकडे प्राधान्याने लक्ष द्यावे, असे आवाहन त्यांनी यावेळी केले.
