Follow us on   

रत्नागिरी: रत्नागिरी रेल्वे स्थानकावर कोकण रेल्वे पोलिसांनी अवैध दारू वाहतुकीविरोधात मोठी कारवाई केली आहे. मडगाव ते मुंबई सीएसएमटी दरम्यान धावणाऱ्या १२०५२ जनशताब्दी एक्सप्रेसची नियमित तपासणी सुरू असताना हा प्रकार उघडकीस आला. या कारवाईमुळे रेल्वेने प्रवास करून छुप्या पद्धतीने दारूची तस्करी करणाऱ्यांचे धाबे दणाणले आहेत.

​रेल्वे सुरक्षा बल (RPF) आणि सी अँड आय स्टाफच्या संयुक्त पथकाने ही मोहीम राबवली. गाडी रत्नागिरी स्थानकावर उभी असताना संशयास्पद हालचाली करणाऱ्या दोन व्यक्तींची झडती घेण्यात आली. त्यांच्याकडे असलेल्या साहित्याची तपासणी केली असता, त्यात एकूण १९१ दारूच्या बाटल्या आढळून आल्या. या सर्व बाटल्या पोलिसांनी तातडीने जप्त केल्या आहेत.

​कोकण रेल्वेच्या अधिकृत माहितीनुसार, गोव्याहून महाराष्ट्राच्या दिशेने येणाऱ्या या मार्गावर सध्या दारूविरोधी कायद्यांची अत्यंत कडक अंमलबजावणी केली जात आहे. या दोन्ही आरोपींना प्रतिबंधित वस्तूंसह प्रवास करताना रंगेहात पकडण्यात आले असून, त्यांच्यावर रेल्वे कायद्यानुसार पुढील कारवाई करण्यात येत आहे.

​प्रशासनाने या निमित्ताने सर्व प्रवाशांना कडक सूचना दिल्या आहेत. प्रवाशांनी प्रवासादरम्यान कोणत्याही प्रकारच्या प्रतिबंधित वस्तूंची ने-आण करू नये, असे आवाहन करण्यात आले आहे. रेल्वेचा प्रवास सुरक्षित, निर्विघ्न आणि सुरळीत पार पडावा यासाठी प्रवाशांनी रेल्वे प्रशासनाला पूर्ण सहकार्य करावे, अशी विनंतीही यावेळी करण्यात आली आहे.

   Follow us on   

​संगमेश्वर:कोकण रेल्वेच्या प्रवाशांसाठी आणि विशेषतः संगमेश्वरवासीयांसाठी अत्यंत आनंदाची बातमी समोर आली आहे. नुकत्याच पार पडलेल्या एका महत्त्वपूर्ण बैठकीत कोकण रेल्वेचे व्यवस्थापकीय संचालक (CMD) श्री. संतोष कुमार झा यांनी संगमेश्वर रेल्वे स्थानकाच्या प्रलंबित मागण्यांबाबत सकारात्मक आश्वासन दिले आहे. पद्मश्री गजानन माने यांच्या पुढाकारातून ही बैठक पार पडली असून, यावेळी संगमेश्वरसाठी ५ महत्त्वाच्या गाड्यांच्या थांब्याचा प्रस्ताव रेल्वे बोर्डाकडे पाठवण्यावर शिक्कामोर्तब करण्यात आले आहे.

​या बैठकीत प्रामुख्याने ९ साप्ताहिक गाड्यांच्या थांब्याची मागणी करण्यात आली होती, ज्यापैकी ५ गाड्यांबाबत लवकरच अनुकूल निर्णय होण्याची शक्यता आहे. तसेच मदार जंक्शन–तिरुवनंतपुरम स्पेशल गाडीला देखील संगमेश्वर येथे थांबा देण्याबाबत प्रशासनाने सकारात्मकता दर्शवली आहे. गाड्यांच्या थांब्यासोबतच प्रवाशांच्या तांत्रिक सोयीसाठी स्थानकावरील फलाट क्रमांक १ व २ वर ‘डिजिटल कोच पोजिशन इंडिकेटर’ बसवण्याची मागणी मान्य करण्यात आली आहे. यामुळे प्रवाशांना आपला डबा नेमका कुठे येईल, याची अचूक माहिती मिळणे सोपे होणार आहे.

​केवळ स्थानकाचा विकासच नव्हे, तर प्रवासातील शिस्त आणि सुरक्षितता वाढवण्यासाठी स्थानकावर दररोज तिकीट तपासनीस (TC) नेमण्याचा निर्णयही या बैठकीत घेण्यात आला. दरम्यान, पद्मश्री गजानन माने यांनी मांडलेल्या कोकण रेल्वेच्या शिल्पकारांच्या नावाचा फलक स्थानकावर लावण्याच्या मागणीला तात्काळ मंजुरी देण्यात आली आहे. याशिवाय मांडवी एक्सप्रेसला दिवा स्थानकावर थांबा देण्याबाबतही चर्चा करण्यात आली. या बैठकीला श्री. गंगाराम टोपरे, श्री. मुकुंद सनगरे आणि ‘निसर्गरम्य चिपळूण व संगमेश्वर’ फेसबुक ग्रुपचे प्रमुख संदेश जिमन यांच्यासह इतर मान्यवर उपस्थित होते. या निर्णयामुळे संगमेश्वर परिसरातील रेल्वे सुविधांचा कायापालट होणार असल्याची भावना व्यक्त होत आहे

   Follow us on   

सावंतवाडी: मुंबई-गोवा महामार्गावरील झारप ते पत्रादेवी बायपासवर असलेल्या मळगाव सुतारवाडी सर्कल येथे आज दुपारी एक भीषण अपघात घडला. गोव्याहून मुंबईच्या दिशेने परतणाऱ्या पर्यटकांची कार एका दुचाकीस्वाराला वाचवण्याच्या प्रयत्नात ररस्त्याकडेला असलेल्या काजू विक्रीच्या स्टॉलमध्ये शिरली. या अपघातात कारमधील तीन युवक किरकोळ जखमी झाले असून, सुदैवाने स्टॉल मालक जेवणासाठी घरी गेले असल्याने मोठा अनर्थ टळला आहे.

​मिळालेल्या माहितीनुसार, मुंबईतील एका खाजगी कंपनीत कामाला असलेले आणि मूळचे उज्जैन (मध्य प्रदेश) येथील चार युवक सुट्टीनिमित्त गोव्याला पर्यटनासाठी आले होते. आपली सहल संपवून ते त्यांच्या होंडा अमेझ कारने (MH 23 BH 8533 A) मुंबईकडे परतत असताना, मळगाव सुतारवाडी सर्कलजवळ एक दुचाकीस्वार अचानक महामार्ग ओलांडू लागला. त्याला वाचवण्यासाठी कार चालकाने तातडीने ब्रेक मारला, ज्यामुळे कारवरील ताबा सुटला. कार प्रथम दुभाजकाला धडकली आणि त्यानंतर विरुद्ध दिशेने फिरून रस्त्याच्या कडेला असलेल्या मंगेस राऊळ यांच्या काजू स्टॉलमध्ये जोरात शिरली.

​ज्यावेळी हा अपघात झाला, त्यावेळी योगायोगाने स्टॉल मालक मंगेस राऊळ जेवण करण्यासाठी घरी गेले होते. ते जेवण करून दुकानाच्या दिशेने येत असतानाच त्यांच्या डोळ्यांदेखत हा थरार घडला. जर ते दुकानात असते, तर मोठी जीवितहानी होण्याची शक्यता होती. मात्र, या धडकेत त्यांच्या दुकानाचे आणि साहित्याचे प्रचंड नुकसान झाले आहे. अपघातातील जखमी युवकांना तातडीने सावंतवाडी येथील खासगी रुग्णालयात उपचारासाठी दाखल करण्यात आले आहे.

​घटनेची माहिती मिळताच परिसरातील ग्रामस्थ आणि सावंतवाडी पोलीस ठाण्याचे हवालदार मनोज राऊत, दीपक शिंदे, वाहतूक पोलीस गुरुनाथ नाईक व त्यांच्या टीमने घटनास्थळी धाव घेत पंचनामा केला. सायंकाळपर्यंत या अपघाताबाबत कोणतीही अधिकृत तक्रार नोंदवण्यात आली नव्हती. महामार्गावरील अशा धोकादायक वळणांवर वाहनचालकांनी सावधगिरी बाळगण्याचे आवाहन प्रशासनाकडून करण्यात येत आहे.

   Follow us on   

सावंतवाडी:सिंधुदुर्ग जिल्ह्यातील ओसरगाव येथील टोलनाक्यावरून प्रवास करणाऱ्या स्थानिक वाहनधारकांसाठी एक मोठी आणि दिलासादायक बातमी समोर आली आहे. ओसरगाव टोलनाक्यावर ‘MH 07’ पासिंग असलेल्या (सिंधुदुर्ग जिल्ह्यातील) गाड्यांना कोणत्याही प्रकारचा टोल आकारला जाणार नाही, अशी महत्त्वाची घोषणा पालकमंत्री नितेश राणे यांनी केली आहे. सावंतवाडी येथे आयोजित एका पत्रकार परिषदेत बोलताना त्यांनी ही माहिती दिली.

​पालकमंत्री नितेश राणे यांनी यावेळी आपल्या जुन्या भूमिकेचा पुनरुच्चार केला. ते म्हणाले की, “मी आमदार असताना ओसरगाव येथील टोल बंद पाडला होता. आता मी जिल्ह्याचा पालकमंत्री आहे, त्यामुळे सिंधुदुर्गवासीयांना कोणत्याही परिस्थितीत टोल भरावा लागणार नाही याची मी दक्षता घेतली आहे. ओसरगाव टोलनाका जरी सुरू झाला, तरी या टोलनाक्यावरून ‘MH 07’ पासिंग असलेल्या एकाही वाहनाला टोल लागू होणार नाही, हा माझा शब्द आहे. त्यामुळे जिल्हावासीयांनी काळजी करण्याची गरज नाही.”

​या पत्रकार परिषदेला आमदार दीपक केसरकर, नगराध्यक्षा श्रद्धा राणे, लखमराजे भोसले, विक्रांत सावंत यांच्यासह भाजपचे अनेक पदाधिकारी आणि जिल्हा व्यापारी महासंघाचे अध्यक्ष उपस्थित होते. व्यापारी महासंघाने स्थानिक वाहनांना टोलमाफी मिळावी, अशी मागणी निवेदनाद्वारे केली होती, ज्यावर पालकमंत्र्यांनी सकारात्मक निर्णय घेतला आहे.

​यासोबतच, पालकमंत्र्यांनी इतर विषयांवरही भाष्य केले. “भाजपचे सरकार सत्तेत असताना हिंदूंना धमकावण्याचे प्रकार खपवून घेतले जाणार नाहीत. सर्वांनी सरकारच्या नियमांचे पालन करावे आणि ज्यांना मराठी येत नाही त्यांनी ती शिकावी, त्यासाठी लागेल ती मदत करू,” असेही त्यांनी ठामपणे सांगितले.

   Follow us on   

सिंधुदुर्ग: सिंधुदुर्ग जिल्ह्याचे पालकमंत्री नितेश राणे यांनी शक्तीपीठ महामार्गाच्या संदर्भात एक महत्त्वाची माहिती दिली आहे. त्यांनी स्पष्ट केले की, या महामार्गाचा जुना आराखडा बदलण्यात आला असून आता हा मार्ग थेट रेडी पोर्टशी (Redi Port) जोडला जाणार आहे. जुन्या आराखड्यामुळे महाराष्ट्रापेक्षा गोव्याला अधिक फायदा होत होता, ही बाब लक्षात घेऊन राज्य सरकारने हा धोरणात्मक निर्णय घेतला आहे.

​नितेश राणे यांनी सांगितले की, नवीन आराखड्यानुसार जिल्ह्याचा विकास डोळ्यासमोर ठेवण्यात आला आहे. यामुळे सिंधुदुर्ग जिल्ह्यातील विविध विकासाची द्वारे उघडली जातील. तसेच, बांदा आणि देगवे सारखी गावे या प्रकल्पामुळे बाधित होणार नाहीत, अशी ग्वाही देखील त्यांनी दिली आहे. “आम्ही मंत्रालयात बसतो, या संदर्भात बैठका घेतल्या आहेत आणि मुख्यमंत्र्यांच्या सूचनेनुसारच हा बदल करण्यात आला आहे,” असे त्यांनी माध्यमांशी बोलताना स्पष्ट केले.

​शेवटी, त्यांनी नागरिकांना आवाहन केले की कोणत्याही अफवांवर विश्वास ठेवू नका. “पालकमंत्री म्हणून मी स्वतः ही माहिती देत आहे, त्यामुळे जनतेने निश्चिंत राहावे,” असे सांगत त्यांनी या प्रकल्पाच्या माध्यमातून जिल्ह्याचा सर्वांगीण विकास साधण्याचा सरकारचा मानस असल्याचे अधोरेखित केले.