सिंधुदुर्ग/गोवा :

पावसाने काहीशी विश्रांती घेताच तळकोकणात आणि गोव्यात जंगलातील वारुळांवर नैसर्गिकरित्या उगवणाऱ्या चवदार ‘अळंब्यांची’ (रानमशरूम) वेध लागतात. या हंगामातील अळंब्यांचे गोव्यातील आणि सिंधुदुर्ग जिल्हय़ातील बाजारपेठेत जोरदार आगमन झाले आहे. मात्र, सुरुवातीच्या काळात या अळंब्यांचे दर गगनाला भिडले असून, अवघ्या १०० अळंब्यांसाठी ग्राहकांना तब्बल १५०० रुपये मोजावे लागत आहेत. ग्रामीण भागातून विक्रीसाठी आणलेली ही अळंबी महाग असली, तरी त्यांच्या खरेदीसाठी खवय्यांची बाजारात मोठी गर्दी पाहायला मिळत आहे.

​साधारणपणे पाऊस पडून गेल्यानंतर वातावरणात निर्माण होणाऱ्या उकाड्यामुळे वारुळांवर ही अळंबी नैसर्गिकरित्या उगवतात. ठराविक आकाराची झाली की स्थानिक लोक ती शोधून बाजारात विक्रीसाठी आणतात. साखळी आणि डिचोली भागात प्रामुख्याने ही अळंबी मोठ्या प्रमाणात मिळतात. पूर्वी ही अळंबी नगाप्रमाणे किंवा विशिष्ट संख्येने विकली जायची, परंतु आता बाजारात त्यांची विक्री ‘वाट्यांच्या’ (हिश्श्यांच्या) स्वरूपात केली जात आहे. एका वाट्यात नेमकी किती अळंबी आहेत याचा अंदाज येत नसला, तरी विक्रेते त्याचे ठरलेले पैसे मात्र एक रुपयाही कमी न करता वसूल करत आहेत.

निसर्गाकडून मिळणाऱ्या या रानमेव्याची चव प्रत्येक गोमंतकीयाला हवीहवीशी वाटते. अत्यंत चवदार असल्यामुळे अळंबी सर्वांचीच आवडती असतात, म्हणूनच महाग असूनही लोक वर्षातून एकदा तरी ती आवर्जून खरेदी करतात. यंदा पावसाने दडी मारल्यामुळे आणि कडक ऊन पडल्यामुळे अळंब्यांचे पीक चांगले आले असले, तरी वाढत्या महागाईमुळे ते सामान्य लोकांच्या बजेटबाहेर गेले आहे. येत्या काही दिवसांत बाजारात अळंब्यांची आवक वाढेल आणि त्यानंतर त्यांचे दर कमी होतील, अशी आशा ग्राहकांकडून व्यक्त केली जात आहे.

   Follow us on   

सिंधुदुर्ग: जिल्ह्यासाठी एक अत्यंत आनंदाची आणि महत्त्वाची बातमी समोर आली आहे. जिल्ह्याचे पालकमंत्री नितेश राणे यांनी सिंधुदुर्गवासियांना १५० कोटी रुपयांच्या गुंतवणुकीची ‘गुड न्यूज’ दिली आहे. मंत्रालयामध्ये ‘जोया मरीन कंपनी’ आणि ‘महाराष्ट्र मेरिटाईम बोर्ड बंदर मंत्रालय’ यांच्यात एक महत्त्वपूर्ण सामंजस्य करार (MoU) स्वाक्षरित करण्यात आला आहे. या करारानुसार, मुख्यमंत्री एकनाथ शिंदे यांच्या ड्रीम प्रोजेक्ट असलेल्या ‘मुंबई वॉटर मेट्रो’साठी लागणाऱ्या ५० आणि १०० पॅसेंजरच्या बोटी या प्रकल्पांतर्गत बनवल्या जाणार आहेत. पहिल्या टप्प्यात अशा जवळपास १०० बोटी बनवण्याचे उद्दिष्ट ठेवण्यात आले आहे.

​हा भव्य बोट निर्मितीचा कारखाना सिंधुदुर्ग जिल्ह्यातील सावंतवाडी येथील तळवणे गावात उभा राहणार आहे. बोट क्राफ्ट, येल्लो फ्लीट यांसारख्या कंपन्यांनी एकत्र येऊन हा प्रकल्प जिल्ह्यात आणला आहे. या प्रकल्पामुळे कोकणातील तरुणांसाठी मोठ्या प्रमाणावर रोजगार निर्मिती होणार आहे. नोकरी-धंद्यासाठी मुंबई किंवा इतर ठिकाणी गेलेल्या कोकणातील तरुणांना पुन्हा आपल्या मातृभूमीत परत आणणे (रिव्हर्स मायग्रेशन), हाच यामागचा मुख्य उद्देश असल्याचे पालकमंत्री नितेश राणे यांनी सांगितले.

​या पर्यावरणपूरक प्रकल्पामुळे स्थानिक अर्थकारणाला मोठी गती मिळणार आहे. या कारखान्यात विविध प्रकारच्या नोकऱ्या आणि कौशल्य विकासाच्या संधी उपलब्ध होणार असल्याने, पालकमंत्र्यांनी स्थानिक तरुण-तरुणींना या क्षेत्रातील आवश्यक कौशल्ये (Skills) आत्मसात करण्याचे आवाहन केले आहे. तसेच, येत्या ५ वर्षांत जहाज बांधणी, मत्स व्यवसाय आणि पर्यटन क्षेत्रात असे अनेक मोठे प्रकल्प सिंधुदुर्गात आणून रोजगार निर्मितीला प्राधान्य दिले जाईल, असा विश्वासही त्यांनी यावेळी व्यक्त केला आहे.

कोकण रेल्वे प्रवासी संघटनेच्या प्रयत्नांना अखेर यश!

   Follow us on   

सिंधुदुर्ग:

कोकणातील रेल्वे कनेक्टिव्हिटी अधिक सक्षम करण्याच्या दृष्टीने एक अत्यंत महत्त्वाचा निर्णय घेण्यात आला आहे. सिंधुदुर्ग जिल्ह्यातील सावंतवाडी रोड रेल्वे स्थानकावर आता ३ प्रमुख एक्स्प्रेस गाड्यांना नवीन थांबा (Stoppage) मंजूर करण्यात आला आहे. केंद्रीय रेल्वे मंत्री अश्विनी वैष्णव यांनी या संदर्भातील मंजुरी दिली असून, महाराष्ट्राचे मुख्यमंत्री देवेंद्र फडणवीस यांनी सोशल मीडियाद्वारे ही माहिती देत केंद्र सरकारचे आभार मानले आहेत.

‘या’ ३ गाड्यांना मिळाला थांबा:

सावंतवाडी रोड स्थानकावर आता खालील गाड्या थांबतील:

१. गाडी संख्या १२१३३/१२१३४: छत्रपती शिवाजी महाराज टर्मिनस (CSMT) – मंगळुरू एक्स्प्रेस

२. गाडी संख्या १२४३१/१२४३२: तिरुवनंतपुरम सेंट्रल – हजरत निजामुद्दीन राजधानी एक्स्प्रेस

३. गाडी संख्या १२२०१/१२२०२: लोकमान्य टिळक टर्मिनस (LTT) – तिरुवनंतपुरम उत्तर (कोचुवेली) गरीब रथ एक्स्प्रेस

देवेंद्र फडणवीस यांच्या पाठपुराव्याला यश

जनसामान्यांच्या सुविधेसाठी सावंतवाडी रोड रेल्वे स्थानकावर विविध गाड्यांना थांबा मिळवा, यासाठी देवेंद्र फडणवीस यांनी २५ मार्च २०२६ रोजी केंद्रीय रेल्वे मंत्र्यांकडे पत्राद्वारे विनंती केली होती. त्यांच्या या मागणीची दखल घेत रेल्वे मंत्रालयाने ७ जुलै २०२६ रोजी अधिकृत पत्र जारी करून या तिन्ही गाड्यांच्या थांब्याला मंजुरी दिली आहे.

संघटनेच्या विविध माध्यमांतील प्रयत्नांना अखेर यश!

सावंतवाडी रोड रेल्वे स्थानकावर प्रवाशांच्या सुविधेसाठी प्रमुख गाड्या थांबवण्यात याव्यात, यासाठी कोकण रेल्वे प्रवासी संघटना (सावंतवाडी) ने विविध माध्यमातून मोठा पाठपुरावा केला होता. संघटनेच्या वतीने वेळोवेळी आंदोलने करण्यात आली, विविध स्तरांवर प्रशासनाचे लक्ष वेधण्यात आले, तसेच स्थानिक लोकप्रतिनिधींना मागण्यांची निवेदनेही देण्यात आली होती. यासोबतच, या मागणीला जनआंदोलनाचे रूप देण्यासाठी समितीने सोशल मीडियाचाही पुरेपूर वापर करून प्रवाशांचा आवाज शासनापर्यंत पोहोचवला. संघटनेच्या याच चौफेर प्रयत्नांची आणि जनभावनेची दखल अखेर प्रशासनाला घ्यावी लागली आहे.

कोकण रेल्वेच्या प्रवाशांच्या हितासाठी मिळालेल्या अभूतपूर्व यशाबद्दल कोकण रेल्वे प्रवासी संघटना, सावंतवाडीच्या वतीने परिसरातील सर्व सन्माननीय खासदार, आमदार आणि पालकमंत्री यांचे जाहीर आभार मानण्यात आले आहेत. लोकप्रतिनिधींच्या खंबीर पाठपुराव्यामुळेच प्रवाशांच्या मागण्यांना यश आले असल्याचे संघटनेने म्हटले आहे.

​या यशाबद्दल खासदार श्री. नारायण राणे साहेब, श्री. श्रीकांत शिंदे, श्री. नरेश म्हस्के, आणि श्रीमती मेधाताई कुलकर्णी, पालकमंत्री श्री. नितेश राणे, आमदार श्री. दीपक केसरकर, आमदार श्री. रवींद्र चव्हाण, आमदार श्रीमती सुलभा गायकवाड ताई, आमदार श्री. कुमार आयलानी, आणि आमदार श्री. बाळा नर आदींचे संघटनेच्या वतीने लोकप्रतिनिधींचे विशेष आभार मानण्यात आले आहेत.

​”आमच्या सर्व लोकप्रतिनिधींनी रेल्वे प्रवाशांच्या प्रश्नांवर नेहमीच सकारात्मक भूमिका घेतली आहे. त्यांच्या एकत्रित प्रयत्नांमुळे आणि सातत्यपूर्ण पाठपुराव्यामुळे हे यश मिळाले आहे. भविष्यातही प्रवासी बांधवांच्या हितासाठी आणि हक्कासाठी आपले असेच मोलाचे सहकार्य व मार्गदर्शन लाभत राहील, हा विश्वास आहे.”

— कोकण रेल्वे प्रवासी संघटना, सावंतवाडी

​या यशस्वी प्रयत्नांमुळे कोकण रेल्वेच्या प्रवाशांमध्ये समाधानाचे वातावरण असून, सर्व स्तरांतून या लोकप्रतिनिधींचे कौतुक होत आहे.

   Follow us on   

आंबोली: निसर्गसौंदर्याने नटलेल्या आंबोली घाटातील सनसेट पॉईंट परिसरामध्ये तीन दिवसांपूर्वी निसर्गाचा कोप पाहायला मिळाला. डोंगरकड्यावरून अचानक एक अजस्र कडा आणि सोबतीला मातीचा ढिगारा थेट मुख्य रस्त्यावर येऊन कोसळला. हा दगड अगदी रस्त्या कडेला असलेल्या चहाच्या टपरीच्या शेजारी पडल्याने सुदैवाने मोठी जीवितहानी टळली. परंतु, या  घटनेला तीन दिवस उलटून गेले, तरीही राष्ट्रीय महामार्ग प्राधिकरण आणि स्थानिक प्रशासनाला ही दरड हटवण्यास वेळ मिळालेला नाही. प्रशासनाला पूर्वकल्पना देऊनही याकडे साफ दुर्लक्ष केले जात असल्याने स्थानिक ग्रामस्थांनी तीव्र संताप व्यक्त केला आहे.

​सध्या हा भलामोठा दगड रस्त्याच्या कडेलाच असल्याने अपघाताचा धोका वाढला आहे. पावसाचा जोर आणि धुक्याचं साम्राज्य यामुळे रात्रीच्या वेळी समोरचा रस्ता स्पष्ट दिसत नाही, अशा वेळी एखादे वाहन या ढिगाऱ्यावर आदळून भीषण अपघात होण्याची दाट शक्यता निर्माण झाली आहे. पावसाळ्यात आंबोली घाटात दरडी कोसळण्याच्या घटना नव्या नाहीत, पण अशा संवेदनशील आणि धोकादायक ब्लॅक स्पॉटची वेळेत दखल न घेण्याच्या प्रशासकीय अनास्थेमुळे पर्यटक आणि वाहनचालकांच्या सुरक्षिततेचा प्रश्न ऐरणीवर आला आहे.

​सध्या पावसाळी पर्यटनाचा आनंद घेण्यासाठी राज्याच्या कानाकोपऱ्यातून हजारो पर्यटक दररोज आंबोलीत हजेरी लावत आहेत. जर मुख्य रस्त्यावरील हा अडथळा तातडीने दूर केला नाही, तर पर्यटकांच्या उत्साहावर विरजण पडू शकते आणि आंबोलीच्या पर्यटन व्यवसायाला मोठा फटका बसू शकतो, अशी भीती व्यक्त केली जात आहे. यामुळे संबंधित विभागाने आता तरी सुस्तपणा झटकून हा रस्ता तातडीने मोकळा करावा आणि संपूर्ण घाटाची पाहणी करून प्रतिबंधात्मक उपाययोजना कराव्यात, अशी आग्रही मागणी आता जोर धरू लागली आहे.

   Follow us on   

​सावंतवाडी:

“बहुजन हिताय, बहुजन सुखाय” हे ब्रीदवाक्य मिरवणाऱ्या महाराष्ट्र राज्य मार्ग परिवहन महामंडळाचा (एसटी) कारभार चौकुळ-कुंभवडे मार्गावर मात्र प्रवाशांसाठी मोठी डोकेदुखी ठरत आहे. या मार्गावर धावणारी एकमेव एसटी बस पूर्णपणे गळकी झाली असून, प्रत्येक पावसाळ्यात प्रवाशांना चक्क बसमध्ये बसूनही छत्र्या उघडाव्या लागत आहेत. या गंभीर समस्येमुळे हैराण झालेल्या उल्हास पनवेलकर, स्वरांगी गावडे, समिक्षा गावडे, कमलेशकुमार गावडे, सुनिता गावडे, कृष्णा गावडे, प्रकाश जाधव, राहुल चव्हाण, ऋतुराज गावडे, सुरेश गावडे आदी नागरिकांनी एसटी महामंडळाच्या विभाग नियंत्रकांकडे लेखी निवेदन देऊन ही बस तातडीने बदलण्याची मागणी केली आहे.

​या मार्गावरील एसटीवर विद्यार्थी, महिला, ज्येष्ठ नागरिक, शेतकरी आणि नोकरदार वर्ग रोजच्या प्रवासासाठी पूर्णपणे अवलंबून आहेत. मात्र, बसच्या छतातून पाणी गळत असल्याने प्रवाशांचे कपडे, विद्यार्थ्यांचे शालेय साहित्य आणि नोकरदारांची महत्त्वाची कागदपत्रे भिजून नुकसान होत आहे. त्यामुळे हा प्रवास अत्यंत त्रासदायक आणि असुरक्षित बनला आहे. प्रवाशांनी लेखी निवेदन देऊनही प्रशासनाने अद्याप कोणतीही ठोस कारवाई केलेली नाही, ज्यामुळे स्थानिक प्रवाशांमध्ये तीव्र संतापाची भावना निर्माण झाली आहे.

​”महामंडळाकडे नवीन बसेस उपलब्ध आहेत, मग चौकुळ-कुंभवडे मार्गावरील प्रवाशांच्या नशिबीच ही गळकी बस का? ग्रामीण भागातील नागरिक एसटी प्रशासनासाठी दुय्यम आहेत का?” असा संतप्त सवाल आता नागरिक विचारत आहेत. महामंडळाने केवळ घोषणाबाजी न करता प्रत्यक्षात सुरक्षित, स्वच्छ आणि सुस्थितीतील बस उपलब्ध करून देणे ही त्यांची जबाबदारी आहे, अन्यथा “बहुजन हिताय, बहुजन सुखाय” हे ब्रीदवाक्य केवळ फलकापुरतेच उरेल, अशी टीकाही केली जात आहे. प्रशासन आता तरी खडबडून जागे होऊन चौकुळ-कुंभवडे मार्गावरील गळकी एसटी तातडीने बदलणार की प्रवाशांच्या सहनशीलतेचा अंत पाहणार, याकडे सर्वांचे लक्ष लागले आहे.