Follow us on   

सावंतवाडी: येथील प्रसिद्ध बालरोग तज्ज्ञ डॉ. अरविंद खानोलकर यांचे वयाच्या ८३ व्या वर्षी निधन झाले आहे. ते गेले चार दिवस सावंतवाडी येथील एका खाजगी रुग्णालयात उपचाराधीन होते, मात्र उपचारादरम्यान त्यांची प्राणज्योत मालवली.

​डॉ. खानोलकर यांनी सावंतवाडीतील गांधी चौक परिसरात आपला दवाखाना चालवत गेली ६० हून अधिक वर्षे या क्षेत्रात वैद्यकीय सेवा दिली होती. त्यांच्या पश्चात दोन मुले आणि एक मुलगी असा परिवार आहे. त्यांच्या निधनामुळे सर्वत्र हळहळ व्यक्त होत असून वैद्यकीय क्षेत्रात मोठी पोकळी निर्माण झाली आहे.

   Follow us on   

पालघर: जिल्ह्यातील निसर्गरम्य दाभोसा धबधबा परिसरात स्वातंत्र्यदिनाचे औचित्य साधून उभारण्यात आलेल्या आकर्षक ग्लास स्कायवॉकचे लोकार्पण करण्यात आले. वनमंत्री तथा पालघर जिल्ह्याचे पालकमंत्री गणेश नाईक यांच्या हस्ते हा सोहळा पार पडला. या नवीन पर्यटन प्रकल्पामुळे दाभोसा येथील पर्यटनाला अधिक वेग येईल आणि देशासह परदेशातील पर्यटकांचा ओघ या भागाकडे वळेल, असा ठाम विश्वास त्यांनी यावेळी व्यक्त केला. या विकासकामामुळे स्थानिकांसाठी रोजगाराचे नवे मार्ग खुले होणार आहेत.

​पालघर जिल्ह्याच्या भौगोलिक आणि नैसर्गिक समृद्धीचा उल्लेख करत पालकमंत्री गणेश नाईक यांनी भविष्यात हा जिल्हा देशाच्या पर्यटन आणि आर्थिक नकाशावर महत्त्वाचे स्थान प्राप्त करेल, असा विश्वास दाखवला. मुंबई, अहमदाबाद, दिल्ली आणि कोलकाता यांसारख्या प्रमुख शहरांशी जिल्ह्याची कनेक्टिव्हिटी वेगाने वाढत आहे. तसेच विमानतळ, बुलेट ट्रेन आणि विविध महामार्गांच्या प्रकल्पामुळे येथील विकासाला मोठी गती मिळणार असून, निसर्गसमृद्ध किनारपट्टी आणि डोंगराळ भागाचा शाश्वत विकास केला जाईल.

​स्थानिक आदिवासी कुटुंबांना पर्यटनाचा थेट आर्थिक लाभ व्हावा, यासाठी ‘होम-स्टे’ ही संकल्पना प्रभावीपणे राबविण्याचे निर्देश प्रशासनाला देण्यात आले आहेत. प्रधानमंत्री आवास योजनेच्या लाभासोबतच अतिरिक्त निवास सुविधा उभारण्यासाठी आर्थिक मदत किंवा कर्जाची व्यवस्था करण्यावर विचार व्हावा, जेणेकरून स्थानिकांचे रोजगारासाठी होणारे स्थलांतर थांबण्यास मदत होईल. तसेच स्कायवॉक परिसरामध्ये सुरक्षिततेच्या दृष्टीने कोणतीही तडजोड न करता सीसीटीव्ही यंत्रणा थेट स्थानिक पोलीस ठाण्याशी जोडण्याच्या सूचनाही त्यांनी दिल्या.

​दाभोसा येथील या स्कायवॉकसोबतच जव्हार तालुक्यातील इतरही पर्यटनस्थळांवर पायाभूत सुविधा विकसित करण्यासाठी एक सर्वसमावेशक एकात्मिक विकास आराखडा तयार करण्याचे निर्देश पालकमंत्र्यांनी दिले आहेत. स्कायवॉक परिसरात पार्किंग, पर्यटक सुविधा आणि इतर सोयी-सुविधांचा विस्तार करण्यावर विशेष भर दिला जाणार आहे. या पर्यटनातून मिळणाऱ्या महसुलातील काही हिस्सा ग्रामपंचायतीला आणि पार्किंग व्यवस्थेचा लाभ स्थानिक संस्थांना मिळवून देण्याची भूमिकाही त्यांनी मांडली.

​या संपूर्ण पर्यटन विकासात महिला बचत गटांना सक्रियपणे जोडून त्यांना रोजगाराच्या संधी उपलब्ध करून देण्याचे आवाहन करण्यात आले आहे. या लोकार्पण सोहळ्यादरम्यान खासदार डॉ. हेमंत सावरा, आमदार राजेंद्र गावित, आमदार हरिश्चंद्र भोये, जिल्हाधिकारी डॉ. इंदू राणी जाखड, मुख्य कार्यकारी अधिकारी मनोज रानडे आणि पोलीस अधीक्षक यतीश देशमुख यांच्यासह अनेक मान्यवर व अधिकारी वर्ग उपस्थित होता.

   Follow us on   

सावंतवाडी: सावंतवाडी तालुक्यातील माडखोल येथे एका महिला वनरक्षकाने गळफास लावून आपली जीवनयात्रा संपवल्याची अत्यंत दुःखद आणि धक्कादायक घटना उघडकीस आली आहे. माडखोल येथील तिच्या राहत्या घरामध्ये तिने हे टोकाचे पाऊल उचलले असून, या दुर्दैवी प्रकारामुळे संपूर्ण परिसरात मोठी हळहळ व्यक्त होत आहे.

​मृत तरुणीचे नाव आश्लेषा सागर मांगले (वय २२, मूळ रा. लाकुडवाडी, आजरा तालुका, जि. कोल्हापूर) असे असून त्या आंबोली विभाग अंतर्गत येणाऱ्या देवसू परिमंडळामध्ये महिला वनरक्षक पदावर कार्यरत होत्या. त्यांचे बीएसपर्यंतचे शिक्षण पूर्ण झाले होते आणि अवघ्या तीन वर्षांपूर्वीच त्यांची वनरक्षक म्हणून शासकीय भरती झाली होती.

​त्या माडखोल – धवडकी येथे पूजा गोवेकर यांच्या घरी भाड्याने वास्तव्य करून राहत होत्या आणि त्यांचे आई-वडील त्यांच्याकडे अधूनमधून येऊन-जाऊन असत. रविवारी सुट्टी असल्यामुळे त्या दिवसभर घरामध्येच थांबल्या होत्या, मात्र उशिरापर्यंत त्या घराबाहेर न आल्याने घरमालक गोवेकर यांना संशय आला आणि त्यांनी दरवाजा ठोठावला.

​खोलीमधून कोणताही प्रतिसाद न मिळाल्याने आणि दरवाजा उघडून पाहिले असता त्यांनी ओढणीने गळफास घेतल्याचे निदर्शनास आले. घटनेची माहिती मिळताच सहाय्यक पोलीस निरीक्षक हर्षद हिंगे, पोलीस उपनिरीक्षक माधुरी मुळीक आणि पोलीस महेश जाधव यांनी तात्काळ घटनास्थळी धाव घेऊन पंचनामा केला, तसेच पुढील कायदेशीर व वैद्यकीय तपासणीसाठी त्यांचा मृतदेह सावंतवाडीच्या उपजिल्हा रुग्णालयात आणण्यात आला.

​घरमालक पूजा गोवेकर यांनी पोलीस ठाण्यात वर्दी दिल्यानंतर पोलिसांनी या प्रकरणी आकस्मिक मृत्यूची नोंद केली आहे. या दुर्दैवी घटनेमागील नेमके कारण अद्याप समोर आले नसून, पोलीस उपनिरीक्षक माधुरी मुळीक या प्रकरणाचा अधिक सखोल तपास करत आहेत.

   Follow us on   

Konkan Railway: प्रवाशांचा अतिरिक्त ओघ आणि आगामी गणेशोत्सव २०२६ च्या पार्श्वभूमीवर, मध्य रेल्वेशी समन्वय साधून कोकण रेल्वेमार्गे विशेष ट्रेन (TOD – Type-TOD) चालवण्याचा निर्णय घेण्यात आला आहे. या विशेष गाड्यांच्या फेऱ्या, वेळा आणि थांब्यांची सविस्तर माहिती खालीलप्रमाणे आहे:

१) ट्रेन क्र. ०११४० / ०११३९ मडगाव जंक्शन – नागपूर – मडगाव जंक्शन विशेष (साप्ताहिक):

• ट्रेन क्र. ०११४० (मडगाव – नागपूर विशेष): ही ट्रेन मडगाव जंक्शन येथून दर मंगळवारी संध्याकाळी १९:०० वाजता सुटेल आणि दुसऱ्या दिवशी रात्री २१:२५ वाजता नागपूर येथे पोहोचेल.
  • सेवा दिनांक (अतिरिक्त गर्दी): १८ ऑगस्ट, २५ ऑगस्ट आणि १ सप्टेंबर २०२६ (एकूण ३ फेऱ्या).
  • सेवा दिनांक (गणपती विशेष): ८ सप्टेंबर, १५ सप्टेंबर आणि २२ सप्टेंबर २०२६ (एकूण ३ फेऱ्या).
• ट्रेन क्र. ०११३९ (नागपूर – मडगाव विशेष): ही ट्रेन नागपूर येथून दर बुधवारी रात्री २३:४५ वाजता सुटेल आणि शुक्रवार भल्या पहाटे ०५:३० वाजता मडगाव जंक्शन येथे पोहोचेल.
  • सेवा दिनांक (अतिरिक्त गर्दी): १९ ऑगस्ट, २६ ऑगस्ट आणि २ सप्टेंबर २०२६ (एकूण ३ फेऱ्या).
  • सेवा दिनांक (गणपती विशेष): ९ सप्टेंबर, १६ सप्टेंबर आणि २३ सप्टेंबर २०२६ (एकूण ३ फेऱ्या).

२) ट्रेन क्र. ०१००४ / ०१००३ मडगाव जंक्शन – लोकमान्य टिळक टर्मिनस (LTT) – मडगाव जंक्शन विशेष (साप्ताहिक):

• ट्रेन क्र. ०१००४ (मडगाव – LTT विशेष): ही ट्रेन मडगाव जंक्शन येथून दर रविवारी दुपारी १६:०० वाजता सुटेल आणि दुसऱ्या दिवशी (सोमवारी) पहाटे ०६:०५ वाजता लोकमान्य टिळक टर्मिनस (LTT) येथे पोहोचेल.
  • सेवा दिनांक (अतिरिक्त गर्दी): २३ ऑगस्ट, ३० ऑगस्ट आणि ६ सप्टेंबर २०२६ (एकूण ३ फेऱ्या).
  • सेवा दिनांक (गणपती विशेष): १३ सप्टेंबर, २० सप्टेंबर आणि २७ सप्टेंबर २०२६ (एकूण ३ फेऱ्या).
• ट्रेन क्र. ०१००३ (LTT – मडगाव विशेष): ही ट्रेन LTT येथून दर सोमवारी सकाळी ०७:५० वाजता सुटेल आणि त्याच दिवशी रात्री २३:४५ वाजता मडगाव जंक्शन येथे पोहोचेल.
  • सेवा दिनांक (अतिरिक्त गर्दी): २४ ऑगस्ट, ३१ ऑगस्ट आणि ७ सप्टेंबर २०२६ (एकूण ३ फेऱ्या).
  • सेवा दिनांक (गणपती विशेष): १४ सप्टेंबर, २१ सप्टेंबर आणि २८ सप्टेंबर २०२६ (एकूण ३ फेऱ्या).

प्रमुख थांबे (Halts):

या दोन्ही विशेष ट्रेनना दोन्ही मार्गांवर करमाळी, थिविम, सावंतवाडी रोड, कुडाळ, कणकवली, वैभववाडी रोड, राजापूर रोड, रत्नागिरी, संगमेश्वर रोड, चिपळूण, खेड, माणगाव आणि रोहा या प्रमुख स्थानकांसमवेत इतर निर्धारित थांब्यांवर दोन्ही दिशांना थांबვ दिला जाईल.

कोचेसची रचना (Composition):

या गाड्यांना सुरळीत प्रवासासाठी एकूण १९ आयसीएफ (ICF) कोचेस जोडण्यात येणार आहेत:

• २ टायर एसी (2 Tier AC): ३ कोचेस (WGACCN)
• ३ टायर एसी (3 Tier AC): ८ कोचेस (WGSCN)
• स्लीपर (Sleeper): ६ कोचेस (GS)
• जनरल (General / Unreserved): –
• एसलआरडी (SLRD): २ कोचेस

प्रवाशांनी या विशेष ट्रेनचा जास्तीत जास्त लाभ घ्यावा, तसेच अधिक माहितीसाठी व प्रवासाच्या आरक्षणासाठी नजीकच्या रेल्वे स्थानकाशी किंवा अधिकृत संकेतस्थळाशी संपर्क साधावा, असे आवाहन रेल्वे प्रशासनाकडून करण्यात आले आहे.

   Follow us on   

सिंधुदुर्ग: मुंबई-गोवा महामार्गावरील ओसरगाव येथील टोल नाका उद्या, १७ ऑगस्ट रोजी सकाळी ८ वाजल्यापासून कार्यान्वित होणार आहे, मात्र सिंधुदुर्ग जिल्ह्यातील स्थानिक वाहनांना टोलमधून पूर्णपणे सूट मिळणार की नाही, याबाबत राष्ट्रीय महामार्ग प्राधिकरणाने अद्याप कोणतीही अधिकृत स्पष्टता दिलेली नाही. यामुळे स्थानिक नागरिकांमध्ये आणि वाहनधारकांमध्ये मोठा संभ्रम निर्माण झाला आहे.

​यापूर्वी सिंधुदुर्ग जिल्ह्याचे पालकमंत्री नितेश राणे यांनी आपल्या वाढदिवसानिमित्त जाहीर केले होते की, स्थानिक वाहनधारकांसाठी टोलमध्ये सवलत दिली जाईल आणि त्यांच्यासाठी वेगळी लेन उपलब्ध करून दिली जाईल. परंतु, प्रशासनाकडून या आश्वासनाबाबत अद्याप कोणतीही कार्यवाही किंवा स्पष्ट आदेश न मिळाल्याने, प्रत्यक्ष टोल वसुली सुरू झाल्यावर स्थानिकांना टोल भरावा लागणार की नाही, हा प्रश्न अनुत्तरितच आहे.

​सिंधुदुर्ग जिल्ह्यातील जानवली ते पत्रादेवी या ६० किलोमीटरच्या पट्ट्यासाठी हा टोल आकारला जाणार असून, याचे कंत्राट ‘स्कायलाईट इन्फ्रा इंजिनिअर्स’ या कंपनीला देण्यात आले आहे. या टोल नाक्याच्या विरोधात टोलविरोधी कृती समितीने आक्रमक पवित्रा घेतला असून, पूर्ण टोल माफीची मागणी लावून धरली आहे. याआधीही तीन वेळा टोल नाका सुरू करण्याचे प्रयत्न झाले होते, मात्र स्थानिकांच्या विरोधाचा फटका बसला होता.

​राष्ट्रीय महामार्ग प्राधिकरणाने दिलेल्या माहितीनुसार, १७ जूनपासून या टोल नाक्यावर वसुली सुरू करण्यात येणार होती, ज्यामध्ये सिंधुदुर्ग पासिंगच्या नोंदणीकृत व्यावसायिक वाहनांना ५० टक्के सवलत देण्याचे नमूद करण्यात आले आहे. याशिवाय, खासगी अव्यावसायिक वाहनांसाठी ३३० रुपयांचा मासिक पास उपलब्ध करून दिला जाणार असल्याचे प्राधिकरणाने अधिसूचनेत स्पष्ट केले आहे.