Konkan Railway: पश्चिम रेल्वेने प्रवाशांची वाढती गर्दी आणि सोय लक्षात घेता कोकण रेल्वे मार्गावरून धावणाऱ्या दोन महत्त्वाच्या एक्सप्रेस गाड्यांमध्ये कायमस्वरूपी जादा डबा (कोच) जोडण्याचा निर्णय घेतला आहे.
या निर्णयानुसार गाडी संख्या १०११६/१०११५ मडगाव जंक्शन – वांद्रे (टर्मिनस) – मडगाव जंक्शन द्विसप्ताहिक एक्सप्रेस आणि गाडी संख्या १०२१५/१०२१६ मडगाव जंक्शन – एर्नाकुलम जंक्शन – मडगाव जंक्शन साप्ताहिक एक्सप्रेसमध्ये आता ‘३ टायर एसी’ (3 Tier AC) चा एक अतिरिक्त डबा वाढवण्यात येणार आहे. यामुळे या गाड्यांची एकूण डब्यांची संख्या आता २० वरून २१ (LHB कोचेस) होणार असून, प्रवाशांना अधिक जागा उपलब्ध होणार आहे.
या सुधारित रचनेनुसार, मडगाव येथून सुटणाऱ्या वांद्रे एक्सप्रेसला (१०११६) २६ मे २०२६ पासून, तर वांद्रे येथून सुटणाऱ्या मडगाव एक्सप्रेसला (१०११५) २७ मे २०२६ पासून हा जादा डबा जोडला जाईल. तसेच, मडगाव-एर्नाकुलम एक्सप्रेसच्या (१०२१५) प्रवासासाठी २४ मे २०२६ पासून आणि एर्नाकुलम-मडगाव एक्सप्रेससाठी (१०२१६) २५ मे २०२६ पासून ही नवीन डब्यांची रचना लागू होईल. नवीन रचनेमध्ये १ डबा २ टायर एसी, ४ डबे ३ टायर एसी, २ डबे ३ टायर इकॉनॉमी, ८ स्लीपर क्लास, ४ जनरल डबे, १ जनरेटर कार आणि १ SLR कोचचा समावेश असेल.
कोकण रेल्वेचे मुख्य जनसंपर्क अधिकारी सुनील बी. नारकर यांनी प्रसिद्धी पत्रकाद्वारे ही माहिती दिली असून, प्रवाशांनी या सुविधेचा लाभ घ्यावा असे आवाहन केले आहे. गाड्यांच्या थांब्यांच्या व वेळेच्या सविस्तर माहितीसाठी प्रवाशांनी रेल्वेच्या अधिकृत संकेतस्थळाला भेट द्यावी.
