मुंबई: मुंबई-पुणे एक्सप्रेसवेवरील प्रवाशांसाठी एक मोठी आनंदाची बातमी समोर येत आहे. अनेक वर्षांपासून प्रलंबित असलेल्या १३.३ किलोमीटर लांबीच्या ‘मिसिंग लिंक’ प्रकल्पाचे काम आता अंतिम टप्प्यात आले असून, सध्या या मार्गावरील पुलांच्या मजबुतीसाठी ‘लोड टेस्टिंग’ची प्रक्रिया सुरू आहे. महाराष्ट्र राज्य रस्ते विकास महामंडळाच्या (MSRDC) देखरेखीखाली सुरू असलेल्या या प्रकल्पाचे ९९ टक्के काम पूर्ण झाले असून, केवळ अंतिम डांबरीकरण आणि सुरक्षा तपासणीचे काम शिल्लक आहे. हे काम ३० एप्रिलपर्यंत पूर्ण करण्याचे उद्दिष्ट ठेवण्यात आले असून, १ मे २०२६ रोजी महाराष्ट्र दिनाचे औचित्य साधून मुख्यमंत्री देवेंद्र फडणवीस यांच्या हस्ते या मार्गाचे लोकार्पण होण्याची दाट शक्यता आहे.
या प्रकल्पामुळे मुंबई आणि पुणे दरम्यानचे अंतर सुमारे ६ किलोमीटरने कमी होणार असून, प्रवाशांचा किमान ३० मिनिटांचा वेळ वाचणार आहे. या मार्गात दोन भव्य केबल-स्टे ब्रिज आणि दोन मोठ्या बोगद्यांचा समावेश आहे. लोणावळ्याजवळील भोर घाटातील वळणदार आणि धोकादायक प्रवासाला हा मार्ग एक सक्षम पर्याय ठरेल. सध्या सुरू असलेल्या लोड टेस्टिंगमध्ये अनेक अवजड ट्रक पुलावरून एकत्रितपणे नेऊन रस्त्याची स्थिरता आणि भार सहन करण्याची क्षमता तपासली जात आहे. तांत्रिक सुरक्षा सुनिश्चित केल्यानंतरच हा मार्ग वाहतुकीसाठी खुला केला जाणार आहे.
प्रशासनाने घेतलेल्या निर्णयानुसार, उद्घाटन झाल्यानंतर सुरुवातीच्या सहा महिन्यांच्या कालावधीत या नवीन मार्गावरून केवळ कार, एसयूव्ही आणि बस यांसारख्या वाहनांनाच प्रवेश दिला जाईल. जड आणि अवजड वाहनांना सुरक्षिततेच्या कारणास्तव जुन्या घाट रस्त्यावरूनच प्रवास करावा लागणार आहे. या प्रकल्पाच्या पूर्णत्वामुळे पावसाळ्यात घाटात होणारी वाहतूक कोंडी आणि दरडी कोसळण्याच्या धोक्यापासून प्रवाशांची कायमची सुटका होईल, असा विश्वास व्यक्त केला जात आहे. मुंबई-पुणे प्रवासाचा हा ‘स्मार्ट बायपास’ राज्याच्या दळणवळण क्षेत्रात मैलाचा दगड ठरणार आहे.
