ठाणे: कोकण आणि रेल्वे प्रवाशांच्या विविध मागण्यांसाठी शनिवार, १ ऑगस्ट २०२६ रोजी सायंकाळी ६ वाजता विविध संघटनांच्या कार्यकर्त्यांनी विधानपरिषद आमदार सौ. माधवी नाईक यांची ठाणे येथील कार्यालयात भेट घेतली. या बैठकीत कोंकण विकास समिती, सिंधुदुर्ग मराठा विकास मंडळ, ठाणे, कोकण रेल्वे प्रवासी संघटना (सावंतवाडी) आणि महाराष्ट्र रेल्वे परिषदेचे पदाधिकारी व कार्यकर्ते प्रामुख्याने उपस्थित होते.
यावेळी, नव्याने मान्यता मिळालेल्या मुंबई छत्रपती शिवाजी महाराज टर्मिनस – सावंतवाडी रोड दैनिक एक्सप्रेसबद्दल आमदार सौ. माधवी नाईक यांच्यासह रेल्वेमंत्री श्री. अश्विनी वैष्णव आणि मुख्यमंत्री श्री. देवेंद्र फडणवीस यांचे आभार मानण्यात आले. तसेच, सावंतवाडी टर्मिनसच्या दुसऱ्या टप्प्यातील काम पूर्ण होण्यासाठी आवश्यक प्रशासकीय मान्यता मिळवून देण्यात सहकार्य करावे, अशी विनंती करण्यात आली. याशिवाय, कोकणातील चाकरमान्यांसाठी व प्रवाशांसाठी अत्यंत जिव्हाळ्याच्या असलेल्या रत्नागिरी-दादर पॅसेंजर ट्रेन पूर्ववत सुरू करण्यासाठी योग्य त्या पातळीवर पाठपुरावा करण्याची मागणीही करण्यात आली.
आमदार सौ. माधवीताई नाईक यांनी कार्यकर्त्यांच्या सर्व समस्या व मागण्या शांतपणे ऐकून घेतल्या आणि यासंदर्भात तातडीने कार्यवाही करण्याचे आश्वासन दिले. या शिष्टमंडळात किशोर सावंत, अक्षय मधुकर महापदी, प्रसन्न प्रकाश कलमस्टे, प्रमोद बागवे, संजय शिंदे, अशोक शिंदे, अमित शेलार, जतिन कोठारे, हेमंत गडकरी, रविंद्र साटम आणि राजेश तावडे आदी मान्यवर व कार्यकर्ते उपस्थित होते.
