Follow us on   

नवी दिल्ली: कोकण रेल्वेच्या दुहेरीकरणाचा आणि प्रवाशांच्या सुरक्षिततेचा प्रलंबित मुद्दा आज लोकसभेत गाजला. शिवसेना (शिंदे गट) खासदार रवींद्र वायकर यांनी शून्य प्रहरात हा विषय मांडत रेल्वे मंत्रालयाचे लक्ष वेधले.

कोकण रेल्वे हा देशातील अत्यंत महत्त्वाचा आणि वर्दळीचा मार्ग असूनही तो आजही ‘सिंगल ट्रॅक’वरच (एकेरी मार्ग) मर्यादित आहे. यामुळे पावसाळ्यात दरडी कोसळणे, गाड्यांना होणारा तासनतास विलंब आणि अपघातांचा धोका वाढला असून, प्रवाशांच्या सुरक्षेचा प्रश्न गंभीर झाला असल्याचे वायकर यांनी सभागृहात सांगितले.

​खासदार वायकर यांनी माहिती दिली की, २०२३ च्या सर्वेक्षणानुसार कोकण रेल्वेच्या दुहेरीकरणासाठी सुमारे २५,००० कोटी रुपयांचा खर्च अपेक्षित आहे. हा प्रकल्प मार्गी लागण्यास होत असलेल्या विलंबाबाबत त्यांनी रेल्वे मंत्र्यांना जाब विचारला. जोपर्यंत या मार्गाचे पूर्णतः दुहेरीकरण होत नाही, तोपर्यंत प्रवाशांच्या सुरक्षेसाठी ‘कवच’ (Kavach) ही स्वदेशी सुरक्षा प्रणाली तातडीने कार्यान्वित करावी, अशी आग्रही मागणीही त्यांनी केली.

कोकणवासीयांचा प्रवास अधिक वेगवान, सुरक्षित आणि सुखकर होण्यासाठी केंद्र सरकारने या पायाभूत सुविधांकडे प्राधान्याने लक्ष द्यावे, असे आवाहन त्यांनी यावेळी केले.

कोकण रेल्वेचे दुहेरीकरण आणि ‘कवच’ प्रणालीसाठी लोकसभेत आवाज – Kokanai https://t.co/6PQ6Xp0sZX​#कोकणरेल्वे #रेल्वेदुहेरीकरण #प्रवासीसुरक्षा ​#KonkanRailway #RailwaySafety #KavachSystem #InfrastructureDevelopment #LokSabha pic.twitter.com/k3W0G4tDFt

— Kokanai Digital News Channel (@kokanai21) March 12, 2026

   Follow us on   

पुणे: महाराष्ट्र राज्य माध्यमिक व उच्च माध्यमिक शिक्षण मंडळाच्या दहावीच्या परीक्षेत एक खळबळजनक प्रकार उघडकीस आला आहे. गणित भाग-१ आणि भाग-२ या दोन्ही विषयांच्या प्रश्नपत्रिका परीक्षेपूर्वीच ‘महाराष्ट्रलीकर्स’ (Maharashtra Leakers) नावाच्या टेलिग्राम चॅनेलवर लीक झाल्याचे समोर आले आहे. धक्कादायक बाब म्हणजे, ५ मार्च रोजी होणारा गणित भाग-२ चा पेपर तब्बल तीन दिवस आधीच या ग्रुपवर उपलब्ध करून देण्यात आला होता.

​या प्रकरणाची माहिती मिळताच बोर्डाच्या अधिकार्यांनी सोशल मीडियावर फिरणाऱ्या या प्रश्नपत्रिकांची अधिकृत प्रश्नपत्रिकांशी पडताळणी केली. तपासाअंती या दोन्ही प्रश्नपत्रिका तंतोतंत जुळत असल्याचे निष्पन्न झाले आहे. परीक्षेच्या गोपनीयतेचा भंग झाल्याने पुणे विभागीय मंडळाने या प्रकरणाची गंभीर दखल घेतली असून, शिवाजीनगर पोलीस ठाण्यात अधिकृत तक्रार दाखल केली आहे.

​या तक्रारीनुसार, संबंधित टेलिग्राम ग्रुपचे ॲडमिन आणि सदस्यांविरुद्ध गुन्हा नोंदवण्यात आला आहे. सायबर तज्ज्ञांच्या मदतीने पोलीस आता या रॅकेटचा मूळ स्रोत शोधण्याचा प्रयत्न करत आहेत. दरम्यान, या पेपर लीकच्या प्रकारामुळे प्रामाणिकपणे अभ्यास करणाऱ्या विद्यार्थी आणि पालकांमध्ये चिंतेचे वातावरण पसरले असून, संबंधित विषयांची परीक्षा पुन्हा घेतली जाणार का? असा प्रश्न उपस्थित केला जात आहे.

   Follow us on   

मुंबई: देशभरात भासणाऱ्या एलपीजी (LPG) सिलिंडरच्या तुटवड्यामुळे आता भारतीय रेल्वे खानपान आणि पर्यटन महामंडळाच्या (IRCTC) कार्यावर विपरीत परिणाम होऊ लागला आहे. या संकटामुळे रेल्वे गाड्यांमधील शिजवलेल्या जेवणाची सेवा तात्पुरती स्थगित करण्याचा आणि ज्या प्रवाशांनी तिकिटासोबत जेवण आरक्षित केले आहे, त्यांना त्यांचे पैसे परत करण्याचा विचार रेल्वे प्रशासन करत आहे. रेल्वे अधिकाऱ्यांनी दिलेल्या माहितीनुसार, या टंचाईचा सर्वाधिक फटका आयआरसीटीसीच्या ‘बेस किचन’ला बसत आहे, जिथे जेवण तयार करून ते पँट्री कारमध्ये चढवले जाते. पँट्री कारमध्ये सिलिंडर नेले जात नसल्याने तिथे फक्त जेवण गरम करणे आणि वितरणाचे काम चालते, मात्र मुख्य स्वयंपाकघरांनाच गॅसचा पुरवठा कमी पडत असल्याने लांब पल्ल्याच्या गाड्यांच्या जेवण पुरवठ्यावर गदा आली आहे.

​देशभरात आयआरसीटीसी दररोज सुमारे १७ लाख जेवणांचे वाटप करते, ज्यापैकी २०% वाटा एकट्या पश्चिम विभागात आहे. त्यामुळे हा तुटवडा कायम राहिल्यास या विभागाला मोठा फटका बसण्याची शक्यता आहे. एका वरिष्ठ रेल्वे अधिकाऱ्याने सांगितले की, परिस्थिती गंभीर असून आगामी काळात ती अधिक बिकट होऊ शकते. एलपीजीचा पुरवठा सुरळीत न झाल्यास गाड्यांमधील खाद्यसेवा विस्कळीत होणे अटळ आहे. या संदर्भात रेल्वे बोर्डाला अवगत करण्यात आले असून, खबरदारीचा उपाय म्हणून काही काळ सेवा बंद ठेवण्याचा प्रस्तावही देण्यात आला आहे. अंतिम निर्णय रेल्वे बोर्ड घेणार असले, तरी सध्याची परिस्थिती पाहता प्रवाशांना मिळणाऱ्या शिजवलेल्या जेवणावर प्रश्नचिन्ह निर्माण झाले आहे.

   Follow us on   

मुंबई: राज्यात जमिनीच्या मोजणीसाठी प्रलंबित असलेल्या हजारो अर्जांचा निपटारा करण्यासाठी महसूल विभागाने एक मोठा निर्णय घेतला आहे. शासकीय भूमापकांची कमतरता लक्षात घेता, नागरिकांना जलद सेवा देण्यासाठी राज्यात २०० खाजगी भूमापकांची नियुक्ती करण्यात आल्याची माहिती महसूल मंत्री चंद्रशेखर बावनकुळे यांनी विधानसभेत दिली. यामुळे आता जमीन मोजणीची प्रक्रिया अधिक वेगवान होणार असून, अर्ज केल्यानंतर एक महिन्यात मोजणी पूर्ण करणे बंधनकारक करण्यात आले आहे.

​राज्यात सध्या मनुष्यबळाच्या अभावामुळे पोट-हिस्सा, हद्दकायम, बिनशेती आणि गुंठेवारी यांसारखी मोजणीची प्रकरणे मोठ्या प्रमाणावर रखडली होती. यावर तोडगा म्हणून शासनाने दोन खाजगी यंत्रणांमार्फत २०० परवानाधारक भूमापकांना कार्यारंभ आदेश दिले आहेत. हे भूमापक दोन आठवड्यांचे विशेष प्रशिक्षण पूर्ण करून ३० मार्चपासून प्रत्यक्ष मोजणीच्या कामाला सुरुवात करतील.

​अल्पभूधारक शेतकऱ्यांच्या शुल्कात कपातीचे संकेत

​जमीन मोजणीसाठी सध्या सरसकट नऊ हजार रुपये शुल्क आकारले जाते. मात्र, हे शुल्क अल्पभूधारक शेतकऱ्यांसाठी परवडणारे नसल्याचा मुद्दा राष्ट्रवादी (शरद पवार गट) पक्षाचे आमदार जयंत पाटील यांनी उपस्थित केला. गरीब शेतकऱ्यांसाठी हे शुल्क कमी करण्यात यावे, अशी सूचना त्यांनी केली. यावर सकारात्मक प्रतिसाद देत, अडीच एकरपेक्षा कमी जमीन असलेल्या अल्पभूधारकांसाठी मोजणी शुल्काबाबत शासन वेगळा प्रस्ताव तयार करत असल्याचे आश्वासन महसूल मंत्र्यांनी दिले.

   Follow us on   

ठाणे: कोकण रेल्वेची शान आणि वेगासाठी ओळखली जाणारी १२०५२ मडगाव-मुंबई जनशताब्दी एक्सप्रेस सोमवारी (९ मार्च) तब्बल अडीच तास उशिराने धावल्यामुळे होळीचा सण साजरा करून परतणाऱ्या प्रवाशांचे प्रचंड हाल झाले. विशेषतः ठाणे स्थानकावर उतरलेल्या अंबरनाथ आणि बदलापूरच्या प्रवाशांना शेवटची लोकल हुकल्यामुळे संपूर्ण रात्र प्लॅटफॉर्मवर काढावी लागली.

​होळीच्या सुट्ट्या संपवून मुंबईत कामावर परतण्यासाठी कोकणातील प्रवाशांनी जनशताब्दी एक्सप्रेसला पसंती दिली होती. मात्र, कोकण रेल्वेच्या विस्कळीत नियोजनामुळे ही गाडी रात्री उशिरा मुंबईत पोहोचली. ठाणे स्थानकावर ही गाडी आली तेव्हा शेवटची लोकल सुटून अवघी १० मिनिटे झाली होती. त्यामुळे अंबरनाथ, बदलापूर आणि कर्जतच्या दिशेला जाणाऱ्या शेकडो प्रवाशांची मोठी कोंडी झाली.

​प्रवाशांचा संताप: “आम्ही करायचे काय?”

​ठाणे स्थानकावर अडकलेल्या प्रवाशांमध्ये लहान मुले आणि ज्येष्ठ नागरिकांचा समावेश होता. या प्रवाशांनी प्रशासनाबाबत तीव्र नाराजी व्यक्त केली:

​ओला/उबेर परवडत नाही: लांबच्या प्रवासासाठी टॅक्सीचे भाडे सर्वसामान्यांच्या आवाक्याबाहेर असल्याने अनेक प्रवाशांनी स्थानकावरच थांबणे पसंत केले. एकटी महिला असल्यास सुरक्षेच्या दृष्टीने या पर्यायाचा विचारच न केलेला बरा.

​अतिरिक्त लोकल का नाही?: “नवीन वर्षाचे स्वागत असो किंवा क्रिकेटचे सामने, रेल्वे प्रशासन रात्री उशिरापर्यंत जादा गाड्या चालवते. मग अशा आपत्कालीन परिस्थितीत, जेव्हा एखादी महत्त्वाची एक्सप्रेस उशिरा येते, तेव्हा माणुसकीच्या नात्याने एखादी जादा लोकल का सोडली जात नाही?” असा संतप्त सवाल प्रवाशांनी उपस्थित केला आहे.

​प्लॅटफॉर्मवरच काढली रात्र

​शेवटची गाडी हुकल्याने प्रवाशांना पहाटेच्या पहिल्या लोकलची (सुमारे ४ तास) वाट पाहत प्लॅटफॉर्मवरच बसून किंवा झोपून राहावे लागले. रेल्वे प्रशासनाच्या या ढिसाळ नियोजनामुळे “वेगाचा दावा करणाऱ्या जनशताब्दीने प्रवाशांचा प्रवास सुखकर करण्याऐवजी कष्टदायकच केला,” अशी भावना व्यक्त होत आहे.

​प्रशासनाला प्रश्न:

सणासुदीच्या काळात गाड्या उशिरा धावणार हे माहित असताना, समन्वय राखून शेवटची लोकल १० मिनिटे थांबवून ठेवता आली नसती का? किंवा प्रवाशांसाठी पर्यायी व्यवस्था का केली गेली नाही?