ठाणे आणि भिवंडी या दोन महत्त्वाच्या शहरांना जोडणाऱ्या बहुप्रतिक्षित मेट्रो ५ मार्गिकेच्या रुळांवर अखेर पहिली गाडी दाखल झाली आहे. नवरात्रीच्या शुभमुहूर्तावर ही मेट्रो गाडी या मार्गावर आणण्यात आली असून, यामुळे या भागातील वाहतूक कोंडीतून नागरिकांची लवकरच सुटका होण्याची शक्यता निर्माण झाली आहे.
मुंबई महानगर प्रदेश विकास प्राधिकरणाने (एमएमआरडीए) ही मेट्रो सेवा लवकरात लवकर सुरू करण्यासाठी जोरदार हालचाली सुरू केल्या आहेत. त्यानुसार चालू महिन्याच्या अखेरीस या मेट्रो गाडीच्या विविध तांत्रिक आणि सुरक्षेशी संबंधित चाचण्यांना प्रत्यक्ष सुरुवात होणार आहे. या सर्व प्राथमिक चाचण्या यशस्वीरीत्या पार पडल्यानंतर अंतिम मंजुरीसाठी सीएमआरएसच्या पथकाला पाचारण केले जाईल आणि आगामी वर्षाच्या सुरुवातीला ही मेट्रो प्रवाशांच्या सेवेत दाखल होईल.
ठाणे ते धामणकर नाका असा ११.९ किलोमीटर लांबीचा हा पहिला टप्पा असून, यावर बाळकुम, कशेळी, काल्हेर, पूर्णा, अंजूरफाटा आणि धामणकर नाका अशी सहा प्रमुख स्थानके उभारण्यात येत आहेत. सुमारे ६,७४१ कोटी रुपये खर्च करून तयार करण्यात येत असलेल्या या प्रकल्पावर सध्या शेवटच्या टप्प्यातील फिनिशिंगची आणि यंत्रणा बसवण्याची कामे वेगाने सुरू आहेत.
या नव्या मार्गिकेसाठी विशेष गाड्यांचे डब्बे येण्यास अजून काही महिन्यांचा कालावधी लागणार आहे. त्यामुळे सुरुवातीच्या काळात प्रकल्प रखडू नये म्हणून गुंदवली ते दहिसर दरम्यान धावणाऱ्या मेट्रो ७ मार्गिकेतील गाड्यांचा वापर या मार्गावर करण्याचा निर्णय प्रशासनाने घेतला आहे. त्यातीलच एक मेट्रो गाडी सध्या या ५ क्रमांकाच्या मार्गिकेवर हस्तांतरित करण्यात आली आहे.
दुसरीकडे, सुमारे ३२ किलोमीटरच्या संपूर्ण मेट्रो ५ प्रकल्पासाठी कशेळी टोल नाक्याजवळ २७ हेक्टर जागेवर कारशेड उभारणीचे काम सुरू आहे. हे काम पूर्ण होण्यासाठी अजून काही वर्षांचा वेळ लागणार असल्याने प्रशासनाने गाड्यांची तपासणी, स्वच्छता आणि देखभालीसाठी तात्पुरत्या स्वरूपात पिट लाईन तयार केली आहे, ज्याद्वारे या मार्गावरील सुरुवातीची वाहतूक सुरळीत चालवली जाईल.
