सिंधुदुर्ग:
पावसाळी अधिवेशनात आमदार निलेश राणे यांनी केलेल्या महत्त्वपूर्ण मागणीची दखल घेत, अखेर सांस्कृतिक मंत्रालयाचे वरिष्ठ अधिकारी आजपासून प्रत्यक्ष कामासाठी सिंधुदुर्ग जिल्ह्यात दाखल झाले आहेत. जिल्ह्यातील पारंपारिक दशावतार कलाकारांची अधिकृत नोंदणी व्हावी आणि त्यांना शासनाच्या विविध योजनांचा थेट लाभ मिळावा, यासाठी ही मोहीम राबवली जात आहे.
आमदार निलेश राणे यांनी सभागृहात आग्रही मागणी केली होती की, कलाकारांना ऑनलाईन नोंदणीमध्ये अडचणी येत असल्याने केवळ कागदी घोडे न नाचवता अधिकाऱ्यांनी स्वतः मैदानात उतरावे. एकही कलाकार लाभापासून वंचित राहू नये म्हणून मंत्रालयातील अधिकाऱ्यांनी थेट जिल्ह्यात येऊन काम करावे, अशी भूमिका त्यांनी मांडली होती. त्यांच्या या मागणीनंतर संबंधित खात्याचे वरिष्ठ अधिकारी आज जिल्ह्यात पोहोचले असून त्यांनी प्रत्यक्ष कामाला सुरुवात केली आहे.
हे अधिकारी पुढील काही दिवस सिंधुदुर्ग जिल्ह्यातच मुक्कामी राहणार आहेत. या कालावधीत ते जिल्ह्यातील प्रत्येक तालुक्याला भेट देतील आणि स्थानिक दशावतार कलाकारांच्या प्रत्यक्ष भेटीगाठी घेऊन त्यांची अधिकृत नोंद गोळा करणार आहेत. दरम्यान, या मोहिमेसाठी सिंधुदुर्गात दाखल झालेल्या सर्व अधिकाऱ्यांचे आमदार निलेश राणे यांनी कुडाळ येथे उत्साहात स्वागत केले. या मोहिमेमुळे दशावतार कलाकारांना मोठा दिलासा मिळण्याची शक्यता वर्तवली जात आहे.
